Fear Factor Theory (Hlauhna)

          Hlauhna hi mihringte min tizalen thei lotu pakhat, bawiha min siamtu leh a ruka min phuar tlattu chu a ni.

         

Vawikhat chu Aizawl vêng pakhata mitthi inah ka kal a. A mitthi chu tu nge a nih ka hriat loh chu thuhran, a chhûngte emaw, a \hiante emaw pawh hriat pakhatmah ka nei lo va. A thihchhan takngial pawh ka hre lo. An in pawh ka zawn fê hnu-ah ka hmu chauh a ni. Eng vanga chu hmunah chuan kal nge ka nih? A chhânna chu hlauhna a ni. Thih hlauh vang erawh a ni lo.

Mizo ka ni a, chu hnam chuan Mizo nia inchhâl apiangte chu an kal phâkna chin mitthi ina kal zel turin a phût tlat a, a phût na si a, kal loh ngam a ni lo. |henawm khawvengten Mizo lo min tih ka hlau va, YMA ten YMA lo min tih ka hlau va, chutiang chhiatna chu ka pumpelh thei bik dâwn si lo va, chhiat kan tawh ve hunah inlêng ka nei lo bik ang tih ka hlau bawk a. Chu hlauhna chuan ka peih emaw peih lo emaw, ka châk emaw châk lo emaw, ka hman emaw hman lo emaw, ka tuarpui emaw tuarpui lo emaw, a thia chu chawh ka ti zâwk hle emaw, ti lo emaw a ngaihtuah lo – kal turin min tur lui tlat a, min vau deuh bawk a, ka kal ta a ni mai.

Chu mitthi inah chuan keimah ang bawka hlauhnain a tur chhuah mi engemaw zât an lo awm ve a. Thil awm dan kan inzâwt sup sup mai a ni. Ka ngaihtuah a, chuta mipui tlim hmur zingah chuan a mitthi ui vang liau liauva lo kal khâwm âiin hlauhna vanga kal khâwm kan tam zâwk hial âwm e – ka hre chiah lo. Mahse a tam zâwk chuan hlauhna avanga kalkhawm kan ni tih kan inhre chuang kher lo vang.

Chawlhnia kan inkhâwmna chhan tam tak hi Pathian kan hnaih em em vang a ni lo fo. Zêp lovah chuan kei pawh ka han inngaihtuah vang vang hian ka inkhawm chhan tam tak hi chu hlauhna vang a ni tih ka pawm tho. Biak in hnâi têa awm, dam sen lul si hi miin enga tinge i inkhawm loh min tih ka hlau va. Kohhran  huatthu liantham sawi si lo chu min hnawtchhuak êm lo va. Chutia mi tha pangngai awma awm ve ta chu inkhâwm loh kha a mawi tlat lo va, ka inkhawm lo ngam thin lo a ni.

Vairam hmun pilril, Bombay vêng kilkhawr deuha flat pakhat luah ve mai zawng ni ila Mizorama ka hmêlhriat miah loh mitthi, an in zawng chawpa ka kal hram hramna angah hian ka kal hauh lo vang a. Chawlhni tin inkhawm \an hun angah hian inchei apin kawrchung leh nectie nen Bible kengin keima pindanah inkhawm hunbi ka hmang kim peih miah lo vang.

Hlauhna hian Pathian min auhtir \hin a. Chu chu a pawina pawh awmin ka hre lo. Pathian min hnaihtirtu hmanrua a nih chuan a \ha viau a ni. Hlauhna avanga Pathian kan auh dan leh kan auh chhan tam tak sawitur a awm a, mahse thil pakhat chauh i han sawi teh ang.

Kristian nu leh pa tam takin Pathian hnena an fate an hlanna chhan hi fear factor theory hmang hian ka han ngaihtuah mai mai chhin a. Chuta ka ngaihtuahna lêng vel chuan nu leh pa tam takin Pathian hnena kan fate kan hlanna chhan chu Pathian rawngbawl tak tak se, retheih a \ul pawhin rethei se, martar a \ul pawhin martar se, kutdawh a \ul pawhin dawh se, mualpho a \ul pawhin chanchin \ha chu  mualpho pui se tihvang lam a ni lo – hlauhna vang a ni. Eng hlauhna vang maw?

Naupang enkawl hi thil namai a nih loh avangin nu leh pa tam zâwk hi chu naupang enkawlna-ah hian kan inring tâwk lo va, Pathian kan au \hin. An lo puitlin hunah mi an pha lo vang tih kan hlau va. Lehkha thiam, thla tin chêng tam tak hlawh thei ni se kan duh a, chu chu mi âiin an rethei ang tih kan hlauh vang a ni; a sualna âwm phei zawng ka hre lo. Mahse Pathian hnena kan hlan kan fate awm dân tura kan duh chu fear factor theory hmang hian kan kohhran chhûnga thil thleng thei entirna nen sawi ta zel ila.

Kohhran upa pakhat fel tak a awm; an nupain kohhrana mi \hahnemngâi tak an ni. Fa lehkha thiam tak tak panga a nei. Chutihlâi chuan kan kohhran hian hnathawktu tur lehkha thiam a mamawh em em mai a. Tichuan tu nge he kohhran upa fate zingah hian kohhran hna thawk ta ang? Ka fear factor theory hmanga ka chhût dân chuan he kohhran upa hian a fate zinga a rin loh ber, kohhran dang zingah sawrkar hna thawk se zu in duh mai tur hmuha a hmuh, kohhrana ti\ha zui lutuk duh tura a hmuh loh ber chu kohhran hna thawk atan a duh ber ang (a fapa/fanuin a thawh duh leh duh loh chu thuhran ni se). A fate zinga a fel deuh deuh, khawiah pawh awm se hlauhthawnna em em a neih loh, a rin ngamte chu sawrkar hna lian thawk a, Pathian malsawmna dawnga thla tin hlawh la turin a duh ang a. Sawma pakhat pawh rinawm takin an pe mai ang.

Hetiang hi kristian nu leh pa tam tak an nih theih rualin kan kohhranah han la lût ta bik ila. Adventist nu leh pate hian kan fate chu an la puitlin tak tak hmâ leh an sual dâwn nge an ṭha dâwn tih kan la hriat theih tak tak hmâ, sual mai thei dinhmunah an la ding nia kan hriat lâi leh anmahni hrim hrimah rinna kan la nghah ngam tak tak hmâ chuan Pathian hnênah hlânin ‘Lalpa rawngbawl se’ kan han tive luam a. Sawrkar hna hmu mai dâwna kan hriat loh phei chuan kohhranah ngei hian thawk se ti thei kan awm fur mai. Amarawhchu an lo puitlin a, khawiah pawh awm se nghing mai mai tawh lo tura kan ngaih chin, anmahnia hlauhthâwnna rilru kan neih tawh loh chinah chuan boruak a danglam daih \hin. Hei hi a chianna chu Helen Lowry School-a Seventh-day adventist \halai lehkha thiam thawk tawh, sawrkar hna hmua chhuak leh sapram kala an hna bânsan tam tawhzia a\ang hian a hriat theih mai awm e.

Nu pakhat chuan a fapa naupang zâwk chu tirhkoh ni turin a duh em em mai a. Pathian hnenah pawh nasa takin a dil a, a hlan lah a hlan zing narawh. Chutia hlan fo ta chu Pathian pawhin a chhâng ta a ni ngei ang; a fapa sual zet mai, zu leh damdawi tih ching (drugs addict) chu piangtharin a sim ta hlauh mai a. A testimony sawina-ah pawh a pianthar theihna chhan chu a nuin nasa taka Pathian hnena a hlan vang niin a sawi a. Ka pawm zâwng tak a ni. Nu \awng\aina hian thil a tithei teh asin. A nu pawh a lâwm ngawtin ka ring.

Amarawhchu, han ti leh ṭalh ila, a hnu lawkah chu nu chuan a fapa fel zâwk, lehkhathiam zâwk, hmêl ṭha zâwk, fing zâwk leh ei tling zâwk, khawiah pawh awm se sual ve mai mai lo tur chu kohhran hna atanga bantirin sawrkar hnâ-ah a luhtir hmiah mai. Chu chanchin ka hria chu ka ngaihtuah zui nasa ta mai a. Engvangin nge he nu hian nasa taka a fapa sual zâwk chu Pathian rawngbawl tura nawr siin Pathian rawngbawl mêk a fapa fel zâwk chu sawrkar hna thawk tura a lâk chhuah theih? Hei pawh hi fear factor theory dikna-ah ka ngâi mai. He nu hian Pathian ram zauna tak tak kha a duh a ni lo; a duh zâwk chu a fapa sual sim kha a ni. A fapain sual sim se a tihna chhan pawh kha ama hmâ a sial vang a ni bawk. Chu chu kraws hmanga mahni hmasialna thup dân ṭha ber a ni hial ta ve ang. A fapa khân piangthar se su lo pawhin a sual kha a sim hlen thei dâwn tih hre ta se Pathian rawngbawltir tura chaw ngheiin a \awng\ai fo kher lo mai thei. Nu leh pa tam takin kan fate hian Pathian thu awih se kan tihna chhan chu Krista rawngbawlin pên chhuak tak tak se kan tih vang a ni lo, keimahni nawmsakna tur a nih vang leh keimahni hmâ kan sial vang mai a ni.

Kristian nu leh pa tam takin taima taka an fate an ṭawngtaisak peihna chhan tam ber chu Krista ram zauna lam a ni lo; mualpho hlauh vang te, ṭhiante fate aia an sual bik hlauh vang te, mi aia an retheih bik hlauh vang te, chhungkua an tibuai ang tih hlauh vang te a ni ber zâwk awm e. Hei hi a dik lo mai thei, dik mai thei, ka hre thiam tawh bik lo. Rinthu vek a nih hi. 

Tin, hlauhna hian mihring min phuar khâwm \hin. Hmânlai kan pipute chu ṭhenawm khuaten an rûn ang tih hlâu reng rengin an awm a. Chutah ramhuai leh sakawlh hlauh tur dang an la ngah si; chu hlauhna chuan a phuar khâwm a, an in\anpui tawn tel tel thin. Chutiang hlauh tur awm tawh lohna Aizawl, New York tih ang rengahte chuan hetiang hian mi an inphuar khâwm (closely knitted) tak tak thei lo. Indopui Pahnihna-ah khân hlauh inang USA leh Russia chu Hitler-a dovin an \ang dûn a. France leh British pawh khawvel hmun danga ram inchuh buai reng \hin an ni a, mahse Hitler hlauvin an ṭang dûn a nih kha. Indopui a han zo chiah a, an hmêlma in\âwm Germany a han tlâwm takah chuan thinlung lama inngeih tak tak lo USA leh Russia chu an inbakkaih nghal chat mai. Cold War lâia an inngeih lohzia lah tlâng hriat. Heng ram pahnihte hi hlauhna avanga chauha Indopui Pahnihna lâia ṭang dun thei kha an ni a. Chu pawh chu fear factor tho a ni.

Hei hi vanram kawng kan zawhna-ah pawh hian a thleng fo. Kum 1983 bâwr vel kha a ni ta awm e. Kan kohhran zingah khawvel tawp hnaih tawhzia hmanga mi sawi\haih thiam fahran mai pakhat hi a rawn chhuak a. A sawi uar thiam bawk a, kan ngaithla tam tulh tulh a, kan hlau tawlh tawlh a, kan insawr bing tawlh tawlh bawk a. Zan khat inkhawm pelh zeuh pawh hlauhawm tak a ni. Chuta Sunday Law hlau tak takho chuan tunhma lama an inngeih lohnate kha dahṭhain khawvel hi an hmêlma en tawp a ni ber mai. America president leh Synod Moderator atanga YMA section hruaitu thleng khân min tiduhdahtu tur enin kan en tawh mai a ni.

Chutia min sawi\haih vak hnu chuan Manipur lamah min hawsan ta a. Chutah kan hlauhna boruak chu zawi zawiin a lo dâi a, kan thla a han muan leh deuh tâkah chuan hlauhna avanga unau emaw inti kohhran pakhata mite chu Indopui Pahnihna zawh veleha USA leh Russia an inbakkaih nghal chat ang khân thu leh hlain an inbakkaih nghal chu a ni der mai a. A hnu lawk kha ni ta maiin ka hria (ka hre chiang ta lo) an inkhawm hrang ta nge nge a nih kha.

Keini kohhran hian mi kohhran hlauh ve loh hlauh kan nei a. He hlauhna boruak hi a nasat apiangin kan intêl ruh ang a, kan inhmangaih ang a, kan \angrual bawk ang. Chu ngei chu  fear factor chi khat chu a ni. He factor hi miin zir lem lo pawhin an hmang fo. A bikin thuhriltute hian an hmang thiam \hin khawp mai.

Mizo zinga thuhril thiam tak tak, speaker lar tak ti teh ang, reng reng chu a tlangpuiin mipui rilrua hlauhna tuh thiam tak leh tichi-ai thiam tak an ni deuh zel ang. Khawvel sual tawhzia leh bawlhhlawh tawhzia sawi thiam tak, chutiang sawi tur hre tak, sawi tur pawh zawng deuh reng mai an ni duh khawp bawk.

He an hmanrua ‘hlauhna rilru tuh’ hi a hmang thiam thiam an hlawhtling tihna a ni tlangpui awm e. USSR communist ram hruaitu sual tawrawt hmingthang Joseph Stalin-a khan hei hi a man chiang khawp a. Mipui rilru-ah hlauhna a tuh theih chuan a duh duhin a thunun thei dawn tih a hria a, a hmang nasa kher asin. A hun laia USSR mipui chuan amah kha an hlauhtlawn a, an hlauh poh leh a thunun hneh dawn tih hriain ani lah chu a intihlauhawm thiam em em lehnghal.

Hetiang deuh chiah hian mipui thunun tum chuan hlauhna rilru neihtir phawt tur a ni. Thuhriltu kan nih chuan engemaw ti taka hlauhna rilru kan neihtir hun hunah kan thusawi dang reng reng chu an pawm zel tawh dawn tih hria ila, sawi\haih dan \ha ber ber zawn tur a ni. Politician kan nih pawhin hei hi a dikna chen a awm. Mi party-in sawrkarna an lâk chuan ram hian tuar dawn hlein sawi chiam ila, kan sawi thiam viau a, hlauhna rilru kan tuh theih chuan kan hmin zung zung mai ang.

Tin, hlauhna hian engmah hlauh lohna-ah min hruai thei. Sakei hlau tlanchhia chuan engkim a su ngam tawh mai \hin. Khawvel tâwp hlauh lutuk avangin engkim kan chan ngam fo. Kan hlauh loh laia kan tihngam loh leh kan tih peih loh kha kan tingamin kan ti peih mai a ni. Rambuai laia Mizo sipai \henkhat vai sipai hlau tlanchhia chu hlauh tur a awm loh laia an zuan thlak ngam lohna khamah an zuang thla zung zung mai a ni. Thil pakhat hlauhna hian thil dang hlau miah lovin min siam thei kan tih kha. Chuvangin thil pakhat ti tura kan duh, kawng danga kan nawr kal theih lohho chu hlauhna hmang hian i nawr kal thei maithei a ni. Pathian hmangaihna thu nêm tak emaw, vanram nawmzia emawa mipui rilru i chawk tho zo lo a nih chuan hremhmun hlauhawmzia hmangin i nawr kal dul dul thei asin. I fa naupang thu awih lo chu sanghar hmangin tih\haih la, i tih\haih hlawhtlin a, an hlauh viau chuan an rawn bel ang che’ng a, i duh duhnaah i tir thei tawh ang. Puitling pawh kan hi kan ni tho; a hmanrua leh a lan chhuah dan a danglam deuh tih chauh a ni.◊◊

 Note: ‘Fear Factor’ tih ‘thumal’ hi keima phuahchawp liau liau a ni.