Ethnocentrism, Xenocentrism leh Mizo Kohhrante

Ethnocentrism chu mahni awmna society, culture, norms and values leh thil dang hrim hrim pawh, hnam dang tihdan âia ṭha zâwka hriatna hi a ni. Mizote chuan ‘tlawmngaihna’ hi hnam dangin nei ve lovin kan hria a, kan ‘tlawmngaih’ dan chu hnam dang nunzia aia mawi zawkin kan hre bawk a. Tin, kan ram hi ram dang aia boruak nuam zawk leh hrisel zawkah kan dah a. Chhawrpial run iang hialin kan ngai a ni ber e. Mimal nunah lo la lût ila, ethnocentrism  chu mi âia mahni fel zawkah inngaihna hi a ni kan ti thei ang. 

Ethncentrism hian ṭhatna pahnih a nei. Pakhatna-ah chuan hnam a tilungrual. ‘Bik’ riauva inhriatna chuan hnam min phuar khawm a ni. Khawvel hmun hrang hranga Mizo awmte an inlungrual theihna chhan pakhat pawh ethnocentrism, hnam dang âia danglam deuh bika inhriatna hi a ni ti ila a sual tam lo vang. Pahnihna-ah chuan inrintâwkna min pe. ‘Mizo tlangval’ kan han intih tawh chuan mi dawihzep deuh pawh kha a intihuaisen thei a, mi aia nêp bik lova inhriatna min pe. He Mizo rilrua ethnocentrism awm lian em em mai hi lehkhazirna-ah te, sipaiah te, infiamna khawvelah te kan hmang ṭangkai khawp mai. ‘Mizo tlangval kan ni law’m ni’ han tihtawh hi chuan dawihzep thiang lo tluk a ni tawh. 

Ethnocentrism hi kohhran tinin kan nei vek; keini kohhran pawh kan bang lo. Kohhran tin hian ‘inhmangaih bik riauva inhriatna te, mi kohhran aia thawhlawm te pawh thawh ṭha zawka inhriatna te, hlim zawk leh rau deuh zâwka inhriatna te, Pathian thu hmu fuh zâwka inhriatna te’ kan nei vekin a rinawm. 

Ethnocentrism kalh chiah hi xenocentrism a awm leh a. Hei hi chu kan hnam tihdan aia mi hnam tihdan kha ṭha zawk leh belhchian dawl zâwka hriatna kha a ni. Kan ram aia foreign ram nuam zâwka hriatna kan nei lian hle; foreign ram kal theite chu a duh pawh an induh deuh. An kal hlat poh leh changkangin an inhria. Mi khaw VC-te chu kan khaw VC-te aia khawtlâng hmangaih zâwk leh khawtlâng hmasawnna tur thawk tam zâwka ngaih a awl hle. Mikhual nula leh tlangval an luck duh riauna chhan pawh hi xenocentrism a ni. 

Ethnocentrism leh xenocentrism hi kan nei kawp duh hle; khawi nge langsar zawk tih a ni deuh mai. A chang chuan ethnocentrism a langsar zawk a, a chang chuan xenocentrism a langsar zawk bawk. Mimalah thui tak a innghah rualin kan dinhmun tawn dan azira danglam thei a ni. Politician-hovin ṭhalaite min han fuih tak tak chuan ethnocentrism hi a lian duh khawp mai a. Mahse foreign kal haw hlimin uar deuh maia an kalna ram changkanzia an han sawi chuan (an kalna ram an sawi changkan thiam poh leh an dinhmun a sâng dawn tih an hre tlat) xenocentrism hi a lian duhin mahni insit a awl khawp mai. 

Tichuan kan rilrua ethnocentrism leh xenocentrism inbin (insual ni lovin) zak zak chuan thu inang lo tak tak min sawitir ṭhin. Kohhranah lo la lût ta ila. A châng chuan kohhran dangte chu fel deuh thluam hian kan han hre ta bik a. Keini kohhran chu chhangchhe deuh zawkten kan inchhuah bawk. A chang leh kohhran dangte aia fel zâwk fêin kan inhre si; kan hun tawn azir a ni. 

Chutiang rilru pû chuan sawi zel teh ang hmiang. 

Hmân deuh aṭang khân kan kohhran mite inzilh nân kohhran dang kan hmang fo mai a. Kan kohhran hi mi kohhran aia inkhâwmnaa bengchheng zâwk, kal tlâi zâwk, zâi tui lo zâwk etc., -ah insawiin mi kohhran chu fel deuh thlup hian kan sawi leh mai ṭhin a. Kei zawng ka pawm mai thei lo.

Vawikhat chu UPC biak inah ka inkhâwm a, chhangchhe ve tak an ni. An kohhran inzilh nân min hmang ve fo lovang tih a sawi theih bik miah loh. Presbyterian-ah han inkhawm ve teh u. Keini aia an felna emaw, an fel lohna emaw in hmu emaw chu? Kum khatah chawlhni vawi 52 a awm a. Chawlhni zân, Nilai zân, Inrinni zân, KTP inkhâwm zân a awm a. Inkhawm tam tak an neih zinga vawihnih khat va inkhawm ringawt khân an nihna tak tak a va hmuh hman loh. Keini, a chhunga seilian, Presbyterian chhungkuaa tunthlenga la awmte hian kan hre thui viau ang tih hriat tur. An lehkhabute lah chu an kum tin Synod Bu nen lam kan keu ve zel a nia.

Sunday sikula kan inkhawm lâi chuan kan chhangchhe ve teh asin. Tawngṭai laia inpawh zeuh zeuh te, thil ei rûk rek rek te a tam ve khawp mai. Puitling nise ṭawngṭai veleha sahdah bûr phawrh chhuak nghal mawlh mawlh te, pâwna chhuak ta daih te an kat ve nuk a nia. Kan tirhkoh pakhat Presbyterian biak ina inkhawm pawh ṭawngṭai lâiin a meng ru a. Thalaiho an inchhaih nasatzia leh hla deuh deuha mi signal an inpêk dan te, sahdah ip leh eitur thil dang an in-pass kual vel nasatzia a sawi a. Changkang bik lo tak an ni. 

Khaw pakhat UPC inkhâwm, anmahni pawh ka hmêlhriat, naupan lâia ka kawm fote chanchin pawh hi ngaihnawm deuh asin. Khatiang kha kan kohhranah a thleng ngai lo. Chu lo pawh pulpita thuhriltu thusawi lâi khuangin kan la vawm ve em hleinem le. 

Salvation lam chanchin ka hriat ṭhenkhat (Salvation-ah hian sâp dan takin ka cousin-te an tam a) pawh a ngaihnawm khawp mai. Keimahni han inzilh a, han inhauh chiamna tur chu ni bikin ka hre lo (Ka hriat zawng zawng ka sawi lo a nia). Hetiang hian kohhran dangte hi han bel chiang ila mahni han insit bik viauna tur hi a awm emaw ni? Chak lohna lâi hi kan nei ṭheuh a ni mai lo maw? Tumah hi han uang fâl tur kan awm lo a ni. 

 A lehlamah kan insawitheihna tam tak hi kohhran dang kan hriat chian loh vang a ni fo bawk. Presbyterian pastor-te hi intilal deuh ngûk tur leh nelawm lo deuh run turte hian kan va hmu ta ṭhin a. Hei hi a châng chuan keimahni lam kan insit vang zâwk leh kan huphurh zâwk vang a ni fo. Thingsulthliah khuaa Presbyterian pastor rawn awmte chu ka hmêhriat ve fo va. An quarters-ah te pawh thingpui vâr min siam ve mai châng a awm. An fel, an nelawm, an hawihhâwm, an taima, mi lova feh leh ram kal an hreh bik lo va. An intihlal pawh ka hre bik hek lo. Mahniin ngam tak leh nêl tak, rualpui kawma va kawm ngam chuan an intihlal emaw, an induh emaw ka hre hran lo. An fate nen pawh kan inkawm, an pro-pastor te nen badminton kan vaw ho, kan infiam, kan nui ho bawk – khawiah mah keini pastor leh tirhkohte aia an induh bikna ka hre lo – keimahni hi kan tlêm a, social prejudice kan ngah a, an bulah inferiority complex kan nei bawk a. Rala khat aṭangin kan tawng leh chiam ṭhin.

Hei hi keima mimal experience ve mai mai a nia. Mi tawn loh ka tawng a nih chuan ka sawi theih bâk ni rawh se. Hman deuh khân Presbyterian upa langsar berte zinga mi, foreign ramah pawh an thawn chhuah fo, tun thlenga Mizoram sawrkar pawhin a la chhawr nawn ṭhin inah tlângnêl takin ka lêng a. Ka haw dâwnin a in hnuai luah an Synod Pastor min zahawm tak pakhat inah ka lût bawk a. Tlângnêl taka pawh chuan fel tak an ni. 

Nisarihtlâng leh a chhehvelah hian pastor ṭanglai an awm nual a. Pension tawh pali/panga vel an awm bawk a. Presbyterian pastor ka hmêlhriat ina an member-ho tlângnêlzia leh an luh chhuah ngunzia ka ngaihtuahin tuna kan pastor awm hnâiho inah hian Nisarihtlâng kohhran member-te hi kan lût khât viau zâwk lo maw? thingtlâng an rawn fan chânga kohhran member tlêm tê, inthik tham lekin nêl taka kan lo kawm ang hian member kan tam ve deuhna hmunah chuan a ni thei hauh lo mai. In lo chik ve ngai em?

Mahni bial chhûngah rau rau chuan Presbyterian pastor aiin kan kohhran pastor-te hi an lal zâwk daih lo maw? Anni chu upa chairman-na hnuaiah bial kawmiti-in pastor program an ngaihtuah a. Chumi awmzia chu pastor ber kha bial kawmiti hnuaiah a awm ti ila a dik thui viau ang. Keini pastor bial vawngtute chu anmahni thununtu kawmiti a awm ve si lo va, an thu thu a ni ringawt. Hei hi mimal chanchin sawina ni lovin kohhran kalphung pum pui system sawina a ni tih hriat a ṭha.

He thu ka han sawi duhna chhan pakhat chu tun kum 2009 Mizo Conference Constituency neih lâi khân kan pastor pakhat rawn ding chhuak chuan thu tak tak a sawi ṭan hmâ hauhin “Pâwl lehlam pastor-ho hi chu an intilal a, an bial fangte hi ṭawiawm duah an ngâi ṭhin,” ti lam hawiin kohhran dang pastor-ho chu a han sâwt nghal ringawt a. Hei hi Presbyterian pastor-ho a sawina ni berin a lang. Hetianga thâwka phita an intilal, an inchhu ngêng, an induh tih ringawt tur hian pâwl dang pastor engzât nge a kawm a, a zir chian? Number hian zahawmna a ken ṭhin avangin tlêmte chunga hotu leh tam tak chunga hotu hi intehkhin theih lohna a awm fo. 

Keini hi kan la tlêm a, thingtlang zinte hian hminga inko chhuak tham lek kan la ni bawk a, kan innêl vek hian a lang ṭhin. Mahse hei hi mi aia kan fel vang emaw, kan inngaihtlâwm vang emaw a ni miah lo. Mizoramah hian kan society-in a ken tel ve avangin kan innêl viau a, Union, Division leh General Conference-a kan hotute lalzia, unity vawn a ṭul tih chhuanlama thuneihna an inpêk nasatzia mithiam dangin min zirnaa an finding-te sawi a châkawm; mahse ka sawi lo vang. 

Heta ka sawi duh zâwk chu mimal tinin chak lohna leh tlâkchham engemaw kan nei ṭheuh ang hian kohhran tin hian chakna leh chak lohna kan nei deuh zel a. Tute kohhran emaw kha ral khata aṭanga va hmuh ṭhat viau emaw va hmuh ṭhat loh viau emaw kha a awl a. Mahse mi kohhrante pawh hi han bel chiang ila, keini aia an felna emaw, an fel loh bikna emaw a awm lo tih ka sawi duhna mai a ni. Hei hi mi kohhran aia inhmuh hniam viau emaw, inhmuh ṭhat loh viau emaw a ṭha lo ang bawkin mi kohhran hmuh hniam lutuk leh mi kohhran aia kawng engkima fel zâwk ang hrima thâwka phita kohhran dang sawisel zen hi a ṭul lo ve ka tihna a ni ber. Vanlal nau ang a ṭahna Kalvari-ah an dang chuang lo ve. 

Keima mimalah hian (kohhran thil bikah) ethnocentrism nge lian zing zâwk xenocentrism? Ka chhang thiam lo ang reng khawp mai. Mimal tin, pâwl tin, khaw tin, vêng tin leh hnam tinin ethnocentrism leh xenoxentrism hi kan nei kawp vekin a rinawm; a khawi nge chak zing zâwk tih a ni deuh mai kan tih kha. Keini kohhran member-te hi ram tinah minority kan ni deuh zel a. Kan sakhaw dan leh hrai, kan value leh norms te hian kan awmna khawtlang culture leh mihring sûkthlêk, ei leh in aṭanga kan inkhawm ni thlengin mi nawlpui tihdan a kalh tlat a. Chu chuan kan awmna khawtlangah min titlangnel lo. Thalai kalkhawm nikhua te hian special deuh taka engemaw chhawpsak hi kan ngai ta bik ṭhin a. Chuvangin keimahni-ah hian ethnocentrism aiin xenocentrism a chak zing zâwk a, chu chuan foreign ramah min kal tamtir niten ka hre ṭhin. Dik maw, dik lo maw? Ka hre bik der si lo. ■