Praise and Worship.

Thuhmahruai

      Tunhma deuh, kum 2002 vel aṭang khan ni maw? Mizoramah zaithiam an rawn pung deuh hluai mai a. A thiam lah an thiam hlawm narawh. Pathian hla sa an pung a, lêngzem hla sa an nêp bik hek lo. Demand channel han hmet ila hmêl thar an inlar deuh fo bawk a. Mihring tlêm ngaihtuah chuan zaithiam ngah pâwl tak kan ni mai thei; hriat ni suh. Tin, kan zaithiamte hi North East India state dang mite hian an lo hre ve viau mai. Nagaland college pakhata thawk Naga nula pakhat ka kawm chuan Mizo zaithiam hming leh an hlate a hre hle. Nagaland vêkah hian thingtlang khaw pakhata Mizo zirtirtu thawk Catholic Sister pakhat chuan a sikul naupangten Mizo zaithiam an ngaihsan thu leh Mizo ṭawng thumal an zawh phah fo thu min hrilh bawk. ‘Mizo hla ka neih loh ṭha ṭha an nei,’ a tia lawm. 

Zaithiam an pun rualin tunlai hian Pathian biak dân chi dang deuh, praise and worship an tia maw ni hi a lâr ṭan leh ta viau mai a. Sâp ngaisang reng renga buai, an hmaa ṭhingṭhi lo chauh; nupui/pasal atana hnam dang neih haw em ema insawi, sâp nei an awma ropui ta viauva ngâi, chanchinbu-ahte meuh chhuah ṭhin leh interview ṭhin hnam kan ni bawk a, praise and worship tih pawh hi kan tilâr dawn khawp mai. Bengali ṭawnga a tlukpui ‘Dharmia Anusthan’ tiin inkhawmah mi sawm ila kalkhawm tur kan awm ngût angemaw chu(?). Thenkhatin “Chawimawina Thûk” titen an lo sawi bawk a. A bu meuh siam pawh kan awm tâk hi. Tin, praise and worship ti deuh ngata kan inhuikhawm theihna chhan leh Tuikuk hming Jonorama etc., aia sâp hming Linda, Richard etc., put kan duhna chhan hi thil inhnai tak niin ka hre bawk. Kei chuan tuna kan inkhawm dân pangngai, zaithiam leh thiam lote pawhin chanvo thuhmun kan channa, kan tihdan pangngai tluka praise and worship, chawimawina thûk hi awm chuangin ka hre lo a ni. Mahse tunlai praise and worship hi ka sawisel tihna a ni lo a nia. Ka tui pha meuh lo ka tihna a ni ber.

            Engpawhnise zaithiam an lo tam a, zai lama hma kan sawn tak viauah chuan kei, zai lama mi rual pâwl pha lo ber hian mi sawi ngai loh lam rimawi chanchin chu kan sawi ve daih teh ang. Heta ka thu ziahte hi zirtir neia ziah tum ka ni hran lo lehnghal.

            A tlangpuiin kohhrana thil thar engemaw seng luh a nih hian a do pâwl leh chutiang tihdan thar do chu kohhran humhalhnaa ngâi tlat ṭhin an awm zel a. Tihdan hlui vawn bur mai kha thlarau bik riauvin an hre ṭhin. Mahse chutianga tihdan hlui an vawn tlatte pawh kha tunhma lehzuala ringtuten an chin thar tirha inhnialna chawk chhuaktu, kohhran tibuaitua an ngaihte kha a lo ni ve tho fo ṭhin a. Chutiang zinga lar tak pakhat chu hla leh rimawi chungchang hi a ni. Tlêm kan sawi ang.

Kohhran Hmasate Aṭangin

Kristian hmasate kha Hebrai culture aiin Grik culture-in a chim nasa zawk a, Grik ṭawng pawh a lar zawk a, Thuthlung Thar pawh Hebrai ṭawng ni lovin Grik ṭawnga ziah a ni. Chuvangin ringtu hmasate Pathian hla chuan Hebrai lam awn lovin Grik milem beho sakhaw biakna hla thlûk lam a awn zâwk. Kum zabi palina velah hla phuah thiam French mi St. Hilary leh a thih hnua rawn chhunzawmtu St. Ambrose-te hming chu kan hre mai a. Hmasawnna em em awm lovin Pope Gregory Ropuia(590-604) khan  Gregorian Chant an tih kha a rawn siam chhuak a. Chu pawh chu tunlaia kan hla ang tak tak hi a ni lo. An chham deuh ruah ruah ani ber e. Tin, hetih hun lâia an hlate hi puithiam leh zaipawl tih loh mipui inkhawm nazawngin an sa ngai lo.

Kohhran hmasate chanchin kan chhiar zel chuan Roman Catholic kohhran chuan biak inah hmeichhiate zai ve an phal lo va.  Zaipawla a soprano  sa tur leh zai tur hrim hrim chu mipa naupang zinga zaithiam aw tha deuhte til an rehsak (mipa thei lo turin an siam) thin. Hetianga mipa naupang zai tur til an rehsakte hi castri an ti a. Castri zingah hian zai lama mi lar tak takte pawh an lo awm tawh thin a. Chung zinga lar ber pakhat chu Italian mi  Carlo Broschi Farinelli-a(1705-1782), Andria-a piang kha a ni. Hetianga  soprano sa tur mipa naupang til rehsak hi Italy-ah chuan kum 1878-a  Pope Leo XIII-a pope a rawn nih thleng khan an uar viau a ni awm e..

Tin, tunhma chuan rimawi hmanrua an khap bur a, hla part hrang hrang sak  pawh phal a ni lo. Hun a lo kal zela biak ina hmeichhe zai an phal ve hun a lo awm a. Chutah pawh chuan mipa nena zai rual kha an la phal chuang lo; hmeichhiat mipatna rilru a kai tho, a sexy lutuk an ti a, an vêng atanga an hnawhchhuah ve leh ve loh phei zawng kan hre lo.

Reformation Hunlai vel

Tun hma chuan Catholic Sam hla bute kha an sa tam deuh ber a. Chung an hla sakte chu a mawi lovin mi rilru a hneh lo em em mai a. Kohhran a timuthlu a ni ber e. Martin Luther-an Siam Thatna hna rawn ṭanin hla thar sak nuam tak tak a rawn phuah ta a. =henkhat ngaihdan phei chuan heng a hla tharte hian All Saints Church (Castle Church), Wittenberg-a Ninety-Five Theses a tar âi khan ram a la zau zawk hialin an sawi a ni. A hmêlmate meuh pawhin an pha lo. Jesuit pawl ami Adam Conzenius-a phei chuan, “Luther-a hlate hian a thusawi leh ziak âiin mi thlarau a tichhe hnem zawk” a ti. A hla  tharte chuan Germany dung leh vang a fang chhuak a, kawtthlerah leh biak inahte a ri chuah chuah mai a ni. Luther-a chuan rimawi hi a dah sâng hle a, theology dawta Pathian thilthlawnpek ropui takah a ngai a ni.    

Amarawhchu hetiang tak hian Luther-a hlate hi Germany-ah chuan lar mah se kohhran hruaitu hmasate kha hla chungchangah hian an ngaihdan a inpersan nasa khawp mai. Zwingli-a chuan kum 1524 khan Catholic kohhranin an hman chi rimawi tum rik theih reng reng chu a do bur mai a. Hemi kum hian Zurich khua (Switzerland) magistrate chuan khawpui chhunga organ zawng zawng chhut chhiatna tur thupêk a chhuah a. An chhu chhe ta chur chur mai a ni. John Calvin-a phei chuan tunlai Pathian hla lar (hymn) ang chi leh rimawi hmanrua hrim hrim hi a do bur bawk.

Calvin-a ngaihdan chuan Pathianin Israel fate rimawi hmanrua tum tir a phalsakna chhan pawh kha eng dang vang mah ni lovin rinna lama an la naupan vang chauhah a ngai a. Chuvangin rimawi hmanrua leh Bible pawn lama hla phuah (hymn) reng reng chu a do tlat mai a ni.

Tichuan chutih hunlaia Europe chu Calvin-a ngaihdan zawmtu leh Luther-a ngaih dan zawmtu pawlah an inṭhen ta phawk mai ti ila a sual hran lo vang. England leh Scotland ramin Calvin-a ngaih dan ṭawmin chu chu Pathian thupêk ni ngeiin an hre bawk a. Thupêk an chhuah a, an biak ina organ chu an chhu chhe ta chur chur mai a ni. Biak in chhungah Sam Hla zawla an phuah hla bâk sak an phal lo. 

Mahse Calvin-a duhdan anga Sâm thlûk neia siam ringawt chuan a tirah larin miin chawisang viau mah se a daih rei lo. Zawi zawiin Europe khawthlang lama protestant zingah hla pangngai(hymn) duhna a lo zual zel a. Amarawhchu chuti mai chuan miin an pawm thei lo. John Banyan-an a awmna kohhrana hla(hymn) lâk luh a tum pawh kohhranin an phel phah der a. Benjamin Keach-an kum 1673 khan Particular Baptist zinga (hymn) lakluh a tum pawhin an buai nasa mai a. A tawpa an inremna chu hla thar (hymn) sak duhho leh duh loho chu an  inkhawm chhâwk ang tih a ni.

Isaac Watts (1674-1748)

            English hla phuah thiam Isaac Watts-a chuan a hunlaia Sam zawl hla thlûkte chuan mi rilru a hneh lo tih a hre chiang a. Mi ril rem zâwng tak tur hla a phuah ṭan ta a. Father of English Hymnody tih hial a lo ni ta a ni. Mahse ani pawh hian harsatna a tawk nasa khawp mai. A hla phuah zingah chuan ‘Khawvel Lawm nan a lo kal a,’ tih te, ‘Khawiah pawh ni chhuahna apiangah’ tih te, “Isua kross mak tak chungah khan’ tihte hi a lar pâwl an ni a. Mahse heng hlate hi a hun laia kohhran member tam zawk chuan biak ina sak tlâkah an ngai lo va. Thenkhat phei chuan chutia hla a lo phuah ve ringawt chu Pathian sawichhiatna ang hialah an puhsak a. Kohhran atanga hnawh chhuah duh hialte pawh an awm ta. Kohhran a buai a, hla thar duh pawl pastor thenkhat an ban a, lung in tân phah leh pawisa inchawi tir hial an awm ta. A duh lo zual chuan biak ina hla thar an sak apianga hla dang saa lo tibuai tur mi an ruai bawk a; buai tak an ni.

Hetihlaia kohhran buaina hi sawi thui a ṭul awm lo ve. Zawi zawiin hla thar (hymn) chuan ram a la zau hret hret a. Isaac Watts-a hla chu kohhran pakhat chuan an pawm thei a. Mahse an ti leh lutuk a; Isaac Watts a hla lo hla thar dang reng reng chu an biak ina sak an khap leh bur bawk.

Isaac Watts-a chauh hi a ni lo; Charles Wesley-a te, Ira Sankey etc-te pawhin sawiselna leh dodalna an tawk nasa hle a ni. Kum zabi 19-na tawp lam 1895 bawr vela D.L.Moody leh Ira Sankey-te rawngbawl dun ṭum pawhin Sankey chuan reed organ a tum pek a. A lo ngaithlatu zinga inti duhtui pawlte chuan an lo ngaithei lo nasa mai niin, chutiang ramhuai hmanrua a hman reng chuan a ṭha lo zawk ang tiin Moody-a hnenah chuan an hêk a ni.

Roman Catholic-in zaipawl an nei ṭhin nge ni, protestant kohhran ṭhenkhat chuan ‘pope thil’ tiin an biak ina zaipawl zaitir an phal loh phah bawk.

America Ram Lam

America rama Puritan lût hmasa ho chuan biak in chhunga organ lâk luhte chu thil ni thei lo tawpah an ngai a. Kum tam tak chhung chu inhnialna tham a ni. Boston Hmar Kohhran pastor C.Mather-a phei chuan biak ina organ meuh lak luh anih chuan rimawi chi hrang hrangte pawh lakluh ani ang a, lâmnain a zui thuai ang a ti.

Mahse zawi zawiin boruak a lo inthlak a. Kum 1770-ah Providence-a Congregational kohhran chuan an biak ina organ lakluh chu an phal ve ta a. Boston khuaa Brattle Street Kohhran pawhin an inhnial fê hnu-ah England aṭanga chah thlâk an remti bawk a. Mahse an han chah thla ta chiah a le, an buai phah nasa ta mai. An kohhran mi tam tak chuan khawvel aia Pathian hmangaih inti ringtuten chutiang sual lian organ-te ang an biak in chhunga lak luh an remti thei chu mak an lo ti em em mai a ni.

Tunah hi chuan piano-te hi  sual em ema ngaih a ni lo va. Mahse kum zabi 18-na hun laia kohhran ṭhenkhat tan chuan biak ina lak luhte chu thil tih awm loh lutuk a ni. Moravian(kum zabi 18-na) hote erawh chu an zau deuh hlek a. Violin tih loh chu biak inah rimawi hmanraw chi hrang hrang  hman an phal a; mahse violin erawh chu ‘Setana hmanrua’ tiin an khap bur thung.

Tichuan….

Heng kohhran hrang hrangte hian ram dangah missionary an tir chhuak sung sung a. Mizoram pawh Calvin-a zuitu ram Wales leh England atangin chanchin ṭha min rawn hrilh a ni a. Kan missionary sâp hmasate background enin Pathian biak nana Mizo khuang leh hla thlûk an rawn duh lo nghal em em mai kha a lo mak vak lo; an tih awm reng a lo ni tihsak mai teh ang. ■■

A Kar Awl Hnawh Khahna Mai Mai

Mizo Kristian hla hmasa ber chu:

Isua vanah a awm a, 

Khawvelah zuk lo kal a;

Mhring angin a lo awm, 

Keimah min chhandam turin;

Bible-ah ka hmu thei e,

A va ṭha kher em ve aw,

tih hi a ni. 

An hla ṭhenkhat chu:

Khasi te, Khasi te, Vaiho te, Lushei te,

Kan zain pumkhat kan ni.

Ka inpe, ka inpe, ka pumin ka inpe,

Ka pumin mi la ang che.

Thei thlum tak (3) ti rah rawh,

Ti rah rawh, harhna thei chu.

Mi tam tak an thi e, harhna lovin,

Ka harh ta e, ka harh ta e. 

tih hlate pawh a awm bawk.

Kristian duh lohna hla a awm bawk a:

Mahni sakhua banin hmanhlel suh,

Zosap sakhua in biak danzia hi enga ti nge?

Patling pui mualah an au lung lung.

an tih khum ṭhin a ni.

Source: Lalnghinglova, Rev. 

Zoram Nghahchhan, p. 156, 157.

2^nd Edition, 2000.