Mizo Mipa Rilru leh Hmeichhe Incheina

Tunlai chu hnam incheinain mi rilru a luah thar hle a ni ang, kan sawi sup sup mai. Veng thenkhat phei chuan puan bih ni an siam a, an au dum dum niawm tak a ni.

Incheina chungchanga Mizo mipa rilru hi hriat thiam harsa ka ti fo. Hmeichhe chungah kan thikthu a chhe hle bawk. Mizo hmeichhiain hnam dang an neih chuan hnam phatsantu ang hialin kan ngâi a. Kan hnamin boral phah mai dawnte hian kan sawi lek lek thin. Mahse kei chu Mizo hmeichheho hmêl put dan tlangpui ka en hian hnam boralna khawp hnam dang tlangval neih tur an hmuh chur chur hi ka ring ngai lo. Hmeichhe chunga kan thikthu a chhiat tehlul nen hian mipain sâp nula emaw an neih chuan luck kan ti zâwk hialin a lang si.

Incheina chungchangah pawh hian hei tho hi kan rilru a ni. Hmeichhiain hnam dang incheina an lâk chuan hnam pawisawi ta bik hliah hliahah kan ngâi a, kan mit an timim hma em em mai a ni. Mipate chu engtin pawhin inchei ila hnam pawisawi zo ve lohah kan inngai tlat thin. Vairama lehkha ka zir ve laiin Mizo mipaho thikthu a chhe thin hle. Kan nulaten sari an han kaih ve chuan an meng rum thei khawp mai. Mahse chung hmeichhe sari han kaih ve zawkho chu ‘kaih reng rawh u’ pawh ti ila an peih rei chuang lo vang, a duh pawh an duh lo.

Burma ramah vawithum lai ka han kal ve a. Burma mipaho chuan an kâwl pawnfen chu an zahpui miah lo. Mizo mipaho anga mahni tih peih miah loh titurin an hmeichhiate an tawng an tawng ve lo a ni ang. An hnam inchei dan kâwl pawnfen kan tih chu an fêng a, an zak reng reng lo.

Vairamah khuan ka kal ve fo ṭhin. Vai mipa tam zâwk khuan an hnam inchei dan an zahpui lo va. Mipa changkang awm tak tak zingah pawh hrenpereng kaih an la tam em em mai a ni. Mizo mipate angin an tih peih miah loh an hnam inchei dana inchei turin an hmeichhiate an tur an tur vein ka ring lo va. An tih peih miah loh hnam incheina ni chu an hmeichhiate tân an tukluih ve kherin ka ring lo bawk. MA ka zirna university-a kan professor pa changkang tak takte pawhin hrenpereng kaih an zak miah lo va. Ka kal lohna college/university-a zirtirtute pawhin hrenpereng kaih an zak bik lo tih ka mit ngeiin ka hmu. Vaipaho chuan an hnam incheina an zahpui lo va, an inbel reng zawk a. An tih peih miah loh kha an hmeichhiate chungah an barh luih lo; anmahniin hmeichhiate entawn turin zak miah lovin an hnam inchei dan chu an chhawm nung reng zâwk a ni.

Vawikhat chu Guwahati rêl station waiting room-a kan awm lâiin Arunachal paho an rawn thleng ve a. Mizo mipaho tihngam miah loh an hnam incheia incheiin an vei teuh teuh mai a. A hmuhnawm ang reng khawp mai. Kum sawmhnih zet a liam tawh a, la tingam zel tak maw ka hre zui lo.

Prime Minister  hlui Chandra Sekhar-a kha khawthlang lam inchei anga inchei ngai meuh lo a ni a. Hnam dang mikhual ropui tak takte pawh kha hrenpereng ang chi fêng khan a lo hmuak a, an hnam inchei dan chu a zahpui reng reng lo zu nia. India president hlui boral ta Sharma pawh kha vawikhat chu president a nih lâi khan Brazil a zu tlawh a. Chakaikhawrhkawr a ha a, puan kha fual tak, buk takin a veng bawk a. Lukhum vâr te reuh tê a khum a. Pheikhawk ke-artui hniam, a chhip zum er van chi kha a bun bawk a. Keini Mizo paho hmuhah chuan ṭhing ṭiah ṭiah tak a ni. Mahse a ni chuan an hnampui hmeichheho nawr nawr lovin a hnam inchei dan chu khawvel a fan pui ngam si a ni. Tuna central minister-ho chetla pawh hi han en ila an hnam incheina chu an zahpui lo hle tih a lang. Mizo mipa zingah tunge kan hnam inchei dana khawvel fang ngam ve le?

Foreign ram ka kal hla ve lo va, sawi tur pawh ka hre tlêm khawp mai. TV lama a lan danin Afghanistan mipaho pawhin an hnam incheidan chu an la chhawm nung ṭha hle niin a lang. Taliban-ho thlalâk kan hmuh phâkte chu hmuihmul buk tak tak, hrenpereng kaih a, chakai khawrhkawr niawm tak ha an ni fur mai. Chanchinbu leh TV-a Afghanistan mipaho thlalak ka hmuh phâk tam zâwk chu an hnam incheia an inchei lâi hlir a ni.

Fiji mipaho pawhin pawnfen fen chu an hnam inchei dan a ni a, an zahpui lo khawp mai. Kum 2000 May 19-a George Speight-an an sawrkar a tihbuai tum pawh khan pawnfen an fêng fur mai tih TV atangin ka lo hmu a. Chutihlaia ka lo inzawhna chu ‘Engati nge Mizo mipate hian puan hi kan ven ngam tâk miah lo le?’ tih hi a ni.

Arab paho pawh khuan an hnam inchei dan chu an la chhawm nung ṭha ngawt nia. TV han en ila kawrfual vâr ha kan hmu noh noh mai. Engtin nge khung paho khuan an hmeichhiate chungah an thikthu an len ve ka zu hre hauh lo va. Anni chuan thikthu lo tina deuh pawh nise a awm viauin ka hria.

Tunlai khawvel hi a zim tawh a. Khawchhak tâwp Japan atanga khawthlang tâwp America thlengin kan inang deuh ta pût mai. Mizo hmeichhiaten kekawr an hâk hian tu hnam incheina ber nge an entawn ka hre thiam ta lo. Kekawr hâk hi khawvel incheina a ni ta ber a. Tu hnam ta bik mah a ni tawh lo ve. Kei chu hmeichhiain puan an bih emaw, kekawr an ha emaw, ka pawi an sawi lo ve ve. Nula nalh tak maiin puan an han bih fual hnak mai hi chuan mâwi riau hian ka hre thin. Mahse nula pian nalh bik lo takin an bih hnawk ve satliah ringawt hi nalh ka tichuang der lo bawk.

            Engpawhnise hetia hnam incheina hi kan chawi sâng dawn a nih rau rau chuan hmeichhe chunga kan thikthu chhiat zahve tal hian mipa pawh hi inenlêt ve thei ila a ṭha awm mang e. Hnam dang paho chuan an nulate nawr nawr bik lovin an hnam incheina an inbel zak lo asin.◊