Sponsorship

Hmeithâi pakhat a awm; an in chu khaw hmâwr kawng thlang lama awm a ni a, Liandova te hun lâi ni se, ‘hmeithâi in mai mai,’ tia feh kal velin an vawm nawmnah fo tur a ni. An sekawtrawlh hmuh ringawt pawhin phâia fate lehkha zirtir thei rual ani lo tih chu pâwl thum pass lo tân pawh hairual a ni lo. Chu nu chuan fapa pahnih a nei; a fate zingah dan pangngaia sikul kal thei an awm lo va, an hmabâk chu lo neia eizawn a ni. Hei hi an sual vang a ni lo, an chunga khuarel a ni mai.

Vanneih thlâk takin a fapa naupang zâwk chuan eng tin tin emawni open school-ah te inhlawh chawp titiha pawl sawm a pass hnu-ah sponsorship hmuin MA a pass ta mai. Hei hi phuahchawp ni lovin tak tak a ni. Hetiang mi rethei, vanduai vang leh dinhmun phêt laklawh tawh avanga lehkha zir thei lo turin tute emaw thawhchhuahsa ringa lehkha an zir chhuak thei hi an lawmpui awm a, sawisel ngawt chi a ni lo; kan lawmpuizia entir nân kut i bêng ang u.

Midang pakhat a awm a; an awmna vêng leh a nihna aṭangin mi thawhchhuah sa tel lo pawha duh duhna hmuna fate lehkha zirtir thei a ni tih a lang. A fate zinga pakhat phei chu fawren ramah thau lutuk hlauhawm khawpa ei hmuin a thu mawm hmak mai. A fapa college kal mêk chu a duh duh a leisak a, incheina pawh mi naran âi chuan nei tak a ni. Keini sponsor zawn ngâi inti lovin kan neih phâk loh computer, bike leh incheina ṭha chi tinreng a nei. Chuti khawpa nuam tawl thei chuan zak miah lovin anmahni châwmtu tur sâp an zawng a, an hmu a, an la insawi thei zui.

Kan kohhran mite zinga sponsor awmzia nia lang chu zak miah lova mi thawhchhuahsa hmanga inchawm hi a ni ber mai. Vangvatin mi thisen a dâwt nen hian a danglam vak lo. Amarawhchu ka sawi tawh ang khan mi harsa, sponsor zawng awm ngawih ngawih hi chu an awm; chung mite chu kan sawisel lo va, kan itsik lo va, kan lawmpui zâwk tur pawh a ni. Mahse heng mite pawh hian insawitheih nân hmang lo sela, miin hah taka an thawhchhuah kha a thlawnin an dawng tih inhriain zak thiam sela. A thlawna pawisa dawn te, ṭanpuina dawn te hi kawtthlera kutdawh nen a danglam lo tih hriat tur a ni. Tin, mahni inchawm thei rengin necktie leh kawrchung nena sponsor kan zawngte a nih phei chuan a zahthlâk ngawih ngawih a ni law’m ni? Sponsor nei ṭha inti a, mi thawhchhuah pawisa hmanga lo inchei ve zuar te pawh hi kei chu ka hmu nikhua mang lo fo mai zu nia!     

Seventh-day Adventist mite zinga sponsor a lar lutuk leh kan zawng huai huai ṭhin hi zahthlâka lâk a hun tawh a ni. Mi harsa bikin an zawng chu dem rual a ni lo- lo zawng zel rawh se. Amarawhchu mi nâwlpui, mahni inchawm thei ṭâwk ṭâwk chuan a thlawna mi pawisa dawn tumin sâpho hnenah kut i dawh dûk dûk fo tawh lo vang u. Kan vela hnam tênâu Tuikuk, Chakma etc., te sponsor a, mite ṭanpuitu nive thei tura rilru insiam a hun tawh zâwk a ni. Vangvat ang maia mi thawhchhuahsa rin tum lovin mi ṭanpuitu nih tum a hun ve ta e. Hei hi rinna lama kan puitlinna tur, kan hmabâk chu a ni. 

             India rama ziaktu lar Khuswant Singh-a khu vawikhat chu a fapain a ṭhiante birthday-a tel a tum thu a hrilh a. Ani chuan, “Kal lo mai rawh. I rulh lêt leh theih loh tur mi hnen aṭangin thilpêk engmah dawng suh,” a ti a. Hemi ṭuma a thusawi hi ropui hlein ka hria. A fapa kha a ṭhiante birthday lawmna-ah kal lo se a tih tak tak vang lam ni lovin, mi lak aṭangin engmah beisei lo sela, intodelh se, mi ṭanpuina dawngtu ni lova, mite ṭanpuitu nih tum zâwk se a tihna lam zâwk a ni.

A hrim hrimin Mizote hian kutdawh rilru kan pu nasa khawp mai. Tuikuk aia sâp hmelhriat kan châkna chhan leh kawng sira kutdawhho rilru hi a danglam vak awm lo ve. Milian hmêlhriat kan châkna chhan te, politician kan zuina chhan te hi a kutdawh rilru duh khawp mai. Hei hi kan inrin tâwk loh vang (self confidence tlâkchham vang) a ni thei.

Engpawhnise Bible-in lâk aiin pêkin lukhawng a nei a ti a. Mi khawngaihna dawngtu nih a, chu chu insawi theih nân leh intihtheih nâna hmang tawh lovin mite ṭanpuitu nih ve tawh zâwk hi tum ila, kan puitling zâwk ang. 

Vawikhat chu Mizo nu pakhat hian ‘Phâiah ka fate dah ka duh ve si a,’ tih lam hawi zawngin sâp rama awm pa pakhat chu ṭanpuina a dil chiam mai a. A han insawi khawngaih thlâk tak tak chu a mittui  rawn tla ta hial a. Mahse chu nu mittui tla chu mittui tla ka hmuh tawh zawng zawnga ka rilru la hneh lo bertu a ni awm e ka ti. Khawsak harsa em em pawh ni lovin mi khawngaihna dil leh chiam mai chu Pathian pawh a zah lo emaw ni! A neih ang ang khân an kal phâkna sikulah a fate chu kaltir mai se a zahawm zâwkin ka ring; mi thawhchhuahsa ringa fate college ṭha ṭhaa kaltir tum ve ngawt chu dikin ka hre lo. Amarawhchu ka sawi tawh ang khan mi harsate tâna kohhran, sawrkar leh university ṭhenkhatin scholarship an pêk ang chite chu dil se, dil tura siam a nih miau avangin a ṭha em em. Ka han sawi duh tak zâwka chu a engamah hmâa mahni phâk bâka khawsak tum a, thawhlawm khawn a, tlin lo chung chunga fate phâia dah ve ṭalh tum chu dik ka ti lo a ni.     

Sponsor (ṭanpuitu) zawng hmu thei nih tum lovin sponsor tur (ṭanpui tur) zawng hmu thei nih i tum tawh zâwk ang u.

Mahni inchawm thei rengin (mi harsa, mahni inchawm thei lote kan sawi tel lo a nia) sponsor zawn hi rûkrûk nen a danglam ka ring lo.r◊◊

A Kar Awl Hnawh Khahna Mai Mai

Ka nu kha nu induh ve tak leh intodelh tum tlat mi a ni a. Amaherawhchu kan chhungkaw tlin tawk leh theih tawk te a hria a. Chuvangin sponsorship kan tih, mi thawhchhuah hmanga inchawm hi a do bur lo tih ka hre chiang hle. 

Amaherawhchu mahni inchawm thei ve tawk tawk kan nih a, kan thawh ve theih hram hram chuan midang ban a, mi thawhchhuah sa rin chu a duh lo khawp thung mai.

Kum 1993-a lehkha zir zawm ka tum khan a huphurh hle mai a. Kal lo mai turte pawhin min han thlem deuh at at a. Mahse kal ngei se min duh ve tho bawk si. Chutih lai chuan kan kohhran college-a kalten sponsorship an hmuh a, lehkha an zir theih thu leh an kalna college-a kal a, chutiang chu zawn ve mai a that thu ka sawi a. Ani ngaihdan erawh chu a ti ta hauh lo mai. A han ngaihtuah vang vang khan a fapa duat lai midang daihin an han chawm tur leh midang thawhchhuaha ka han awm tur kha a ngaingam ta lo va. A phal ta ikhaw lo mai. “Ka fapa i ni a, nangmah chawmlen che leh enkawl seilen che hi ka mawhphurhna a ni. Tuman an chawm lo vang che. A dama ka dam a, ka thawh theih tek tek chhung chu midang chawm atan che chuan ka phal lo che a ni. Sapin emaw, vaiin emaw an chawm lo vang che. Keimah ngeiin ka chawm ang che,” a ti a. Ka zir chhuah hnu hian ka nu leh pate chawm ngei maia ei ka hmu hi ka lawm thar ta em em mai a. Ka nu kha ka ngaihsan phah sawt a, ka zirna te hi hlu ta sawt hian ka hre thin.Δ