Kohhrana Mi Chi Hrang Hrangte

Kohhran chu eng nge a nih a, eng ni turin nge Pathian chuan a duh? Kohhran chu Pathian mite intawhkhawmna tura pâwl lo ding hi a ni. Hmuh theih kohhran leh hmuh theih loh kohhran a awm a, ṭhen hran theih a ni lo.

Kohhran tih hian Mizo ṭawng chuan a chiang hle. Sâp ṭawng chuan kohhran hi church an ti a. Chu chu biak in sawi nan an hmang bawk si a, keini ang sâp ṭawng thiam ṭha mang lo chu sâp ṭawng lehkhabu kan chhiarin kan buai leh mai ṭhin. Kan thiam tâwk loh vangte pawh a ni ve bawk e. Kohhran tih thumal hrim hrim pawh hi sawifiah fe tham a nih rualin sawifiah lo mahila he lehkha ziak chhiar thei tawh chin Mizo mi pangngai chuan a awmzia kan hre vek ang. Thu ril leh thuk pui pui sawi tum ka ni lo bawk a, mi thiam ṭhenkhatin chiang awm tak, rilru tibuai zawk maha an hrilhfiahnate chu sawi lang lo ila kan rilru-ah a fiah zawkin a rinawm.

Kohhran chhunga mi chi hrang hrang kan sawi dawn a, kan sawi seng lo vang. Heta kohhran ka tih hi local church kan tih, tualchhung kohhran hi a ni nghe nghe tih lo hria ila a ṭha ang. Evelyn Monteiro-a chuan Church and Culture tih lehkhabu chhuahin tualchhung kohhran tih ringawt hi lehkha phêk engemaw  zât daih ziah tur zu han hre peka mawle. Keini chuan chutian em ema thui sawi tur leh ziah tur kan hre ve lo. Mi ziah sa lawrkhawm a, ziah chhah ve hrim hrim tum ni ila a tihdan kawng kawng chu a awm ang; mahse kan sawi tur nen hian a inhmeh tawh chiah dawn lo va, chuvangin mi thiam zawkte hrilhfiahna chu kan sawi tam lo mai ang. Tin, kan thil hmuh leh hriat dante hi a inan loh theih em avang hian heta kohhran mi chi hrang hrang ka sawite hi kohhran zawng zawngah a dik vek kher lo mai thei. Kan awmna kohhrana zirin ‘a dik, a dik lo’ tih theih a tam hle dawnin a lang bawk.

A hmasa berah chuan kohhranah hian a ruhkawl, kohhran khai ding a, enkawl a, buaipui a, chawm liantu patling rual an awm a. Heng mite hi chu eng tik lai pawhin kohhran tan an ding nghet tlat a, an nghing ve mai mai lo. Kohhrana boruak engemaw a lo awmin an phili ve chiam ngai lo va, an ṭe ve chel chul ngai lo bawk. Camping runpui leh harh tharna runpui a thlen laia an awm dan leh an chezia chu kohhran hlim loh lai leh boruak hniam laia an awm dan nen a danglam lutuk ngai lo va, an phur lai leh an dâk lai hriat hran hleih theih a ni lo. Heng mite hi awm lo se kohhran hi a chhangchhe hle emaw, chhangchhe tur awm lovin an darh vek emaw a ni mai thei.

A pahnihna-ah chuan pa valai, a chunga mite ang em han chim pha lo deuh, kawng hrang hranga kohhran kut ke ni ve si an awm leh a. Heng mite hi an langsar vak lo naa an ṭangkai khawp mai. A bikin hnatlan nikhua leh kohhranin programme lian tham deuh a neihte hian an phur thei a, an ṭangkai ṭhin hle. |halai zinga awm nuam an ti tak tak tawh lo va, ṭhalaiho pawhin an thiltihnaa tel fo turin an duh tawh lem lo. |halai zinga an awmin ṭhalaiho an dip a, puitling zinga an awmin an tlangnel tak tak chuang lo. Upahovin an zinga awm turin an la ngai chiah lo va, an dinhmun a laklawh khawp mai. Chuvangin hengho chet vena tur programme hi siam thiam a ṭha hle. 

A pathumna chu nuho hi an ni. Nuho hi an inang lo khawp mai. An pasalte puitlin leh puitlin lohah kohhrana an inhman dan leh an mizia a innghat thui hle. Kohhrana an mizia azirin an in lama an pasalte mizia tur leh nupuite hneh deuh leh hneh lo deuh te pawh a rin hriat theih. Nu ṭhenkhat chu an thlarau mi hle. A nghing lam apiang an awn emaw tihtur an ni. An rilrua awm ang ang kha an tihlan mai ṭhin avangin thusawi thiam deuh an ngaihthlak fuh chang chuan an mittui an titla mai thei zel a. A nih loh pawhin a lam chi chu an lam chhuak mai. Keini kohhran hi lam lo tak mai kan ni a, an inthunun thei viau. Hetia an rilru no, emotion, lan chhuahna tur pakhat up behsak an nih avang hian thil dangah kua a hreuh zauh zauh; kan hre thiam hlawm emw chu? Tin, hmeichhe ṭhenkhat chuan revival speaker ngaihsan bik leh zui duh bik an nei duh viau bawk. An ngaihsan rawn tawh chu an intihhmuh a, an inngaihsan siak emaw tih mai tur a ni. An mi ngaihsan tawh vek vekte thusawi apiang chu an awih a, an chhia leh ṭha hriatna an hmang tawh mang lo. A kal thui deuhte phei chu an ngaihsan zawng revival speaker-te (speaker kher lo pawh) tan chuan an inpe pumhlum ṭhak thei a, an taksa hial pawh an hlan hreh lo.  

            Hetianga nuho ngaihsan bik leh zui bik neite hian kohhran kalphung pangngai an ngainep ru duh viau bawk. Engemaw thil mak tak leh danglam bik tak, nidanga la awm ngai lo lo thleng thar tur awma an hriat ṭhin avangin an zauthau va, an beng chu chutiang thil mak ngaihthlak chak chuan a za ṭhin. Thu ṭha tluang pangngai an kham lo fo. Tin, speaker leh thusawi thiam tam tak pawh hian nuho ngaihsan rawn leh chibai rawn nih hi nuam an ti ber emaw tih tur a ni. Mipa kut hrâm deuhina min han chibai ai chuan hmeichhe kut no nêm lum thar tharin min han chibai chu a dan zawng a dang deuh a ni ang e. Mipa infiammi mi leh mipa zaithiamten nula ngaihsan rawn leh atchilh rawn nih an duh ang tho hi a ni. A spirit chu a inang reng; a hmanrua leh a lanchhuah dan a danglam deuh tih chauh a ni.

            Tin, kohhran hmeichhiate hi an chapo hma hle. An zingah thusawi thiam ve deuh emaw, thil danga mipa han tluk ve deuh thuak thuak emaw han awm se an ṭawng lian hma khawp mai. Kum 1989 khan Saitual khua-ah hmeichhe inkhawmpui a awm a. Chu inkhawmpuia lo kal nu pahnih emaw, pathum emaw chuan thu an han sawi pap pap a. An thusawi chuan mi rilru a hneh ve viau mai a. Chu veleh chuan mipa thusawi aia an nep bik lohzia leh a ṭhente phei chu an thlarau zawkzia chu an sawi ta piap piap mai a. An inkhawmpui rei ang tih hlauhawm tak a ni. Ven an ngai khawp mai.

            Hengte hi hmeichhia an nêp tihna emaw anmahni hmuhsitna lam emaw a ni lo va, kohhranin a mamawh lo tihna a ni hek lo. Nih ahnekin kohhran hi a tir aṭangin hmeichhe tel lo chuan a awm thei lo a ni ber. Mipa hi hmeichhe mamawh saa siam a nih miau avangin hmeichhe tel lo chuan engahmah a tlei zo lo va, khawi hmun leh ram mah nuam a ti thei lo. Kohhran tinuamtu leh tichaktu pawh hi hmeichhia an ni. Lo awm ve mai mai a, mipa che vel thlir tur ringawta lo ṭhu ngawi ve tawp pawh ni se an ṭangkai em em. Mipa hlang kohhran hi ding dawn se member an tlêm lutuk ang a, a ṭiavai thuai ang.

            Greece ram chhak lam tuipui kamah khuan ram pakhat Athos an tih chu a awm a. Greece ram pêng khat chu a ni ve naa mahnia ro inrel an ni ve. Mara District Council kan tih ang deuh hi a ni a, thuneihna erawh chu an nei sang deuh a ni awm e. Kum sang chuang fê chu khu ramah khuan hmeichhia reng reng luh ve an phal lo va. A ram mi ni tur chuan mipa kum  18 aia naupang lo, kristian ṭha tak, puithiam an nih ngei a ngai. Hmeichhia reng reng an lakluh duh loh avangin khu rama chengte khu chuan hmeichhia an hmu ngai lo va. Puithiam an nih hma leh Athos an luh hmaa an hmeichhe hmuh bâk kha an hmuh tawh lo va. Chutia mipa hlir inkhung hrang ta chu an thil thlir dan leh an khawsak dan pawh a mawl hle niin an sawi.

            Athos chanchin ka han sawi lanna chhan chu hmeichhe tel lova mipa awm khawm an famkim lohzia leh mihring nun an thlir dan a dik tawk theih lohzia sawi lan lan ka duh vang a ni. Kohhrana hmeichhe lo awm ve hrim hrim hian nun a tifamkim a, a tihlu a, a tinuam bawk. Chuvangin hmeichhiate hi kan hnawl ngawt thei lo ni mai lovin an tel lovang tih hi kan hlau em em zawk tur a ni.

            Kohhranah hian ṭhalaiho an awm leh a. Anni hi kohhran ban la ni mai tur an nih avangin chawmlen leh zirtir ngai tak an ni. An thithlir dan a tunlai deuh avang hian upa lam nena an inkarah conflict (buaina) a awm duh khawp mai. Upaho nen chuan an inhau bur bur kher lo vang a, an inhnial an hnial kher lo vang. Chuti chung chuan an inkalh tlat thei. Upa lam hian tunlai khawvel sual tawhzia sawi nan ṭhalaiho hi hman an ching viau mai a. Chu chu ṭhalaite tan thu ngaihthla ninawm tak a ni thei. |halaiin kohhran upate hi an ning duh hle. Chutianga ṭhalaihovin an nin deuh deuh upa pahnih khat chu ka hria. An nin em emna chhan nia lang chu:

(1)   Upa ṭhenkhat chu ṭhalaiho bulah an insawi lian lutuk. Upa pakhat, a dinchhuah apianga ṭhalaihovin an rel zui deuh ziah a awm. A insawi thei lutuk mai ni lovin fel a inti a, dik a inti viau bawk. Thil engemaw thleng hlekah amah a insawi lût ve deuh zel.

(2)   Upa ṭhenkhat chuan an naupan lai chanchin leh an hlawhtlinna chanchinte hi ṭhalaitena ngaihnawm tiviau turah an ngai ṭhin. An chanchin kal tawh hmanga ṭhalaite zilh an ching; an nin an lo ngaisang bik si lo va, ninawmah a kal.

(3)   Upa ṭhenkhat chu an che muang ta deuh a, thu pawh an sawi rei deuh nge nge; ṭhalai tan a ninawm hma hle.

(4)   Upa ṭhenkhat chuan thil hriat leh ngaihdan chu a hlui tawh lutuk a, ṭhalai tan nuih tiza mai a ni. Upa ṭhenkhat vethung chuan lehkhabu an chhiar an chhiar a, hria an inti viau bawk. Mahse an lehkha chhiar tam tak chu ngaihdan hlui ziahna lehkhabu un pui pui a ni tih an hre lo. Tunlai mil ṭhalai lehkhabu chhiar hawt si lovin an lehkhabu chhiar tam an chhuang viau ringawt a, ṭhalaite hma-ah thu hlui pui pui an chhawp fo mai a ni. Upaho zingah Chetan Bhagat-a chanchin hria leh a lehkhabu chhiar an awm mang lo; ṭhalai zingah nuaih telin an chhiar si.

(5)   Upa zingah engemaw la ni riauva inhria, ṭhalai zinga la dinchhuah ve sek ching an awm. Mi bik ni riauva inhria a, ṭhalai lawmzawng la sawi thei tlata inhria kan nei bawk.

|halai tam tak hi chuan upaho hi an ngaisangin an zah der thiam hle. Kohhran hian hmasawn zel se an duh a, an duhna sawichhuah a, an suangtuahna tihpuitlin theihna kawng erawh an la nei tlem deuh thung.

Kohhran member ṭhenkhat hi chuan kohhran kalphung sawisel nuam an ti a, sawiselna an hriat tam poh leh fing lehzual sawtin an inhre ṭhin nite pawhin a lang. Hmathlir an nei thui hle a, an hmathlir tam ber chu a taka tihhlawhtlin theih loh leh tihhlawhtlin atan ṭha lem lote an ni tih erawh an hre thiam hlei thei lo thung. Kohhran upaho zinga an ngaihsan loh zawngte chu an inkawm khawm changin sawi nuam an ti hle a, a sawi pawh an sawi nasa. |halai zingah hian chi thum an awm a (kan ṭhen hran duh dan category azirin chi tam tak an awm thei ang), heng mi chi thum zinga chi hnihte hi chu kohhran tana thawk ve ve ni chungin an inhnaih lutuk ngai lo.

Kohhran tana ṭhahnemngai taka thawk ṭhalai chi hnih zinga a pakhat zawk chu naupan lai aṭanga naupang fel, an pianthar tehchiam pawh hriat loh, an sual viau pawh hriat chuang loha inkhawm taima, kohhran bel ve tlatho hi an ni. Anniho hian a tlangpuiin kan sawi leh tur pawl pakhat ai hian lehkha an thiam deuh zel a. |halai inkhawm leh kohhran programme pangngai an ngai pawimawh hle bawk. An chhungte leh kohhranin an awm dan leh kohhrana an nihnate chu ngaiah an neihsak tawh a, kohhranah nihna eng pawh chelh se mak tih leh lawmpui an hlawh tehchiam lo. Ni tur renga ngaih an ni sa deuh tlat ṭhin.

Pawl hnihna chu mi sual dam leh, khawvel thila nasa taka lo tlan tawh piangthar, kohhran tana ṭhahnemngai takho hi an ni. Heng mite hi chuan kohhran programme pangngai hi an duh khawp lo deuh tlangpui a. Mahni awmna tualchhung kohhrana inhman vak lam aiin khual-khuaa kal chhuah a, speaker zui leh inkhawmpui programme-te an ngaipawimawh zawk ṭhin. Tualchhung kohhran rawngbawltute an sit duh hle a, heng tualchhung upa leh rawngbawltute ai hian khual khua atanga thuhriltu lar rawn kal an lawm a, a zui pawh an zui taima zawk bawk. Tin, an awm ṭhat duh loh laia an tih ang tive ṭhinte kha tuna an lo sim san tak hnu hian hriat thiamna nen an en hlei thei lo zawk fo bawk. Rinna lamah an tlan chak hle a, an inchhuih palh changin an tlu na thei khawp mai. An tui anga tui ve lo leh an phur anga phur ve lote bulah an awm peih vak lo ṭhin. Kohhran programme pangngai baka engemaw anmahni tiphurtu programme dang a awm loh chuan kohhran kalphung pangngai hian a chawm zo lo niin an inhria a, nuam an ti vak lo. Heng mite hi a chang chuan kohhran rawngbawlna leh programme tihlawhtlingtu an ni fo va, an tel lo hian kohhran hi a hlim thei lo emaw tihtur a nih chang a awm ve fo ṭhin. Isua lo kal lehna an phurpui a, an sawi hnai thei hle. Khawvel hi tâwp mai tura an rin avangin an khaw thlir a tawi duh viau ṭhin. Tlêma an thlarau nun a han daih deuh a, anmahni pawh an han zuai deuh chuan an nun dan pangngaia lêt leh an awlsam a, chutianga an lêt leh palh anih pawhin mak tih an hlawh vak chuang lo.

|halai pawl thumna chu kohhran ngaihsak lo hrim hrim an ni. Heng mite hi chuan kohhran thil hi an ngaihsak lo ve hrim hrim a. An sawisel tehchiam lo bawk. Mi dang zingah kohhran an ṭan bur a, kohhran ṭhalai hlang awmna hmunah erawh an sawisel ve nasa ṭhin hle. Kohhran hruaitute emaw, ṭhalai hruaitute emaw, a tua mah hi ngaihsan em em an nei bik lo. Hnatlang a awmin an thawk ve zauh zauh a, kohhran ruaiṭheh leh huau huau a awm changin an tel ve zel thung.

Kohhran member zinga thlarau chang sang mi ṭhenkhat hi chuan tualchhung rawngbawlna hi an ngaihsak meuh lo. Biak in hnatlang leh tualchhung kohhran rawngbawlna pêng hrang hrangte pawh hi an ngaihven lutuk lo bawk. Tualchhung rawngbawlna aiin khualkhaw lama rawngbawlnain an thinlung a hnehin an tuipui zawk tlangpui bawk. Hnathawh kawr ha chi leh neck-tie awrh chi hi engah mai pawh hian kan awm zel zawng a ni hi. A mak lo ve.  

Tin, kohhran member-te thlarau lam dinhmun hi a inthlau khawp mai a, chu chuan  kohhran chanchin hi a tingaihnawm sawt a, sawi tur pawh a titam khawp mai. |awngṭai peih em em aṭanga ṭawngṭai ngai miah lo te, nun uluk em em aṭanga engkim tithei te, officer lian leh sumdawng hausa pui pui aṭanga ni tin eichawp zawng te thlengin beram huang khatah kan han awmza a nia, enkawl thiam ngai deuh a ni. 

Kohhran hi hetiang mi chi hrang hrang awm khawm hi kan ni a, a enkawl tur pawhin rilru zau tak put a ṭul a ni. Pathian hmangaihna nena mite hi kan en loh a, kohhran dan leh mahni ṭha tihzawng thil eng engemaw hmanga midang kan teh chuan tumah hi teh tlin tak tak theih an ni lo va, mahse Pathian hmangaihna nena en erawh chuan mahni tan a hahdam a, midang tan a nuam bawk.ΔΔ  

Dt 25 March, 2016. Friday                              Chawnpui, Aizawl.