SEVENTH-DAY, POLITICS, SAMSON KISEKKA

Samson Kisekka

Keini kohhran hi pawlitiks tilo deuh mai, inthlan dawn apianga mi inthlan thuchah ang lo deuha thuchah chhuah ṭhin, vote thlâk te pawh vanram kai lohna ang deuh dâwn dâwna sawi ṭhin kan ni a. Chutiang boruak nêna kan vung chhoh lâi tak chuan Africa khawmualpui lailia ram lian vak lo Uganda-ah khuan Seventh-day Adventist doctor pakhat, elder te pawh lo ni ve tawh ṭhin chu Prime Minister a rawn ni ta luah mai a. Seventh-day Adventist khawvel a barakhaih a nih kha. General Conference lam lahin lawm tur leh lawm loh tur an hre lo va. Kum 1987 tir lama USA a zin phei chu General Conference hotute chu sawi loh, adventist college leh university-ah kawmtu a ngah teh asin.

Chutih lâia kan kohhran rawn tlawhtu pakhat thusawi ka hriat thawi dan chiang lo fahran mai leh a hnua ka zeldin thu bawl chu hetiang deuh hi a ni: “Adventist-te hi chu kan awmna ram apiangah mi vantlâng aiin kan fel deuh zel a. Khawvel pawlitiks bawlhhlawhah pawh kan inhnim ve ngai lo. Mahse he Samson Kisekka erawh hi chu Seventh-day Adventist kohhran upa a ni a, doctor a ni bawk a, a fel em avangin an ram president chuan a awm mai mai lâi chu prime minister-ah a sawm ta ngawt mai a ni,” tiin.

Hetiang ngaihdan ka neih lai hi chuan la â ve bial bial tak ka ni. I lo chhui teh ang hmiang.  

Samson Babi Mululu Kisekka (June 23, 1912 – Oct.25,1999) chu Uganda khawpui Kampala dai hnai maia piang, lehkha thiam thei tak a ni. Kum 1954-ah adventist kohhran a zawm a. Amah hi pawlitik-a tui em em, party te pawh din ve uaih uaih ṭhin a ni bawk. Kum 1959 khan a awmna Bugunda ram provincial parliament-ah thlan tlin niin health minister a ni a. Eng chen chiah nge a minister chu ka hre mai thei lo. Amah hi mi taima a nih avangin hruaitu pawh a ni thei khawp mai. Uganda ram puma Bible Society-ah te pawh hotu chan a lo chang reng tawh a. Uganda rama Seventh-day Adventist mite harsatna su kiang tur pâwl a din phei chu tun thleng hian an la ding reng a ni. Idi Amin-a khan Uganda rama adventist biak in leh sikul zawng zawng a khar vek a. General Conference lam aṭanga ṭanpuina dawn a phal si lo; adventist kohhran chu pawisa awm loh avangin a keh dawn ruai a ni ta mai a. Mahse Kisekka remhriatna leh huaisen vang liau liauin Uganda rama Seventh-day Adventist-te chu Idi Amin-a hrân vanglai pawh khan an him thei a ni.

Pawlitik lama tui ta reng reng chuan Idi Amin-a paihthlâk a nih hnu lawk kum 1980 inthlan khan a ding leh a, mahse a tling lo. Hemi kum vêk hian ram dangah a tlanchhia a. Yoweri Kaguta Museveni-an sipai 27 lek nena bul a ṭan hel pâwl National Resistance Movement chu zawmin an hruaitu langsar tak a ni ta nghal a. Amah avang hian ni maw, ni lo maw, ka hre phâk lo, adventist ṭhalai tam takin he hel pâwl hi an zawm a ni. Kisekka chu khawvel hmun hrang hrangah sawrkar ding lâi sawichhe tur leh hel pâwl ṭanpuina khawn turin a zin kual a. A tâwpa tâwpah rorel lâi sawrkar chu paihthlain an pâwl hruaitu Museveni chu Uganda president a lo ni ta a. Tichuan kum 1986 January 30 khan Museveni chuan Kisekka chu prime minister-ah a dah a. Chu chu duh tâwk mai lovin kum 1991 January 22 khan Vice President-ah a dah leh a, chu hna chu 1999 thleng a chelh ta a ni.

Idi Amin-a paihthlâk a nih khan adventist-te chu kawtthlerah zuang chhuakin an lâm nasa ve hle a. MNF rammu haw kan lo lawm ang khan ramhnuai aṭanga hel sipai lo chhuakte chu pangpar thi nen nasa takin an lo lawm a ni. He thil thleng hi chipchiar zâwk leh ril zâwka chhiar duh chuan Spectrum, May 1987 chhiar mai tur. Keia sawi ve hi chu khawhar zualpui hnêm chauh a ni. Chu lah chu ka la uang deuh lehnghal. 

Ka sawi tawh ang khân keini kohhran hi pawlitiks chungchangah hian kan buai ru riau va. General Conference lam pawhin lawmpui chi nge a nih zilh chi zâwk an hre mai bik lo. Ngaihdan a phir nasa khawp mai. Amah chuan Mosia te, Josefa te leh Daniela te ang deuh khan Uganda ramin hun harsa an tawh lâia A mite thlavang hauh tura Pathian ruat niin a inngai deuh roh a. Chu chu tuman a ni lo kan tihsak thei si lo. Kohhran tân lah chuan a ṭangkaiin a dik tak chuan Idi Amin-an lal a hrawt vanglâi pawha kohhran thlavang hauhtu ber chu a ni lawi si.

Kisekka ngaihdan chuan zalenna kan duh a, chu chu political system ṭha bera kan ngai a nih chuan chumi zalenna boruak nei tura kan sual chu a thiang a ni. Mi sual chhuah atan dah ringawt chu dik a ti lo. Uganda ram chu dictator Milton Obote-a leh General Tito Okella hnuaiah a rum tak meuh meuh a. Kohhran pawhin a tuar nasa, chutah a âia sual zâwk leh nunrawng zâwk, mi nuaih têl tihlumtu Idi Amin-an a hrual leh a. Mipui an rethei a, sualna a pung a. Biak in leh kohhran sikul tam tak a khar a. Kohhran mite chu zalenna duhin an rum nasa hle a ni. Chutianga zalenna ngâia rum rum leh zalenna boruak a lo awma lawm em em siin zalenna sual chu sual thûk taka dah bawk si chu Kisekka ngaihdan a ni ve lo. Zalenna sualtute misual ber anga chhiar a, an zalenna sual chhuahsa lo lawm em em bawk si chu a ngaihdan a ni lo a ni ber mai. Inthlannaa vote thlâk hi sualah kan ngâi a nih chuan democracy leh a ken tel sakhaw zalenna leh mihring chhia leh ṭha hriatna zalenna te hi sualah ngâiin kan duh lo tihna a ni a. Chutiang anih chuan zalenna te hi sawi sawi ve tur kan ni lo.

Heta ka han sawi duh ber zâwk chu ka naupan lâia ka thil hriat sual, Kisekka kha adventist doctor, damdawi ina a  hna thawk ṭha melh melh lâi a fel em avanga prime minister tura an sawm nia ka hriat kha a lo dik lo deuh ve, tunhma aṭanga pawlitik khel ṭhin a lo ni zâwk tih hi a ni. A ho ve ang reng khawp mai. Mahse naupan lâia kan thil hriat kha a lo dik lo nasa thei em a lo ni. Entirnân Kristian tiduhdahtu Rom lal Nero-a kha pa upa lam, kum 50-60 bâwr tur ni hian ka ring a. Chuvangin ‘Nero putara’ han tih mai kha awl deuh a ni. Mahse tun hnu hian ka han zir chiang a, Nero-a chu AD 37-ah piangin AD 68-ah a thi a, a thih khân thla tlêm têin kum 31 a la pumhlum lo deuh. Ka lo rin dan ṭhin nen chuan a inpersan khawp mai.

Hetiang a nih chuan kan rualpui nula, min melh no ve deuha kan hriat, kan biak pawh ngam loh, hnung lam aṭanga kan thlir liam vawng vawng ṭhinte pawh khan min lo melh no tak tak hian ka ring ngam ta meuh lo ka ti.■

Thu Belh - Laurent Nkunda

Laurent Nkunda chu kum 1967 February 2-ah a lo piang a.  A naupan laiin amahah khawvel hriat a la ni ang tih rin theihna tura mi danglam bik a nihna awm reng reng a lang lo. Mahse a lo puitling chho va, khawvel hriat khawpa mi buaipuiawm a lo ni chho ta si a ni.

A hming dik tak chu Laurent Nkundabatware emaw, Laurent Nkunda Batware emaw a ni thei a. Amah chuan The Chairman tia koh a duh ber. A chanchin kan han sawina chhan chu ‘Seventh day Adventist pastor ka ni,’ inti chunga indo nuam a ti em em mai leh Congo sipai General lâi han kâi a, hel hruaitu chimawm tak a ni leh ta si hi a ni. Amah hi pa ria sâng zen zawn, hmâi tung rât mai leh sipai uniform inbelh chawt reng a ni a. A thlalak tam zâwk pawh sipai uniform nena a lâk an ni. English, French, Swahili, leh Kinyarwanda ṭawngte a thiam hle.

Nkunda hian a nupui Elizabeth-i nen fa paruk an nei a. Sipaia a luh hmain Kisangani University-ah psychology a zir a. Kichanga khaw sikul zirtirtu-ah a ṭang zui a. Mahatma Gandhi leh George Bush-a te a ngaisâng hle niin a insawi.

Amah chuan Seventh-day Adventist pastor nemngheh niin a insawi a. Chutih rualin America rama Penticostal thurin vawrhdarhtu ‘Rebels for Christ’ hnen atangin ṭanpuina a dawng ṭhin niin a sawi bawk.

Kum 1994-95-a Rwanda rama mihring inpâwng samna-ah khan Tutsi hnamin an din Rwandan Patriotic Front (RPF) chu a zirtirna hna kalsana zawmin Hutu hruai sawrkar sipai Rwandan Armed Force (FAR) te chu a do a. RPF te chuan FAR-ho chu hnehin Rwanda-ah sawrkar thar an siam nghe nghe a. Hemi hnu hian Nkunda chu a pianna ram Congo lamah a kir leh a. Lauren-Desire Kabila hnuaiah chutih lâia Congo hruaitu Mobutu chu dovin an paih thla leh ta a ni.

Kum 2000-2003 inkâr khan Congo ramah tualchhung buaina a chhuak leh a. Hemi ṭum hian sipaiah inrawlh lehin Congolese Rally for Democracy (RDC) ah major a kâi chho va. He pâwl RDC hi Rwanda mi te, Uganda mi te, Burundi mi te leh Tutsi ṭangrual pâwl intêlkhawmte an ni ber. 

Kum 2003-ah indo a tâwp a. Sawrkar lâilawk Transitional Government of the Democratic Republic of the Congo sipai chu zawm lehin colonel a kâi chho va. Kum 2004 han General puitlingah a kâi chho ta a ni.

Amarawhchu he sawrkar tharah hian Nkunda chu a lungawi thei lo va. Chuvangin a sipai rual engemaw zât hruaiin Nord Kivu biala Masisi ngaw kârah a tlan lût a. Joseph Kabila sawrkar paih thlâk a, sawrkar thar din a tum thu leh Congo ram chhak lama Tutsi hnam tlêm zâwkte venhim a tum thu chu a puang ta a ni. He lâi vela Tutsi hnam tlêm zâwkte chu Rwanda aṭanga tlanchhia Hutu hnamten an beih fo avangin hum him an ngâiin a hria a ni ber; chu chu a chhuanlam pakhat a ni.

Kum 2007 khân a awmna ram bial Kivu dil hmar lam china Masisi leh Rutshuru lai vel chu a ramah chhiarin National Congress for the Defence of the People (CNDP) tih sawrkar a din a. Headquarters building te a sa a. Dan leh thupêk kengkawhin thuneihna a inpe chawp ta a ni. Sipai 7,000 aṭanga 8,000 vel a nei.

Kum 2008 October 27 khan Nord-Kivu indona an tih chu a chhuak a. He indonaa inbeite chu Nkunda hruai Tutsi helho leh Congo sipai leh UN sipai 17,000 te an ni. Nkunda chuan Goma khawpui lâk tumin a bei a. Congo sipai leh UN sipai ṭangrualte chuan an lo beih rawn a. Congo sipaiho chuan Rwanda sawrkar chu Nkunda ṭanpuiah an puh bawk.

He indona avang hian mi nuaih hnihin an in leh lo an tlanchhiatsan a. Kivu buaina avanga in leh lo tlanchhiatsan chu mi maktaduaih hnih zet an tling chho ta a nih chu. Eitur an tlachham a, buaina tênâu deuh a chhuak reng bawk a, ṭanpuina nise a sem rual hleih theih bawk si loh a, mi tam takin an thih phah a ni. Kum 2008 November 10-a BBC palaiin a kawmna-ah Nkunda chuan President Joseph Kabila-an inbiakna neih a duh loh reng chuan Congo sawrkar chu paih thlâk a tum tih a sawi.

Khawvel hmun hrang hranga tlâwmngai pâwl leh UNO pêng ṭhenkhatte chuan a hmâ deuh aṭang tawhin Nkunda chu an sawisel luai luai tawh a. A sipaite chu mi pawngsual, tualthah, thingtlang khaw suam vak vak chingah an puh a. Nkunda erawh chuan heng an puhnate hi a pha nasa hle. Amnesty International phei chuan Nkunda sipaite chu naupang kum 12 mi lek lek pawh sipaia la lui angin a sawi hial a ni. Mahse ani thung chuan kum 2005 khan sipai 2500 lai chu an la naupan lutuk avangin a chawlhtir zâwk niin a sawi.

Kum 2002 My thla khan mi 160 a suat mang veka sawi a ni bawk a. Hei phei chuan UN beng a verh zar mai. UN Human Rights Commissioner Mary Robinson chuan Nkunda chu a sipaiten UN sipai pahnih mana an lo vuak avangte nen man ngei tur a ni a ti ta hial a.

Tichuan kum 2009 January 22 khân Rwanda rama a lût chu Rwanda sipai leh Congo sipai ṭangrualin an lo man a. Hetia an man theihna chhan hi tun hmâ zawnga amah pui ṭhintu Rwanda sawrkarin Congo sawrkar nen remna a siam vang a ni. Amah man tur hian sipai battalion thum zet tirh chhuah an ni a. Tunah hian khawihah nge an dah hriat a ni chiah lo. Rwanda sipaite chuan Congo sipai kuta pêk chu an tum lem lo niin a lang. Rwanda sipai thupuangtu chuan Rwanda khawthlang lam Western Province-a Rubavu district khawpui pakhat Gisenyi-ah house arrest-a dah niawmin a sawi a. A dik em kan hre lo.

Heng khawvel chanchinbu lar leh chanchin thar theh darhtu ṭhenkhat Associated Press, Bloomberg News, The Christian Science Monitor leh American Spectator te hian Nkunda hi Seventh-day Pastor angin an chhuah a. Chu chu khawvelin amah an hriat dan a ni tlat. Chuvanga han sawi ve mai chu ka ni. General Conference pawh an insawifiah a ngai ta hial. GC lam chuan pastor a ni lo va, Seventh day Adventist member ṭha pangngai pawh a ni ngai lo an ti ve thung. Seventh-day biak inah chuan a lo inkhawm ve zauh zauh chu niawm tak a ni; mahse member ṭha chu a ni ngai lo niin an sawi a. Amah lah chuan Seventh-day ordained pastor ni tawh ang leh a sipai tam zâwk pawh convert angin a insawi hmiah hmiah thung si. Hetih rual hian New York Times chanchinbu palaiin kum 2007 June thla chawhnu lama an camp a tlawh chuan Penticostal mi niin a sawi thung. Hei hi Penticostal lam mite ṭanpuina pawisa a dawn ṭhin vang pawh a ni thei. Thudik hriat a har hle.

Nkunda hian a sipaite chu ṭawngṭai ṭhin turin a fuih a. Râl do tura a tirh pawhin an ṭawngṭai hmasa phawt a, Pathian an lamah a ṭang a, engmah an hlau tur a ni lo tiin a fuih ṭhin. Pathian hming chu lam ri nasa ve tak a ni.

Hengte hi awih tur a nih leh ni loh ka hre bik miah lo a nia. Inzawh belh chi pawh va ni suh. A mak ve em a, ka han sawi lang ve mai mai a ni.

Laurent Nkunda