AIZAWL PA NUAMSA CHIAH LO

                  

                            

          Thingtlâng aṭanga harsa taka lehkha zir chhuak, naupang têa officer ni thei ka ṭhianpa chanchin hi a hua ang nge haw lovang tih hre hauh lovin Mizoram darthlalang a ni thei dâwn emaw tunlaia dana hming thupin han sawi ta mai mai ila. Mi pawi kan sawi thui lutuk lo vang chu maw!

Tunah hian matrict a pass hlima a phu hauh loh a college kalpui Aizawl pa hausa fanu kha nupuiah neiin a puzawn te in hmuna a sak in ropui zet maiah chuan a khawsa mêk a. Lehkha a zir lâia amah hah puitu a laina hnai, an harsat chang pawha an ban ber ṭhin thingtlâng lama a chhungte chuan an dam loh mangan tâwpah ti dêkin an sitting room an rawn rap dêk dêk ngam chauh tawh a. Chutihlaiin a nupui chhungte erawh chuan tim eih lovin an bed room te chu an pal tlang puat puat a. Choka lama an eitur dahna bâwmte chu an dap zung zung ngam si. 

Mahse ka ṭhianpa hi a awmna vêngah chuan pa fel tak, khawtlang leh kohhran tana mi tangkai a ni. Kan sawi zel ang.

A Awmna Khua

A awmna khua Aizawl hian khawvelah ber nihna pahnih a nei; cancer vei tamna ber leh khawvela hun serh ngah ber an ni. Heti khawp hian cancer vei tamin ni tin deuhthaw thih phah awm mah se cancer awm tirtu nia mithiamte sawi chu engahmah an ngai lova. Roreltuten puipunna hmun leh sawrkar office-a tih an khapna thupêkte chu sakhaw hruaitu leh tlawmngai pawl hruaitute meuh pawhin engahmah an ngai lo. Chu thupêk bawhchhiat avanga inman leh lei inchawitirte phei chu thil ni thei lo tawpa ngaih a ni a. Chuvangin chutiang thupêk awmze nei lo kenkawh tuma tan i lo la fâl a nih vaih chuan mi chêkngel, mi tikher kher tiin tawngtai inkhawm thupuiah an hmang duh hial zâwk ang che.

          Tin, hunserh an ngahzia leh Pathian an fak nasatzia chu mak tak a ni. Hunserh tel lovin engmah an tithei lo va. Hunserh a zawh tawh chuan huai tak e ti niawm takin engkim a thiang tawh thung. Sandei sikul inkhawm ban ruala mi in han hal mai te, inkhawm kawnga thilzuar han vau nghal maite emaw chu a pawi tawh hek lo. A tûk khua a lo vâr a, hnathawk tura an chhuah hnu phei chuan thiang lo a awm tawh lo reng reng.

A Pian Ni Leh Thla

Pa fel tih takah ka ṭhianpa hi chuan pian ni leh thla sawi tur a ngah bik asin. Buhtuh lai vela piang a ni a. An chhungkua an rual deuh avanga resawn lâk lam thahnemngaih a tul avangin kum sawm vel a nih khan a upa thut a. Matric a exam dawnah a naupang tha leh a. A kum naupan aia a pumraw lam a len avangin  vote a neih dawna a pianni chu a danglam leh a. Chutiang chuan kum khatah birthday lawm tur pahnih pathum lai a nei! Eng ni berah nge a birthday a lawm dawn tihah erawh a buai ngai miah lo. 

Mahse an khawtlang mizia leh nunphungin a zir em avangin chutiang mai maiah ka ṭhianpa chu a mualpho dawn lo. Zû a ruih bûk bûk loh a, dan pangngaia nachhawkna satliah a ei a, zing kara badminton a vuak peih chhung chuan kohhran leh tlawmngai pawlte chuan a birthday mai maite chu engahmah an ngai lo.

A Ropuina Sawrkar

          Ka ṭhianpa ngaihdan chuan sawrkar hi Pathian tenâu, belte phâi thei lo neitu a ni. A naupan lâi atanga sawrkar ngaisâng reng renga lehkha zir a ni bawk a, sawrkar chu a engkima engkim a ni mai e. Thiamna meuh pawh hi sawrkar hna atanga a teh avangin hnam fing zâwkten hriatna ril zâwk hai chhuah tuma mutmu pawh tuah mang lova thiamna an um ang hi a lehkha zir dan a ni ve lo; a ngaihdan chuan sawrkar hna hmu lian apiang lehkha thiam, hmu lo chu thiam lo a ni tawp mai.

          Chumi rilru pûa lehkha zir chhuak chu a ni bawka university exam result a chhuah rualin a mitthla-ah sawrkar motor a lo lang nghal a. A mark hmuh a sân poh leh mahni kea din a tum lohna a sâng tihna a ni. 

Tichuan a tum ang takin sawrkar hna chu a thawk ta a; ropui tak a ni. Sawrkar chuan eirûk zawh sen loh pawisa nei tlata a hriat bâkah Pathian âi pawha zaidam, a fate eiru pawh hrem ve ngai lo ni hian a hre tlat bawk. Tin, sawrkar chu a engkima engkim a nih avangin sawrkar thiltih apiang chu dik vek turah a dah tawp mai a ni. Lehkha thiam a châkna chhan ber sawrkar hna a hmuh hnu chuan hriatna ril zâwk uma inzir belh lam a lang tawh lo va; a thawhna department kaihhnawih sâpṭawng thumal tlêm a hriat belh bâk chu thiamna lamah chuan ro vawng vawng tak a ni.

Hetiang taka sawrkar rinchhan patling lehkha thiam ve pui si hi a nih avangin concrete in lianpui a sak uaih tawh hnu-ah pawh sawrkar tel lova khawsa  thei lovah a la indah tlat a. Chuvangin a fate chuan a thih hmâin sawrkar hna chhe tê tal an vuan kim hman lo vang tih chu a thil hlauh ber pakhat a ni. Tunah pawh hian an fate zinga a pisil ber, matric pawh pass lo chu a thawhna department-ah chuan MR tala hnim dan a awm lo maw tiin a hnuaia mite mitmei pawh a vêng zo lo a ni ber.  

Khawtlanga A Nihna

          A vêngten mi fel an tehna sâng ber chu khawtlanga nihna neih leh neih loh a ni ber a. Chuvangin a awmna vêng in tin deuhthaw chuan kawngka lu chunga pawl engemaw tala nihna tar tur an nei deuh fur a. Tlawmngai pawl hruaitu nihte chu châk sakhaiah an neih emaw tih tur a ni. Ani pawh hian nihna chi hrang hrang sawm dawn lai a chelh a. OB a nih lohna pawlah pawh adviser nihna pahnih pathum a la nei cheu a ni.

An Office-ah

          A office hna tih loh pâwl dang hruaitu a nihna-ah chuan mi rinawm tak, pâwl tâna thahnemngâi, pâwl pawisa kawl pung thei a ni. An office-ah ve thung chuan  office a tlai loh mial chang te, chawlhkâr khat lai a office kim ve biai changte hian a thawhpuite ngaih a tha lo deuh zawk hial tawh a. An venga mitthi an awm phei chuan office kai tura beisei loh law law kha a hahdam thlak zawk. Chuti chung chuan hotu tlawn tur awm chi leh a biak that tur awm chite chu tlawmngai pawl hruaitu a nihna hmanga kawm ngeih dan a hre riau lawi si a ni.

A In Leh Lo

          A vêngten ka ṭhianpa an fakna ber leh kohhran leh an vêng chhûnga pâwl hrang hrangten an pâwl hruaitu atana an itna chhan ber chu a hlawh phû lova in leh lo din thei khawpa pa fing a nihna chu a ni. A thawh ang thawk, a hlawh zât hlawh Pu Marama te ang, mahni hlawh chauh ring, pûk chawpa in sa ve tawk tawkte chu tuman an ngâisâng lo. Ka ṭhianpa chu a rilru a zau, thawhlawm a pawk si, a ina kawmiti a hrai tlai thei si, tluk rual a ni lo reng a ni. A ṭul huna a private motor thar, a kum nga hlawh pawhin a lei zawh loh tur han hman mai lah chu a ui der si lo.

          Tunah hian a in chu chhâwng ngana a sak zawm leh mêk a. Luah theiha an peih veleh a luah man chanve chu Pathian hnena lawmthu sawina ni pahfawmin missionary chawm nan pêk a tum a. Chu chu an vêng kohhran chanchinbu-ah vawihnih lai a chhuak tawh a. Pastor leh upa thahnemngai deuhte phei chuan midang fuih nan an thusawina-ah rem leh rem lovin an zep tel fo tawh a ni.

Mi Tlawmngâi Ka ṭhianpa, Mizo

          Ka ṭhianpa, Mizo chuan tlawmngaihna nia a hriat ber chu mitthi an awm changa lên pui pui zat zat theih hi a ni. Chuvangin miin a hautak lo thei ang ber leh mi tibuai lo thei ang bera thih an sawi ṭhinte hi chu a tei thei bau lo. Chutiang ngaihdan neite chu Mizo lo riauvin a hria a. Thihna chu mi an tihbuai tam a, traffic an tih zam nasat a, a neitute lam an insên tam zawh poh leh hlawhtlingah a ngâi a, Mizo hlein a hre bawk a, chutiang tura mite fuih leh phût pawh a tina khawp mai. Thuneihna phei chu nei se khawhar in kal nachang hre lo leh tlangval thlan lai peih loho chu a chawitir duh hial awm e.

          Tlawmngaihna nia a hriat chu chutiang chu a nih tlat avangin chhiatni ṭhatnia office a ṭhulh chuan thil ṭha tak ti-ah a inngâi a. A tih anga tive lote chu a hmu Mizo lo riau tawh mai a ni. Chu mai a la ni lo; chu a tlawmngaihna chuan a thawhna office atanga engemaw  hum haw zeuh zeuh kha pawi lova hriatna leh inthiamna a neihtir hial zu nia.

Sual Do Kawnga Mi Taima

          Ka ṭhianpa chuan  mi fel tih takah sual tin reng bul ZU hi a haw em em mai a. A huat em avangin kawrapsawn te hi chu engahmah a ngai tham lo zâwk a ni. Eng vanga ZU chu haw viau nge a nih chu a inhrethiam chiah bik lo. ‘ZU’ han tih ri hi a haw ve hrim hrim pawh a ni thei bawk. A awmna a zirin a huat dan a inang lo khawp mai. RV leh Phunchawng zu khu a haw em em a, an vêng mawnga pachhe deuhten an kawl chuan sual hliah hliahin a hre bawk a, vêng chhûng aṭanga hnawhchhuah hial a duh ṭhin. Mahse a in hnuai luahtu driver leh office-a a thawhpuite ngei pawhin an in fo va, an kawl ṭhin tih pawh a hre reng a, thuneitute hnenah report ta nge chu a ti chuang der lo. Supply Reduction lama a phur ang aiin Demand Reduction lam chu ngaihthah ang reng tak a ni. A in luahtute demand reduce chu sawi loh, a fate demand pawh a reduce thei lo chu a ni ber e. Tin, zû chu haw viau e ti lo chuan amah aia fel zawk leh neinung zawk nia a hriatten an in chuan a awt rilru deuh tlat lawi a. Chung mite zu chu man sak a, an dahna fridge vuak kehte chu sawi loh, changkang taka in chu a châk rilru deuh tlat thin zu nia. 

          ZU chu hnam mualphona nia a hriat laiin French Champagne te, Scott Whisky leh Russian Vodka avangten heng hnamte hi a hmuhsit phah hauh lo va. Khawvela a ram hmuh châk ber leh a ngaihsan ber pawh zu khap burna ram Saudi Arabia ni lovin zu tamna ram, Sâpram ngei khu a ni. Zu chhiaha Mizoram tih hausak aiin retheih a thlang ngam a. Zu chhiah la thin Sâpram aṭanga tanpuina lo kal erawh chu Pathian malsawmna a ni.

          Tin, a tlangval laia a tihchâk em em, a tih zauh zauh ṭhin kha tunah chuan a kum leh khawtlanga a nihna bâkah a hriselna pawhin a lo tlin ta chiah lo nen, langsar takin a tingam tawh lo va, chuvangin a tlangval laia a tih fo, tlangval tha leh pawh nise a la tihduh tho tur thil titute chu a thik tlat a, khap beh dan mawlh ani a ngaihtuah ni. TV-a sâp nula/tlangval infâwp a hmuh leh bar-a zu in a  hmuh te hian sâpho ngâinêpin a tive ngai lo Arab-ho chu a ngâisâng tihna a ni hauh lo. Mahse chuti chung chuan an vêng tlangval zu in chuan buaina an siam emaw, siam lo emaw, hnam timualpho riauvin a hre tlat a. Kawng sirah nula leh tlangval lo thu dun se a thik a, a mit ngo râng a hmuh a. Hnam mualphona ni tlatin a hre thin. 

Sakhaw Mi Ka |hianpa

          Ka ṭhianpa chu kristian sakhaw fir tak, a fir lutuk avanga nu deuh zawk hialin a chawi len a ni bawka kristian ruh tak a ni. Engkim mai hi kristian tarmit hmanga thlir a nih avangin sakhaw zalenna a hriat dan pawh kristian ten duh duha thu kan hril theihna hi a ni deuh ber.

          Sakhaw zalenna ngâisâng mi a nih avangin a chawlhnia hnam dang leh inrinni serh kristian ve bawk inpho a hmuhte hian a thawpik tlat a. A sakhaw zalenna tichêp tlatin a hria a. A inkhawm bângte hian a Bible kawm khawng chi ngeia chhut darh vek mai kha a châk em em ṭhin a ni.

          Tin, kohhran tana a inpêk zawh em avangin kohhranin an pawm theih phawt chuan a thawhna office atanga thil eng eng emaw kohhran tâna han hawn maite chu ṭhahnemngaihna ni zelin a hre tawh a. An office-ah chuan sakhaw dang bia awm ve lo phei se office pawisa chu an kohhran missionary chawm nan thla tin pêk mai pawh a hreh awm lo ve.

          Kristian nun dan ṭha a ngaihsan em avangin ka ṭhianpa chuan a ngaihsan zawnga awm lote chu nunau pawh nise vuak neka pawisa chawitir a duh zel mai a. A nih loh pawhin an vêng atanga hnawhchhuah hmiah hmiah mai a duh ṭhin. A awmna pâwl leh an vêng ṭangrual duhdan chu dan a ni a, an vêngah chuan sawrkar aiin an lal zawk bawk. Rom sawrkar dan anga thiamthu sawina hun pêk tihvelte chu a ngaihsan loh lam a ni. Kristian nun dan ṭha a ngaihsan em avangin Mizorama CBI koh luh tihte chu kristiante tih chi-ah a ngai miah lo bawk.

An Chhungkua Chu

          Mi fate ang bawkin a fate chuan ka ṭhianpa chu khawvela pa ṭha ber, thiltithei ber, dik ber, fel ber leh huaisen ber niin an lo ngâi ve ṭhin a. Mahse high school algebra an han chawh thiam meuh chuan chutiang chu a ni chiah lo tih an man thiam ṭan ta a ni.

          A fate chuan Bangkok-a nu ber bazar-na te, an in leh lo leh a chhunga an bungraw neih zo zai te, an thlâm changkang te, an lirthei changkang pui pui leh pa ber thla tin hlawh chu an han belh a, pahnih leh pahnih belhah pali a chhuak thei tlat lo. Chu chhiarkawp dik lo chuan a rûkin a fateho thinlungah zawhna lian tak, sawi chhuah ngam si loh a siam a. An kum a tam ang zelin zawhna pawh an ngah ve zel a. Chu rinhlelhna rilru inup chu thil dangah a lo lang chhuak ta. Engkim mai hi lem riauva hriatna an lo nei a. An chhungkaw inkhawm leh nu ber zing ṭawngṭai chuan an nun chhûngrilah ro a rêl tak tak lo tih an hre chiang tawlh tawlh bawk. Chuvangin sakhua leh kohhran chu lemchanna dawhsan, a tider thiam thiamin lawm an hlawhna hmunah an hmu a. Mi tin mai hi rinhlelhna nen an en vek tawh mai a ni. Pâwn lâng, mi hmuh mai theiha an chhûngkaw nun leh an thinlung chhung ril lama an nun chu a inang lo kher mai. An fate chu thuhran, an nupa chhungril nuna inthiam lohna thûk tak mai thup nana kohhran leh khawtlâng an belhna zawng zawngte chuan ṭhin lêt châng a nei a. Inhnem nâna an tih ang tive leh an mahni aia eiru nasa nia an hriat an chhiar rilrûk mual mual zan a tam khawp mai.

          Tunah chuan khawsak nawmpui tham sum neih tum khan zahpuiawm tham a nei ta tlat mai a; chu chu mi hriat loha a tlaivar pui lek lek chang a tam hle lehnghal. Leina neih loh vanga mahni awh ngawih ngawih neih theih loh leh leina nei rengin khaw êng zah vanga neih ngam loh danglamzia pawh sawi ngam se sawi tur ngah pâwl a ni ang chu. Engmah nei lova thingtlâng an awm lâite kha a ngai hnuhnawh fo, a sawt si lo. 

A tawp berah chuan ka ṭhianpa hian hlauh deuh mai a nei; chhiat an tawh hunah khawtlang an tibuai pha lovang tih hi.r