Khawiah Tuan Che Maw?

Ka mikhualna khuaa vêng pakhat, Hmar Veng kawng hnuai bul maia Assam type rangva in chu han en mai pawhin a chhunga chengte khawsak dan tur awm tâwk inzawh a ngai lo. Mahse chu in leh a chhunga chengte chuan ka thinlung hi an luah reng a. A bikin an fate zinga upa ber, nula inngaitlâwm tak, khawvel mawina thil ropui inbel tur reng reng nei lo chuan ka khawvel nun hi a her danglam bawih a. Chu tak chu ka tana thawnthu ngaihnawm, thawnthu lungchhiatthlâk, mittui titlatu a nih avangin ka theihnghilh thei lo. Theihnghilh tum ila ka thei dawn chuang lo va, chuvangin ka tum buai lo law law.

Middle School sport lai a ni a. Playground sira sikul naupang zi mur mur leh sport entu mipui tlim hmur kârah chuan nula sam tawi hmeih hmawih, a koki vaw pha chang chang, hnawihsen vang ni lo, a pianpui tisa mawinain a ken tel avanga hmui sen ling hlar mai leh ir no chek mai chu ka va melh a. Vanneih asiamin kan mit leh mit chu a intawng siah; a zak sen ap ap chu hmuhnawm tham a ni. 

Kan inbiak hmasak ber tum chuan zahzum hmel takin a ṭawng bah deuh niai a. Ka hmêl en ngam lo niawm takin a kun ngaih a. Chuta a rawn hawi chhuak leh chu a nui var var a.   

An ina ka lên hmasak ber zan chuan keimah zâwk ka tawng tha ngam lo va; min lênpuitu ka ṭhianpa lo zei deuh lo phei se ka mualpho der ang chu. Sawi tur a vang thei khawp mai. Chumi zan ka haw tur chu sekawtrawlh thleng min thlah a. “Mangṭha mai le,” a ti zo chiahin inthlahrun hmel taka, “Naktuk zanah i lo leng leh dawn nia aw,” a ti zawm tluka chanchin ṭha dang awm thei hian ka hre tawh lo. 

A zan thumna-ah chuan an bangkil thlang lama an tape recorder te reuh tê chu a han zaitir a. Zan dangah pawh an zaitir fo, mahse chumi zan chuan zan danga a zaitir pawh ka hriat ngai loh, Dan Mc Cafferty-a chuan, 

      “Every single day
        I think of the times
       When you were still mine
       And I’m blue,”

tih hla chu a rawn thlawh ta vau vau mai a. Kan boruakin a zir bawk a, ni dang zawng aiin a mawi ka ti. Chu hla chu ka thinlungah hian a châm reng a. Chu hla vêk chuan he thu hi min ziahtir ta a ni. 

Engkim mai chu duhthusam a ni ber e. Chawlhkar hnih a han liam meuh chuan a tir lama rawn leng lût ve ṭhin tlangval dangte hmêl pawh hmuh tur an awm ta lo va; a nu leh pate pawhin dip enah min en lo. A kut bâwr lum thar thar ka vawnsak hmasak ber tum chuan a khur dar dar a. Min hnial lo na a, a zam hle tih hai rual a ni lo. Nula naran kut bawr te chu kan lo vawnsak nawk nawk tawh a, engah mah an ngai lo va, keini pawhin engah mah kan ngai lo. Chumi zan chuan thua sawifiah rual loh leh hlaa phuah chhuah rual loh thil eng eng emaw, inhmangaihte pahnih kâra thil pawimawh, damchhung daih hial tur, kan thinlung chhun tlanga kan rilru zawng zawng min khawrh chhuahsak vektu thil a thleng chho reng a. Sawi chhuah dawna thil ho tê, a tawngtu tâna sawifiah rual loh thil thleng chuan khawvel hi a tinuam hliah hliah mai a ni. 

Ni khat chu ṭhian zahovin an khaw hnuai zo luiah chengkawl khawrhin kan kal a. Lui kan zu thleng chu zat leh zata inthenin keini chu hmanhmawh lo fahran hian kan che a. Tlai haw dawn hnaih lamah chuan luikam phairuang phen, phul hlim dai nuam zet maiah hian kan thu chawl a. Mi mitmei vên tur a awm lo bawk a, kan inhmangaihna chu daltu awm miah lovin kan lan chhuahtir a. A hmun leh hunin a zir bawk a, khawvel hmun dang kan ngâi lo ngei mai.   

Kut inkhalhsak nauh nauh pah hian eng eng emaw kan sawi dun a. Kan inhmangaihna pangpâr lo vul chho mêk chuan duat leh lawm a hlawh ngei mai. Chu phul hmun nuam leh mâwi tak maiah chuan tudang mah ngâi lovin rei tak kan ṭhu dun a. Theih ni se chatuana lên dun mai pawh châkawm tak a ni.

Lui mawng lam aṭanga thlifim rawn thaw chho heuh heuhte chuan kan inhmangaihna chu a rawn chhêm alh hlep hlep a. Kan bul vel phaitual hnim thle siau siau leh phul pangpar vul chik chêkte chuan chibai mi bûk hian ka hre hial a ni. Chu October thla tâwp tlai lam ni dul raih mai chuan duat fahran hian mi rawn ên phêt mai a, rilru a hlim hliah hliah mai. 

Sava hram nak nak leh phêngphehlep thlâwk mem mem te, khuai thlâwk ri vang vang leh hnahthel inchhawk ri seng sengte chuan duhsakna min hlan ni hian ka hre vek tawh mai a ni.  Luang buk thle siau siau leh di hnah âwn dial dialte chuan kan inhmangaihna chu min lawmpui ve hian ka hre hial a. Van boruak thiang fai kûk leh dum pawl ruih maite chuan thinlung an tihlim veng veng mai zu nia! Ni e, hmangaihna-ah ngat zawng, Buckingham Palace luahtute kan awt lo va, Hollywood mawitu filmstar nalh tak takte pawh khu kan nau ve rum rum a ni.

Inngheng riala thu dunin kut kan inhmersak vawng vawng a ni ringawt lo va, mit tla lek lekin kan inen vawng vawng a ni ringawt lo; Napolean-a meuh pawhin a ropuina leh thiltihtheihna zawng zawng hmanga a zawn hmuh loh hmangaihna lunghlû chu chhar dun melh melhin chu hmangaihna boruak rimtui lêng chem chemin min thlenpui tur ram nuam sawi hleih theih loh, chhawrpial rûn nuam chu kan thlir dun a ni zâwk.

Kan inhmangaihna chu luite tui lian, rei lo têa liam leh vut ang hi ni lovin, zawi muanga phaizawl luipui tui a luang ang hian hmangaihna phaizawlah chuan hmanhmawh lo fahran hian kan luantir del del a. Chu bâkah naupang tê la ni mah ila, chhia leh ṭha hre rual, mawi leh mawi lo thliar thiam tur tawka harhfim reng kan lo ni bawk nen, kan inhmangahna chu tleirawl rilru so phut, liam pur pura dai leh ta mai ang kha a ni lo. 

          Hmangaihna hi tlai khat thil mai a ni lo tih hre rual kan lo ni ve ta bawk a. Chumi tlaia kan awm dun chuan a naktûk leh chu sawi loh, chatuan thlenga kan dinhmun tur suangtuahin vante khi kan han thlir chho va. Ni e, vante khian kan inhmangaihna chu min hriatpuia kan rin avang leh min lawmpui ve ngei tura kan beisei avangin Sodom leh Gomorra, Davida mualphona ram chu dâi ngam lo. Chu chatuan ram beiseina chuan kan inhmangaihna chu a timawi a, a tithianghlim a, min tihlim em em bawk. 

          Theih nise cham hlen mai pawh chakawm tak a ni. Mahse hunin min nghâk si lo va, kham lo tak, kut inhmersak vawng vawng chungin chu ram dai nuam tak mai chu kan hawsan ta a. 

          Ni leh thla a ral a, kan induhna pawh a la pângngai reng. Mahse khawvel chu keini pahnih duhdan ngawta her reng thei a ni si lo. Ni khat chu ka thawhna lama kan hotute hnen atangin khaw dang hla tak, mêl sang chuang fêa insawnna tur thupêk ka hmu ta a. Hna ka thawh dawna rinawmna thu ka tiam zawng zawngte kha sirah hnawlin chu khaw te reuh têah chuan ka cham hlen mai dâwn em ni? Rilru a buai nak mai. 

          Ka insawn hmâ zan, kan zan hnuhnung berah chuan ni danga a zahzum ṭhin tehreng nen; a zak zo ta bik lo va. Ka nghawnga mi uai pah chuan a chhing diar diar a. A mittui a tling piau va, chutah a rawn far fap fap a. 

 “I tel lovin engtin nge ka awm ang? Kal lo mai rawh.”

Kal lo thei ka ni si lo va, ka chhâng thei lo. Ni danga a hmui te chu a sen mawi a, a biang te chu a mâm nalh ṭhin nen, a hmui chu a dâng lêp a, a mittui luanna biang chu thinlung tihnim tur tâwk lek hian a râng niau lehnghal! 

Zinglam dâr hniha in ka thlen phei leh chuan sakawr sawi hlim ang mai ka ni,  ka thu zawi hnawk a. Ka tlaivâr chiang ngei mai. Zing ni chhuah rual velin chu khaw te reuh tê, map-ah pawh lang pha mang lo tur chu beidawnna kâra beiseina tlêm tê la awm nen chuan ka chhuahsan ta hnak hnak a.

   Engtin tin emaw kum chu a lo ral ve mai. Lehkha kan inthawn ṭhin a; mahse a khât tial tial. A kum hnihna chanve-ah phei chuan a reh ta hmak mai.

   Kan inthen atanga kum thum a pumhlum ṭêp tihah chawlh ka la a. Ka chhûngte hnenah chuan engtin tin emaw chhuanlam siamin an khua chu ka va tlawh leh a. Hmar Vêng kawng hnuai ka va thleng a, thin a phu dup dup mai. An kawt ka thleng chu an inhmun kha a lo ruak huai a. Tunhmaa Assam type rangva in dinna-ah chuan bawng in niawm tak a lo ding a. An choka hmun phei chu a awl der. 

Chutia hrilhai taka ka din lâi chuan ka hmêlhriat an ṭhenawm nula chu a rawn kal hlauh mai a. Thil awm dan ka lo zâwt. 

Khatia, ka insawn hnu lawk khan a pain nupui dang a nei a. Chutia chhungkaw chawmtu berin nupui dang nei ta daih chu a nu mangang chuan an khaw hlui lama a nuṭate belin a fate chu a pem pui a. Chuta an va pemna-ah chuan ka ṭhiani chuan humsual daiin thla khat kal ta khan pasal a nei a nih chu! Thil awm dan min hrilhtuin ‘humsual’ a tih tak mai chu tun thleng hian ka la hre thiam lo va, eng dictionary mahin min hrilhfiahsak lo vang. Zawh belh pawh ngaiin ka hre lo. 

Ka mitthla chuan a sam leng vawn vawn ka hui khawmsak lâia a nui ar ar te, ka awm bawra a biang no chek mai thukru pah a, “Kal lo mai rawh,” a tih lâi te kha a rawn lang zut zut a. Kan intawn hmasak ber ni aṭangin ka han chhui kir leh a. Ka rilru-ah chuan an tape recorder te reuh tê a,

“Every single day
I think of the times
When you were still mine
And I’m blue,”

tih hla kan ngaihthlâk dun thin kha a rawn ri leh a. Ni e, hmanah chuan ka ta a ni thin; kan pahnih chauha kan hlim dun theih zia kha ka theihnghilh ngai lo asin. 

          

“I don’t miss all the fun that we had
You were always around me”

Tunah erawh khaw’ nge a awm pawh ka hre tawh si lo. An khua ka chhuahsan hmasak tum aia beidawng zâwkin chu khaw te reuh tê chu damchhunga tlawh leh tawh ngai lo turin ka chhuahsan leh ta hna hna mai a. ☺☺