Ni A Thim Kan Ti….

Isua lo kal lehna chhinchhiahna pakhat nia kan sawi Matthaia 24:29-a “Ni tihthima” a awm tur thu hi kan sawi zing thei hle a. Khang lai kha chuan Ni (Sun) alh hluah hluah lâi khi tâwp hmak a, khawvel pum pui hi thim mup a, nilênga thim ta bur turah ka lo ngâi pek a. Mahse ka lo upa ve deuh deuh a, lehkha ka chhiar tam ve hret hret a, khawvel history bu danga ni thim thu lang ve ngai reng reng lo te, Ni (Sun) chanchin zirna lam aṭanga a thim thu sawi awm ngai miah lo leh Seventh-day lo midang tumahin an sawi ve lo hi mak ka ti a. Tichuan ngai teh, hetiang hi a lo ni zâwk e.

Pictorial Aid For Bible Study tih bu, Go Five Million Edition, 1987, hi Frank Breden-a ziah a ni a. A tira chhuah hmasatu chu Signs Publishing Company, Australia a ni a, ka copy neih ve hi chu Sabbath School & Personal Ministries Director, North East India Union of SDA-in a chhuah chhawn a ni (Mizo ṭawngin kan letling tawh nghe nghe).  He lehkhabu phêk 122-naah chuan ka naupan lâia khawvel pum a thim emaw ka lo tih ṭhin kha North America rama thleng niin a sawi ta chauh mai a. A sâp ṭawng chuan “The darkness extended over a large portion of North America….” tih a ni. Hei bâkah he mite chhuah tho Thupuan zirna bu, Prophecy Seminars-ah (1^st Edition, 2009) chuan chiang zâwkin Pictorial Aid-in North America ti ringawta a sawi chu New England a rawn ti ta a (a sâp ṭawng bua phêk 242). Hei hi chu a chiang lehzual.

Adventist kohhranin Mizo tawnga kan lehkhabu neih hmasak pawl Thudik Panna Kawngpui, Arthur E.Lickey ziakah pawh chiang takin hemi tuma ni thim hian New England chauh a huam tih a inziak: “…ni thim ni hi May ni 19, 1780-a New England ram zawng zawng huapa thimna mak tak a awm vanga tih a ni – he thil mak thlentirtu hi hriat a ni lo.” (phek 169, para 4-na. Third Edition, 1994) tiin Noah Webster Dictionary ami chu a rawn la chhuak ve mai. New England a tichiang viau a ni. Arthur E.Lickey hian fing takin hemi nia a thimna chhan hi a rin dan pawh a sawi duh miah lo. “He thimna lo thleng hi khawvel awmphung atanga lo chhuak nge, chumi piah lama mi tih chu sawifiah helaiah hian ka tum a ni lo ve…. khawvel awmphung atanga lo chhuak a ni thei, chumi piah lam atanga lo chhuak a ni thei, a pahnih hnih pawhin a ni thei,” a tih zawhah “Chhandamtu chhinchhiahna lo sawi lawk chu, a lo thleng chiah ni zawngin a lang,” a ti duh lek a ni.

Heng thute hi tunhma lama ka lo hriat ve dan nen a inan loh avangin tû hriat dan nge dik zawk chhui a ngai ta. A ziaktu pa lah hi keini aia thiam zâwk, hre ril zâwk leh chhiar zâu zawk a nih hmel si a. Kan lo hre dik lo zâwk emaw ni teh reng ni. Rilrua tum nei sa miah lo leh kan rin dan hmasa a lo dik loh pawha inhlan ngamna rilru nen ka han chhui ta a. Hetiang hi a lo ni.

May 19, 1780 (Zirtâwpni) khan US hmar chhak lam ram bial zim tê, New England hmar thlang lam aṭang khuan chawhma dâr 10:30 vel aṭangin khua a rawn thim khup mai a. A hun lâi chuan mak an ti a. Khawvel tâwpna tur ni ngeiin an ngai a ni. Mi tam tak chu biak inah an tlan lût a. An ranvulhte an rawn tlan haw bawk a. A thim zual lai phei chuan khawnvar chhit a ngai hial an ti.

Hemi nia khaw thim hi engvang nge an inzâwt sup sup mai. Khatih lai khan America chu an la mawl ve a, sakhuana an la runthlâk a. Tin, inkal pawhna kawng an la nei ṭha bik lo bawk a, thil inhriat pawh zung zung theih a ni bik lo. Chuvangin a thim lai chuan khawi chin nge thima thim lo an hre mai thei bik lo va, buai ve tak an ni. A hnu fêa report hrang hrang an han lâk khawm chuan khami nia khaw thim khan New England bâk a khuh lo tih an hre ta a. Chuvang chuan a hmingah pawh New England’s Dark Day an vuah ta a ni.

Ka naupan lai chuan USA pum pui khu New England an ti emaw ka lo ti a. Mahse a lo ni lo. New England chu USA hmar chhak kila state te reuh tê tê paruk – Maine, New Hamshire, Vermont, Massachussettes, Rhode Island leh Connecticut-te khu an ni a, a zau lam chu 172, 668 sq.km  a ni a (Britannica Ready Reference Encyclopedia, Vol. 7, p. 98. 2005 Edition). Hei hi Arunachal Pradesh tel lova North East India nen hian a intia tâwk viau a ni.

May 19, Zirtâwpni hma ni engemaw chen aṭang tawh khan New England chung boruak chu a tideuh ruih tawh a. Van dumpâwl ruih ṭhin pawh kha rawng eng (yellow) lamin a pawlh ṭan tawh a ni. Chutah ruah a rawn sur a, meikhu rim a nam ta tlat mai. Meikhu rim hi a nam satliah lo, meivâp nawi ang deuh hi ruahah chuan a tam ta mai bawk a. =henkhat phei chuan ruahtui chu an hmang ngam lo.

Ni 17 leh 18-ah te pawh hian mi tam tak diary-a a lan danin boruak awm dan a dik tawh lo va, ni chhuak leh tlate chu a sen rûm tawh a ni. Ni 19 tûkah hian Salem khua chu chhûmin a khuh chuai mai a. A vawt deuh sûng bawk a ni awm e. Tin, New England khawchhak lam phei chu chhûm chuan a bawh nasa a, khua pawh a tihnim deuh ruih mai. Mahse tui pai chhum nge tam thil dang hriat a ni lo.

A Khuh Chin

Chutia khaw rawn thim ta mup chu eng chin nge a khuh an hre thei mai lo va. Chutih lai vel chuan sawi tawh ang khan America khu sakawr bâkin an la inkal pawh thei bik lo va, telephone a la awm si lo. Buai ve map map tak an ni. A hnu-ah Harvard College-a thawk Prof. Samuel Williams-a chuan report hrang hrang lakhawmin engtianga zau nge a khuh chu a zir ta a. Chu khaw thim chu (thim dan inang chiah kher lovin) chhim lamah New Jersy leh New York tuipui kam thlengin hmar lamah Portland leh Maine a thleng a. Khawthlang lamah Hudson Valley-in an lo hre ve a, Philladelphia leh Pennsylvania aṭang erawh chuan khaw thim thu report engmah a awm lo. Chutiang report hrang hrang a zir hnu-ah Williams-a chuan a thim zualna lai chu Massachusetts hmarchhak leh New Hampshire chhim lam leh Maine chhim thlang lam, hengho inrina bawr vel hi niin a ngai a ni.

A thim ṭanna report hmasa ber chu New England hmar thlang New York State-a Rupert khua a ni a. Hemi tûk hian Ni chu a chhuahtirh aṭangin a lang fiah tawh lo. Prof. Samuel Williams, Cambridge-a thawk chuan, “Dâr 10 leh 11 inkârah chuan namên lovin a rawn thim ta a, zanlâi thlengin a thim zawm a ni,” a ti a. Khaw thim chu chhim lam hawia kal zelin Westborough, Massachussetts-a awm Reverend Ebenezer Parkham-a chhinchhiah dan chuan a thim nasat lai ber chu dâr 12.00 a ni a, mahse engtik aṭanga thim ṭan nge a chhinchhiah lo. Harvard College-a mite chhinchhiah dan chuan khua chu dâr 10:30 aṭanga thim ṭanin a thim chhah lâi ber chu dâr 12:45 a ni an ti thung a. Dâr 1:10-ah chuan khua chu a eng leh uau tawh a, mahse nidang ang chu a ni chuang lo. Chuta ṭanga hla ve fê, chhim chhak lam bawk New England chhim chhak tuifinriat kam Barnsable, Massachussetts-ah chuan chawhnu dâr 2.00 aṭangin a thim ṭan ve chauh a, a thim chhah lâi ber chu tlai dâr 5:30 vel a ni.

Map of USA

       Note: Ni thimna chu map dinglam kil chung lamah rin biala  chhinchhiah a ni a. He lai rin bialin a kualkhung chin hi Ni thimna hmun New England chu a ni.

Hetianga report hrang hrang han chhût hian a thimna hmasa ber Rupert aṭanga chhim chhak lam mêl 180 (km 289) a hlâ Barnstable thlen nân chu chhûm or meikhu thim chhah mup chuan dârkar sarih leh a chanve a duh tihna a ni a. Chumi awmzia chu dârkâr khata mêl 25 (40 km) a chakin Ni hliah thimtu chu a kal tihna a ni.

Harvard College zirlai pakhat Nathan Read chuan tihian chawhma dâr 10:30 vel aṭanga thil thleng chu a sawi: “Namên lo hian a rawn thim ta khup khup mai a. Dâr 11-ah phei chuan Wigglesworth-a chuan a Bible lianpui chu tukverh bulah pawh a chhiar thei lo va. Dâr 12:21-ah chuan khawnvar an chhi sup sup tawh a ni.”

Read-a chhinchhiah dan chuan a thim zual lai ber chu dâr 12:45 a ni a. Chutihlai vel chuan sana pawh a en theih meuh loh a ni awm e. Dâr 1:10-ah chuan tlêmin a rawn ziawm deuh a, âr te pawh an khuang a ti. Mahse khua chu chhum chhah tak hnuaia awm ang maiin a thim ruih reng mai a ni.

Dr Samuel Tenney, Rowley, (MA?) pawhin a lehkhathawnah, “….hmâi zawn hnaitêa lehkha vâr dah pawh a hmuh theih loh,” a ti a. Prof. Samuel Williams, Cambridge MA, pawhin, “Hmun ṭhenkhatah phei chuan a thim lutuk a, pâwnah pawh lehkha a chhiar theih loh… A thimzia chu theihnghilh mai mai chi a ni lo,” a ti bawk. Rev. Ebenezer Parkham-a, Westborough, MA chuan, “Dâr 12-ah chuan in chhûng khawilaiah mah lehkha ka chhiar thei lo va. Khawnvar chhit lo chuan engmah ei thei a ni lo. Mak tak a ni ringawt,” a ti.

Prof. Daggett-a sawi danin a hmâ deuh ni 17 bâwr vel aṭang tawh khân ‘chhûm hniam tak mai chuan boruak chu a tieng (yellow) deuh pup hian a lang a. A châng phei chuan a sen deuh khuih a… boruak eng (yellowish) deuh pup chuan silver tle deuhte chu dâr rawng angin a lantir hial a ni,” a ti bawk.

Nathan Read-a  bawkin tihian a sawi, “Chhûm sen dal deuh leh eng (yellow) leh a buang inpawlh angten a lang,” a ti. =henkhat chuan hnim leh thing hnahte chu a lang danglam daih an ti bawk. Prof. Samuel Williams-a chuan ram leilung, hnim leh phaitual vel chu a lang mawi hle niawmin a sawi a. Hetiang bawk hian Dr Samuel Tenney-a pawhin hlau chung chunga an tih loh theih loh chu leilung lan dan mawi tak thlir vel chu niin a sawi ve tho bawk.

A hun lâi chuan miin an hlau hle a. Biak inah an tlânkhawm a, khawvel tâwp a lo thleng ta-ah ngaiin an lungngai hle ani awm e. Biak ina inkhawm tam tak chuan vantirhkoh tawtawrâwt hamri an lo ngaichâng ṭhup an ti.

He khaw thim chhan ni-awm bera lang chu Williams-an khatih laia ruahtui awmdan a sawi aṭang hian a chhui theih mai awm e. “Tui rawng chuan ni dang a ang lo tawp mai, a chhah bâkah a dum a, inṭing (mei) rim a nam bawk… he tui hi ka han zir chiang a, a awmdan (taste) leh a rawng leh a rim aṭang chuan Ipswich-a miin an hmuh tawh engmahin a pawlh loh hnah kang rim bâk kha a ni lo,” a ti. Ipswich, MA-a ruahtui an dawh khawl chu Reverend John Lathrop-a sawi dan chuan vut ang maiin a dum a, mei rim a nam bawk.  Boston khaw mi Jeremy Belknap-a pawhin khaw thim laia boruak rim chu “zu sakna tura buh dahna in emaw, leirawhchan siamna meikhu rim emaw a ang ber,” a ti.

Independent Chronicle-a Viator-a chhui dan leh ziah dan report hi a sâp ṭawng ngai ngai ang hian dah ila a chiang zâwk awm e. A sâp ṭawng sipel dik lo ṭhenkhatte pawh hi siam ṭha chuang lo ila.

"the hemisphere for several days had been greatly obscured with smoke and vapour, so that the sun and moon appeared unusually red." Again on May 19 the rising sun was red in color, but before long the clouds thickened and blotted out the crimson disk. "Between 8 and 9 o'clock," …. The motion of the clouds in the western sky was now "more quick, their colour higher and more brassy than at any time before." There also appeared to be "quick flashes, or coruscations, not unlike the Aurora Borealis." Sometime after three o'clock the gentlemen cautiously ventured outside, where they immediately "perceived a strong sooty smell": "Some of the company were confident a chimney in the neighbourhood must be burning; others conjectured the smell was more like that of burnt leaves." By half past four o'clock, the group ("which had past [sic] an unexpected night very chearfully together") broke up and went their separate ways. …. "Among other things which gave them surprise,"  was the "strange appearance and smell of the rain-water which they had saved in tubs." The tavern crowd led him 'round back to see for himself: "Upon examining the water, I found a light scum over it, which rubing [sic] between my thumb and finger, I found to be nothing but black ashes and burnt leaves. The water gave the same strong sooty smell we had observed in the air, and confirmed me in my opinion, that the smell ... was occasioned by the smoke, or very small particles of burnt leaves, which had obscured the hemisphere for several days past, and were now brought down by the rain." Viator now had enough evidence to float a theory: "The vast body of smoke from the woods which had been burning for many days, mixing with the common exhalations from the earth and water, and condensed by the action of winds from opposite points, may perhaps be sufficient causes to produce the surprising darkness."45

Thomas Campanella-a ziah danin mi pakhat, khaw thim laia ram vâk chuan ngaw kâra meikhu zâm nasa lutuk avang chuan a thâwk pawh a thaw ṭha thei lo tih a report thu a ziak bawk.

Vawikhat chu mi pakhat hian he khaw thim chanchin an zirna lama an hotupain duhsak taka document a pêk, a xerox copy (photo copy tih zâwk tur) chu min entir a. Chutih lâia miten uar taka khua a thim nasatzia an ziahna hlir a rawn phawrh a. A hmâ ni rei fê aṭang tawha khaw awmdân a chiangkuan tawh loh dan te, meikhu a zam chuai dan te, ruah a sur tel dan te, ruahtuiin mei rim a nam nasat thu te, an ruahtui dawn khâwl pawh hman tlâk loh khawpa meivâp niawm tak a tam dan te, New England-ah rau rau pawh khaw thim dan a inchen lohzia leh a thim hun pawh a inan loh thluah dan te, New England ram zim têa thleng a nih thu etc., report tam tak kha an inpe tel lo niin a lang a, a zir pawh an zir tel lo hial pawh a ni thei, ka hre lo; chu chu an thil zir dan a nih chuan ngaihtuahawm tak an ni.

He khaw thim hi Colonel Abraham Davenport-an a hmingthan phah ber mai. Connecticut rorelna ina ro an rel laiin khua chu a rawn thim a. Pathian rorelna lo thleng turah ngaiin speaker chuan rorel inkhawm chu ban a rawt mai a ni awm e. Davenport-a chu a lo ding chhuak a, “Chawlh hi ka duh ve lo ve. Tunah hian rorelna ni chu a lo thleng mêk a ni mai thei a, a ni lo thei bawk. A ni lo a nih chuan chawlhna chhan tur a awm lo va, a lo ni ta a nih pawhin kei chuan ka duty ka ti lai ngeia rorelna hmachhawn hi ka duh zâwk. Khawnvar han la se, rorelna hi kalpui zel ang tih ka rawt e,” a rawn ti a. Heta a thusawi hi tunthleng hian thusawi ropui pawlah an la dah a. Hlâ-ah te hial an châwi a. John F.Kennedy-a pawh khan 1960 America President thlanna-ah khan a campaign-na-ah he ṭawngkam hi a la entawn cheu a ni an ti.

A thuhrimah helai bâwr vel hian kangmei avanga khaw thim an tawng leh thuak ṭhin. Kum 1881 pawh khan Ontario leh Michigan ram kang khuin hmar chhak lam hi a tuam a, khua a thim deuh ruih a ni awm e. Mahse 1780 ang em em kha chu a ni lo. Hemi nia Ni (Sun) ên dan chu Harvard-a an zir danin chhûm zin ni pangngai hmun sawma ṭhena hmun khat chauh a ni. Kum 1950 khan Canada ram kangin heng lai hi a rawn hliah thim leh ruih bawk.

Hetia ram bial zâu lutuk lova khaw thim hi a hnu zela a thim chhan awmte an han ngaihtuahin a tira Pathian rorelna a lo thleng tawh dâwn ngei a nih hi tia hlau tam tak chuan an ngai thupui zui ta lutuk lo va. Keini kohhran hian kan sawi rei ta deuh ber a nih hi. Scientist leh mi thil chik mite erawh chuan an zir zui fo a ni awm e, kum 2007 khan  International Journal of Wildland Fire, Erin R. McMurry, University of Missouri forestry department leh a thianpa chuan Algonquin Provincial Park, Ontario-ah hian nasa taka thing upat dan leh awm dan an zir hnu-ah kum 1780 ṭhal laiin kangmei nasa tak a chhuak a, he kangmei hian ram 50,000 acres  a kang ral a, hei hi khami kuma khaw thim vakna chhan kha a ni an ti. Kan sawi zel ang.

Science Daily (June 9, 2008) chuan khami nia New England thimna chhan kha Canada nena an inrina bula kangmei nasa tak chhuak vang a nih thu University of Missouri mithiamten an hmuh chhuak a ti bawk. Hei hi a dik a rinawmna chu ni thim zawha mi lehkha inthawn tawn vel leh diary ziaktuten mei rim a nam nasat thu te, ruahtui an dawh khawl pawh hman tlâk loh khawpa inṭing nawi ang deuh a tam thu te, a hmâ deuh atang tawha khaw awm dan a dik tawh loh thu te, ni lan dan pawh a sen rûm thu te an sawi tlat mai kha a ni.

Ka naupan lai bawk han sawi leh ila. He thu ka hriattirh chuan kum 14 ka pumhlum deuh chauh a ni a. Ni (Sun) alh lâi khi a tâwp a, khawvel zawng zawng hi (khawvel pang lehlam thim sate nena belhkhawmin) a lo thim ta khup mai ni hian ka ring ṭhin. Mahse tuna ka pawm dan chu Ni (Sun) tak tak khi chu a thim lo tih hi a ni.  Ni tak tak khi thim se chu New England chauh ni lo, khatihlaia khawthlang lam (Western Hemisphere) chin, entirnan, London, Paris, Amsterdam, California, Texas, Mexico, Canada, South America etc., te khu an thim rual vek tur a ni. Mahse he Ni thim hi chu ram zim tê New England-ah pawh a thim dan leh a thim hun a inang lo va. Hmun ṭhenkhatah chawhma lam aṭangin a thim ṭan a, hmun ṭhenkhatah chawhnu tlâng her fê-ah a thim ṭan bawk a. Hmun ṭhenkhatah a thim bur a, hmun ṭhenkhatah chuan ni a dul deuh ruai chauh bawk. Ni tak tak khi thim chu nise khu ram zim tê-ah khu chuan a thim rual ngei ngei tur a ni. Tin, khua a ṭhat phei chuan vana arsi, mahnia enna nei chinte chauh khi an lang pe uarh ang a, Ni (Sun) aṭanga eng dawng, mahnia enna nei lo planet-te erawh chu an lang thei lo vang. Thla pawh a nihna takah chuan Ni alh hluah hluah khi a tâwp hmak a nih chuan a lang tur a ni lo; amahin enna a nei lo tlat.

Tin, America state danga mi tam takin he khaw thim hi an lo hre ve reng reng lo va. A hnu fê-ah mi titi leh lehkhathawn leh chanchinbu aṭangten an lo hre ve chauh a ni.

Kan church historian Mervyn Maxwell a lehkhabu pahnihna God Cares "Revelation" p 196-198 ah khan chiang takin i hmu ang: "The Olivet Discourse Jesus said, "Immediately after the tribulation of those days [the 1260 year-days] the sun will be darkened, and the moon will not give its light." Matthew 24:29. Catholic persecution virtually ceased in Europe in the middle of the eighteen century. The last "heretic" to be martyred in France, a Reformed pastor, died in 1762. Pope Clement XlV personally outlawed the Jesuits (the Society of Jesus) in 1773.

So the timing of the May 19, 1780, event was right. And the people reflected on it, for the place was right. New England was a center of Bible study, noticeably so even in comparison with the other newly independent American states. "Engvangin nge New England ah kher kher? William Miller a ho a kohhran tin ten hrilhlawkna an zir tlut tlutna hmun bik a ni a. Hmun dangah lo awm ta se a pawimawhna an hre lo ang, Bible an zir loh avangin" a tihna ber niin a lang.

New England ram bial zim têa thil thleng Frank Breden-an “…large portion of North America,” a tih hi a la uar lutuk em? Vawkpui tiat sâi puitling awm se tê kan ti viau ang a, chanchin thar a ni ang; fanghmir kuttum tiat awm se lian kan tilutuk ang a, chanchin thar a ni leh ang. Kan tehna a inan loh vang a ni. Chutiang bawk chuan ram zim tê ka tih hian khawvel pum huap emaw ka lo tih ṭhin vanga khawvel pum aṭanga ka teh vang a ni a. Khawvel pum a huap lo tih hre sa Frank Breden-a chuan ‘ram zâu tak’ niin a hre thung a. Kan tehna a inan loh avangin kan daw lo ve ve.  Tin, hemi ṭuma ni thim hian khawvel chu sawi loh, America hmar chhak kil ram zim tê chauh a huam tih chu keimahni lehkhabu ngei SDA Student’s Source Book, Commentary Reference Series Vol. 9, 1962, phêk 313-320 inkârah chiang taka ziah a ni a. Hei lo pawh Handbook of Seventh –day Adventist Theology (Commentary Reference Series Vol. 12) phêk 906-ah chuan ‘thick darkness covered the north-eastern part of the North America’ tiin a ziak chiang viau bawk. Heta north-eastern part a tih hi ram bial zim tê New England a ni. Sawi tawh ang khan mahni kohhran lehkhabu ngeia inziakte pawh hi a lo hriat loh theih khawp mai.

Kan hotute thusawi hi a hnialna tur document ka nei si lo va, ka lo hriat dan a kalh deuh a nih pawhin ka pawm mai dâwn em ni? Mahni ngaihdan lo vawn tawh sa paih hi kan harsat ṭheuh mai a, chuvangin pawm mai harsa tih chang ka nei. Amarawhchu a hnialna tura ka thu zir reng reng chuan min paih thla zat zat si a, ka pawm ve mai a ngâi dawn a ang khawp mai (hreh châng awm mah se). Rilru inhawng taka dawnsawn thiam a ngâi dâwn hle a lo ni.

Keini thingtlâng naupang pawr phing pheng ve tak maiin pulpit chuma (a tak takah chuan he thu sawi vanga pulpit ka chum tak tak chu ka hre lo) ‘Khawvel hi a lo thim ta khup mai a,’ kan tih kan tih lâi khan kan thurin ziahna bu-ah chuan ‘New England’ (North East India pawh tiat lo) a lo ni reng si; thil hi a lo hriat loh ve theih khawp mai.

Ni e, naupan lâia thil hriat kha chu a chiang lo thei reng a ni. Kan hotute nge nge zawng kan lo la umpha lo deuh a ni e. Heng thute hi pawm ngam lo ila hriatna lamah hma a sâwn theih dâwn si loh.

Kan thil sawi lai nena inkungkaihna nei miah lo, ngaihnawm leh mak ve mai mai, Mizorma thil thleng han sawi kâi daih ila.

Mizo hla phuahthiam Siamliana chu kum 1962 khan Vaisam khua-ah a thi a. Hetiang hian a thih nia khaw awmdan chu an sawi thin:

“Kum 1962 May ni 16 zing dar 7:00-ah kum 68 mi niin a (Siamliana) boral a. Thil mak em em mai chu a boral ni hian kum 1927-a Angelte’n an lo hrilhlawk tawh ‘I thih ni chuan i khawsak tawhna khua leh a chhevel kan rawn tithim ang’ an lo tih chu atakin a thleng dik a. A thih ni chhun dar khat velah chuan a lo khawsak tawhna khua-ah tawh phawt chuan nunphung khaihlak vek khawpin khua a lo thim ta tak tak a. Heng khua – Dampui, Luangpawl, Mamit, Phuldungsei, Sabual, Tlangsang, Bangla Zion, Behliangchhip, Kawrthah leh Vaisam-ah te hian ang khat rengin khawnvar chhit ngai khawpin khua a lo thim ta a, âr lawi a ngai ta hial a, khawpui ri si lovin thli a thaw hum hum a, an chi-aiin mak an titakzet a ni.”

Thu lâkna: Meichher, June, 2010. p. 21. Hla Kungpui Siamliana Thlanah Biakzinin, By Rohlupuia Chhangte, Kawrthah). He thu hi a dik leh dik loh ka hre lo va, finfiah tum kher pawh a ṭul awm lo ve. A mak ve em a, ka han thailang ve mai mai a ni. ■

A Kar Awl Laklawh Hnawh Khahna

Ni ramri chungchanga buaina

Kum 2011 December 29 a lo ral a, a tûk Inrinni chu Samoa sawrkar chuan a paih a, December 31, Sunday a nih thu a puang ta a. Samoa thliarkara Adventist mite chu an buai ta hle mai a ni. Samoa thliarkar hi international dateline-a awm an ni a. An duh chuan ni chhiar nan khawchhak lam America lam ni an ring thei a, an duh chuan khawthlang lam ni chhiar dan an hmang thei.

          Entir nan, December 30, 2011 chu America lam aṭanga chhiarin Inrinni a ni a. International dateline bula awm ve tho Australia leh New Zealand ram tan chuan Sunday a ni thung. A awmzia chu ni inang chiah kha khawchhak lam zawm leh khawthlang lam zawm tan ni hran daih a ni thei tihna a ni. Entirna dang sawi leh ila. Samoa thliarkarah Sabbath serhin inkhawm la. Chawhnu lam ṭhalai inkhawm chu khaw nge New Zealand-ah ka va inkhawm teh tiin thlawhnain New Zealand-ah chuan va kal la, anni tan chuan Sunday a lo ni si ang a, inkhawmpui tur i va hmu lo vang.

          Samoa thliarkar hian hmana Sunday an hman ṭhin kha kum 1872 khan Sabbath-ah an lo thlak tawh a. Adventist missionary-te khan chu chu ngaihtuah lem lovin sawrkar tih ang ang chu an zawm mai a. Mahse hmana an kal dan hluia an kal leh chuan Adventist mi tam takin an hre thiam ta lo a ni. Sabbath ni tur Sunday ni lo ni ta daih mai leh Sunday serh leh Sabbath serh ni thuhmuna an inkhawm tur chu an ngai ngam lo va. An buai ta hle mai a nih chu. A ṭhen phei chu an titau va, an inkhawm hrang ta a. Union lamah an thlen a, anni tihngaihna hre lo chuan khawvel pum pui khaikhawmtu General Conference-ah an thlen ve lehchhawng a. General Conference pawh chuan tihngaihna hre chuang hek lo; Union lamah an refer kir leh ta ringawt mai a ni.

          Mi ṭhenkhat chuan ni sarihna ni chu sawrkar thlak theih ni lo hul hualah an ngai a, chuvang chuan sawrkarin Sunday a ni tawh ang tia Inrinni a puan pawh chu an pawm duh lo va. Chumi rual chuan chutianga pawm duh lotute chuan sawrkar puan tho, kum 1872 ami kha an ring ve em em tho tih an hre duh hauh si lo.

          He buaina aṭang hian mi tam tak chuan eng hi nge ni serh thianghlimnaa a thianghlim lai tak chu tiin an zawt ta fo reng a ni. A hma lama sawi tawh ang khan Samoa thliarkara Sabbath ni chhuak chu Samoa mite chuan thianghlim taka serh tur niin an hria a, an serh bawk reng a. Mahse chu ni chiah, a hun inang chiah chu New Zealand leh thliarkar danga mite tan chuan Sunday a nih tawh avangin inthiam lohna nei miah lovin hna an thawk mawlh mawlh tawh si.

          Tunah hian ṭhenkhat chu an la buai deuh a, mahse a tir ang em em kha chu a ni tawh lo nia sawi a ni.

          Hetiang lam sawi takah chuan hmar tawp ram, a bikin Norway hmar lam ram, kum khata thla ruk khua a thim a, thla ruk dang ni a tlak ngai lohna rama Sabbath serh hmasa, a bikin Juda-ho buai dan leh an thuchhuahte sawi zawm a chakawm khawp mai. Sabbath serh-ho kan buai bik. Kan chawlhni kan ngaih pawimawh bik vang te pawh a ni ang chu. Adventist kohhran pawhin a ngaihtuahtu tur sub- committee a din hial a ni.