Kohhran Office leh Rawngbawlna

Chutichuan, in ei pawhin, in in pawhin, in tih apiangah pawh, Pathian ropuina tur hlirin ti rawh  u. I Korinth 10:31.

Thuhmahruai

          Mizoramah Adventist kan lo tam ve ta hle mai. Mihring kan tam ringawt a ni lo va, ram hmasawnna chuan kan hriat loh hlanin zawi zawiin hma min sawntir zel bawk a. Chu chuan hna min siam tam tial tial a. Tunah chuan kan kohhran office pawh a changtlungin a ropui ta hle mai. Hmanlai, kum sawmruk kal taa kohhran inkhawmpui zah zet kha office hnathawk ringawt pawh kan lo nei ta a. Hei hi thil kalphung pangngai ve tur reng nia a lan laiin a lawmawmzia lam ngaihtuah chuan Pathian hnena lawmthu sawi loh theih a ni lo. Hetianga hnathawktu lo pung ve ta zel chuan hnuh tel a ngah lo thei lo va, chuvangin tunhma lama thil ṭul lem lova ngaihte pawh kha sawi a lo ṭul ta a. Chutiang ngaihtuahna aṭanga he thu hi lo chhuak a ni. Sawi tur tam tak a awm thei a, a bu hial pawhin ziak dawn ila a ziah theih hial awm e. Mahse tawi te tein office hnaa hma kan sawn theihna tur lam chu han sawi ila a tha awm e.

1.    Office Hnathawk leh Hun Vawn Dik: Kan biak Pathian khi a hun taka che ṭhin leh a hun taka thil ti ṭhin a ni a. Chuvang chuan amah zuitu ni leh hun vawng dik nih leh hun ngai pawimawh mi nih hi a inhmeh  hle a ni. Tin, hun vawng dik tur chuan taimak a ngai a, chuvangin mi taima leh taima lo hriatna tha tak chu hun an vawn dik leh dik lohah thui tak a teh thei ang. Chu mai ni lovin hun vawn dik hi a zahawm a, a mawi a, ringtu nun nen pawh a inhmeh hle bawk. Office ṭan hun leh ban hun kan hria, sawi tam a ngai lo. Kan office register-ah hian kan kal hun leh haw hun dik tak ziah ngam tur a ni. Tin, Mizo Conference-a hnathawk tam tak chu office hnai te-ah in awm a. Register-ah kal hun pangngaia ziak ve thlap a, chhuan lam hmanga haw lailawk leh a, office kal tlai dangte ang thova dawr tur mumal in awm leh si lo (palh) a nih chuan kal tlai nen thuhmun reng a ni. He thlemna hi office bul hnaia awmte tan (sawrkar office te pawh an ni vek) do zawh a harsa ṭhin. Hun vawn dik dan phakar tak a ni.

Office-a awm tam leh ṭhut taimak hi hun vawn dik tih hian a huam telah ngai ila.  Pune khawpuia college principal hlawhtling tak, India sawrkar hriat thama mi thiam ril Prof. Nulkar-a khan mahni office-a kan ṭhut rei peih leh peih loh hian eng ang hruaitu nge kan nih a hril hle niin a sawi. Thil ṭha zawk leh hmasawnna tur ngaihtuah tur ringawt pawha office-a ngawi renga a ṭhut nilen ṭhin thu a sawi bawk. Office-a awm tam hi taimak ngai deuh a ni.

2. Dawr Nuam leh Biak Nuam: Kum 2015 tir lam khan bank pakhat ka dawr a. Mi kan tam hle. Kan tam satliah a ni lo; thil tih dan tur hre lo ve tak tak kan ni a, kan mawl hlawm viau mai. Chu kan mawlna chu pakhat chuan thinur nan a hmang a, amah dawrtute chu a vin deuh khur khur reng a. Amah pawh a hah tih a hriat. A piah lawka ṭhu vethung chuan kan mawlna chu fiamthu nan a hmang a, a nui huah huah reng a. Mi tizak chuang miah si lo khan nuihza siam nan min hmang a, kan mawlna tak chu hlim nan kan hmang a, a hmel hmuh a nuam a, amah pawhin nuam a tihle tih hai rual a ni lo. Kha mite pahnih kha ina an haw hun chuan hna inang reng thawk si kha an inhah hleih ngawtin ka ring.

Mahni thawhna office-ah pawimawh inti ve tawk taka kan ṭhut hian kan mizia a lo lang ṭhin. Chhungkaw lama kan harsatna te, kan thawhpuite chunga kan lungawi lohna te leh thil danga kan rilru hahnate hi min dawrtute chungah leh thawhpuite chungah tihlan palh (biak hrehawm khawpa awm palh) a awl hle bawk. Engpawhnise kohhran office zahawm tak, Thlarau Thianghlimin a uap rengna hmuna thawktu nih leh mi biak nuam leh dawr nuam, dawr nawn zel chakawm tak nih hi a inhmeh hle a ni. Mahni office-a kan ṭhut hian engmah ni lovin inhre mah ila rin aiin min dawrtute tan chuan  kan zahawm hma hle a. Induh nih pawh a awl hle.  Thingtlang aṭanga zak chung chunga lo kalte tana biak nuam lo deuha kan lo awm chuan an zahna a belhchhah a, an vui hma a, induh riauvin min hre thuai mai a ni. Tin, mi office-a len chang hian bo a awl hle. Ni tina lo ṭhu thinte tana engmah tham lo, thil ho tê kha mikhual tan chuan zawh nawn fo a ṭul thei. Hengte hi hre rengin kan thawhnaah ṭheuh mi tana biak nuam nih tum ila. Biak nuam satliah pawh ni mai lo; midang harsatna sutkiansak tumna rilru put zel tum ila, chu chu Pathian thu nen pawh a inhmeh hle a ni.

Inlengte thil lo hrilh nghek ringawt hi dawr nuam nihna a ni lo. Kan harsatna min ngaihthlaksak peih apiang kan ngaina; chu chu mihring mizia a ni. Mi harsatna ngaihthlaksak a, beng lo dawh hi mi kawm nuam nihna tura rahbi pawimawh hmasa ber pakhat a ni. Mi thusawi i ngaihthla taima ang u.

3. Office Bungraw Hman Chungchang: Ram retheia sawrkar hnathawk leh kohhran hnathawkte  tana thlemna do harsa ber pakhat chu office bungraw hman chungchang hi a ni awm e. Kohhran office bungruate hi zahawm taka enkawl tur an ni. Mimal tana hman chu a thiang lo tlukah ngai ila. Amaherawh chu chhiat-ni that-ni nei kan ni a, hengah hian loh theih loha hman a ngaih chang zawng a awm lo thei lo awm e. Chutiang thleng thleng chuan kohhran member-te hi kan thikthu a chhe hauhin ka ring lo. Ramri erawh kham fet deuh ila a ṭhat ka ring. Rev. Dr Zairema kha vawikhat chu a nupuiin a dawhkana lehkhapuan phek khat chu naupang tan han lak mai hi a tum a (chutih lai chuan an quarters kha office a ni nghal a). Mahse ani chuan, “Hei hi chu Synod ta a ni. A theih loh,” a lo ti tlat mai niin an sawi ṭhin. Kan hnathawhna hmunah kan hah viau thei; kan ṭangkai satliah pawh ni lovin sum leh tha pawh kan seng nasa hle a ni thei, mahse chumi avanga office bungrua keima mimal hamthatna atana ka hman chu a thiang chuang lo. Zirtirtu ka ni. Naupang tan note-bu siamin ka sum leh tha pawh ka seng viau a ni thei; mahse chu chuan (kan sikul tan tho a nia tiin) office computer leh paper-te chu ka keima mimal tana hmang turin thiam min chantir chuang lo.

          Tin, office camera leh computer-a a enkawltute chhungkaw thla a lan tuarh hian a mawi lo hma hle bawk. Mimal thila kan hman chu thuhran ni se kohhran office bungrua, a bikin computer leh thil ri thei dangte hi khawvel hla ngaihthlak nan hman loh hram ni se a mawi ngawt mai. Love song-te hi ‘sual an ni e,’ zu tidawt thei lo mah ila kohhran office chhunga ri fo atan chuan a mawi lo deuh. Chutiang bawkin computer game-te pawh hi a mala sual tihngawt chi ni chiah lo mah se kohhran office leh computer game khelh chiam chu a inmawi chiah lo a ni.

4. Hriat Tur Hriat Ngei leh Hriat Loh Tur Hriat Loh Ngam: Mahni chanpual vuan ve far mai kan ni hlawm a. Kan hna vawn ṭheuh hriat chian tuma tan lak hi kan duty a ni. Chumi rual chuan kan inrawlh lohna tur thila inrawlh emaw, thil lo intihhriat ve chiam emaw kha awm thei tak a ni a. Hetah hian inven thiam a ṭul khawp mai. Mahni hna chanpual hriat tur awm tak hriat loh hi a ṭha lo va, chumi ruala kan hriat ve hauh loh tur thil engemaw hriat loh ngam pawh hi zir tho tur a ni. Driver chuan motor khalh leh a chhe siam han thiam viau mai sela. Chumi baka zin veivah velnaa hotute titi-khawchang a intihhriat lutuk emaw, a beng a chhit ve lutuk emaw kha a remchang lo fo thei. Chutiang bawkin hotute zingah driver tana motor khalhsak hrehawm khawpa lirthei khalh dan hria a awm theih bawk. Heng thil ho te anga lang hi thawh hona tichhe der thei a ni. President hriat tur a awm rualin fourth grade hriat tur a awm. Anmahni zawnah chuan an ṭangkai em em vek.

5. Incheina: Mizo culture leh sakhua leh incheina hi thil inzawm tlat a ni. Sakhaw thil tihna-ah reng reng, kan hnatlang dawn te a nih loh chuan kan inchei nalh hlawm viau zel a. Heti lam hi chu sawi thui a ngai awm lo ve. Incheina hi a mawi tawk a awm. Engtik lai pawha inchei nalh hlarh reng mai chu a ninawm ṭhin. Chuti chung chuan kohhran office-a thawk, Pathian rawngbawltute chu an hnathawhna hmunah chuan zahawm taka inchei turin kan beisei che u a ni.

6. Hotute Thupuan Ngaih Pawimawh: Mi ṭhenkhatin hotu ṭha leh ṭha lo kan tehna chu a ho hle; kan duh duha kan awm a, kan inthlahdah deuh chang pawha min khak lem lote hi hotu ṭha kan ti mai. A hotu lam tan pawh min tlawn thiam apiang leh min fak peihtu apiang kha hnathawktu ṭha emaw tih palh a awl khawp mai. Engpawhnise hnathawktu tan chuan hotute thupuan leh tihtur an sawi, entirnan, a hun taka office kal tur tih te, chhunah kal bo sek loh tur tihte, kal chhuah chang pawhin a rang thei ang berin office-ah haw leh tur tih te ang hi (kan thawhna sikula kan infuihna angin) ngaih pawimawh hi kan duty a ni. Chumi rual chuan hotute pawh an thupuan anga awm kha an duty ve tho a ni a, entawn tlaka an awm hmasak a ṭha. “Kal rawh u” ti ringawt lo va, ‘Min rawn zui rawh u,’ tih theih a ṭha hle.

7.  Mahni Hna Baka Inhman: Mizo zinga thil langsar tak chu mahni hna baka inhman buai em em hi a ni. |henkhat phei chu fiamthuin, “A eizawnna hna tih loh chu a thiam vek,” an tih ṭhin hi. A leha lingin mahni hna tui chilh bur chi, thil dang ngaihtuah vak loho chu kan hmu nikhua lo lek lek zawk a ni. Engpawhnise, hna kan nei a nih chuan chu hna chu kan dah pawimawh ber tur a ni. Mizo zingah mahni eizawnna hna aia larpui zawk thil dang kan nei fer fur hi a pawi hle. Mi fel teh nan kan hmang ta hial zawk emaw tih tur a ni bawk. Mahse keini chu Pathian rawngbawltute kan ni a, chuvangin kan hna chelh lai aia tuipui zawk, kan hna nena inzul lek lek, han sawi zawm mai theih ang chi hi kan ngah lo turah inngai ila. Inven lawk erawh a ṭha ang.

8. Kohhran Thiltihnaa Inhman: Mizo Conference hi Conference office-a thawkte ta, in thlazar hnuaia awm a ni a. Mizoram (Tripura leh Cachar huamin) Adventist mipuite hian kan thlir ṭhup che u a nih hi. Harsatna kan tawh changa kan thlamuanna leh inhnemna in nih avangin Mizo Conference office-a thawkte hi chu kohhran thiltihnaah reng reng a neitu chan chang thiam hle tura beisei in ni a. Hnatlan nikhua-ah pawh lan tam tur a ni. Kohhran activity hrang hrangah hian mi dang dip si lova a neitu chan in chan zel hi a mawi a, a awm viau bawk. In ṭawngkam hnih khat lek hian min thlamuanin min hnem thei hle a. Chuvangin laymen-te thiltihna (kohhran activity)-a intel tam hi a ṭha lehzual a ni.

9. Rawngbawlna leh Eizawnna: Conference office-a thawkte hi pawn lama miten Pathian rawngbawltu diktak in ni kan tih lai hian nangmahni zawk hian field-a thawkte ang em em ni lo deuha inhriatna neiin field-a mite tluk lo deuh hian in lo inen reng em phei zawng kan hre pha lo. Mahse hei hi hre nawn leh ang u: Pathian rawngbawltu in ni a. Chutiang ang chiah chuan kan en che u a, chutiang taka Pathian rawngbawltute awm dan tur dik taka awm tur chuan kan beisei che u a ni. Field-a mite rawngbawlna aiin in rawngbawlna hi nep bikah ngai suh u.

Tin, kohhran hna hi Pathian rawngbawlna a ni kan tih rual hian kan eizawnna a ni tel tihte pawh hi hria ila a tha ang. Sawrkar hnathawk ka hmelhriat pakhat chuan, “He hna hi ka eizawnna a ni a. Hei lo hi eizawnna dang dap turin ka remhriatna leh finnain a pha lo va. Chuvangin ka eizawnna hna-ah hian theihtawp chhuah ka tum a. Office pawh hi ka kal tlai mai mai ngai lo. Theihtawp chhuah hi ka tum ve tawp mai a ni,” tiin min hrilh. Eizawnna ni bawk, rawngbawlna ni bawk kohhran hna hi hna zahawm leh hna hlu tak a ni a. Chuvangin in hnathawh hi khawvel hna ropui ber ti ila kan uar lutuk hauh lo vang.

10. Kan Chhungte leh Office Hna:  Mahni hnathawhna hmuna chhungte hnuh luh hi thil ṭha lo tak a nih dan a awm. Office-a naupang kan hruai hian min lo lawmsak liam liam a. A ṭhente phei chuan min lo pawmsak lawp lawp bawk a. Mahse chutianga min lo pawmsak liam liamtute chuan nau hruai fo tur chuan min duh lo tih hriat a ṭha. Kan nupui/pasalte pawh kan thawhna office chungchanga ngaihdan lo sawi ve vak vak lo turin khap ila. Kan thawhna chungchang lo intihhriat vak kha an hna a ni lo; an hriat chian em em pawh hre lo ngam sela a mawi zawk a ni. Kan thawhpuite nena an lo inkawm ngeih a nih chuan a ṭha e. Hei pawh hi mi inveng thiam lo tan chuan a la pawi thei tho a ni.

11. Hmasawn Zel I Tum Ang U: Kan dai chin atang hian hma i sawn zel i tum ang u. Philipi 3:16-ah chuan, “Eng pawh ni se, kan thlen chin atang khan hma i sawn zel ang u,” tih kan hmu a. Hei hi a hnuaia note-ah chuan, “ ‘Kan thlen chin phu hian i nung zel ang u,’ tih theih a ni bawk,” tiin a inziak a. Tuna kan thlen chin hi eng pawh ni rawh se; hmasawn tumna tak tak nena kan thawh phawt chuan Mizo Conference hian nasa takin hma a sawn dawn tih a chiang a ni. Vawiina he laia rawn kal khawmte kutah hian Mizo Conference huam chhunga ringtu sing tel awm mekte hmasawn leh hmasawn loh chu a awm mek a. He laia awmte hian hma kan sawn phawt chuan hmun danga mite chuan min rawn zui mai dawn a ni. Kan mawhphurhna a san em avang hian hmasawn tumna nena thawh loh ngamna hi a ni lo ti ila kan uar lutuk lovah inngai ang u. Pathian nena ṭangrual a, a thiltihtheihnaa innghat chunga hma lam pan zel turin kan inngen ni sela. He Conference hi North-East India mai ni lo, chhim lam Myanmar leh Bangladesh ram thim thlenga chanchin ṭha khawnvar chhitu a nih theih nan i ṭang tlang ang u.

He thu hian a tawp i khar teh ang: “A tawp berah chuan unaute u, a dik apiang te,  a zahawm apiang te, a fel apiang te, a thianghlim apiang te, a duhawm apiang te, a thangmawi apiangte – thatna reng a awm a, fakna reng a awm phawt chuan – chung chu ngaihtuah rawh u. Philipi 4:8.

 Note: He thu hi April 30 (Thursday) 2015)-a Mizo Conference Office staff retreat-na, Nextcom picnic spot-a thu sawi tura min sawm ṭuma ka sawi a ni.