Arsi Tla Kha….




Kum 2008-a kan kohhran ṭawngṭai Hapta zirlai pahnihna-ah (phêk 9) chuan tihian Jon Paulian-a chuan a ziak: “November 16, 1966 khan scientist-ten arsi (meteor) nasa takin a tla dâwn tih an sawi lâwk a. Khatih lâi khan kei leh Carlos-a chu zirlai kan la ni a, kum 1833 kuma nasa taka a tlâk ṭum, mi tam takin Isua Krista lo kal thuai dâwna an rin phahna ang kha kan hmu ve dâwn nia ngâiin kan phur hle mai a.

“Nimahsela chumi zan chuan van chu chhûmin a hliah thim mup mai a. Arsi pawh pakhatmah a lang thei lo….Kum 1966-a arsi tla chu 1833 a mi ang tho khân a nasa a, mahse thlawhna aṭang leh America khawthlang lam hmun tlêm tê aṭang chauh lo chuan a lang thei lo. Kum 1833 leh 1966-a arsi tlate kha simeikhu (comet) pakhat, Tempel-Tuttle, kum 33 dana vawikhat ni hel chhuak ṭhin them lêng vel a ni a. Chutiang arsi tla, Leo (arsi hlawm pakhat) aṭanga chhuak chu kum tin November thla hian a zual ṭhin a ni,”  tiin.
Note: Jon Paulian-a hi Andrews University-a Professor, New Testament Department-a awm ṭhin a ni a, he thu ziah lâi hi chuan Loma Linda University lamah a lo insawn tawh a ni. 
Hei hi kan kohhran hmunpui ber aṭanga chhuak a ni a, tunhma lama ka lo hriat dan nen chuan inang lo tak a ni. Chuvangin hetia tunhma lama kan lo hriat dan kalh chiaha kan hotu lamten thu an rawn chhuah tâkah chuan rilru inhawng taka chhui zui a ṭha a, kan lo hriat dan ṭhin bansan ngamna rilru nen kan chhui dâwn a ni. ‘Kan khua-ah chuan ‘âl’ ka ti tho tho ang’ tih rilru kha paih tum bawk ila. 
Kum 1833 November 12-13 zan khân North America hmar chhak lamah (?) nasa takin arsi a tla chur chur mai a. A sawi uar deuh phei chuan a êngah lehkha a chhiar theih hial a ni an ti. Hemi ṭuma arsi tla hi a nasa bawk a, miin mak an ti a, an sawi zui huai huai a. Sakhuana an la urh hlawm bawka ṭhenkhat phei chuan a tûk mai chu rorelna ni thleng turah ngâiin an thidang hlawm a. Mi tam takin an zir zui a, hetiang lam chhuinaa hmahruaitu a lo ni ta a ni.
Mithiam tam tak zir zuitu zinga lar tak H.A.Newton-a chuan kum 1863 khan kum 585, 902, 1582, 1698-ah te pawh nasa taka arsi tla a lo awm tawh ṭhin tih a hmu chhuak a. A zir zawm zelna lamah kum 1864 khan heng kum 931, 934, 1002, 1202, 1366 leh 1602-ah te pawh hian chanchin nei hat thamin a lo tla tawh tih a hriat belh leh a. Tichuan huaisen takin kum 1833-a arsi tla kha kum 33/34 dana tla ṭhin ani tih leh tunhma pawha lo thleng fo tawh ṭhin, Leo arsi bâwr aṭanga lo inṭan ani tih a sawi ngam ta a. A hmingah pawh Leonids an ti nghe nghe. (Amarawhchu Leo arsi bawr aṭanga inṭan tak tak chu a ni lo va, inṭan ang taka a lan vang mai a ni). Mizorama Arsi Tlâk kum kan tih chu 1884 a ni a. Pipute sawi dan chuan hemi zân hian vana arsite khi ruah ang mai hian a rawn sur chum chum mai a ni awm e. Enge a chhan? tih lam zawng an zir ve pha hauh lo.
Tichuan kum 1866 November thla-ah nasa taka tla leh turin a hrilhlawk a. Mahse hemi kum hian beisei angin a tla tam lo, dârkâr khatah 2000 aṭanga 5000 inkâr chauh an chhiar thei a. Kum 1867 khan a tla leh a, mahse thla a en em avangin a lang tam thei lo va, dârkâr khata 1000 vel tla ang chauh a ni. 
A hnu kum 33, kum 1899-ah chuan nasa takin chanchinbu lamah arsi tam tak tla tur chu an lo hrilhlâwk a. Mi tam takin hmuhnawm titaka thlir an tum laiin hemi kum hian a tla ta mang hauh lo mai a. Arsi lam chanchin zir mite pawh an beidawngin an hrilhai ngei mai. Hemi kuma arsi tla hi darkar khatah 50-100 vel chauh a ni ta si a, mi tam takin vanlam chanchin zir mite chu an ngaihnêp phah an ti. Hetiang hian nasa vak lovin kum 33 danah chuan a tla zel a. A nasat ber ṭum chu kum 1966 November thla kha niin hemi ṭum hi chuan kum 1833 ai khan a nasa zâwk daih a. Amarawhchu Jon Paulian-a sawi ang hian a hmuh theihna lai tur America ram lamah chhûm a zing nasa a, Arizona ram bial zim tê leh hmun ṭhenkhat aṭang chauha a hmuh theih avangin a lar ta lo a ni. Chhût mite sawi dan chuan kum 1833-a arsi tla kha chu darkâr khatah 100,000 a ni a. Kum 1966 kha chuan darkar khatah 140,000 aṭanga 150,000 zet a ni.
Tunhma lama arsi tla an lo chhinchhiah dan chu han sawi thuak thuak ila:

1.AD 902: Hemi kum hian Chinese arsi lam zir mite chuan arsi tla chum chum hmuin an insawi a. “Ruah ang mai a ni,” an ti.

2.AD 1202: Kum zabi 13-na leh 14-na laia Muslim historian tam tak chuan October thla chanve vel laia arsi tla vak ṭhin chanchin an lo record a. Al-Dhahabi (1274-1348) chuan Siyar a’lam al-nubala-ah chuan, “Arsite chu khaukhuap thlâwk ang mai hian an thlâwk chum chum a. A hmutute mipuite chuan an hlauh em avangin an ṭawngṭai nghal mur mur,” tiin a lo ziak bawk.

5.AD 1237/1238: Heng kuma arsi tlate hi Japan ramah hmuh a ni a. Azuma Kagami leh Konendai Shiki-ah te chhinchhiah an ni. “Zanlâiah chhiar sên rual loh arsi vâr-sen an tla chur chur mai.” 

6.AD 1630: Hemi kum November 15 hian German mathematician, astronomer ni bawk Johannes Kepler-a a thi a. A hnu ni hnihah an vui chauh a. An vui zan hian a tama tam mangkhengin arsi a tla chum chum mai a. A tamzia an sawi dan chuan, “Ruah ang maiin a sur chum chum,” an ti. Thenkhat phei chuan hemi zana chhiar sên rual loh arsi tla chum chum hi Pathianin Kepler-a a chawimawina a nih an ring hial a ni. Kepler-a hi tarmitin mit khaw hmuh a tihfiah theih dan hmuchhuaktu leh Mars-in ni a helna kawng khi a bial pap ni lova tung sawl, dawnfawh ang deuh a nih dan hmuchhuaktu a ni a. Hei lo pawh hi mathematics leh astronomy-ah hmahruaitu a nihna a awm nuk mai.  

7.AD 1799: German scientist Humboldt-a leh a thianpa Bonpland-a te chuan Cumana (Venezuela) an awm laiin arsi tla chum chum an hmuh thu an ziak a. A tamzia an hrilhfâk a ni. Andrew Ellicott Douglas, American arsi lam zir mi pawhin he arsi tla hi Florida chhim lam tuifinriata an zin laiin a lo hmu ve a, “Van pumpui mai khi rocket thlâwk ang hian a khat a, ṭhenkhat phei chu kan lawngah chuan rawn tla ve mai dâwn hian ka hria a. Ni chhuah hmâ zawng chu chutiang chuan an tla chum chum mai a ni,” a ti. Douglas-a thuziah hi North America-a arsi tla record awm hmasa ber a ni. A hma kum 33 kal ta, 1766 pawh khan helaiah vêk hian nasa takin arsi a tla niin an sawi bawk.

1.Kum 1833, 1866 leh 1899 chu kan sawi tawh kha.

2.Kum 1884, Vailen hmasa leh hnuhnung inkârah khan Mizo kum  chhiara kum  pawimawh tak, Arsi Tlâk Kum a lo thleng a. Hemi ṭuma arsi tla tamzia hi ‘ruah ang mai’ tih a ni bawk. Arsi tla hi a awm fo va. Hemi kuma Mizovin arsi tla kan tih hi Leonid ani ve kher ang tihna a ni lo.(Siama, V.L. Mizo History, Edition-2009.  Lengchhawn Press, Bethel House, Khatla. Aizawl. P.38. Note: He lehkhabu hi kum 1950-a ziah a ni a. He thu a ziah lâi hian V.L.Siama hi kum 38 mi a ni a. Kum 1884-a Arsi tla hmutute kha a kawm hman ngeiin a rinawm a. Aman a kawm chiah loh pawhin chiang taka hmutute sawi hretute a kawm hman ngei a rinawm.)

3.Kum 1933 chho vela arsi tla chu khua a chhe lutuk a, engmah hmuh theih a ni lo. A tla tam vak lo hrim hrim bawk niin a lang.

4.Kum 1966 November 17 zana arsi tla chu tum angin mi nawlpuiin an hmu lo kan tih tawh kha. A hmutute sawi dan pahnih khat chauh han ziak chhawng ila: (Ziah tur a tam khawp mai).
“Chhiar sên rual loh arsi tla chum chum chu kan hmu a.”
- Charles Capen in the San Gabriel Mountains of Southern California


“Arsi tla chu a tam turû bawka second khatah eng zât nge rawn lang hman ang tihte kan ring chhin a… minute 20 chhung vel phei chu dârkâr khatah 150,000 vel tla angin a hmuh theih a ni.”
-Dennis Milon, Kitt Peak in Southern Arizona

Kum 1998/99 kha a kum 33-na a ni leh a. Hemi kum 1988 November 16/17 hian khawvel hmun hrang hranga a zir mite chuan arsi tla chu an lo thlir a. Mahse tunhma anga han lar hluai zawng a ni lo; a tla nasa lutuk lote pawh a ni awm e. Chutianga sawi uar vak tur a awm lo. Tin, lo tla tam pawh nise thil thleng fo a nih avangin miin chuti em emin an ngaihsak tawh lovang. Khawpui electric êng hnuaia mite tân phei chuan hmuh a harsa lehzual. A lan tamna ber chu Europe a ni a. NASA-in hetianga arsi tla zir tur bika a din Leonid MAC (MAC-Multi-Instrument Aircraft Campaign) chuan Japan thliarkar pakhat Okinawa-ah thlawhna pahnih a han tir a. Engti takin nge an han zir zawng keini, tuk tin nauawm ṭhin chuan kan han hriatpui pha lo a ni. 


Kum 1998-a arsi tla NASA-in a lo record chu



 November 17, 1999-a arsi tla NASA-in a lo record chu

NASA mithiam Bill Cooke-a (NASA Marshall Space Flight Center ami) sawi dân chuan tun kum 2009 Novermber 17 zanah pawh hian arsi tla a awm dâwn a. Amarawhchu thla a en loh a, chhum a zin loh chauhin a hmuh chian theih ang. Tin, a tla tam lutukin a rinawm loh bawk. An rin danin dârkâr khatah 500 vel hmuh theih turah an ngâi chauh a. Chuvangin mut kham lo chung[i] chunga lo nghah tham a ni lo vang.
Tin, heng arsi tla hi chiang taka hmu tur chuan khaw thian zan leh thla en loh zan a nih kher a ngai a, chuvangin tam tak chu hmuh mang lohin a liam a ni. Han sawi zel takah chuan Japan, China leh Korea ram lamah te pawh hmanlai aṭang tawhin ruah ang maia arsi tla chum chum hi an lo hmu ṭhin a, chiang takin an lo chhinchhiah thlap a, hahipin an lo sawi ve ṭhin a ni. (Heng ram pathuma arsi tam mang kheng tla chum chum an lo record dan chu a thui deuh dâwn avangin sawi lo mai ila).

Engtia Lo Awm Nge?
He arsi tla hi arsi tak tak ni lovin simeikhu kehthem vaivut ani kan tih tawh kha. A hmuchhuaktute pahnih E.W.L.Tempel (Marseilles, France) leh H.Tuttle (USA) hming chawia a hming phuah simeikhu pakhat Tempel-Tuttle chuan kum 33/34 danah Ni (Sun) khi kan leiin Ni a helna kawng tan tlang zâwng hian a rawn hel ziah a. Ni a rawn hnaih lai chuan a lo sa ta vak mai a. Chu chuan a mei chu a ti-arh ta vak a. Kan lei chuan Ni a helna kawnga simeikhu kehthem vaivut lêng chum chum chu a va su ta a. Simeikhu kehthem thlâwk chak lutuk, second khata mêl 70 bâwr vela thlâwk leh kan lei tuamtu boruak insû chu an alh ta zuai zuai mai a. Chu chu arsi tla kan tih chu a ni. A tlângpuiin hetianga arsi tla kan tih hi lei aṭanga mêl 100 bawr velah a thleng deuh ber ṭhin bawk. 
He simeikhu hi a lian lo va, chuvangin mit lawnga hmuh phâk a ni lo, a sei em em ringawt mai a ni. 
Tin, tunhmaa ka lo ngaihdan chuan arsi tak tak, Hmar Arsi, Chhohreivung, Sikawikâp, Dingdipuantah etc., te khi an rawn tla tak tak emaw ka ti a. Thâwk khat lai phei kha chuan lei rawn tla thleng ngeiin ka ring a. Mahse tun hnua arsi khawvel (universe) zauzia, ngaihtuah phâk loh lêt tam tak a nih thute ka han chhiar hnu hian ka ngaihdan ka thlâk ta a ni. Mitlawnga arsi hmuh theih 5776 vel zinga hnai ber Proxima Centauri khi eng kum 4.2 kal (mêl 24,800,000,000,000) a ni a. Chhohreivung khi eng kum 360 kal a ni a. Sikawikâp khi eng kum 400 kal a ni a. Siruk khi eng kum 410 kal a ni bawk. Mita kan hmuh theih arsi bâwr (galaxy), arsi tluklehdingawn za têl awmna Andromeda khi eng kum 2,120,000,000 kal a ni a, amah khi vir mup mup chungin kan awmna galaxy lam pan hian dârkâr khata mêl sang tam taka chakin a rawn thlâwk duai duai reng a ni.  
Tichuan heng arsi lian tak tak, Ni ai pawha a lêt za tam taka liante khi (Ni khi a laia hawlh tlangin mêl 865,270 a ni a, Sikeisen (Betelgeuse) khi a laia hawlh tlanga mêl 400,000,000 niin a ênzia chu Ni êng lêt 10,000 a ni) chu tla thei ziazang an lo ni lo tihte ka hre chhuak leh ta zel a. Kum 1833-a arsi tla kan sawi pawh kha arsi tak tak ni lovin simeikhu kehthem vaivut leh lungte thil lêng chum chum a ni a, lei a rawn tla thleng hek lo. Khatianga nasa khan arsite khi leiah rawn tla tak tak nise America ram khu a chhe vek ang a, arsi tla report tur pawh an awm lo vang. Entirnân dârkâr khata mêl 200,000-a chak football tiat arsi thlâwk chuan Lammual khi rawn dêng tase Aizawl khawpui hi a chim rum rum ang a, lir nasa tak a nghing dur dur bawk ang. Chuvangin kha arsi tla kha arsi tak tak ni lovin simeikhu kehthem vaivut lêng nuk nukin kan lei tuamtu boruak a rawn sut avanga alh, arsi tla chum chum anga lang mai a lo ni zâwk. 
Ka han sawi duh zâwk chu – kan naupan lâi khan kum 1833 November thlaa arsi tla Leonids an tih kha vana kan hmuh ṭhin arsi tak tak tla emaw ka tih leh khawvela a awm chhun emaw ka lo tih ṭhin kha a dik lo ve, kum 33/34 dana thil thleng, thla en loh zan leh khaw thian zana lang tam leh lan tam bik châng nei hrim hrim a lo ni tih hi a ni. Amarawhchu kum 1833 ang tluka mi rilru a khawih leh miin an thlir nasat chu history lamah a awm lo niin a lang. Hei hi a chhan chu tunhma lehzual chuan ziak leh chhiar thiam an tlêm a, thil chhinchhiah nachang an la hre lo fo bawk a. Chuvangin ‘ruah ang maiin a tla chur chur’ tihbâk record a awm meuh lo a ni ang. (Ka la ziak kim lo nasa).
Heta arsi tla hi arsi tak tak ni lovin simeikhu kehthem vaivut leng vel (meteor) a ni tih leh kum 33/34 dana thleng a ni tih chu kan commentary pakhat SDA Student’s Source Book, Commentary Reference Series Vol. 9, 1962, phêk 409-417 ah chiang takin a lo inziak reng si a, mahni kohhran lehkhabua inziak ngeite pawh hi a lo hriat loh theih khawp mai!■




                

Comments

Post a Comment

Popular posts from this blog

KA LO TAWN VE - REMRUATI

Image
Kum 1997 November thla chawhma lam a ni a. Chutih laia ka awmna khua chu   kan   khua Thingsulthliah aṭanga kilometer za chuang zeta hla, khaw te reuh te, in za leh sawmriat vel khua a ni. BA pass hlim, tlangval zuan zang tak leh harh vang tak ka ni a, ka awmna khaw tharah chuan Upa Pawl in luahin ka khawsa ve nawk nawk a. Ka kal ngai lohna khua a nih bâkah chhungte han sawi tur pakhatmah kan neih lohna khua a ni a, chuvangin ka awm tirh phei chuan tualchhung mite zingah hriat ka nei lo. Khaw te reuh te a nih avangin a khuaa mite chuan min hre kim thuaiin ka ring a. Middle School awm chhuna thawk thar ka nih avangin mi hriat ka hlawh ve turah pawh ka inngai a ni.   Chu  chu keima fel vang leh vengvat vang ni lovin sikul naupangten an nu leh pate hnena zirtirtu thar an neih thu an sawi ngei dawna ka rin vang a ni zawk mah. Sawrkar hna thawk hlim ka ni a, hlawh pawh ka la nei ve lo. Ka nu leh pate pawisa min paitir hmangin ka khawsa ve mai mai a ni. Tin,...
Read more

NUTHLAWI THIANGHLIM

Image
A Bul Tanna Thalaiho khawhar hla sa rual ṭham ṭham kâra min rawn melh zeuh zeuhtu nuthlawi chu tunhma pawha ka hmelhriat tawh sa ni mah se chumi zan chu a danglam tlat. Lût chhuak an awm reng avangin a tira inṭhut hnaih vak lo kha zan rei lamah chuan   kan  inhnaih sâwt hle a. Zanlai ârkhuan a hun meuh chuan   kan  inkhawih pha der tawh a ni. A hmâ chawlhkar hnih vel kal tawh aṭang khan engemaw titaka khawhar rûkna riau hi ka nei thin; a chhan ka hre lo. Tlangval ngawichawi, rual pawl tam lo tak ka nih vang a ni maithei. College final year ka zir kumah pawh exam mai tur ka ni a. Thil danga inham buai hun loh lai tak a ni nghe nghe. Aizawla kal leh thuai tur ka ni lehnghal. Chutia ka naupan lai atanga ka hmêlhriat tawh nuthlawi, kei aia kum hnih vela upa, fa pahnih nei tawh lehnghal bula ka ṭhu thei ka lawm thar viau mai chu mak intih nachang ka hre lo va. “I tlaivar dawn em? Kei chu haw mai ka duh,” tia min rawn bia ka lo lawm viau mai te chu mak intih ...
Read more

Ka Tlin Ta Ngang Lo Ve

Image
Fate fahrah tur pawh ka dâwn thei ta lo ve. Tunah zawng a vawrtawp a thleng ta; ka dawh peih ta ngang lo a ni. Kan intawn tirh chuan khawvelah nula dang awm thei hian ka hre lo va. An awm a nih pawhin ani tluk tur awmin ka ring lo. Ka chhungten min duhpui lo te chu an hriat chian tâwk loh vangah puhin ka hre thiam lo va, ka hmangaihna tizualtu mai an ni. |hian ṭ haten nei lo tura min tite chu min thik vang leh an bialnute aia a hmel ṭ hat zâwk vangah dahin ka duhna an tizual ting bawk. Hlim taka inneiin a zarah fanaute kan la nei ve ang a, chhungkaw duhawm tak kan la din ang chu tiin duhthu ka sam ṭ hin. Mahse mihring hi duhthusam ang diak diaka awm a lo harsa khawp mai. Khawvel nula dang zawng zawng aia ka thlan, ka rose pâr, chhungte leh ṭ hiante min duh pui vak loh chunga ka neih tâk chuan ka tum ram – vanram tlafual lei Eden , chhawrpial rûn nuam chu min thlen zo lo chiang ngei mai. A mo thar tûka a tho tlai chu a hmâ nia a hah em vang leh zan lama kan khawsak...
Read more