Ka Pa Hmingin Thu Kam Hnih Khat

‘Dad, your sweet memory will always comfort me.’

Kum 1995 July thlaa ka nu boral \um kha chuan ‘Ka pa a la dam alawm’ tiin kan la inhnêm thei deuh a. Mahse August 26, 2009-a ka pa lehzelin min han boralsan kha chu a râpthlâkzia

leh khawhar thlâkzia mihring \awnga sawifiah ngaihna a awm lo va, chêtziaa tihlan sên a ni hek lo. Ka pâ thih vanga kan lungngaihna leh manganna te hi tuia len botir theih nise khawvel tui awm zawng zawngte pawh hi an tam tâwk lo va, a chhilh bo nan Mizoram tlang zawng zawngte hi rawt mam vek pawh ni ila, a la khuh zo chuang awm lo ve.

Ka pa ngâia kan lunglênna leh khawharna te hi kum khata hunbi inher chhuak zelte hian a la rawn tithar dâwn chauh a ni. Favang ni chhuak êng mâwi tak leh van dumpâwl thiang kûk maite khian a hmêl min ngaihtir ang a. Tlângkâr Zotui thiang luang del del leh phairuang thle siau siaute chuan min la vel nawn fo ang. Hunbi neia hram thin nungcha tinreng, rêngchal, ngirtling, chêpchêp leh daihnai vate hrâm chenin kan rilru tithartu an la ni dâwn si a. Tin, thlasik khaw vâwt seng seng leh krismas boruak belhchhahtu tlangsam pâr vul chêk chûkte chu kan mittui titlatu an la ni dâwn chiang mai. Thlasik zan boruak thiang kûk maia arsi chhiar sên loh phe neuh neuh leh thlasik kawng paw chik chêk kârahte khian ka pa hmêl kha kan la zawng leh ang a. Mahse chungte chu beiseina beidawnthlâk, duhthusam saruak, rauthla lêng mai an ni.

Thâl khaw ro hun a lo thleng ang a, kangvâr dum hiam huam leh khaw lum vung vung te, laiking bêl rawh mem mem leh khâm râng thâng ro hmun kâra vaube pâr vul chêk chûk te, fartuah pâr tlân sava hrâm chêl chulte chuan ka pa hova kan ramvah lâite kha min la ngaihtir hle dâwn a ni. Chutah \o haw hun a lo thleng ang a. Thlipui inmung boruak reh vung vung chu chhûm dum inhrosa let but butin a rawn zui ang. Chung vanrial rum leh khawpui ri dur dur kâra kâwlphe zuai zuaite chuan ka pa kan thlamuanpui \hinzia te kha min hriatchhuahtir dâwn a ni. Fur khua a chenin kan ngai zual deuh deuh ang a, khua a \hatin lunglên a kiam dâwn chuang si lo.

Tunhma chuan khawvel hi ka pa phên atang vekin ka thlir thin. Lungngaihna te lâwmna te, buaina leh manganna te hi ka pa a\angin ka teh a. Ka khawvel hmuh ve phâk Arabian tuipui kam tiaupho atanga Rûn luiin Chindwin a finna Kalewa khawpui inkâra thil hlâ leh hnâi ka tehna pawh ka pâ awmna Thingsulthliah khua vek a ni.

Kan tleirawl laia Pu S.Lalkâmlova min rawn tlawh chuan ‘Piangthar se sû lo mah ila nu leh pate thu awihna hrim hrimah hian malsawmna a awm,’ tiin a sawi a. Hei hi ka theihnghilh thei tawh lo. A thusawi dikzia leh nu leh pa thu awih hi damreina a nihzia chu hetiang hian han sawi ta ila. Hman deuh khân kan khaw thlanmual pahnihah kum sawm chhunga mitthi kum 40 hnuai lam leh an thihchhan ka chhui vak mai a. Chuta ka hmuhchhuah chu kum 40 hnuai lam thi zingah hmeichhia an tlêm em em a. Mipa thi zingah a tam zâwk fê chu chu nu leh pate thu awih lo leh a kaihhnawih vanga thi an ni. Vanduai vang liau liaua thi zawng an awm ve teh meuh e. Mahse an tlêm khawp mai.

Kum 2015 December thla khan College Veng leh Venghlui thlanmuala mitthi ka chhinchhiah leh a. Kum 20 chhunga thi tam ber chu mipa kum 21-30 inkar an ni a. A dawttu chu mipa bawk kum 31-40 inkar an ni. Mipa kan va thi naupang em

Nu leh pate hlutna hi hre ve viauin ka inhre \hin a. Mahse an dam lâia hria emaw kan intihte kha chu ‘A \hen pawh kan hre thei lo; he lui kam a\ang hian,’ tih hla ang chauh kha a lo ni. Tuna nu leh pa la neite hian in vanneihzia hriain in nu leh pate kha duat viau mai teh u. An thu pawh awih viau tur. Nu leh pate thu awihna-ah hian malsawmna a awm si a.

“I nu leh i pa chawimawi rawh,” (chu chu thupek tiam nei hmasa ber a ni). “Chutichuan, i tan a \ha ang a, leiah hian i dam rei bawk ang.” Eph 6:1.◊◊

A Kâr Awl Hnawh Khahna

Eng tik kum nge ka hre chiang ta lo. November thla tir emaw, October thla tawp lam emaw a ni ta awm e. Zanah len deng turin Tuirini-ah ka kal a. Kaihdêp suar leh Kanglui velah khuan ka zu dêng ve lauh lauh a. Ka man tlêm ngei mai. Ka beidawng chuan zan dar kaw rik hma hretin haw zai ka rêl a. Chutia haw tuma rilru ka siam lai chuan ka hma zawn hnimbuk kâr a\ang chuan naute \ap ri ang chiah hi a rawn ri chhuak ta ngâk ngâk mai a. Ka va phu chiang kher em! Hlau rilru tak chungin lui chu ka dai kâi a. Ka chhak lawka mi nul vah ro tawh chu ka hal eng ta hluah mai a. A alh \ha duh bawka thla a timuang huai huai mai. Meichher ka siam sawk sawk a, hmanhmawh fêin kan chhak kawngpui lam pan chuan ka kal ta a. Mahse ka meichher siam chu a lo \ha lo va. Ngaw thim chhah lai ka thlen chuan a thi dawn ta mai a. Rei fê ka beih hnu, thingkunga riah mai ka duh rum rum tawh hnu chuan eng tin tin emawni ka chhem alh leh thei ta hlauh a. Champhai Road chu ka han thleng ve ta hlawl mai a ni.

Kawngpui kilometer khat tling deuh tur ka zawh hnu chuan feh kawng pangngaiah ka kal leh ta a. Chutia kawngpui ka pensan hnu, teak hmun ngaw ka thlen hnu-ah ka meichher chu a thi leh ta a. Chumi \um chuan tihngaihna a awm tawh lo. Tichuan Champhai road kawng bul a\anga kan khua Thingsulthliah thleng chu thimthamah ka indap chho ta a. Thla a eng lo va, arsi eng hnuaiah kawng chu a lang deuh viai viai a. Dam thim laiah erawh chuan a hrehawm duh ngang mai. Hemi \uma ka len dêng hi ka hlawhchham haw si a, ka hah bawk si a, hlawk lo tak a ni. Hei hi kum 1990 tâwp lam emaw, 1991 kum tâwp lam emaw a ni.