KEI VE TE HI

          

            “…tunah leh chatuan thlengin lo awm zel rawh se, Amen” tia vuitu pastor-in malsawm ṭawngṭaina a chham zawh rualin ṭap thâwm a ri nghal mur mur a. Hmeichhe ṭap thâwm ri chel chul kâra patling ṭap râwl ri ruai ruaite chu ka awmna aṭang chuan chiang takin a hriat theih vek a ni.

            Ka ṭhutna bul tukverh aṭang chuan mitthi ina thil thleng chu chiang takin a hmuh theih a. Kuang siamtuten kuang an zawn lût lâi te, thla la tura an insingsa lâi te leh thlalâkna tur hmun kiana mipui kal sawn mêk te chu hmuhnawm ti lo fahranin ka lo thlir reng a.

            Ka awmna in chu mitthi in ral lehlam kawngsira in chhe tê, zu zûar in a ni nghe nghe a. A chung rangva chu a ung tawh hle a. A bang dâpte pawh a hlui em avangin a dum ṭhip ṭhep tawh a. Tukverh darthlalangte pawh a keh deuh vek tawh bawk. Tukverh dârthlalang invuahna-ah chuan rangva chhia an kilh beh avangin in chhûng chuan a thim phah khawp mai.

            Ka ṭhutna bul turkverh aṭang chuan mitthi in lam chu zu in pahin ka thlir reng a. Ka thin chu a phu dup dup bawk a. A dik tak chuan rilru mumal pawh ka pu chiah lo. Ka bing mum mum a, ka lû chu hai chiai chiaiin ka hria a, a hai pawh a hai tak tak ang. Zu chu ûm khat ka in zo ṭêp tawh a, ka nova thlit zawh ka tum lâi tak chuan kuang chu an rawn zâwn chhuak a, thla lâk dan tur an rawn puang nghal a. Ka ûm ken lai chu ka hmâa dawhkan chhe tê, sawi deuh ang bii beiah chuan ka dah leh a, thil kal zel dan hmuh tumin tukverh pâwn lam chu ka thlir ta zâwk a.

            Kuang chu an nghat a. Vuitu pastor leh kohhran upaten thla an lâk pui a, chutiang zel chuan a lâk pui awmte chuan a indawtin an lâk pui zel a. Chutah thlânmual lam an pan pui dâwn ta. Mitthi chanchin ziahna board chu an vêng YMA hruaitu pakhat chuan a la sawn a, midangin kuang bul vela an pangpâr dahte chu an rawn la sawn bawk a. Mitthi chanchin ziahna board-a thu inziak chu ka va chhiar thei lo naa eng nge inziak chu ka hre chiang ngang mai. An mitthi chanchin phei chu kei aia hre chiang an awm lo vang ti ila ka daw deuh mai thei e.

            Kuang chu tlangvâl ṭhenkhat leh pa valâi deuh engemaw zât hian din hualin an châwi kang a, thlânmual lam panin an kal ta. A lan theih chhûng ka thlir a. Ka lû chu a rawn hai muai muai a. Nakinah phei chuan ka khaw hmuh te chu a rawn thim khup khup a, nikhaw hre lovin ka bul lawk thutthlengsei chhe tê-ah chuan ka let thla ta hlawl mai a.

            Ka han harh leh meuh chuan zan dar riat a lo ri dâwn ruai tawh a. Ka bula zu ûm leh no te chu an lo awm tawh lo va. Ni dang âia ka in hnem vang ni maw, ka lû chu ka chhip lam leh tukhum lamah hian a na tluk tluk mai a; hrehawm tak a ni. Ka bul lawk chair hlui tawh fahran maiah chuan in neitupa Vanlalhriata, a hming lema Hreveka kan tih ṭhin chu a lo ṭhu a. A ṭawng duh em avang leh thil a intihhriat ṭhin em avanga Hreveka ti kan ni. “I va han mu rei kher em! I lem hnem lutuk a nih kha,” tiin min lo be nghal a. “Ka lû a va na em! Hmai ka’n phih phawt teh ang,” tiin thei leh thei lovin ka tho chhuak a, an tui dehna lam chu ka pan nghal a. Ka ril lah chu a hmâ ni aṭanga chaw ei mumal lo kha ka ni bawk a, a ṭâm khawp lehnghal. Ka hmâi phih zo chu ka harh deuh huai a. Tui chu no hnih ka lem pawp pawp a. Chu chuan min tiharh lehzual bawk a. Ka lu nâ pawh a ziaawm ta.

            “I ril a ṭâm tawh viau lo maw? Chaw hi tlêm tal bâr ta che. I chau lutuk ang e.”

“Nia mawle. Zêp lohah chuan ṭâm tak a ni. Nimin tlai aṭang khân chaw ka ei mumal tawh lo. Mahse zanin chu thil tihduh ka nei tlat a, ei lo thei ka ni lo. Ka chau dâwn lutuk tlat.”

“Eng thil nge maw tih i tum le? I rui ropui si a, eng han tithei ziazang i ni hleinem. Chaw kha ei kham la, mu hahdam zâwk rawh.”

Ka ruihzia chu ka hre chiang alawm; mahse chhia leh ṭha hriatna bo vek khawpa rui chu ka ni tawh lovin ka inhria. Hreveka nupui Pâri chuan chaw ei a rawn siam sawk sawk a.

“Kha va ei rawh. Ruih chin tâwk hi hre ṭhin hek lo che mawle. Vawiin phei chu a ruihna nikhua lo lutuk.”

Ka rilru chuan a ruihna nikhua ber zâwk lo maw ka lo ti a. Mahse ṭawng chhuak lovin an chawṭhing rum zet mai chu ka eisan ta zâwk a. Ka chaw ei chu a tûi lo hle naa ka taksain a mamawhzia ka hria a, ka ei lui hrâm hrâm a ni. Ka rui hle naa ka chhia leh ṭha hriatna chu a bo chuang lo; ka huat tur chi leh ka huat loh tur chi te, ka lunglênna tur leh ka damchhûnga ka theihnghilh tawh ngai loh tur thil thleng mêkte chu pakhatmah ka hai lo.

Chaw ka ei lâi chuan Hreveka chu a titi bawrh bawrh a. Pa thil intihria tih takah kan mitthi chanchin leh a thihdante chu a bua ziak thei mai hmêl pu khawpin a intihria a. A sawi lah a sawi thiam. Pa ṭawng duh deuh hi chu titi thiam tak, thil a nihna aia uar deuh hleka sawi thiam leh sawi hreh lo an ni duh tlangpuiin ka hria a. Chutiang chiah chu Hreveka thusawi chu a ni. A sawi thiam ang hian ziak thiam se chu ama insawi dan takin Mizoram khawvel hian a theihnghilh tawh ngai lo vang. Mahse vanneihthlâk takin thu ziak mi a lo ni lo hlauh va. Kan khua bâk hian tu nge a nih an hre ta lo a ni.

Ka chaw ei chu a tui fahran lo naa puar khawp ei luih hram ka tum bawk a, ni danga ka chaw ei ang zât ei thei lo mah ila ka puar viau mai. Muang chânga kam te ṭhuahin ka han intiharh a. Ka ruih pawh a ziaawm ta viau mai. Minute tin ka harh chiang tial tial a, ka lung a chhe tulh tulh a, ṭah hawm hawm mai ka châk ta. Mahse ka awmna hmun leh hun chuan a zir loh em avangin ka insûm hram hram a. Pâwn lama an zun in chhe tê-ah chuan ka va zung a, insum har ka tingei mai.

Hreveka te hnenah chuan lawmthu tlêm ka sawi a. Tichuan November thla tawp lam zan thla êng ruih mai hnuaiah chuan thlanmual lam panin ka pai phei ta nawk nawk a.

Thlanmual ka va thlen chuan zan dâr sawm a ri chiah tih râl hla fêa sipai dâr vuak rik atang chuan ka hre thei a. Chutah khawvela ka hmangaih ber, ka nunna âi pawha ka dah pawimawh zâwk Mahruaii thlân chu ka thleng a, ka insum zo ta lo; a thlân vurna lei an chhun pâwnah chuan ka bawk thlawp a, ka ṭap ta ngar ngar mai a ni. Chumi ṭuma ka mittui luang chu dawh khawl theih nise a tling puau thei hialin ka ring. Chutiang chuan rilru mumal pawh pu hlei thei lovin dârkâr khat chuang chu Mahruaii thlanah chuan ka bawk a. Khaw lum leh khaw vâwt, zan rei leh rei loh, a hlauhawm leh hlauhawm loh, a mawi leh mawi loh lam te ka dâwn thei lo.

Sipai camp chu a hla viau naa thlânmual nen a inep chiah avang leh a reh em avangin an dâr vuak ri chu chiang takin a hriat theih a. Dâr sawm leh pakhat a rawn ri leh bal bal a. Ka ṭhu chhuak a, Mahruaii hming an tarna thing kraws chu ka pawm a, chutah zawi têin a hming inziak chu ka fâwp a. Ka tum rilrûk dan chu mi awm loh hlana a thlan chu hai leh a, vawikhat tal a hmui vawt ngiai chu han fawh leh hram a, mang ṭha tia a kut vawt ngiai, duh tak leh kham lo taka ka lo hmer vawng vawng tawh ṭhin ngei mai chu han vawn leh a, chibai han bûk leh hram chu a ni. Ka rilrua thil awm chu tihhlawhtlin tumin YMA-in thlanmual bungrua an dahna in tê chu ka han pan a. Mahse tala lian tâwk fê hian a lo inkalh bur mai a. A bang lah chu leirawhchan a ni a, han tihchhiat mai mai ziazang a ni lo. Ka beidawng chuan tala chu ka han sawi nawk nawk a, kawngkhar chu ka nam vak vak bawk a. He in tê sakna-ah hian ka hnatlâng ve a, a rinawm thei ang bera sak a nih dan leh pa naranin awlsam taka an hawn mai mai theih loh tura siam a nih dan pawh a hre chiang bertute zinga mi ka ni. Pa naran zinga mi chu ka nih ve miau avangin ka hawng thei ta lo va. Chu bâkah ka harh chiang tial tial a, ka rilru pawh a fim hret hret a, ka thil tum chu thil sâwt lo leh âtthlâk tak a nihna laite pawh awmin ka hre ta deuh a, tichuan Mahruaii thlân lamah bawk chuan ka phei leh a, thlân vurna lei pâwngah bawk chuan ka va ṭhu ngawi leh ta vang vang mai a.

Tunah chuan ka ṭap tawh lo. Ka lungchhiatna leh lunglênna chu thinurna te, phuba lâk châkna te, mi huatna te, tualthah duhna te, tlan bo daih duhna te, intihhlum duh ut utna ten a rawn thlâk a. Pa huaisena sawi chu ka ni ngai lo naa beidawnna thinlung ka pu tawh a, chutih lâi ngat chuan engmah pawisak tak tak pawh ka nei lo. Hmangaihna hian ken tel pakhat a nei, chu chu thikthu a ni. Hmangaihna a nasat poh leh thikthu a nasa a. Chu tak chu tuna ka buaina pakhat chu a ni. Thikthu chuan huatna a pai a, chu huatna chuan sual lian pui a pai lehchhawng a, nuin nâu a vei angin a vei nâ a, a hrin vaih chuan thil pawi tak a thleng thin.

Thlânmual thlang ngâw-ah chuan zân sava a hrâm lauh lauh a. Thlifim a rawn thaw heuh heuh a, ka ruih a reh tawh avangin vâwt ka ti tan ta viau bawk a. Khua chu a thiang vawl vawl a. Thla chuan tlâk tumin kâwlkil thlang lam a pan hrut hrut a. Vanlaizâwla arsi pe uarh mai chu ka thlir chho va, ka rilrua huatna te, itsikna te, phuba lâk châkna te leh thikthu lian pui pui awmte chu ṭha tilovin hnawh bo daih duh mah ila mihring thiltihtheihnaa hnawh bo rual a ni lo. Mahruaii thihna-ah hian mi pahnihin mawh an phur a, chung mi pahnih zinga pakhat, a mawhphur nasa zâwk leh a inthiam lo zâwk, retheih pui zâwk leh hrehawm tizâwk chu keimah ngei hi ka ni.

Nula tlangval rilru pua kan inbiak hmasak ber ni chuan a sam lêng phe dawr dawr kârah biang sum lang mâwi tawk chauh hian min rawn nuih var var a. Kan mit leh mit intawnga a zak hmêl sen ap ap chu tawrh zawh rual a ni lo.

“Mahruai.” Sawi zawm tur ka hre lo. A hma lâwka ka sawi tur, ka sawi hual kha vawm bo ang duak a ni a. Ka ngâwihsan ta daih a.

“Eng nge i duh ve teh tlat a?”

“I bulah hian ka lo ṭhu thei ang em?”

“Keini bulah te i ṭhut duh chuan tu nge ui phal ang ni.” A nui seih a, a kun leh daih a. A hmâa lei chu hmawlhtêin a thâi a thâi a.

“I phal phawt te chuan tu nge i bulah ṭhu lo phal ang, ka ṭhu châk lutuk alawm,” tiin ka han fiam zui leh a.

Kan ṭawng hre pha an awm leh awm loh enin kan hnung lam chu ka han hawi thuak a. Tumah an awm hnaih loh avangin tihtak deuh zâwk hian, “Mahruai, rawn lên i phal ang tiraw?” ka han ti a. Sen deuh ap ap chung hian, “Keini inah tehlul in rawn lên duh chuan in thu thu alawm. Lênna tur dang ṭha deuh deuh in hmu awm si a,” a ti bauh a. Kei chuan, “In ina rawn lên hi ka châk thei lutuk asin. Ngawi teh, i hnenah hian sawi tur ka ngah lutuk tlat. Mahse min lo ngaihthlaksak duh ang em tih hi ka hre lo a ni. Mahruai, ka thusawi turte chu i ngaithla duh ang tiraw?” ka han ti tê tê a. Ka zam ve em avangin sawi hmasak tur leh sawi hnuhnun tur pawh ka hre thiam lo a ni ber awm e.

Ani chuan fiamthu hian, “I duh duh sawi rawh. Ka lo ngaithla ang e. Ka ngaihthlâk châk zawng tak a niang chu maw? Mi te hi i hau hrep ang e. Eng nge i sawi duh chu sawi ta che. Ka beng ka lo dawh ang e,” a ti a, a nui var var a.

Tichuan ka duhzawng chu naupang lehkha chhiar zirtir ang maia bah deuh nak hian ka sawi ta a. Ka beisei aia a lo ngaihthlâk ṭhat avangin kei pawhin ka huphurh aiin sawi ṭha ka inti. Chumi ṭum chuan eng tin mah min chhâng lo va. ‘Aw’ pawh a ti lo va, ‘aih’ pawh a ti lo. A hmêl aṭang chuan a ngaihtuah zui nasa hle tih a lang thei. Nula fing tak, lehkhathiam a ni a, a rilru a tilang mai mai chuan ka ring lo. Nakinah chuan, “Rin aia i sawi thiam daih chu le. I lo timi viau a nih dâwn hi. Engpawhnise ka lo inngaihtuah ve ang e. Khawvel hi kan la hmang dâwn chauh a nia, a la hmanhmawh thlâk hleinem,” a ti a. Thil dang kan sawi hmain ṭhianten min rawn chim buai a, engmah ka chhunzawm thei ta lo a ni. 

Kan ṭhutna chu tlângchhip phaitualhnim a ni a. Tlâk lam atanga thli rawn thawin a puan bih lâi a chhêm lên dawr dawr kâra a khûp no lo lang te chu hmuhnawm thlira thlir tham niin ka hria. A sam lêng dawr dawrte chu ngam ila lo hui khawmsak ka châk ngang mai bawk a. Mahse ka hlauh vang ni hlek lovin engtin emaw ni ka awm a, a biak pawh ka be ṭha ngam meuh lo chu a ni e.

Hemi ni hian kan vêng YMA chu thlanmual sam faiin kan hnatlâng a ni. Kan vêng thlanmual chu tlâng chung zâwl hmun thengthaw tak mai a nih avangin nuam kan tithei hle a. Chawlhni tlaiah te hian nula leh tlangval bâkah nu leh pa pawh an lêng huai huai ṭhin. Thlanmual sir tlâng pang awih chin leh chin lovah chuan bûng thing lian fahran hi a ding a. A hnuaiah chuan ṭhutna kan siam a, chuta ṭang chuan tlâk lama kan khaw lui tlawhchhan ber Dârtui luiruam chu thui tak a lang thei a. A piah leh deuhah chuan hming nei tham lem lo tlâng dung nawm hmel tak tak pahnih hi a inkham phei ruah a. Eng khua mahin chung tlangdung pahnih chu lo atan an neih ngai loh avangin a ngaw dur khup bawk.

Hemi nia kan ṭhutna chu bûng hnuai kopang phaitual hnim chung a ni. Mahruaii hi hman deuh tawh aṭang khan ṭha tiin a kawng kal te hi a lo thlir zui vawng vawng tawh ṭhin a. A rûkin a chanchin hi theih ang angin ka lo zir a, ka duhzawng a ni satliah lo; ka hre chiang tawlh tawlh a, ka duhna leh hmangaihna chu ni tin a pung niin ka hria. Mahse maw, kan inkârah hian harsatna lian pui, ṭawngkama han sawi chhuah mai hleih theih loh a awm a. Chu harsatna lui lian dâi kai chu huphurhawm tak a ni. Ka hmangaihna a pun nasat poh leh chu kan harsatna chu a pung nasa ve mai dâwn tih pawh ka hre chiang khawp mai.

Mahse hmangaihna chuan ramri a nei ve lo va, tunhma leh tunhnu a dâwn ve tak tak lo. A mit chang a del lo va, a beng a chhêt a, a hnâr a ping a, a ke a bai tlat. Tuman kan duh duh kan hmangaih ngawt thei lo ang bawk hian kan hmangaih laklawh tawh chu duh hun hunah a sût ngawt theih hek lo. Kei pawhin Aizawla a lehkha zir rawn chawl ka hmuh hmasak ber tuma amah ka hmangaihna lo piang thar ta thut chu zan khat thil thu-ah ka sût ngawt thei tawh lo va; thei lo satliah pawh ka ni lo, kan inkâra harsatna awm thei zawng zawng ka ngaihtuah a, harsatna a tam zawh poh leh ka hmangaihna chu a nasa ting mai a ni.

Mahruaii hnena ka hmangaih thu ka sawi zan chuan tlaivâr deuh thawin a mi chhanna kha ka ngaihtuah zui a. Ngaih ṭhatna tur chi nge a nih a ni lo tih hriat har ka ti ngei mai. “Khawvel hi kan la hmang dâwn chauh a nia, a la hmanhmawh thlâk hleinem,” a tihte kha min hnarna a ni thei ang em? Lang chhuak lutuk lovin a pawm tihna em ni zâwk? Nge ni a sawi tur hre mumal bik lovin a sawi ve mai mai tihte ka ngaihtuah a. A châng leh thu ka sawi laia a hmêl kha lawm hmel ngei nia hriain ka ngaih ka tiṭha a, a châng leh a nuih ka tiza deuh niten ka hria a, chumi zan chu khumah ka let ka let ringawt mai a ni.

Kan lên hmasak ber zan atangin kan boruak tur chu a bul aṭanga a tâwp thlengin a lang nghal ruak tih theih a ni. Ngam leh ngam lova ṭhiante nen kan va lêng chu lên chhuah tuma lo insiam peih diam tawh a pa chuan a lên tum chu ṭhulhin kan lên chhung zawng sitting room-ah eng engemaw ni phuahchawp deuh deuh a khawih tluan ve zak a. A fanu inlêngte chu mi biak pawh tum chuang lovin a awm ve mawp mawp mai a. Mi â nilêng lo tân chuan a rilru tur awm chu hai rual a ni lo. Kan haw tur chu Mahruaii chuan gate thleng min thlah a. Ka kuta piai zauh pah hian, “Naktuk zanah rawn lêng leh ngei ngei ang che,” a ti sap a. Ngaih a ṭha veng veng mai.

Chumi zan ka lêng haw chu kan in lam pawhin zan dang a ang chuang lo. Zan danga ka lênna mi zâwt ngai reng reng lo ka pa chuan khawiah nge ka lên a, tute nen nge kan lên min han zâwt khauh mai a. A hmêl chu thup a tum ngial naa ka chhanna chuan a tilawm lo nasa tih hai rual a ni lo. Mi pawh be zawm lovin khum pindanah a lût a, a reh zui ta vang vang mai a ni.

Mahruaii te chhungkua leh kan chhungkua hi tunhma aṭangin kan inkawm ngeih vak lo tih chu ka hre tawh a, mahse hetiang tak hian kan inkâr hi a kak thuiin a lo hnawk hle a ni tih hi hetia Mahruaii nena kan inngaihzawn hnu hian ka hre ve chauh a ni.

Mahruaii chhungten min duh lohna chhan hi zû ka in vang emaw, hnathawh mumal ka la neih loh vang emaw a ni satliah ngawt lo va, kan pi leh pute aṭanga thil awm tawh a ni. Ka pa chhungte chuan zan hnih khat lekah Mahruaii ka rim tih chu an hre kim nghal a ni ber e. Ka ni Hnûndailovi phei chuan a la na bik hle a ni ang; an inah mi ko chhovin min han zilh hrep phawt a. Min bêng lo choh a ni. Tunhmaa kan chhungkaw hnih chanchin hre chiang ve phâk reng reng chuan min duh pui lo viau zel mai a ni.

Ka ni Hnûndailovi sawi dan chuan: Ka pûte chhungkua kha an rethei hle mai a. An retheihna belhchhah turin ka pû pa chu a lo vahna-ah an thing kihin a delhhlum a. Chuta chin phei chu ka pûte unau chuan mei alh an en tak meuh meuh a ni. An unau a rualin an la naupang hlawm bawk si a, ka pû nu, nu hrilsel lo leh chak lo tak chuan a theih ang anga enkawlin a fate chu a hmeithai pui lo thei ta si lo va, ‘an rethei lutuk’ han tih liam puat hian an retheih dan chu a sawifiah zo lo a ni.

Hetih lai hian ka pûte chhungkua chu Mahruaii pûte nen hian an inṭhenawm nghe nghe a. Mahruaii pûte chuan an ṭhenawma hmeithai rethei tak, chhangchhe bawk si chu han ngaihtuah mai chuan khawngaih a, peizawn zâwk awm tak an ni a. Mahse an retheihna chu hmuhsit nan an hmang zaw hlauh mai a.

Ka ni sawi zel dan chuan an in chu a chhiat em avangin luah reng theih a ni lo va, chu bâkah an awmnaa awm reng pawh chu nuam an ti ta lo va. Tichuan an chhak tuikhur kawng thlangah in chhe tê khawrin an insawn a. Chuta an awm chu an in sak chhûng zawnga engmah sawi si lo Mahruaii pûte chuan thla thum emaw lâi ka piten an luah hnu-ah an in hmun nia sawiin chhuak turin an ti ta mai a. Rei ngial an inbeih hnu-ah ka pute chhungkua hmeithai zâwk chuan ngam hek lo; veng dang in chhe zâwkah an insawn leh ta a. Ka pi nu rilru na lutuk chuan a hrisel loh phah nasa a. An insawn atanga kum khat lekah a thi ta a. Tichuan ka pûte unau chu nu leh pa nei lovin an awm ta a nih chu.

Mahse lung delh loh thing delh loh na na na chu an lo puitling a, nupui pasalte an nei ta hlawm a. Ka pu pawhin nupui neiin an khua chu a pemsan a, tuna kan khua-ah hian a awm hlen ta a ni. Rambuai a lo ni a, ka pute khaw hlui chu khaw dangah sawikhawm an ni a. Chumi kal zelah chuan Mahruaii pûte pawh chu kan khua-ah hian loh theih loh avangin an rawn pêm lût ve a. Ka pûte nen chuan vêng khatah an awm ho leh ta a nih chu. An rawn awm kum hian in hmun chungchângah an han inbakkaih leh chat a. VC court-ah inkhingin tlâng an thang leh ta hat mai a ni.

Heng hi ka ni thil min hrilh tam tak zinga tlêm tê chauh a ni a. A thu sawi zawng zawng chu ka sawi chhâwng sêng lo. Ka ni Hnûndailovi sawi tur ngahzia leh a sawi tamzia ngaihtuah chuan Mahruaii te lam pawhin sawi tur an ngah ve ngawtin ka ring. A dik tak chuan ka niteho pawh hi ṭawng duh ve tak mai an ni a, an sawi zawng zawng hi awih vek chi pawh a ni bik kher awm lo ve. Kan chhungkaw hnih inkâr hi a tir tak, ka pû pate hun lai daih atanga a bul intanna chu inuire chungchangah a ni ber a. Chumi hnu-ah lo tur inchhuhsakin an chhunzawm a, chumi kal zel chuan thawnthu tâwp thei lo hringin tun hi kan thleng ta a ni.

Romeo-a chhungte leh Juliet-i chhungte ang mai kan nih chu. Mahse kei chuan Mahruaii chu a ni telin ka hmangaih tial tial si a. Kan chhungkaw buaina thûk tak mai pawh chuan min dal zo lo.

Kan inhmuh leh hmasak ber chuan vanneihthlak takin a chhungte dang tumah an lo awm lo va. Inngheng riala ṭhu dunin kan titi melh melh a. Ani pawh a dik tak chuan a buai ve hle a ni. Chumi zan chuan lêng rei hman ka ni lo va. Ka haw dawn chuan kan chhungkaw pahnih boruak hre rânin, “Mahruai, ka hmangaihna che hi engmahin a dal zo lo. Tunhma leh tunhnu ka dâwn thei lo va, dâwn vak pawh ka tum lo. Tunah hian ka thinlung zawng zawngin ka hmangaih che a. Ka la hmangaih zual zel dawn che a ni,” ka ti a.

 Ani pawh rilru hah hmêl takin a thaw hawk a. Ka nghawnga mi rawn uai pah hian, “Hmangaihna kawng hi a bumboh poh leh a ngaihnawm a, a hlû bawk a, a to bawk asin. Mahse kei zawng kan chungchang ka ngaihtuah hian ka muhil thei ṭhin lo,” a ti a. Zawi têa lo kuah lêt pahin a hmuiah chuan ka fâwp a. Chutah a nghet thei ang berin kan inpawm a; inthlah a har ngei mai.

Chutiang chuan rilrua pai nei deuh reng, tihngaihna hre mang si lovin kan inngaizawng a. A hmuh pawh kan inhmu fâl hlei thei lo. A chhûngte chuan an vêng deuh tlat a. Kei pawh ka chhûngte chuan lêng lo sê min tih em avangin min dal dan an ngaihtuah fo tih ka hria. Kei chu tlangval harhvâng ve tak leh tuallim ve tak kha ka ni a, min dal thei lo. Mahse ka chhûngten min dal vak thei lo mah se Mahruaii chu hmeichhia a ni a, a chhûngte chuan an vêng hneh ang reng viau mai. Lehkha erawh kan inthawn ṭhin. An ina kan inhmuh theih loh pawhin an kawmthlang Ropâri te inah thiante puihnain kan inhmu a, a nuam a, a hrehawm bawk a, a chang chuan rilru a hah thei khawp mai.

Boruak tichhe lehzual turin Chawlhni tlai khat chu kan zu inna-ah Mahruaii û Lalremruata nen chuan thisen chhuak khawpin kan insual a. Chumi hnua chanchin ka hriat leh hmasak ber chu a chhûngten phai lama Mahruaii dah an tum thu a ni.

Mahruaii û Lalremruata nena kan insualna chhan kha hetiang hi a ni. Ka thianpa Zakhuma Ralte chuan Thênzâwl nula Lalrinpuii a ru a. Nei hlen duh mang si lovin khawi khawiah emaw ni thla hnih vel a fawr kual pui hnu-ah a kirtir leh a. Chu mai ni lovin Zakhuma chuan a hnu lawkah kan khaw nula pakhat chu an inngaihzawn em em kan hriat ngai loh kha a ru leh ta mai a. Chumi chungchang chu kan zu inna-ah chuan an lo sawi a. Keia rui phur pheng chuan Zakhuma chu ‘a thiam lohna a awm lo ve, a hmeichhiate hian an zir lo ve bawk a ni,’ tiin a thlavang ka lo hausak a. ‘A hmeichhiate hian an zir lo ve bawk a ni’ ka han tih tak mai chuan Lalremruata thin a lo khei hle a niang chu (a hnua ka hriat leh danin). Insual peih atin a rawn ding chhuak nghal a. Hmui leh hnâr thi zawih zawihin kan inkhawih dun ta a nih kha. A hnua mi min hrilh danin Zakhuma rûk hnuhnun zâwk Lalremsangi leh Lalremruata chu an lo inngaizawng thin a lo ni.

Mahruaii te ina lên chu a huphurhawm lehzual ta hle mai. Ropari te inah bawk kan inhmu leh a. Sawi tur a vâng ngei mai. Chumi ṭum chuan rei lo tê-ah midangin min rawn chim buai ta bawk nen, thu tam sawi lovin kan inhawsan ta thuai a.

Hun chu zawi zawiin a kal chho ve zel a, Mahruaii nen chuan kan inhmu khât khawp mai.

Zan khat chu ṭhiante nena zu kan inho laiin kan ṭhianpa Lalhriatpuia chuan, “Tunlai chu Mahruaii te inah sawn kan High School zirtirtu thar hi a lêng ngun teh a nia. Ngûnhnâm vai pui tur i lo nei reng te hi a ni lo maw?” tiin min fiam a. Fiamthu a ni naa ka thin a khei ta zak mai. Thil awm dan tur ka han chhui zawn a, ka rilru chu thiknain a khat a, ka bing mup mup mai a ni. Fiamthu vêka chhan tumin ka han nui lui ngial a, mahse ka hlawhchham titih a ni ber e. “Sava thlâwk lai te chu a them thiam thiam ta tur a ni mai alawm,” tiin ka han chhâng ve hrâm a. Ka thinlung chhûng rilah chuan ka nuih a za lo ngang mai.

Heti taka thil chiang engmah a awm lo chung pawha High School zirtirtu thar ka thik em em mai hi Mahruaii ka hmangaih luat vang a nih rualin zirtirtu thar chu tluk loh ena ka en vang a ni. High School zirtirtu thar chu hmanni lawka rawn awm a ni a. A hawiher a felin a smart zaih mai a. A hawihhawmin a biak a nuam hle bawk. Kohhran a rawn bel chat a, kan pastor nen pawh an inhmelhriat der tawh.

Mahruaii nen chuan eng tin tin emawni chawlhni tlai khat chu thlanmual bung hnuaiah thiante remruat puinain kan inhmu leh thei ta hram a. A rilru a hahin a tuar nasa hle tih hriat tak hian a dâng bêm a. Tlêmin a lang cher deuh hlek bawk. Chumi ṭum chuan ni danga ka dawn ngai loh zawhna ka tawng ta fo mai; chu chuan ka ngaih a tiṭha lo khawp lehnghal.

“Zû hi eng tikah nge nghei i tum? Nghei i tum tawh reng reng em? Zu in mi pasala neih hi ka naupan lâi atanga ka hlauh ber a ni,” a ti a. Chutilai pawh chuan zû rim chu ka nam reng mai si a, chhan thiam a har hle mai. “Nupui fanaute kan han neih ve chuan kan la nghei chawp ve mai ang chu,” tiin ka han chhâng liam puat a. Chutah, “Ka zu in vanga min duh lo chuan min hmangaih tak tak lo a ni ang,” ka han tizui leh zat bawk a. A diktak chuan ka zu in leh in loh hi kan inkâra buaina thlentu turah hian ka dah ngai lo va, a ngaihtuah pawh ka ngaihtuah ngai lo. Mahruaii chuan eng tin paw’n awm ila min duh viau turah ka lo ngâi ngawt a. Mahse chumi ṭum chuan nula pangngai, kristian rilru pu tan chuan chutiang ngawt chu a ni reng thei lo vang tih ngaihtuahna ka nei ve ṭan ta a.

“A nih leh lo innei ta ila eng tin nge ei kan zawn ang? Eng tin nge nupui fanau chawm i tum?” tia min zâwt chu ka thin a ur ta thut mai a. Ka thinrimna chhan chu chhanna mumal ka neih loh vang leh chutiang zawhna chhâng tura ka la inpeih loh lutuk vang zawk a ni tih erawh ka hai lo.

Ka rilrua High School zirtirtu hre reng chungin kei chuan, “Ngaihzawng dang i nei a nih chu. Min lo duh tak tak lo tawp a nih hi,” tiin ka chhang a. Ani chuan, “Ka hmangaih vang zawk chea heng thu hi ngaihtuah ṭhin ka ni asin. Naupang chhia kan ni tawh lo va, chutiang chu ngaihtuah phâk lo ila nupui atan neih tlâk pawh ka ni nang,” a ti a. A chhanna chu dik ka ti viau naa ka inti mipa a, tlâwm mai chu ka tum lo. Chu bâkah ka rui bawk si a, ka rilru chu a fim chiah lo bawk a ni.  

A dik tak chuan kei chu hnathawh mumal nei lo, lehkha pawh zir lo, college kal chhuak lova chawlhni tlai tin rui ve ringawt, chhungte zâra inchei ve thei chauh ka ni a; Mahruaii zawhna chu ka chhang thei lo a ni. Ka chhâng thei lo tlâwmngai, dik ti bawk si chuan tihtauhna dang ka zawng a, chu chuan thil ṭha lo zâwkah min hruai zel a, a tâwp kan thlen phah ta a ni.

 A tûk zan chuan an kawt zawn ka kal laiin an kawngkapui bula Hero Honda bike inhung hi ka hmu a. Chu bike chu ka hmuh hnu nia ka hriat avangin ka han en chiang a, High School zirtirtu thar Zothanzauva, ka rilrua ka lo ral thik ngawih ngawih ṭhin ta ngei kha a lo ni a. Ka phu zawk a, ka rilru-ah chuan thu tam tak a rawn lût nghal a, ka lênna tur pawh ka ṭhulh phah der a ni. Chumi zan chuan rinthuin thil ṭha lo pui pui ka ngaihtuah a. Mahruaii leh Zothanzauva chu inngaizawng ngei hian ka han suangtuah vel a. Hmeichhe rinawm lohzia leh an rilru ngheh lohzia te chu ka ngaihtuah a, ka muhil mang lo. Ka rilru tihzan nana ka zu in chuan a thawk lo a niang, ka tlaivar titih der mai.

Thawhleh zan a ni a, Lalrindika te ina ka lêng tur chu Pu Thawmliana te dâwr kawtah chuan ka ṭhian pakhat Lalnunmawia (Manuna) nen kan intâwk a. Ani chuan, “Kan inhmu hlauh chu a va tihzia em! Tirawh vawiin khan Aizawl atangin a senchi ka rawn hawn a nia,” tiin a senchi in puiah min lo sawm a. Ka phur zawng tak a lo nih avangin an inah chuan kan inzui lût a. A chhûngte hmuh loha rawn ak chhuakin in hnuai lamah kan chhuk thla a. Kan zu dawm dun ta a ni.

No thum ve ve kan tlâk dun hnu chuan nidang ang bawkin Manuna chu a ṭawng duh leh ta hle mai a. “Tunlai Mahruaii nen in la inhmu ngai em? Kan High School zirtirtu thar hi a lêng zing hle mai a. Rin loh deuh hian i chang lo mai tur a nia. Hmeichhiate zawng, a vil peih peih an ni mai. Nang pawh ṭang nasa rawh,” a ti a. Kei chuan, “Kan inhmu khât khawp mai. A harsa a ni,” ka ti ringawt a. Manuna chuan, “Anih tirawh, i kal chhuak teh ang. Zanin chu min lenpui ve ang che,” tiin a tho nghal a. Lalrindika te ina kal tur chu ka ni naa haw paha kal mai theih nia ka hriat avangin Manuna chu ka hnial duh ta lo va.

Manuna bike-a kan chhuak tur chu bike pakhat hian min rawn tlan pel thuak a. Khua a thim tawh avang leh ka lo ngaihsak lem loh avangin tute an nih ka hre lo. Manuna chuan, “Saw le, Mahruaii leh Zothanzauva te an nih saw. Khawiah nge an kal dawn aw,” a ti a. Kei chuan, “An duh duhna-ah kal ang hmiang,” ka lo tiliam puat a. Mahse Manuna hnenah chuan, “Khawiah nge an kal dawn hriat ve hrim hrim nan han um chhin teh,” ka ti a. Kan um ta a ni.

Mahruaii te chu an tlan chak  vak lo bawka khaw hmawr lamah chuan kan va umpha titih ta mai a. An bul kan va thlen chuan Manuna chuan a han pit khum tuarh a, chutih lai tak chuan kan khaw luhna tur kawng kual lai kan thleng chiah a ni. Chu kawng kual laiah tak chuan ding lama tlan pelh tum lovin Manuna chuan an vei lam atangin tlan pelh a tum a. Kawng min ken tuma an insiam ṭhat lai takin kawng kawiah chuan motor lian a rawn chhuak thut a. Thil ri bur leh mihring ṭe tuarh thawm hi ka hria a. Manuna phu chiang lutuk chuan a bike chu thunun zo lovin kan tei phei nawk nawk a, kan piah lawk kawng thlang tlangsam hmunah chuan kan tlan liam ta a ni.

Kan tlan liamna chu a awih loh avang te, tlangsam pik hmun a nih avang leh a break a rah hman avangin kan na lo. Eng tin tin emawni harsa lo takin kan inhai chhuak thei mai.

Mahruaii te pahnih chu damdawi in lam pan pui nghal an ni a. Mahse kan khaw damdawi ina enkawl chi an nih loh avangin Aizawlah an phur thla a, ngaihtuahawm tak an ni.

Khawtlangin Mahruaii te pahnih chanchin chu an ngaihven a, an inzawt sup sup mai. Keini ṭhian dun chu han puh chiah theih si loh hian a hmingchhe tawkin kan lo inrawlh ve titih si a, nuam lo tak a ni. Khawlai pawh ka lêng chhuak ngam meuh lo a ni ber mai.

Tin, chutia an thi ang nge an dam ang tih hriat loha an han awm tâkah chuan Mahruaii leh Zothanzauva chanchin chu mi titi ber a ni a, kei pawh ka lo hre ve lo thei lo. Mahruaii Aizawla college a kal lai khan Zothanzauva te nen hian an inṭhenawm a. Hetih lai hian Mahruaii chu a pa û te hnena awm a ni. Zothanzauva te nen chuan chi khat an nih avangin an intichhung viau a. Chhiatni ṭhatni apianga inpui tawn leh man te pawh inei tawn ṭhin an ni.

Kan khuaa Zothanzauva a rawn awm tirh pawh khan Mahruaii te ina awm tum a lo ni nghe nghe a. Mahse sikul a hlat deuh avang leh thil dang engemaw rem chan lohna avangin a fin lo mai mai a lo ni a. Tichuan chhungkhat anga awmin Zothanzauva chuan a tlawh ngun viau a lo nih chu. Kan chetsual zana an inphur chhuak pawh kha thildang vang ni lovin Mahruaii pû dam lo tlawh tum an ni a. Keini zu rui engmah ngaihtuah chiang lo khan thikthu tichhiain kan va um ta vak mai a; hetiang hi kan lo thleng ta a ni.

Hei hi khawtlang titi atanga a lan dan chu a ni a, mahse hemi phênah hian thil hre ril deuh zawka insawite chuan Zothanzauva te leh Mahruaii te hi an intichhûng ngei mai a. Amarawhchu thisen inzawmna nei lo an ni a, Aizawl Mahruaii awm lâi pawh khan an lo inkawp deuh tawh a. Hetia kan khuaa Zothanzauva a rawn awm hnu hian langsar vak lovin a rawn beisei leh a ni.

Nikhaw hre lova ni thum a awm hnu-ah Mahruaii chu a thi a. Zothanzauva erawh chu ngaihtuahawm a ni lo. Kan khaw nula chhuanvawr thi chuan khaw chhung a nghawr nghing a ni ber. Kan khaw mitthi awm tawhah chuan thlanmual thlenga a ruang zuitu pawh a ngah ber hial awm e.

Heng hi Mahruaii nena kan chanchin, kan bul ṭan dan leh tawp dan chu a lo ni ta a ni. Ka nikhua loh vang leh awm khaw loh avanga he thil hi lo thleng a ni a, ka inthiam thei ngang lo. A hming an tarna thing kraws chu ka kuah reng a. Ka tlaivar chiang khawp mai. Kâwl chhak lamah ni a lo chhuak suar suar a. Zawi muangin ka ding chhuak a. Mahruaii thlan vurna lei chu tlêm thamin ka jacket iptê-ah chuan ka ak a, inchhir reng renga nun hmang tluan turin chu thlan khawhar tak chu ka kalsan ta hnak hnak a.☻☻