NU HNENA LEHKHATHAWN

          Kum 1995 July 7, Zirtâwpni khan Pune-a lehkha ka zir hlanin ka nuin min boralsan a. Chutihlâi chuan kei chu engmah hre lovin \hiante nen kan infiam a, ngaih\hat lohna chhe tê mah nei lovin tuna ka \hiannu Zovi nen hian bazar-ah kan inzui chhuak a. Tlâi lamah te chuan \hiante zingah fiamthu thawhin a nui ring berah ka \ang bawk. Ka nu a thi tih ka han hriat ve meuh chuan khawhar inlêng pawh an lo \in vek tawh a. Kan in ka han thleng chho chu a lo ruak huai mai.  He lehkha hi in ka thlen hnu lawka ka ziah chu a ni. Ka ziak zawm \hin. Mahse ka ziak zo thei lo va, ziah zawh pawh ka tum chiah lo.

Ka nu duhtak,

Engtikah emaw chuan min la boralsan dawn tih hi hman ata tawh ka lo ngaihtuah lâwk fo tawh thin a. Zan tam tak mut theih loh nan hmangin mang tha lo ka man phah fo; mahse a tak ram meuh chu danglam tak a ni.

I khualzinna thlaler ram i chhuahsan a, i damlai hun i chhiar zawh ni khan kei chu hlate khua, kawlkil sawm piah lamah ka awm a. Thiam zirna rûn-in sâng kâiin hlawhtlinna tlâng ka lawn chhuak a, hriatna kailawn ka rap ve tan a ni. Ka hlawhtlinnate chu vanneih thila ka chhar emaw, mi min pêk emaw ni lovin in thawhrimna rah, in thlan tuiin a bual chhuah liau liau a ni.

Rim taka i thawhrah chu sengtir thuai che hi ka châk a. Chuvang chu alawm, \hiante pawhin ‘em em a,’ an tih hial khawpa ka lam zin che ni. Chuvang bawk chu alawm, hlawhtlinna kawngkhar kik tawh si hi hawn sak ka nih loh palh hlauva ni tin hun ka hman \hin ni. Chuvang bawk chu ani, rawn haw thuai thuai chaka ni chhuak leh tla ka chhiar fo \hin.

Kan ro awmna apiangah kan rilru pawh a awm thin. Kei chu i hmangaihna bâk ‘ro’ dang nei lo ka ni a. Chuvangin i awmna Thingsulthliah chu ka tan chuan khaw ropui, Van Jerusalem dawttu a ni a. I chenna in pawh in nuam ber leh ngaihawm ber a ni. Vairam in ropui tak tak te, car nalh tak tak leh kawtthler thlur seng sungte, thlawhna thlawk ri vung vung leh rêl tlan ri tluk tlukte hian ka lung an tileng ngai lova, ka lawmna an ni hek lo. Pune khuate hian ka zirna atan bâk keimahah pawimawhna dang an nei lo va, ka mikhualna ram mai an ni. He khawpui, thilsiamna ropui tak tak awmna hmun; khawvel hmasawnna ûm mipui vei suau suau leh phu mur mur karah hian ka thla a muang hek lo.

Hetiang hi ka nihna leh dinhmun, ka awm dan chu a nih avangin i hmangaihnain a awp lum kan in chhûng chu ka hre reng a; tuifinriata mi vakvaite’n Hmar Arsi an ngâi angin ka ngâi a. Israel fa, Babulon saltangte Zion tlang ngâia an \ap ang khan ka \ap \hin.

Ka rawn haw dawn chuan i thawmhnaw tur leiin bazarah ka kal a. Chungte nen chuan in thlen thuai thuai nghakhlel em emin Madhya Pradesh leh Bihar phaizawlte ka rawn hrût chho va. Chutah Assam kan rawn lût; mitthlain in ka rawn thleng chhin a, kan hlim tlâng a ni.

Mahse Kolasib ka rawn thleng chho chu khawvela thu râpthlak ber, thu thin\hawng, thu thinlung vit tlang, i boral thuin min lo dêng a. Hiroshima khawpuia atom bomb tlate kha ka sawi nêp hauh lo va, Indopui Pahnihna lah nuih tiza mai a ni hek lo. Mahse ka tan erawh zawng i boral thu aia chanchin thar râpthlâk a awm thei lo va, a aia history pawimawh a awm hek lo. Sawrkar lian inngur thawmte chuan thin an \hawng pha tawh lo va, khawvel tâwp hun leh Armaggedon pawh a zuamawm ta zek zek mai.

Dam taka inhmuh leh kan duh a. Chumi atana kan ni tin \awng\ainate erawh a thlawn ta. Pathianin kan dilna sang sawm a chhan tawh zinga a chhan loh pakhat avang hian ka vui lo va; rapthlak erawh ka ti a ni. A rapthlak satliah a ni lo- a lungchhiat thlakin a lunglên thlak a, rilru a na em em bawk.

I boral tih ka hriat zan chuan lungngaihna chhum dum karah \ap chungin in ka lût a. I tu leh fate’n \ap chungin min lo hmuak bawk a. Hlim nui ria khat \hin kan in chhung chu lungngaihna rûm riin a khat a. |ap thawm bak hriat tur a awm ta lo. Kan lungngaihna leh mangannate chu tuia tlen bo theih nise a tlen fai nan tuifinriat tuite khu an tam tawk lo va, a khuh bo nan Himalay tlangte saw râwt hniam bawih pawh ni ila a tawk bawk hek lo vang.

He khawvelah hian engmah i rawn luh pui lo va; chhuahpui i nei hek lo. Kalsan leh hnutchhiah erawh i ngah a ni. I hmangaihna rimtui lêng velte chu kan in chhûngah hian a châm reng a. Chu chu kan duhthusam tak pawh a ni. I nui rite kha kan bengah hian rimawi angin a la ri reng a. Tin, min zilhna tawngkamte pawh kan thinlungah hian zawlnei thupuan tluka chiangin a inziak reng bawk a; kan chawk reh phal lo. I thlan vurna lei vungte chu lei thianghlim an chang zo va. I zâlna tlâng pawh kristiante tana Luruh hmun a hlû angin i tu leh fate tân chuan a hlû a ni.

Min kalsan tâk avanga kan lungngaihnate chu teh theih a ni lo va, \ah hlaa chham sen ani hek lo. Khawvel hla phuah thiam ber pawhin phuah dawn se nuih tiza mai ani ang a, zaithiam zaite chu chhepchher inkhâwng ri tluk lek, beng tiza mai an ni a. Thawnthu phuah thiamte dâwt phuahchawp pawh naupang inkhualtelem thil chauh an ni.

Min hmangaihna hmun sang sawm zinga pakhat hu chauh pawh ka rulh let ve hma chea i boral mai hian rilru a tina em em a. Mi pangngai kan nih ve theihna tura i thlantui luang zawng zawngte, rilru leh tisaa min hah puinate kan chhiar sêng lo va, chhiarsen chi-ah pawh kan ngai lo.

Tin, hun inher hian nangmah kan hriat rengna chu a rawn herchhuah pui zel a, a la her chhuak dawn chauh a ni.

Favang ni tla tur êng mawi tak te, kawlkila chhum vâr thianghlim thlâwk dêl dêl te, hla taka tlâng zum fir fer lang paw chiai leh lui ruam ngaw hring dep dup karahte hian i hmêl kan hmu a. Tin, thlasik a lo thaw a, tlai lam thim hmul khaw vâwt seng seng te, zing lam sik ni êng mawi lawm sava hram chil chel te, dai tla huh chip chep leh maimawm ril inphan tle diar diar te, thlifim thaw heuh heuh leh hnahthel inchhawk ri seng seng karahte hian i nui rite kha a lo ri nawn leh \hin.

Zan reh lamah chunglam han hawi ila, Thlasik Kawng kal riak ruak, arsi nuaih sâng têl zingahte khian i hmêl hmuh kan tum thin a. Mahse chungte chu beiseina hlim thla, duhthusam khawvel, suangtuahna saruak, rauthla lêng mai an ni.

Thlasik lo ralin kum tharin hun thar a rawn her chhuahpui a. Kangvâr dum hiam huam leh khaw lum mi uap vung vungte hian i hmêl min ngaihtir a. Thing hnah chawrno hlep hlep te, khâm râng kâra fartuah leh vau vul chêk chûk te, romei zâm paw chik chêk leh van sâng muvanlai lêng delh delh te hian i hnen ata thuchah mi hlan tur nei hian ka ring bawk \hin.

Tin, \o haw hun a lo thleng a. Rûm vung vungin kawlkilah chhum dum inhrosa a let but but a. Khawdur inhro thawm leh thinur hmêl hmu  ngam lovin ramsakawlh leh chunglêng savaten hmun him lam an bel ruai bawk a. Tin, khawpui rite chu mi vauzam hmasak tum niawm takin chung lamah an inthumrawn dup dup a. Hetiang hunah hian vannei fate chuan an nute \âng an bel a, hlauhawm pawh hlauhawm a chang lo; la dam ni la kan thla a muang ve tur.

Khaw \ha ni sa vawl vawl hnuaiah khua ka han chuan a. Khawchhak lam han hawi ila, i sulhnu, i chêt tlat tawhna ram vek an ni. Tin, khawthlang lam han hawi ila kan ram riah hona chul mual leh ruam, kawngkawi chenin a ngai tê vek an la ni. Hmar lam pawh hawi ila thi thei lo nu nei ang maia kan thlamuan pui lai chea kan tuan ho tawhna mual vek an ni a, engmah a dang chuang lo. Hawina lam apiangah mitthlain i hmêl kan hmu a. Mahse  ûm tur i awm si lo.

I boral tih ka hriat ni a\ang khan ‘nunna’hi eng nge tih ka ngaihtuah a, zawhna a va tam em? Scientist chal ngalh pui puite pawh he nunna thurûkah hian an buai a. Ramhuai bawlhhlawh Setana leh a thuihruai, van a\anga mei ko thla thei hialte pawhin he nunna thurûk hi an hre lo. Pathian thurûk, chunglam thiltihtheihna chauhin a pêk theih a ni si a. He thurûk, suala tlu tawh mihring hriat phâk rual loh thil inthup hian min tibuai a. Chu tak chuan nunna hi a tihluin a tingaihnawm a ni. Heng thurûkte hi lo hre ve ni ila kan mittuite tihulin i zarah kan chhungkua hian par a chhuang leh tur….

-Hetah hian ka tâwp hrih a, ka chhunzawm leh mai thei hrih lo. Ni e, ka nu kha khawvel thilah chuan nu tlawm tak, thiamna lamah phei pawh ziak leh chhiar thiam tawk tawk a ni a. Chanchinbu leh TV-a a hming lante chu sawi loh, kan khua-ah ringawt pawh hian lar lem lo tak a ni. Mahse chanchinbu-ah vawi eng zat nge a hming a lan, TV-ah a hmêl vawi engzât nge kan hmuh tihte hi keini a fate hian amah teh nan khan kan hmang ve ngai lo va, a vui nia a chanchin sawina phêkah khawtlang leh eng pâwl pâwl emawa a nihna ziah kur ngei nguai tur a nei hek lo. Kan tana a inpumpêkna te,  min hmangaihna leh min enkawlna zawng zawng, kan damchhung lêt sawm pawha kan rulh zawh loh tur kha a ropuizia kan tehna awmchhun sual thei lo chu a ni a. Chumi kawngah na na na zawng kan chhuang ve a ni.

Ka nu thihna kha kum sawm leh pathum lai a lo liam ta reng mai a, mahse kan thinlungah hian a la thar reng a, Mathusela dam chen pawh dam ila a thar zel dawn a ni.

               * * * * *