Progressive Kristian Ka (n) Ni

Mi tam tak an intih conservative siakna rama progressive Christian ka (n) ni han tih ngauh mai chu a huaisen thlâk ang reng khawp mai. Mahse ka (n) ni miau si. Ka eizawnna subject chu economics a ni a, chu chu social science zinga ka sawi zin ber a ni bawk. He subject-ah hian thil lian pui pui pahnih, inchemhâr reng mai an awm a, chu chu liberalism leh protectionism (socialism tihna tlukah ngai ila) an ni. Kei chu a hmasa zâwk liberalism lam mi ka ni a, chu chu ka chhuang em em bawk.

Economics-a liberal ka ni ang bawk hian social life leh religious philosophy-ah pawh hian liberal tak ka ni tawh a ni. Mahse ka liberal dan hi sâpram lama liberal kan ral hriatho nen a inang lo va. Chuvangin liberal ka intih hian ralkhelh vak tur a awm lo; Pathian thu ka pawm dan ngawr ngawr lam ni lovin thil dang deuh a ni. Theology lam hi chu a a,b,c atanga zir kan nih ve loh avangin liberal emaw conservative emaw ka ni, ka ni lo ti titurin ka hre ril lo va. Ka sawi pha lovah ka ngâi. Chuvang chuan liberal inti lo hian progressive inti ila ka duh zâwk bawk. Tun a\ang chuan progressive tiin insawi tawh ila a \ha ang.

Copernicus-an ‘Ni khian kan lei hi hel lovin lei hian Ni khi a hel zâwk a ni’ tih thudik a hmuhchhuah tirh khân conservative-hote chuan Pathian thu tidaltu-ah ngâiin an hnial nasa a. A hnua Galileo-an entlang a hmuhchhuah khân a hun lâia inti conservative-hote chuan ramhuai hnathawhah an ngâi a, lei hian Ni a hel a ti ngat phei kha chu Pathian sawichhia-ah an puh a, amah kha lo tar deuh tawh lo phei se an halhlum chiang ngawt ang.

Tunhmâ deuh tak taka intiduhtui conservative-ho chuan biak inah hmeichhe zai ve an phal lo; thusawite chu hnai lo hian. Inti Pathian thu duhfir tak takte phei chuan biak in chhunga organ/piano hmante hi ringtute tan thil tihchi loh tâwpah an ngâi a. A dik tak chuan Pathian hla phuah pawh hi phal a ni lo. Isaak Watts-an Pathian hla a phuah khan mi tam tak chuan Bible-a Pathian hla awmsa Sam hlate duh tâwk lovah leh Pathian zah lovah an puh a. Kohhran a buai phah nasa asin.

Mizorama thil thleng pawh sawi dâwn ila a tam awm e. Jeans kekawr ringawt kan buaipui lâi te, hnawihsen leh powder kan hal em em lâi te, nail-polish leh mit hnawih kan do vak vak lâi te kha a la rei lo. Biak ina quiter kan lâkluhna pawh hi a la rei awm lo asin. Kan \hianpa pakhatin a tia lawm, ‘Kan tlangval lâiin biak inah quiter nen zai ka tum ngawt mai a. Kan upate chuan an lo duh awzâwng lo,’ tiin. Conservative-ho chuan quiter-te hi biak ina lâkluh chi-ah an ngâi lo reng a. Mahse tuna kan danglam tawhzia hi!

Tichuan ka ngaihdan liberal-na lâi tak chu hetiang hi a ni: Thusawm Pêka Pathianin sual a sawi bâk mihringin sual kan lo tihve tam tak hi hnam tinin a hun leh hmuna zira kan hnam chin dan leh sûkthlêk tradition avanga sual kan tih an ni fo, tuallâia kan incheina leh kan Pathian biak dan kalphung, zai dan style \henkhat leh biak ina kan inchei dan thleng hian a inthlâk hret hret a. Tuna biak ina lâk luh chi rual loha kan ngaihte hi \hangtharten an la ching ang a, tuna kan thiltih dan hi chu \hing an la ti em em ang.

Khawvel hmun dangah pawh ka (n) progressive kristian pui an tam khawp mai. A bikin West Coast Religion Teachers’ Conference (USA) hmangtute zingah \hian ka ngahin ka ring a. Loma Linda University, La Sierra University, Pacific Union College leh Walla Walla University professor-ho zingah khuan thurualpui ka ngah khawp ang. Tunah hian midang pawh an rawn mawm \uam \uam. Spectrum chanchinbu chhuahtu Association of Adventist Forum-ho zingah khuan titi vâwr ila kan inthurual phian ang. Adventist Today chanchinbu chhuahtute zingah erawh hi chuan a zât ve vel chauh khu ka thurualpui tur niin ka hria a. Adventist Heritage editorial board-hote nen hian buhchiar kan hâwp ho thei viau bawk ang. Good News Unlimited tih chanchinbu chhuahtu Desmond Ford-a te nen hi chuan thil \henkhatah inlungrual mah ila thil dangah chuan, ngaihzawng in\âwm vang ni lovin, kan inbakkaih zeuh zeuh dâwn tih a lang reng. Adventist Society for Religious Studies-hote khu ka birthday lawmnaa sâwm ka châk viau bawk. Adventist Theological Society-ah khuan hriatna lama mi inhawng zâu kawm châk tak tak ka nei \euhin ka ring a ni.

Chutiang zelin Adventist Today-ho camp meeting-a tel ve pawh châkawm tak a ni ang. Pacific Union College Church-a mi John-a leh Joan Hughson-a ten kum tina Spiritual Renaissance Retreat an huaihawt \hinahte pawh khuan zu tel ve ta mai mai ila, ka thurualpui tur mi an awm \euh tih ka hria.

Tichuan thusawm pêkin a sawi bâk keinin inphuarna tham deuhthawa kan ngaih sual tam tak hi chu universal sin an tling lo fo. Vawksa ei loh tur tih chu keini tan universal sin a ni a, mahse ‘sa ei chu chhandam an ni thei lo vang,’ tih chu universal sin a la tling lo deuh. Khawvel changkang zelah a tlin hunte chu a la awm mahna – ka hre lo.  Chuvangin ngaihdan zâu tak (liberal tak kan ti ang chu) neih tur a ni tih hi ka liberal ve dân a ni. Min han hnial teh u.

Pathian thu hriatnate hi a \hang zel a, hmana hnial rual loh thudik nia an hriatte kha \hangthar finna sâng zawkin a rawn paih thla fo \hin. Bible ngei pawh hi lehlin \ha zâwk leh chiang zâwk a lo chhuak zel a, chu chuan ngaihdan thar leh hriatna thar min pe thei bawk. =henkhat chuan King James Version lo chu Bible-ah an pawm mang lo; mahse tunhnu hian Grik \awng leh Hebrai \awngte an han zir chiang a, tin, hmanlai thil hlui an han lai chhuak thar zel a, King James Version ngei pawh hi siam \hat a ngâi hle tih an hmu chhuak hial zâwk a ni.

Ama’rawhchu engemaw ti tak hian rin dan hlui pawmtu nih chu rinna lama kulmûk zâwk leh dik zâwka inngaihna a lian a, heng ka thusawite hi awih mai harsa tak an ni ang tih ka ring. Chuti chung chuan tuna inti conservative em emte pawh hi hmanlai mite ngaihah chuan liberal tak an ni thei ve tho tih hi sawi tel hram ka duh. Han sawi nawn leh hram ila. Copernicus-an leiin ni a hel tih a hmuhchhuah tirha inti conservative-ho chuan Pathian thu a kalh hlein an hria a. Galileo-an (15 February 1564 – 8 January 1642) entlang a hmuhchhuah tirh pawhin Setana hnathawhah an ngai kan tih tawh kha.

Bernard Seeman-a chuan a lehkhabu-ah tihian nu pakhat nau nei chanchin leh conservative-hoten Pathian thu an ngaih sual theihzia a ziak: Eufame MacLayne (AD 1591) chuan nau a nei dawn a. Phir an lo nih avangin a nat phah hle a ni awm e. A na zual chhâwk nan hnim damdawi a hmang ni awm tak a ni. Mahse kohhran hruaitute ngaihdan a lo ni ta hauh lo mai le. Genesis 3:16-a Pathianin, “I hrehawmna leh i nau paina chu nasa takin ka tipung ang a; hrehawm takin fa i hring \hîn ang,” a tih kha a kalh a ni an ti ta a. Nau chhartu (Agnes Sampson-i) khawngaih lutuk chuan a nau vei lâia ei tur damdawi a lo pe a ni. Chutianga a nau vei laia nachhawkna a ei avang chuan an halhlum hmiah mai an ti.

          Kum 1521 pawh khan Hamburg daktawr ngilnei tak chu nu rethei tak mai nau vei na tilutuk chuan nachhawkna engemaw pe turin a dil a. Ani khawngaih chuan a lo pe mai si. Kohhran beng a thleng; Pathian thu (Gen. 3:16) a kalh tiin daktawr Viethes-a chu an tihlum ta a ni.

Note: Bernard Seeman, Man Against Pain: 3000 Years of Effort to Understand and Relieve Physical Suffering (Philadelphia: Chilton Company, 1962), 96. Hei hi en bawk la-Andrew D. White, A History of the Warfare of Science With theology in Christendom, vol., 2 (New York: George Braziller, 1955), 62, 63.

Kum 1847 khan British daktawr Sir James Simpson-a chuan hnimhlum (tunlaia mi ang chiah hi a ni kher lo) a hmuchhuak a. A tira a hmuchhuah chu a rim te a tui chiah loh avangin a daktawrpui tho, German mi Justus von Leibig-a hmuhchhuah chloroform chu a hmang a. A lo \ha phian a ni awm e. A thil hmuhchhuah a han puangzar chu Pathian thu lam a\angin an hnial ta luai luai mai a. Pathianin hmeichhiate anchhia a lawhna a kalh avangin hman loh tur tiin chanchinbu-ah te an chhuah bâkah lehkhate an sem chhuak chuaih chuaih bawk.

Zawnghri danna an hmuhchhuah tirh pawh khan Pathian thu thiam pui pui Rev. Edward Massey te, Rev. Delafaye te chuan Pathian thu a kalh tiin nasa takin an sawisel a. “Zawnghri te hi Pathianin misual hrem nana a dah an ni a, inven a ngâi lo” an ti mai.

Edward Jenner-an inchiuna  (vaccination) a hmuhchhuah hlim pawh khan dodalna a nasa khawp mai. A thawhpui pakhat Dr Mosley-a phei chuan a sawisel nasa hle a. A lehkhabu ziaka bung khat phei chu a hmingah “Father, forgive them, for they know not what they do,” tih a hmang hial an ti. Kum 1798 khan inchiu hi Pathian duhzawng a ni lo ve tiin Pathian thuthiam leh daktawr \henkhat chuan Anti-Vaccination Society an din hial bawk.

Hetiang vel hi kan ni ve thei. Chuvangin kei chuan progressive kristian kan ni tih hi zahthlâk ka ti lo. Tunlai hian ni lova inhria an awm mai thei, mahse anni pawh hi an ni tho; nih tum lo mah se an hriat loh hlanin an ni tho tho.

Khawvel danglam chho zela rin dan leh ngaihdan thar lo chhuakte hi uluk taka lo chik a, a \ha a nih chuan pawm ngam a, a \ha lo a nih chuan hnawl ngam a dik ang.■■

A Kar Awl Laklawh Hnawh Khahna

Kum 1920-30 inkara Mizo kristian hmasate invawn dan tlangpui:

·         Tlangvalin nula lawm loh tur (Lova fehnaah inlawm loh tur)

·         Feh kawngah nula chhawm loh tur.

·         Zu reng reng in loh tur.

·         Chawlhniin puan suk, inkhelh, inhnawk, lungden, inkawihbah te khap vek a ni.

·         Inkhawm zat zat tur.

·         Sa thisen ei loh tur.

·         Chawlhni serh tur.

Source: Lalnghinglova, Rev.

Zoram Nghahchhan, p. 24.

2^nd Edition, 2000.