Mizorama Khualzin Mite Hip Luh Dan Tur




            Ram tinin mahni ramah khualzin mite hip luh teuh a, sum siam nana hman kan tum theuh mai. Chutianga khualzin mite hip nana fakna an tihchhuah pawh kan hmu fo. Arab ram, Mosolman ruhkawl awm khawmna ramahte meuh pawhin khualzin mite hip luh dan an ngaihtuah a. Chuvangin keini pawhin khualzin mite hip luh a, sum tam tak, development sum tipung tham hai luh kan duh a ni. Amarawhchu Mizoramah hian ram dang anga hmun ropui leh mak hmuh tur a awm lo va. Chuvangin thil danga khualzin mite kan hip luh dan tur ngaihtuah a ngai ta a ni. Hetiang hian TV leh chanchinbu-ah inchhuah ta ila, khualzin mite kan hip lût thei phian lo vang maw?


1.         Khawvela kristian ram, ziak leh chhiar thiam tamna ram ni sia zu khap burna dan hmang awm chhun kan nih thu hi khawvel hriatah puang ta chur chur mai ila, khualzin mite kan hip fûin ka ring a ni. Kum zabi 21-na kan chuan chhuah mêk tawh laia ât la so peih hnam dang an vâng tawh si a, keini hi a awm chhun kan ni tawh mai awm e. Chuvangin hei hian khualzin mite a hip nasa thei hle ang. A bikin lehkha thiam, chinchang hriat ve duh hrim hrim emaw, hnam mâwl hmêl hmuh duh hrim hrim emaw pawh an tam mai thei e. Chutianga sakhuana leh motor neih that lama teha rilru zau awm tak si, khawvela zu khap burna dan hmang awm chhun kan nih dan chu thiam tak maiin TV leh chanchinbu-ah han tilang ila, min zir chiang duh ram dang mi an rawn lût sup sup mai tur asin. A nih loh pawhin ram danga zu duh lohovin rawn tlan chhiat nân an hmang ang a, an rawn lût ruih ruih mai ang.

2.         Kan in sak duh dan hi khawvel hmun dangah hmuh tur a tam lo maithei e. Vawikhat chu sâp khualzin pakhat thusawi ka ngaithla a. ‘Ram hrang hrang ka fang hnem tawh hle a, hetianga in sak hi ka la hmu ngai lo,’ tiin Aizawla kan in sak dan hi a sawi chhuak hial. Hei hi tak tak ni hlauh se, chutianga thil vâng tak mai chu khawvela a nei chhun kan nih chuan khualzin kan hip phian tur a nia. Kham awih pang kan ngamzia te, a fing hmasa leh in sakna tur pawisa nei hmasa apiangin fing taka vantlang kawng an nêk thiam dan te, building regulation kan neih that lohzia te leh kan in sak dan mumal lohzia te hi khualzin mite tân chuan hmuhnawm tak tur a ni reng a. Hei hi kan advertise thiam phawt chuan khualzin mite hip tham chu a ni ve reng reng a ni.

3.         Kan lo neih dan danglam tak, ram changkang zâwka hmuh tur awm miah lo hi theh darh ila tourist kan hip lût teuh mai ang. Kan lo hal lâi, a alh sen zuai zuai lai leh van lama a khu chho mup mup lai ngei mai hi a hmuhnawm thei ang ber tur leh mit la thei tur ang berin han tilang ila, hmuh châk tak tak an tam ka ring a ni.

4.         Inkhawm kan taimakzia leh kan inkhawm tamzia hi khawvel hriatah puang chur chur ila, min hmuh duh ve hrim hrim an tamin ka ring bawk. Kan inkhawm program leh inkhawm lâi thlalâkte hi tichhuak ila, chutiang khawpa inkhawm luih luih hman reng mai hnam chu hmuh châka mual mual an awm tur a nia. Japan te, Korea te, China te leh khawthlang ramte chu hna an thawh nasatzia kan chhiar a, an ram hmuh pawh kan châk phah a. Keini erawh chuan mahni hna pawh thawk tha hman lova kan inkhawm nasatzia hi puang ila, sum tam tak kan hai luh phah thei ang. Camping leh revival kan neih tamzia te, piangthar kan tam tawhzia te, pian thar kan awlsam tluk bawka a dâk lehlam kan awlsamzia te hi puang ta ila, khualzin mite kan hip phian law’ maw chu? Revival speaker kan ngah tawhzia te pawh hi thil chhuanawm lam a nih chuan khawvel hriata chhuan tham a ni. Hetiang khawpa a hnam tlêma phu lova revival speaker kan ngah hi a puanzar dan kan thiam phawt chuan rawn chhim duh a mual mualte pawh awm theih a ni a. Sum hnâr tha tak ni dawnin ka hria. Chhandamna camping chhawng sarih zet kan han nei fo thei maite pawh hi khualzin mite hip nân a lo tha phian thei asin.

5.      Kan khawpui ber Aizawl dai vel kawng chhiatzia leh thingtlang khaw kar kawng zawh hrehawm thinziate hi a adventure zawnga lâk chuan tlawh châkawm deuh tur an ni.  Chuvangin kan kalkawng chhe deuh deuhte hi an thla lain theh darh chiam ila. Khualzin mite kan hip phah phian ang em? Hetiang ang kawng chhe deuh maia motor chuang ngai lo, han chuan chhin ve châk ve hrim hrimte pawh an lo tam phian thei a. Tihchi deuh tur asin. A nih loh pawhin Aizawl hi khawvel khawpuia traffic jam nasat berna khua ang te pawhin kan sawi thei ang chu. Chutianga khêl lova traffic jam mup mup reng ni tin mai chu a hmuhnawm tur zawngin lantir thiam ila, malsawmna-ah kan chantir mial thei a ni. A bikin sâphote chu thildangdai hmuh duh hrim hrim an ni a, an rawn kal huai huai mai tur a nia.

6.      Khawvela cancer vei tamna ber kan nih thu hi a zau thei ang berin puang bawk ila. Khualzin mite kan hip phian tur asin. Heti taka cancer vei kan tamna chhan niawma mi thiamte thusawi zûk leh hmuam kan uar lutuk pawh hi hmuhnawm tham a ni dawn a. Khualzin mite hip nan a tha phian ang. Khaw lâia kan meizu tual tual lai te, kan kuhva ei sen sung te, kan chhak sen zuai zuai lai te, bang fai laia chinai kan tah kai lei luai te hi a hmuhnawm thei tur zawngin târ chhuak ila, hmuhnawm tia mual mual zawng an awm chêk ang. Min rawn zir chiang duh hrim hrimte pawh an rawn inzui lût duah duah lo vang tih tu nge sawi thei? Kan intâr chhuah thiam dan azir a ni.

         Tin, hetianga kan chanchin kan puan darh rual hian kan rama rawn kal turte chu thawhlawm tam tâwk tak rawn inring sa turin hrilh ni sela. Chutilo chu mi fel awm tak taka lang pâwl eng engemaw ni hruaitute khan donation an lo dil leh huai huai emaw a ni ang a, an hrilhai lutuk loh nân kan advertisement chhuahah chuan tihlan nghal tur a ni.

          Hetianga kan tih ngat chuan hnam dangin Mizoram hi rawn hmuh an châk ang a, tourism lamah nasa takin hma kan sâwn ang. Amarawhchu Mizote hi engemaw hleka boral dawna inhre thuai mai kan ni a. Foreigner za rual chu rawn tleh lût ta se zirlai pâwl emaw, eng tlâwmngai pâwl invuah emawte khân boral dâwna inhriain foreigner hlauh min zirtir leh si ang a, a nih loh pawhin kan nula pahnih khat khan lo be tha deuh se kan thik ang a, hnam boral tur ni khân kan inhre tlat ang a, kan zo lovang tih chu ka hlau ang reng.☺☺


Comments

Post a Comment

Popular posts from this blog

KA LO TAWN VE - REMRUATI

Image
Kum 1997 November thla chawhma lam a ni a. Chutih laia ka awmna khua chu   kan   khua Thingsulthliah aṭanga kilometer za chuang zeta hla, khaw te reuh te, in za leh sawmriat vel khua a ni. BA pass hlim, tlangval zuan zang tak leh harh vang tak ka ni a, ka awmna khaw tharah chuan Upa Pawl in luahin ka khawsa ve nawk nawk a. Ka kal ngai lohna khua a nih bâkah chhungte han sawi tur pakhatmah kan neih lohna khua a ni a, chuvangin ka awm tirh phei chuan tualchhung mite zingah hriat ka nei lo. Khaw te reuh te a nih avangin a khuaa mite chuan min hre kim thuaiin ka ring a. Middle School awm chhuna thawk thar ka nih avangin mi hriat ka hlawh ve turah pawh ka inngai a ni.   Chu  chu keima fel vang leh vengvat vang ni lovin sikul naupangten an nu leh pate hnena zirtirtu thar an neih thu an sawi ngei dawna ka rin vang a ni zawk mah. Sawrkar hna thawk hlim ka ni a, hlawh pawh ka la nei ve lo. Ka nu leh pate pawisa min paitir hmangin ka khawsa ve mai mai a ni. Tin, lehkha zir zawm le
Read more

TUNLAI KHAWVEL HMASAWNNA LEH KRISTIAN THALAITE.

Image
                                                                        Introduction.             Kum 1991 July thla-a Economic Policy thar a hman atang khan India ram hian khawvel ram dangte awh thamin hma a sawn a. Chu chuan khawsak a tiawlsam ringawt  lo va, hmasawnna a kal chak a ni satliah lo; hnam nunphung leh khawsak dan a sawi nghing a, thalai nun a nghawng em em mai a ni. He Economic Policy thar avanga kan hmasawnna hian culture thar min pe a, chu chu a thenin an chhiat pui laiin khawvel thila changkan pui fê fê pawh an tam hle. Adventist thalaite hian khawi lam kawng nge kan zawh ve dawn tih hi ngaihtuah tlan a tul khawp mai. Tunlai Kan Dinhmun             Mizoram pum huapin han sawi ta ila. Kan khawtlang nun hrim hrimah hian kan lungawi em? Mizote hi khawvela inkhawm tam ber, Pathian fak nasa ber, kohhran program ngah ber kan ni mai thei. Heti chung hian sawrkar hnathawk leh politician zingah corruption a hluar em em a, sumdawng lian leh tê, bazar
Read more

A LOVE STORY

Ka Thil Tawn New Delhi a\angin kan awmna khua, India chhim lama khawpui pangngai ve tak chu rêlin ka kal a. Ka chuanna pindanah chuan Mizo hmeichhe pahnih hi an chuang ve a. Kan \hutna chu a inhlat lo naa kan inbe pawh mai lo. Zing lama chhuak kan ni a. Chawhnu lamah kan inbe pawp chauh a ni. Kan awmna khua-ah chuan ka pain hna a thawh avangin kan awm a. Kan awmna pawh a la rei lutuk lo. Ka pa chu sipai officer pension a ni a. Ka nu erawhchu defence account lamah a thawk a, a la pension lo deuh; a senior pawl a nih avangin a lal tawh hle. Ka pa quarters-ah kan la awm a. Mahse ka nu chu defence account lam mi a nih avangin Pune lamah kan insawn thuai a rinawm. Unau pathum zinga a upa ber ka ni a. Ka naute chu lehkha zirin hmun dangah an awm a. Kei erawh chuan lehkha zir zovin hna ka zawng mek a. Hmuh thuai pawh ka inbeisei. Ka zinpui zinga a upa zawk Pi Dingpuii chu vai pasal nei, a pasal awmnaa kal tur a ni a. A naupang zawk Mahriati chu kan awmna khawpuia kal tur a ni. Chanc
Read more