Thawnthu Pathum

Pakhatna

The Soldier

 John Blanchard-a chu a ṭhutna aṭang chuan a tho hluai a. A sipai uniform kawrbân pawh mar chawt chawt pah chuan Grand Central Station-a mipui phu mur mur chu a thlir vang vang a. A mi zawn chu nula pakhat, a vei rilruk em em, a la hmuh ngai miah si loh, rose sen keng chunga lo kal tur chu a ni a. An inhriat ṭanna pawh kum khat leh thla khat zet kal taa Florida Library aṭangin a ni. Chumi ṭum chuan lehkhabu dahna almira atanga lehkhabu pakhat a lâk chhuah chu a han kêu va, chuta a thu chhiar chuan a rilru a khawih ta hle a. A rilru khawihtu thuziak chu a lehkhabu chhûng thu ni lovin a phêk sira kutziak hawrawp, pencil ngeia inziak chu a ni. Chu thuziak chuan a ziaktu rilru thûk turzia leh ngaihtuahna ril turzia a tarlang chiang hle bawk.  

Chu lehkhabu kâwm hma lama thu inziak aṭang chuan a neitu hmasa chu a hre thei mai a. A hming chu Miss Hollis Maynell-i a ni. Engtin tin emaw ni New York khawpuiah a cheng tihte a hre thei ta bawk a. Tichuan zah pawh dâwn lovin lehkha a va thawn ta a. A lehkhathawn chu chhâng ve ngei turin a ngen nghal bawk. Dâka lehkhathawn a thlâk tûk chuan Indopui Pahnihnaa tel ve turin tuifinriat lamah a zin chhuak ta nghal a.

Hmêlma rama an awm chhung kum khat leh thla khat chhûng chuan lehkha an inthawn tawn ta reng a. An lehkhathawn apiang chu an thinlung lei ṭha hmunah chuan tla zelin hmangaihna a rawn kuhmum chho ṭan ta a ni. Nakinah chuan Blanchard-a chuan a bialnu (titawh mai ang) chu a thlalak thawn turin a ngên a. Mahse Miss Hollis-i chuan a thawn mai duh bik lo. Min care tak tak a nih chuan êng ang hmêl nge ka put a pawimawh ber lo tiin a lo hnial a ni. 

Hun a inher zel a, Blanchard-a chu Europe atanga a haw a lo hun ve ta a. Tichuan lehkha inthawnin inhmuh ngei an tum a. An inhmuh hun atan zan dar sarih, a hmun atan Grand Central Station, New York tiin an intiam ta a ni.

Miss Hollis-i chuan a lehkhathawnah chuan, “Min hriat theih nan ka kawr nghawngah rose sen ka rawn târ ang e,” a ti a. Tichuan Blanchard-a chuan a rilrua a vei rûk em em, eng ang hmêl nge a put a la hriat si loh chu beiseina sang tak nen a lo rin nghak ta veng veng mai a ni.

A hnu-ah ti hian Blanchard-a chuan thil awmdan a sawi: “Ka lam pan hian nula pakhat hi a rawn kal a. A sam buang thâng mai chu a beng zâwnah hian a kir chiai mai a. A mitte chu pangpar pâwl ang mai hian a lang paw phêt bawk a. A hmui sen siah mai leh a khabe dawh mawi tak maite chu a kawrfual hring nen chuan nipui vanglai ang maia duhawm a ni. Chu nu chuan rose reng reng a intawn lo tih theihnghilh vekin ka va pan nghal ruak ruak a. A bul ka va thlen chuan lawm vak lo niawm tak hian a kiai sak a. ‘Sipai pa, ka kalna tur i dal a nia aw?’ a ti a. Ka han din hnaih leh deuh a, chutah chuan a hnung lawka Miss Hollis Maynell-i lo ding reng chu ka hmu ta a. Amah chu kum sawmli a chuang daih tawh tih hai rual a ni lo. A sam ṭuak vâr vo tawhte chu a lukhum hlui tawh tak hnuaiah chuan a bilh chho va. A thau mum nalh a, a ke chhah pui mai chu a pheikhawk ke-artui hniam tak maiah chuan a invuah tlut bawk a. Chutah kawrfual hring ha nula kha chu a kal sawn ta nghal a. Ka keh chhe vek ni ber hian ka inhria; chu nula zâwk chu ka zui châk khawp mai a. Mahse hun rei tak aṭang tawha ka lo vei rilruk ve em em chu chiau-au a ṭul bawk si.”

“Chu nu, Miss Hollis-i ni ngei tur chu ka han en chiang leh a. A hmâi puam deuh ul mai chu a nelawmin a duhawm vei roh phian a. A mit paw ram maite chu a hlim hmel phian lehnghal. Ka kut chuan lehkhabu te reuh tê, hlui tawh tak, hlu tak mai bawk si chu ka hmer ngat ngat a. Hmangaihna ai pawhin a hlu zawk hial awm e tihtur khawpa hlu a ni. Chu nu nen chuan ṭhianah kan insiam tawh a, chutah chuan lawm hle tur ka ni lawm ni.” 

“Ka koki chu ka han chhin ak a, chibai bûk pahin lehkhabu chu ka pe a. Ka ṭawng lai te chuan ka beidawng lutuk chu ka thlan bawrh bawrh mai a ni. ‘Lieutenant John Blanchard-a ka ni a. Miss Maynell-i i ni ti raw? I rawn kal theih avangin ka lawm e. Ti rawh, zanriah i kil dun ang hmiang,’ ka ti a. 

“Chu nu chuan nui hawk hawk pah hian, ‘Tlangval, heng thil hi eng nge a  awmzia ka hre ve reng reng lo. Mahse tuna nula kawrfual hring ha khan he rose sen hi tawn turin min ti a. Zanriah eipuia min sawm chuan kawtthler lehlama restaurant lian zâwkah sâwn a lo nghak ang che tih hrilh tur chein min ti a ni. A sawi danin thil engemaw fiah a duh a ni awm e,’ a ti ta a.”

“Miss Maynell-i finzia chu ka hre fiah ta uar mai a, ka ngaisang kher mai,” a ti. Mihring thinlung diktak chu thil duhawm lo a hmuha a awm danah hmuh theih a ni. Housseaye-a chuan tihian a ziak, “Tu nge i hmangaih min hrilh la, tu nge i nih ka hrilh ang che,” tiin. 

Pahnihna

The Doctor

University hmingthang takah daktawr ka zir a. Ka zirna man chu ka nu leh paten an tum zawh loh avangin restaurant pakhatah ka inhlawh a. Chutah chuan restaurant neitu Troy-a chu ka tawng ta a ni. Troy-a chu tlangval hmelṭha tak a nih bâkah naupang têa multi-millionaire ni thei a ni bawk. Thla engemaw zât ka thawh hnu chuan thil pahnih ka hre chhuak ta thut mai a. A pakhatna chu ka hnaa ka tui em em chu a ni a. A pahnihna chu ka thinlung zawng zawnga kan hotupa ka hmangaih chu a ni. Midang zawng zawng aiin ka hmangaih a ni ber mai. Min rawn melh changte hian ka thin hi a lo phu dup dup ṭhin a. A tawngkam duhawm tak takte chuan ka thinlung lairil hi a fan chhuak nghal vek ṭhin. 

Chutah ka nuna thil thleng duhawm ber leh mak ber chu a lo thleng ta. Troy-a chuan min rawn pan a, min hmangaih ve thu a rawn sawi ta a. Chuta ṭang chuan a rûka ka lo hmangaih ngawih ngawih chuan min lo hmangaih ve hle tih ka hre ta a ni. 

Engkim mai chu duhthusam a ni ber e. A bula ka awm chuan ka lai thei khawp mai; mahse duhthusam ram, a taka lo chang ta kha a ni a, ka hlim em em ṭhin.

Kum khat a ral a, kan induhna chu a pangngai reng a ni. Mahse ni khat chu  ngui deuh ruai hian ka hmu a. Eng vang nge ka zâwt. Ani chuan ka mita mi en vang vang pah hian heng thu, ka thinlung tikeh chhe vektu hi a sawi ta a. A nuna a thil tawnah keimah min tawng chu a tihsual ber a ni a, ani nena inzawmna nei reng turin ka tling tâwk hek lo tih thu chu! A sawi zel danin kei chu nula dinhmun hniam tak, ka pawisa harsatna chin fel nana mi hausa tlangval zawngtu mai ka ni.

Awm ngaihna reng reng ka hre lo. Ka mittui chu dan rual loh hian a rawn sur ta zung zung mai a ni. Rang takin ka inthiarfihlim nghal a. In ka thlen hnu chuan ka han inngaihtuah nawn leh a, ka thil tawn chu mak ka titâwp thei lo. Mu chungin ka inngaihtuah a, ka hmangaih leh tawh ngai lo vang tiin ka intiam a. Chumi zan chuan amah chu ngaihtuah tawh miah loh a, theihnghilh hmin hmiah ka tum a. Mahse engtin nge ni ang? Ka mittui pawh ka hru sêng lo chu a ni si a! 

Ni leh thla, kumte a lo ral zel a. Ni khat chu ka office chair nuam taka ka ṭhut vang vang lai chuan ka secretary hian pindan 207-naa damlo rawn awm thar chu hmuh a ṭul tiin mi rawn ko va.

Ni e, zêp lovah chuan tunah zawng, doctor lar tak ka lo ni tawh a. Tunhmaa ka neih phâk loh in leh lo bâkah car te pawh ka nei ve ta. Kum tam tak hrehawm ka tawrh hnu-ah ka tum chu ka hlen ta a ni. Ama’rawhchu ka thinlunga hliam na tak mai avang khan ka hlim tak tak thei lo va. Chu hliam chu mi pakhat chauhin a tidam thei lehnghal.

Pindan chhunga ka luh rualin ka thin chu a phu nghal dup dup a. An damlo sawi chu mimal taka ka hriat tawh ṭhin a nih vang a ni. Natna khuma mu reng, dawl dâng tak leh cher tak mai chu ka hre chiang ngei mai. Amah chu tu dang ni lovin ka thinlung min hliam a, min tizak ngawih ngawih chung pawha ka la hmangaih reng Troy-a kha a ni a. Amah vêk chu hlawhtlin thuai thuai min tichâktu chu a ni bawk. 

Zawi têin ka ko va. A meng lo naa a mittui chu a rawn luang chhuak ngiai ngiai a. Chu chu min lo hre nghal tih entirna a ni. A bula lehkha inthlep chu ka la a, ka han chhiar chu ka mittui a rawn luang ve ta zawih zawih mai a. Chu lehkha-ah chuan:

“Ka Duhtak,

He lehkha i chhiar lai hian kei chu ka natna avang hian ka harh tawh lo maithei a, a nih loh pawhin ka awm tawh lo hial pawh a ni thei. Dawt ka sawi avang khan ngaihdam dil ka duh mai a ni. Kan inhmuh hnuhnun bera ka thusawi kha dâwt a nih kha. Khami ni khan cancer natna ka vei tih ka inhre chhuak a. Ka hrilh duh lo che a. A chhan chu min ngaihtuah lutuk ang tih ka hlau a ni. Thil pakhat hrilh duh che ka nei – ka nun hi ṭan ṭha leh thei ni ila nangmah bawk kha a ni ka thlan leh tur chu. Engpawhnise, thi mai tur ka ni a. Ka thâwk theih têk têk chhung chu ka hmangaih reng ang che tih hi ka tiam a che.”

Troy

Lehkha ka chhiar zo chiah a, Troy-a chu a thi tih an rawn sawi nghal a. 

Pathumna

Hmangaihna Ngawichawi

Pâwl Sawm Nih Lai

English class-ah ka ṭhu a, ka bula ṭhu nula chu ka melh zauh zauh a. Ani chu ka ṭhian ṭha ber anga ka neih a ni. A sam sei tak mai lêng siau siaute chu ka en vawng vawng a. Ka ta ni se ka tirilru ngawih ngawih ṭhin, mahse ani chuan chutiang tur chuan min en ve lo tih ka hre si. Ban veleh a hmâ nia note a lâk ve hman loh chu lâk chhawn min rawn dil a. Lawm taka ka lo pe chu lawmthu sawi pahin min chibai a. Thil hrilh châk deuh mai ka nei; ṭhian ṭha pangngai aia thuk zâwka inkawm ka duh tih hi hria se ka duh a ni. Ka hmangaih a, mahse ka duhzia thu sawi turin ka zakzum lutuk; a chhan ka hre lo.

Pâwl Sawm leh Pakhatah

Phone a lo ri a, amah bawk a ni. A lungchhe hle tih a hriat mai. Hmangaihnain a thinlung a tihnat thu sawiin a inhnit hlawp hlawp a. Mahni chauha awm a duh loh avangin lêngah min sawm a. Ka va lêng. |hutthlengseia kan ṭhut dun lai chuan ka ta nise ti rilru ngawih ngawih chungin ka en vawng vawng a.

Darkâr hnih zet kan inkawm hnu, TV-a Drew Barrymore channa film khat kan en zawh thak hnu leh eitur eng engemaw kan ei dun nual hnu chuan mut a duh thu a sawi a. Min rawn melh zauh a, lawmthu sawi pahin a nui var var a. Thil hrilh châk deuh mai ka nei; ṭhian ṭha pangngai aia thûk zawka inkawm ka duh tih hi hria se ka duh a ni. Ka hmangaih a, mahse ka duhzia thu sawi turin ka zakzum lutuk; a chhan ka hre lo.

College-ah

Kan college kal tâwpna ni a thlen hma chiahin a rawn kal a. “Ka kawppui (bialpa) a dam lo tlat,” a ti a. Kei chu kawppui ka nei lo; pâwl sarih kan nih lâi khan a tu zâwk zâwkin emaw bialnu bialpa kan neih loh chuan ṭhian ṭha anga inen zelah tiin thu kan intiam a. Chutiang tak chuan kan inkawm zui zel a. Chumi zan college program a zawh hnu chuan an kawngka bul step-ah kan ding dun a. Min rawn nuih seih lâi chu ka lo en vawng vawng a, a mitmeng mâwi tak chuan min en sêt sêt bawk a. Ka ta nise ka ti ngawih ngawih, mahse chutiang zawngin min en ve lo tih ka hre si. Thil hrilh châk deuh mai ka nei; ṭhian ṭha pangngai aia thuka inkawm ka duh tih hi hria se ka duh a ni. Ka hmangaih a, mahse ka duhzia thu sawi turin ka zakzum lutuk; a chhan ka hre lo.
          

Graduation Day

Ni leh thla a lo ral a. Eng ka tih hmain graduation day a lo thleng der mai. A pass-na certificate la tur dawhsana a lawn chhoh lâi chuan a taksa sawisel bo che vel chu ka lo thlir reng a. Ka ta ni se ka ti ngawih ngawih a, mahse chutiang zawng chuan min en ve lo tih ka hre si. Ban dawn chuan a lukhumparh leh a kawrfual haa ṭap deuh faih faih chung hian min rawn pawm a. Ka koki aṭang chuan a rawn dâk chho va, “Ka thian tha ber i ni, ka lawm lutuk,” a ti a. Thil hrilh châk deuh mai ka nei; ṭhian ṭha pangngai aia thuk zawka inkawm ka duh tih hi hria se ka duh a ni. Ka hmangaih a, mahse ka duhzia thu sawi turin ka zakzum lutuk; a chhan ka hre lo.

Kum Engemaw Zât Hnu Chuan

Biak in pakhat ṭhutthlengah ka ṭhu a. Chu nula chuan pasal a nei dâwn a ni. “Ka tiam e,” a tih lai te, a nun thar chen tura mipa dang nen an inkhalh chhuak laite chu ka thlir reng a. Ka ta ni turin ka duh ngawih ngawih, mahse chutiang tur chuan min en ve lo tih ke hre si. Mahse an chhuah hmâ chuan min rawn pan a. “I rawn kal maw!” tih sap pahin ka biangah a rawn fâwp zauh a. Thil hrilh châk deuh mai ka nei; ṭhian ṭha pangngai aia thuk zawka inkawm ka duh tih hi hria se ka duh a ni. Ka hmangaih a, mahse ka duhzia thu sawi turin ka zakzum lutuk; a chhan ka hre lo.

Mitthi Vuina-ah
          Kum a lo ral zel a, ka nula ṭhian ṭha ber ni ṭhin an zalhna kuang chu ka thlir vawng vawng a. Vuina inkhawmah chuan high sikul a kal laia a thuziak pakhat hi an rawn chhiar chhuak a. Chu chu hei hi a ni:

“Ka ta nise ti ngawih ngawih chungin amah chu ka en a, mahse chutiang tur chuan min en ve lo tih ka hre si. Thil hrilh châk deuh mai ka nei; ṭhian ṭha pangngai aia thuk zawka inkawm ka duh tih hi hria se ka duh a ni. Ka hmangaih a, mahse ka duhzia thu sawi turin ka zakzum lutuk; a chhan ka hre lo. Min hmangaih thu min han hrilh se ka va ti em!” tiin.

Kei pawhin ka ti asin…. Ka mittui chu dan rual lohin a rawn luang chhuak ta nguai nguai mai a.