TUTE NGE JEW’S HARP NEI VE?

                                                           

            Israel kan nih leh nih loh chungchanga CIPC hotupa leh Pu P.C.Biaksiama inchapchar ngaihnawm tak mai kha ka lo ngaithla tluan ve zak a. A bengvar thlak rem rem hle mai. Tih fo chi ni maw, ni lo maw? Kha inchapchar laia zawhna rawn zawttu pakhatin kan unau Mara(Lakher) hovin Jew’s Harp an lo nei ve hlauh mai leh chu chu Israel thlah kan ni tih fiahna atana hman tlak ang hial niawma a sawi leh Mongolia thlah hnam dangin an neih leh neih loh a zawh kha kan la hre reng hlawm ang chu maw. Music instrument pakhat inṭawm avanga Israel hnam kan ni dawn a nih chuan Israel kan tam dawn hle mai.

Jews Harp

           

Jew’s Harp hi Jaws Harp tih atanga lo kal ni zawk mahin a lang. Chuvangin tunthleng hian Jaws Harp tia sawi a la ni ve fo reng a ni. Tin, a hming dang GUIMBARDE tiin an ko bawk.  Random House Dictionary chuan, ‘a musical instrument consisting of a lyre shaped metal frame containing a metal tongue, which is plucked while the frame is held between the teeth.’ tiin a hrilhfiah a ni. Hnam dangin an hman leh hman loh chungchangah chuan hetiang hian Microsoft Encarta Encyclopedia Standard 2003 chuan a sawi.          ‘India leh Europe-a Jew’s Harp (kum 1350 vel atang tawh khan) chuan thir kual, purun pianhmang ang deuh, ban pahnih insi deuh riala lawr chhuak a nei a. Chutah(a frame-ah) chuan a lei vuah a ni’ tiin. Chutah zawm zelin,

            “Clothespin-shaped jew's harps with the frame and tongue cut of the same piece of bamboo are found in the Pacific islands. These are often sounded by jerking a cord attached to the instrument. In South East Asian jew's harps, probably the oldest form, the narrow, rectangular frame (of bamboo or, rarely, sheet metal) completely surrounds the free end of the tongue, which is vibrated by plucking a tab on the flexible frame.” a ti. Mizo ṭawnga lehlin awm tak pawh a ni naa a sap ṭawnga a inziah hian ṭhenkhat tan a awihawm zawk mahna.

            Britanica Encyclopaedia pawhin hetiang hian a sawi, “Jew’s Harp chu Asia leh tuifinriat thliarkar ram (Oceania), a bikin tribal culture-ahte leh Europe-ah te pawh kum zabi 14-naa Asia aṭanga an lakluh hnu-ah a darh zau hle,” a ti.

            Kan unau hnam ṭhenkhatin rimawi hmanraw chi khat Jew’s Harp, Jaws Harp an tih bawk, ṭhenkhatin Guimbarde an tih an lo hman ve te Israel hnam nihna tanfung pakhata kan hmang dawn a nih chuan ṭanchhan tur a tam duhawm hle mai. Hetianga inchhui luhna tur kan neih ṭheuh avang hian ni maw Israel hnam bova inchhal hi kan tam em em ni. Mormon ho te, Nestorians ho te, Uganda rama Ubadhaya hnam te, Red Indian hnam ṭhenkhat te, Afghanistan ram ami te, Japan ram ami te, India rama Guntur vel a mite thlengin Israel hnam bo ta-ah an inchhal thei deuh ṭheuh mai. Tanfung lah an nei ṭha ve na rawh.

            Kum zabi 17-na daih tawh khan Europe-ah pawh Anglo-Saxon ho khu Israel hnam sawm bo tate thlah kha nia sawi an lo ni tawh a. Chu rilru avang chuan England ramah Juda mi tam tak an pem luh theih phah a ni. Keini Israel inti ve hi chu a hnu khawi lam kan ni zawk tawh mah awm e. Philladelphia Church of God chuan Britain khu Ephraim niin America khu Manasea an ni a. British-in ram ni tla seng lo va ro an rel theihna chhan kha Ephraim-a malsawmna an dawn vang a ni a. Tuna America ram lo chak leh ta em em pawh khu Ephraim-a nau,(Tisa-ah chuan Manasea hi a upa zawk naa fa u zawk nihna kha Ephraim-a chungah dah a ni) Manasea hnena an pu Jacob-a malsawmna an tel vang a ni an ti a. |anchhan pawh an nei ṭhain document han phawrh mai tur pawh an nei ṭha awm kher mai. Keini, India hmar chhak kila awm, kut dawh state hi an rawn hisap tel aw-zawng lo.

            Khawvel hnam ralṭi ber Israel mi nih hi thil chakawm lo tak a nih vei nen; engvanga chak viau nge maw kan nih hlawm le? Kan ramah hian hnamdang nih chak hman lo khawp leh ṭhenawm ramte mak tih khawpin hna thawk nasa ila, rinawm bawk ila; chu chu Israel mi nih ve hrim hrim aia kan hlawk pui tur leh changkan pui tur chu a ni. Hnam dinchhuahna chu Israel mi nih leh nih loh lam ni lovin taimakna te, rinawmna te, huaisenna te, hmalam hun thlir thiamna te, tei rei peihna te hi a ni zawk. Asia khawmualpui ram ṭhenkhat Japan, S.Korea, Singapore, Thailand leh khawthlang ram changkang hote khuan Israel mi ni kher lo pawha hmasawn theih a nihzia an entir a ni.

            Mizo kan ni kan hmel a tha, kan tum a sang bawk si.

Thu Belh:

Fake Refugee : Raltlan Suak

Kum 2012 atanga 2016 chho vel hian Europe ramah raltlan an tam hle; a maktaduaih têl an ni. An manganpui hle mai. An mang ti-angtu pakhat chu raltlan dik tak ni lo, ram hausa zawkte hausakna chhim tuma dawtsawi, raltlana inchhal an tam lutuk khu a ni. An sawi dan chuan Syria ram atanga raltlan nia insawi hmun thuma thena hmun khat khu a lem, dawt sawia inti raltlan mai an ni. Turkey khawpui lian ber Istanbul leh khawpui dang dangah te khuan passport lem siamna a awm thluah a. Chutah chuan Syria passport lem an lo siam a, Europe-ah an pem thla a. Anni tan a dik leh dik lo hriat a harsa si a, an buai phah hle. A dik lova te hlei hlei kha a insawi khawngaih thlak thiam leh a zak lo lo an ni an ti lehnghal emaw ni.

Raltlan nih hi eng tichak emaw hian kan chak a ni awm e. Mizorama piang leh seilian, inti Mizoram hmangaih em emte pawhin dawt chiang tak sawiin raltlan an inti a, Burma ramah an chho va, a then New Delhi lamah an chhuk a. Dawt tinreng sawiin raltlan nih chu an tum a. An hlawhtlin phei chuan an lawm em em, ‘Haleluiah’ an ti lo chauh a ni. Mahse kei chuan hetiang mi nih hi ka duh lo.