LOVE AND SEX

“Ka hmangaih tlat alawm,” tih chhuanlama nupui/pasal innei kan ni vek awm e. Zawlneite sawi lawk tâwpna ni kan thlen hmâ chuan hmangaihna hian mihring nunah hmun pawimawh a luah reng dawn a. Chu chu ka han sawi ve dawn a ni.Tin, hmangaihna leh hmeichhiat-mipatna lam sawi nana love and sex kan tih avang hian saptawng uar ta lua-ah inngai lo ila. A bikin sex tih phei hi chu Mizo tawng ang thova kan hriat chian a nih avangin kan hmang zui zel ang.

Hmangaihna hi a awm ngei tih kan hria. A hrilhfiah hi thil harsa zâwk chu a ni. A rauva cheng ve lo tân boruak lem ziah a harsa tlukin hriatthiam a harsa a, a chen chilh mêktute tân erawh khaw thian zan thla eng tluka chiang, a thûkzia leh zauzia hrilhfiah zawh rual loh a ni. Lehkha thiam vanga hriat bik ngawt emaw, hausak vanga hriatthiam mai theih lah a ni hek lo. Khawvel mifing kan hriat hlat ber atanga kum zabi 21-naa cheng mifing, hla phuahthiam, thawnthu ziak thiam leh sakhaw miten hrilhfiah an tum a, an la tum zel ang.

Greek-ho chuan hmangaihna hi chi thumah an then a; kan hre lê lû ang chu. Thian kâra inhmangaihna hi “Phileo” an ti a. “Agape” chu phût lêt awm lo hmangaihna, Pathian hmangaihna te, nu leh pa hmangaihna te hi a ni. A pathumna chu nula leh tlangval, rilru leh thinlung, tisa induhtawnna ‘Eros’hi a ni leh a. Hei hi tuna kan buaipui ber tur chu a ni.

Stendhal-a chuan hmangaihna hi chi hrang hrang (passion love, aesthetic love, physical love, love based on vanity) ah a then a. Mahse hetianga then hran duah hian hmangaihna hriatfiahna kawngah leh nunpui kawngah mi a pui tam lo hle.

Triangular Theory of Love: He thurinin a sawi ang chuan hmangaihna hi rin kilthum nei anga thil pathum (a) châkna (passion), tisa taka inngaihzawnna leh init tawnna, (b) Innelna (intimacy), rilru chhungril lam atanga inpawh tawnna leh inngaihtawnna leh (c) induhsakna (commitment), thil intihsak duhna leh inpuih tawn châkna te, awm ho zel châkna te an ni.

Hmangaihna chuan lainatna, khawngaihna, duhsakna, innelna leh hriatthiamna te a keng tel a. Amarawhchu mi kan lainat zawng zawngte, kan duhsak apiangte, kan nêl zawng leh hmeltha kan tih apiangte kan hmangaih kher lo va. Mahse hmangaihna chuan a keng tel vek si a ni.

Magnetic Theory of Love: He thurinin a sawi chu mipa leh hmeichhe kâra inhip tawnna awm hi a ni. China-ho chuan mipa leh hmeichhia chu inkhawih miah lo, inhmuh ringawt pawhin anmahni atang chuan chakna (force) emaw, inhip tawnna ‘tsing’ an tih emaw chu a lo chhuak a. Mipa leh hmeichhia atanga chakna (energy) ‘yin’ leh ‘yang’ lo chhuah tam dana zirin ‘tsing’ (magnetic force) chu a sâng thin. He inhip tawnna ‘tsing’ avanga thil pathum lo awm thei chu:- (i) Mipa leh hmeichhe awm dun chu inkhawih miah lo mah se anmahni atangin inhip tawnna engemaw riau a lo chhuak ta a. (ii) Inhip tawnna chu a lo sâng zel a. Kut inkhawihsak, inkuah leh infawh thlengin a lo thang lian a. (iii) A tâwpah a vawrtawp inpawlna a lo thlen ta hial a ni.

Mipa leh hmeichhe inkâra inzawmna engemaw tak, a awm tih hriat si, hmuh theih loh leh khawih theih loh hi Renaisance hun laite khan an lo tuipui tawh a. Islam-hote hian an ring nghet tlat bawk. Ficino-a chuan inmelh zauh ringawt pawh hian thisenah a awn lût a, a châm ta reng thin a. Khawiah pawh kal se nu/pa chuan hmangaihna chu a thisenah a keng tel ta zel a ni, a ti. Ziakmi Pin-a te, Andrea Capellano-a te, Eliphas Levi-a te pawhin hmangaihna hi an ziak a, an hrilhfiah a. Mahse a chiang tak tak chuang lo.

“Hmangaihnain a dawh thei a, ngil a nei bawk thin; hmangaihna a itsik lova; hmangaihna a infak lo va, a uang lo va, a che mawi lo lo va, mahni hmâ a sial lo va, tiin Paula’n I Korinth 13:4,5-ah a sawi a. Hei hi hmangaihna tawngkam sawifiahna ni lovin a hnathawh sawina a ni mah awm e. Tirhkoh Paula hian sakhaw rilru leh ngaihtuahna atangin a ziak a. Tisa taka lo dawnsawn a, hriatfiah a, lo nunpui theih a ni lo mai thei.

Tuna kan sawi lâi nula leh tlangval inkâra hmangaihna hi chu a che mâwi vek lo va, a itsik fova, sual lam pawh a ngaihtuah fo thin. A dawh thei lo fo va, ngil a nei vek hek lo. Inngaizawng intitau fo te, inhau deuh reng te, nupa invua leh intitlan reng thinte pawh hi an inhmangaih em em tho.

Hmangaihna chungchang sawitu tam tak chuan a hnathawh an hrilhfiah zâwk fo. Mi tin pawm theih hrilhfiahna a awm thei kher lovang. Lawrence Casler (1969) chuan hmangaihna chu mihring mamawh ‘sex’ nemnghehna leh pawm theihna (acceptance and confirmation) tura awm a ni a ti. A sawi danin hmangaihna chu (i) Hun lo kal zel tura ngaihthatna (the need for security) vang te, (ii) tisa châkna tihpuitlin nan te leh (iii) vantlâng nun mila khawsakna tur (social conformity) a nih vangtea lo awm niin a ngai.

Ira Reiss, Golstine, Keith E.Davis te ngaihdan pawh ziah tur a la awm nual naa a fiah tak tak chuang lo. Tuna kan sawi chin atang pawh khian a fiah tak tak chuang lova, hei aia fiah zawka han sawi zâu leh emaw, han sawi tlawr kual vel emaw pawh ka tum chuang lo. Tum ila ka inti mualpho mai mai ang.

Hmangaihna hi arts nge science? Science leh arts ziarang ringawt pawh sawi fê tham a awm. Science nihphung leh ziarang atanga thlirtute thlir dan emaw arts lam atanga thlirtute thlir dan emaw sawi tur ka hre lo. Hmangaihna hi thli ang a ni. Khawi atangin nge a rawn kal ang a, engtikah nge a rawn chêt dawn; khawi lam kawng nge min zawh pui ang tih sawi lawk theih a ni lo va. Mi zawng zawngah a thawh dan a inang hek lo. Chu chu ka buaina a ni.

Hmêl hriat ngai miah loh, thisen inzawmna pawh nei lo kan han inhmangaih hlumlo chauh mai hian chhan a nei em? Pakhat leh pakhat belh pahnih tih tluka chiang chuan tuman kan chhang thei lo vang. Juliet Drovet-i chuan Victor Hugo-a chu, “Ka hmangaihna chhan che chu ka hmangaih vang che a ni,” tiin lehkha a thawn a. A nih leh Victor Hugo-a kha mi ang lo, bengchhêt ni ta se Juliet-i chuan chhan awm lovin a hmangaih tho ang em? A rinawm chiah lo.

Nula leh tlangval inngaizawngte inhmangaihna chhan a inang vek lo va. Chu chuan hmangaihna hi a tichipchiar a, sawifiah a tiharsa a ni. Mahse chu tak chuan a tihlûin a tingaihnawm bawk si a.

Mizo nula leh tlangvâlte inngaihzawn chhan leh nupui/pasal inzawngte intehna engnge ni ang? A hnuaia mite hi a ni thei.

Hmêl: Hei hi rahbi hmasa ber a ni. Rei lo te chhûng leka mi kan duhzawng tur leh duh loh zawng tur kan hriat theihna a ni. Vawi khat hmuhnaa chhia kan tih ngawih ngawihte chu a hnu lamah vei zui an harsa hle.

Nungchang: Hmeltha kan tihte chu an nungchang kan chik thin. Hmeltha bawk, nungchang tha bawk chuan midang aiin duhtu a ngah ang.

Sum leh Pai: Hei hi lehkha thiamna te, infiam, zai leh sumdawnna te huamtir ila. Hmelthat dan inangah lehkha thiam, infiamna lama hmingthang leh zaithiamte chuan mi duh an hlawh zawk tur a ni reng a ni.

Tin, hmangaihna avanga bahra khur laih hial pawh huam an awm a. Chu bâkah hmêltha em em lo, nungchang lama chhuanawm bik lo, hausa bik bawk si lote lo hmangaih a, lo kawlthei sên ruhpui tlatte pawh an bo bik chuang lo. Hmangaihna hi chu mak tak a ni.

Inngaihzawn Dan Chi Ruk

Socialogist  John Alan Lee-a chuan inngaihzawn dan chi ruk (six primary types of romantic love) a awm niin a sawi a. Chungte chu Greek leh Latin tawngin hetiang hi an ni:- (1) Eros: Hei hi tisa taka init tawnna hi a ni. A alh hluai a, a mit leh vat bawk. A daih rei lutuk ngai lo. (2) Ludus: Hetianga inngaizawngte hi chu an lût thûk lutuk lo va. Midang ngaizawng mai thei turin anmahni-ah khêk chin an nei tlat bawk. Midang an kawp teuh a, a tu lakahmah an inpe pumhlum lo. Hemite inkarah hian sex chu inpêk tawnna thûk tak ni lovin, infiamna ang deuh lek a ni. (3) Storge: Hetiang hi chu a mûang fân ruih a, a puithu ang reng viau bawk. Thian inkawm ngeih, hriat loh hlana lo inngaizawng reng ang hi an ni. Hetianga inngaizawngte hian an inngaihzawn tan lai chiah an sawi thei meuh lo thin. Mahse a nghet a, harsatna a lo thlen pawhin an tuar thei bawk. Mahse hetiang mite inkâra hmangaihna thlipui hi a tleh vut vut lem lo khawp mai. (4) Mania: Hetianga inngaizawngte hi chu an ri phut phut a, an intitau va, an induh huam huam a ni ber. An inbân, an inrem leh, awm ngaihna an hre lo.An hlim laiin an hlim em em a; chutah hriat loh hlanin an lo intitau leh hman a. Innei thei lo; inthen thei si lo tih ang an ni ber. (5) Pragma: Nula/tlangvâl senior-in uluk taka mi nungchang leh mizia an zir a, tha an ti a, an va ngaizawng ang hi a ni. Hetiang mite hi chuan an tisual meuh lo va. An tluang duh fû mai. Nupui/pasal neih hun tawh, rilru puitling fê tawh zingah a thleng deuh ber. (6) Agape: Kristianten kan sawi tam em em agape hmangaihna-ah chuan phût lêt engmah a awm lo. A dawhthei a, ngil a nei bawk. Lee-a chuan mihring zingah agape hi hmuh tur awm lo hialin a sawi.

          Love at first sight awm tak tak leh awm tak tak lohah mi an inhnial fo. Mahni tawn loh thil huai tak taka sawi loh a tha ber. Romantic-ho chuan mihring hian a damchhungin mi tam tak a hmangaih thei a. Mahse hmangaihna diktak chu pakhat chauh a neih theih an tih bâkah mi pakhatin a duhthusam pakhat chauh nei theiin an ngâi a. Realist-ho erawh chuan mi tam takin hmangaihin hlim takin a awm theih an ti ve thung. Thenkhat chuan hmangaihna diktak chu vawikhat chauh neih theihah an ngâi a. Mahse vawi tam tak ngaihzawng nei a, hmangaihna diktak ni veka chhâl an awm ve tho bawk.

          Tin, sum leh pâi dinhmuna zir te, kan awmna rama zir te, leh thiamnaa zir ten mi kan lerin kan ler lo deuh niin mithiamten an zir a. D.Knox-a (1983) ten college zirlai 200 (nula/tlangval za ve ve) ngun taka an zir hnua an thutlûkna chu nula âiin tlângval an ler zâwk a, mipa zingah pawh college kal thar an ler zâwk zel. Mingo aiin mihangho an ler a, sâwn pai pawh an tam zâwk. Chu chu an retheih vang niin an ngâi. Japanese zirlaite chu an ler lo deuh a. Nupui pasal thlan chungchangah pawh an nu leh pate chu an fate kârah hnam dang aiin an la inrawlh thûk zâwk.

          Hmangaihna hian tui lianin hnâwl tawp tak tak a hnawl tel angin thil tam tak a hnawl tel thin. A thianghlim vek lo va, a tenawm vek hek lo. Tisa inittawnna te, induhsakna te, innêlna te leh awm fal veng veng duhnate hi hmangaihnain a ken tel zinga mite chu an ni.

          Tin, hmangaihna hian mihring mihrinna hi tisâng theiin an sawi bawk. Miin min duh/hmangaih tih hriatna chuan inrintâwkna te, lungâwina te a siam a. Thil thar tihchâknate leh engemaw ti taka nun duhnain a zui châwk e an tih lehzel chu!

          Hmangaihnain a ken tel pakhat chu thikthu a ni. Pathian pawhin mihringte a hmangaih avangin ‘Pathian thikthu chhia ka ni’ a ti.  Pins-a leh Aronson-a ten (1983) an zirna-ah mi za zela 75 chuan thikthu neiin an insawi a. Zaa 50-te phei chuan thikthu chhe hle niin an insawi. Upa lam aiin thalai thikthu a chhia a, mipa aiin hmeichhe thikthu a chhe zawk a, rilru lamah pawh an tuar nasa zawk a ni. Khawvela thikthu chhe lo ber chu Ammassalik Eskimo-ho khu an ni maithei. Mikhual duhsak entir nan pa ber chuan a nupui chu an mikhual pa bulah a muttir thin. Admiral Robert Peary-a hmar tawp kal pawh kha a nupui a pêk phal loh avangin an dem nasa mai a ni. Anni lahin an nupuite an pe phal nasa mai si a.

          Tin, hmangaihna hian thil a tithei a; ngam loh leh hneh theih loh pawh a nei lo. Tin, a man hi bituk theih a nih loh avangin a into hleih thei khawp mai. Chu tak chu a hlutna a ni a, tawrh a harsat em emna chhan pawh a ni. Samson-an chanchin tha thurûk hralh phah nân a hmang a. Josepha erawhin a hmingthat phah a. Davida thung chuan a mualphopui hle. Nitla sêng lova roreltu Edward-a meuh pawhin a lei lal puan ropuite hlipin a duhtak nena bahra khur laih a thlan phah hial a ni.

          Hmangaihna man to berte zinga pakhat chu 1200-1300 BC bawr vela Trojan War thlentirtu Menelaus-an Helen-i a hmangaihna kha a ni ngei ang. Helen-i chu Zeus-a leh Leda-i te fa niin Leda-i chuan Spartan lal Tyndareus-a a nei a. A naupan lai atang renga helen-i chu a hmêlthat avangin Theseus-an Aticca-ah a tlanbo pui a. Mahse an chhanchhuak leh thuai a.

          A han nula ta chu rimtu a ngah kher mai! Amah duhtu lal fapaho chuan inremna an siam ta hial a. Tuma tihbuai lohin a duhber a nei ang a, pasal a neih hnu-ah pawh a tulna apiangah an tanpui zel ang tiin. Helen-i chuan Meneleus-a a thlang a. Fanu pakhat Hermione-i an nei hman.

          Thawnthua an sawi danin Troy lal Pryam-a fapa Paris-a chuan Approdite-i chu pathiannute zinga ngilnei berah a puang a. Approdite-i chuan lawmthu sawi nan Paris-a chu khawvela hmeichhe hmêltha ber pêk a tiam ta a ni an ti.

          Hemi hnu lawk hian Paris-a chu Sparta-ah a va zin a. Helen-i nen chuan an va intawng ta a ni. An vawikhat inhmuhna-ah an induh nghal mai nge ni? Troy khaw lamah an tlan dun ta a. Meneleus-a chuan Helen-i chhanchhuak turin chhia chham a. Lal dangin puih an lo tum bawk a. Troy khaw rûn tur chuan an thawk chhuak ta mup mup mai a ni.

          Kum sawm zet an indo. Paris-a pawh indona-ah a thi. Helen-i chuan Paris-a nâu Peiphobus-a a nei leh a. Ani pawh indona-ah bawk a thi. A tâwpah Meneleus-a chuan Troy khua chu a chhu chhe vek a. Tin Helen-i chuan amah avanga indona chhuak leh mi tam tak an thi chu pawi ti em emin ngaihdam a dil a. Meneleus-a chuan a ngaidam a. An haw dun ta a ni. Thenkhat sawi danin Meneleus-a thih hnu-ah Helen-i chu Rhodes thliarkârah an tantir a ni awm e.

          Hmangaihna hi a to châng chuan to thei deuh mai a nia!

SEX

    Hmangaihnain a ken tel zinga pawimawh ber leh a vawrtâwp chu hmeichhiat-mipatna (sex) hi a ni. Sex kan tih avang hian zahmawh ngialngan sawi ka tum lo ve.

     George Bernard Shaw-an, “Sakhua, Politics leh sex te chauh hi mifing titi hona tlâk a ni,” a lo timathlawn lovin sex  hian mihring rilru a luah tam hle. A bikin mipain hmeichhia âiin an ngaihtuah nasa a, an sawi tam zâwk a, an insûm thei lo zâwk bawk.

     Tute sermon emaw angin Greek-ho bawk an sawi ve leh khanglang ila. Sex sawina thumal pahnih ‘erotica’ (eros) leh ‘thanatica’ (thanos) an nei. Erotica chu hmeichhia leh mipa duh leh duh, tihluihna awm miah lova hlim taka inpawlna hi a ni a. Hmeichhia leh mipa dinhmun a inchen reng bawk. Thanatica erawh chu mipain a châkna hrikthlâk nan chauha hmeichhia a mutpui hi a ni.

      Greek-ho chauh hi helama ril leh sawi tam an ni lo. Vaiho tak khuan a nia hre rila chhui ril chu ni. Isua pian hmâ fê atang tawh khan sex chungchangah thuril pui pui an lo khel tawh a. Vatsyana Kamasutra-ah chuan hmeichhiat-mipatna lam thil a inziak chipchiar kher mai. Nandi-an sex chungchang a ziah phei chu bung sangkhat zet a nia sin.

Khawvel hnam tinin sex chungchangah ngaihdan leh tihdan (customs and practices) kan nei vek a. A inang lo thei khawp mai. Nupui tam tak nei chite, pasal pakhat aia tam nei thiangte an awm nuk mai. Solomon-an nupui 700 leh hmei 300 a neih thu hi a lar hle a(I Lalte 11:3). Nupui ngah ber emaw te pawh kan lo timaithei. Nupui ngah lamah chuan Vijayanagar ram vanglaia an lal Deva Raya II (AD 1422-1446) khan Solomon-a chu a khûm chiang hle. History of Mediaval India [V.D.Mahajan. S.Chand amd Company (Pvt) Ltd.New Delhi] in a sawi danin nupui 12,000 a nei a. An zinga 4,000 chuan ei rawngbawlsak turin a kalna apiangah an zui a. Chutiang zât vel bawk, tlêma hmêltha deuhho chuan sakawr chungchuangin an zui bawk a. A bâk zawng chu pahovin an zawn thin. A nupui zinga sanghnih-sangthum vel chu a duhsak bikte an ni a. Lal thih hun huna halhlum ve nghal tur an ni.

Hetiang lam chanchin hi chhiar peih chuan vaiho khuan ngaihnawm tak tak an lo ngah khawp mai. An pathian Siva leh a nupui Parvati inkâr thu ringawt pawh ngaihnawm ve tak a ni. Mahse kan sawi lo vang; a sei lutuk dâwn. Sex chungchanga hnam hrang hrang tihdan inan lohzia i han sawi kâi daih teh ang.

Central India-a Muria Baiga thalaite chu nula tlangval zalen takin an khawsa thei a. Inneih tumte kârah sex hi an serh lem lo. Palavan mite chuan nula chu kum khat vel an thenawm hnai mipa inah duh duha an mutpui atan an dah thin a.  Africa chhak lama Kipsigis mite phei chuan nula/tlangvalte chu inngai ngei turin an fuih thung a. Nula chu a lo rai palh pawhin a raitu chuan a nei ngei tur tihna a ni chuang lo. A ching lo tihna a ni mai a. A fa chu a pasal turin a rawn enkawl a, vanneihna-ah an ngâi zâwk.

Zulu-ho erawh chuan inneih hmâa sex hman chu nasa takin an khap a. Sakhaw thil tihna-ah an kawmserh hial a ni. Kgatla mite pawhin sâwn pai chu an hmusit hle a, an au nawmnain an deuhsawh thin hle an ti. Africa-a Nuba tlâng mi Korango leh Mesakin-te erawh chu an zalen kher mai. ‘Kel ang chauh’ an ti. Congo rama Ngmobe tlangvalte chu an duh hlen tur nula an hmuh hmâ loh chu nula tam tak bulah an mu lâwr phawt thin. Hei hi kristiana siam an harsatna chhan ber pakhat a ni.

Inneih hmâa sex hman zalen leh zalen loh hi hnam tin zingah mipa lalna leh hmeichhe lalna an nih leh nih lohvin a hril thui hle niin an sawi bawk. Pacific tuipui chhim lama Marshall thliarkara mite chuan inneih hmâa sex hman hi an la thutak tehchiam lo va. Sâwn paite pawh an hmusit lem lo.

Gilbertise-ho erawh chu an nupui te virgin leh gin  loh chungchangah an khermei hle a. Hei hi a chhan chu mipa an lal vang a ni. Marshall thliarkar mite chu rokhawm chungchangah hmeichhe lam an lal a, Gilbertise-ho erawh chu engkimah mupa an lak hrâk mai. Muslim-ho pawh mipa an lal a, nula thianghlim ngei an duh hi.

Middle Ages laia kohhrante pawh khan sex hi an do hneh lo hle. Kohhranin an khap nasat poh leh bawlhhlawh taka hmanna a pung emaw tih tur a ni. Kohhran zirtirna zawm te chu sawi loh; mi tam takin sex-a insum chu hrisel lohna niin an ngâi a. Doctor tam takin an damlote chu uar zawka sex hmang turin an fuih hial a ni.

Nawhchizawrh a lar hle. Vantlâng mamawh, khawtlâng nunphung pangngai ve rengah an ngâi a ni.Kohhran pawhin an ngaithei em em bawk. English-ho phei chu an nasa zual. Boniface-a sawi danin Italy leh France ramah velah English nawhchizuar awm lohna khua a vâng hle.

Crusader-ho khan khawchhak atangin vamtlâng bual in an ching chhuak a. Nula/tlangvâl tân hun remchang neihna hmun a lo ni a. Tuna nawhchizawrhna hmun-brothel lo chhuahna hi a ni. Henry II khan hetiang vantlang inbualna hman dan hi a siam a, Edward-a leh Henry IV te khan kum zabi 17-na thleng khan an hmang a ni.

England-a Cardinal pakhat phei chuan kohhran sum tuak nân hetiang brothel hi a lei hial a. Nawhchizuarho sum lâkluh za zela sawm chu kohhran hnena pe turin an rawt a. Mahse hei hi kohhran rorelna sâng zâwkah a tlang ta chiah lo a ni awm e.

France ramah pawh Avignon lalnu Queen Joanna chuan nawhchizawrhna hmun a siam a. Sigimond-an Constance (Germany) a tlawh tum pawhin nawhchizuarho chu khawpui pawisain kawr thar an leisak vek a ni.

Hetih lai vel hian saruaka vantlang bual in kal chu zahthlâkah an ngâi lem lo. Charles II hun lai phei chuan saruaka lal hmâa inlan chu milian fanute intihtheihna ber a ni. Ulster(Ireland) lalnu leh a thuihruai nula 610-te chuan kawnga chin chung lam ruak vekin Cuchulain-a an lo hmuak a. An lo lawmzia entir nân a rualin pawnfen an lo hlim khum suau mai a nih chu!

Mizo upain khau hel rim nam (virgin) an tihte chu an hlut lem lo kher mai. Inneihna thutiamte pawh inenchhinna ang lek a ni. Lalnu Mebho-i pawhin tlangval dang a neih chu a pasal laka uan nân tak a hmang a. Sualdam-a pawhin lal Conchobar-a farnu midang fa pai lai chu a nei a. Tin, lalfanu Findabair-i chuan a nu hnenah an piah lawk camp atanga palai rawn kal chu a duhzawng tak a nih thu a hrilh a. A nu chuan, “I duh a hnu zan inah va riahpui ta che,” a ti hmiah mai a ni.

Chutiang boruakah chuan sâwn nih pawh a zahthlâk lo hle a ni ang; William the Conquer khan William the Bastard (Sâwnchhe William-a) tih zu haw hauh lo va! Charlemagne, Charles Martel, King Arthur, Gawain, Roland, Conchobar leh Culuchain-a te pawh sâwn nia sawi an ni.

Leo Tolstoy-a ziak ‘War and Peace’ tih bua Princess Catherine Semenovna-i leh Prince Vasili-a te Pierre-a rokhawm chungchanga an inbiakna atang hian sâwn dinhmun chu a hriat theih awm e; chiang vak lo chuan.

Hnam hrang hrang tihdan kha han sawi leh daih ila. Hopi Indian naupang zingah sex an phal zâu viau. Nula/tlangvâl  nih hnu-ah tlêmin an khirh ve deuh chauh a ni. Pacific thoiarkara hnam thenkhatte erawh chu an khirh em em thung. Mipa naupangte chu hmeichhe bul hnaia awm pawh an phal lo.

Trobiand thliarkar mite chuan nulat-tlangvâl laia inpawl chu an pawi tilo chang ni lovin inneih zirna ang lekah an ngâi a ni. Nula tlangvâl tawh phawt chu an zirtir a, an phal zâu hle. Central Gilbert Island-a mite chuan sâwnpai chu an tihlum hial a. Lepcha hmeichhe naupang kum 12 chung lam chinte erawh chuan regular takin sex an hmang tawh thung. Kan inang lo hlawm kher mai.

Africa-a Ila mite chuan buhseng laiin an nula chu in te reuh tê an saksak a. A tlangval duh ber nen duh tawkin an awm dun thei. He hnamah hian a hmeia pain kum sawm chunglam virgin an awm mang lo an ti. Tepoztlan Indian (Mexico) ho erawh chuan an nulate chu tlangval biak hrim hrim pawh an khap bur mai.

Hmeichhe uirê kan huat dan pawh a inchen lo. A tlângpuiin hnam tin zingah mipa uirê an tam zâwk zel. Hmeichhe uirê pawisa vak lo hnam pawh an awm ve tho bawk. Siberia-a awm Chukchhe hnamte chuan mikhual bula an nupuite muttir an ching a. An zin ve hunah rul lêt ve ngei turin an beisei bawk.

Nupa kâra sex hman duh dan pawh a inang lo nasa. Bolivia rama Siriono Indian-ho chuan mi awm lâi pawh nise fit sawm vela hlâ-ah chuan nupa chu an che dun zel tawh mai a ni. Hnam thenkhat zingah pawh midangin lehlam an hawi hleka nupatna hmang duh mai an awm.

Brazail rama Rucuyen leh Pacific tuipui thliarkar Caroline mite chuan zana nupatna hman an duh lo. India rama Chenchu hnamte chuan zana nupatna hman a nih a, nu chu a lo rai chuan an fa chu a mit a del dawnin an ring tlat bawk.

W.F.Kenkel-an (The Family in Perspective. Santa Monica, California. Good Year.1977) New Guinea thliarkara Trobiand hnam a zirna-ah Trobiand-ho chuan nu raina chhan chu nupa inpawl vang ni lovin thlarauvin a raitir niin an ngâi a. Pa ber chu kum khat lâi pawh zin bo se, a awm loh hlana a nupui lo rai chu uirêa puh lovin a awm loh hlanin pathian thlarauvin an in chhûng a tlawh tihna-ah a ngâi a, a lawm em em zâwk a ni.

Sex leh Hlimna

          Robinson-a leh Jedlicka ten 1965, 1970, 1975, 1980 chhova college zirlaite sex hman dan an zirna-ah chuan sex-ah tlangval aiin nula an thang nasa zâwk a. Ameica rama naupiang za zela 19 chu sâwn an ni. Kum 1980 daih tawh khan college naupang za zela 77.4 leh nula za zela 63.5 ten  sex an tem tawh a. Mingo aiin mihangho an nasa zâwk a, an thianghlimna pawh chawh rualin kum hnih zetin an hloh hmâ zâwk bawk.

          Sex hi nupa kârah hlim taka hman tur a ni a. Mahse mihring chak lohna avangin Pathian remruatna ang pawhin kan hlimpui ta lo a ni. Walt Whiteman-a kha prophet of sexual love tih a ni a(Walt Whiteman. Selelected Poems. Unique Publisher. N.Delhi-24). Ani meuh pawh khan a hlimpui famkim bik emaw chu hriat a ni lo. Sex hi kan hlimpui vek lo mai pawh ni lovin, thenkhat phei chuan an tahpui tlawk tlawk a ni. A bikin hmeichhehovin an tuar nasa lehzual.

Pâwngsual

        Mipa chuan a chakna hmachhuanin hmeichhe a pâwngsual fo thin. Tin, hmeichheho pawehin mipa chak, huaisen, an thlavang hauhngam tur chu an ngaisang zel bawk. Ramayana-ah chuan Rama chuan Janaka fanu Sita-i neih tumin sairawkherh khauh tak mai a kuai tliak tih kan hmu a. Mahabharata-ah pawh Arjun-a chuan tuia a thla enin sangha a kâp fuh a, lal Drupad-a fanu Draupadi a hlawh tih kan hmu bawk. Kan hmu ti ila, thil hre hre zâu zâwkte ziak ka chhiar ve mai an ni.

          Pâwngsual hi tawngkam lar tak a ni. Sâpho chuan hming hrang hrang an vuah a. Chungte chu:- (i) Forciful Rape- tihluihna leh vauna nena mi pâwngsual hi a ni. (ii) Acquaintance Rape – inhmêlhriat hnâi, lo inngaizawng reng tawh emaw, thian tha anga lo inkawm reng tawhte rin loh taka inpâwngsual thut ang hi a ni. Hei hi forciful rape a ni thei tho bawk. (iii) Marital Rape – Nupa pawh nise duh lo chunga inpawl luih chu pawngsual anga ngaih a ni. Tunhma chuan USA leh Canada-te chuan crime-ah an chhiar lo va, mahse tun hnu erawh hi chuan inhremna tham a ni ta. (iv)  Statutory Rape- Kum tling lo pawngsual ti mai ila, an remtihna pawh nise kum 18 aia naupang chu mutpui thiang a ni lo. An kum a naupan ang zelin hetianga kum tling lo pawngsual/mutpui hi a hremna pawh a nâ a ni. (v) Rape of Men- Pawngsualtu-ah hian mipa kan puh deuh chawt thin a. Mahse hun thar lo inher zelah hian hmeichhiate pawhin mipa pawngsual theih a ni a. Mipa leh mipa, hmeichhia leh hmeichhiate pawh inpawng sual theih a ni tho mai a. Chutiang chu rape of men an ti.

          A tlângpuiin pâwngsual hi hmêl inhresate chungah a thleng tam ber a, hmêlhriat ngai miah loh inpawngsual chu a thleng khât zâwk hlea sawi a ni. Puitling upa lam aiin kum 25 hnuai lam pawngsual tâwk an tam a, pâwngsualtute hi an pâwngsualate aiin an upa deuh zel bawk.

          Indona chanchin kan chhiara piangin pawngsual a lar em em zel. Sakhuana hming châwia indona-ah meuh pawh a hluar zâwk emaw tih tur a ni. Muslim indona thianghlim nei chuan ringlo mi an tih hmeichheho pawngsualtu chu vanram kai ngei turah an ngâi a. A sawi uar deuhho phei chuan Christian Crusader-ho pawh khan Muslim hmeichhe pâwngsual chu an kal chhan pakhat (holy mission) ang hialah an ngai e an tih chu.

          Hmanlai Greek-ho pawh khan pâwngsual chu indona chikhat ang lekah an ngâi a. Nietsche-a phei chuan, “Mipa chu indo tura zirtir tur an ni a, hmeichhiate erawh chu pasalthate nawmchenna tur an ni,” a ti. Indopui Pahnihnaa General lar tak, kapathira roreltu an tih George S.Patton Jr pawhin Morrocco lal hnenah, “Theihtâwp zawng ka chhuah naa pawngsual hi ka sipaite zingah hian a awm ve tur reng a ni,” a ti e an tih chu.

          America independent sual laite, French, Russia, Chinese revolution lai ten hmeichhiain an tuar nasa em em a ni. India leh Pakistan inthen dawn lâi vel te, Vieatnam buaina-ah te pawngsual a tam em em a. Irag sipaiin Kuwait hmeichhia an pâwngsual nasatzia pawh sawi hat a tling. Bosnia indona-ah pawh hmeichhiain an tuar nasa hle nia sawi a ni.

          Kum zabi 20-naah khan khawvel deng chhuaktu pâwngsual a thleng nual. December 1939-a Japan sipaihovin Nanking hmeichhia an pawngsual kha a lar hle a. Ni khatah sangkhat vel zel pawng sual ang an ni. Tin, March 16, 1968-a Vietnam khaw pakhat My Lai-a American sipaiin hmeichhia anpawngsual kha a lar hle bawk. December 1971-a Pakistan sipaiin Bangladesh hmeichhia nuaih hnih zet an pawngsual pawh kha sawi hat a tling ve a ni.

          Susan Brownmiller-i chhût danin lal zingah AD 546-a Rome hnehtu Ostrogoth lal Totila chiah kha pâwngsual khaptu a ni. Totila chuan a sipaite chu Rome hmeichhia reng reng khawih lo turin thu a pe a ni. Tunlaia pâwngsual tamzia leh a kaihhnawih chanchin han sawi zel pawh a châkawm viau naa duhtâwk ila a tha awm e.

          He thu ka ziah lai hian fel fai deuh zâwk leh chipchiar tak, lehkhabua siam tum ka ni a, mahse ka thiamna leh ka phur zual laia ka hun neihin min daih lo va, mumal lo deuhin ka chhuah ta a ni. Mahse ka ziak chin chinah hi chuan chhiartuten in bengvar phah ka beisei.

-        He thu hi Pune ka awm lai, kum 1994-95 chhova Spicer College library tlawhchhana ka ziah a ni.