The Lonely Man

Lui kam ngaw hrul phul hring nuam tak maiah chuan sakhi nupa hi ralmuang tak hian an tla dun malh malh a. An khawsak dan aṭang chuan an thlamuang hle a, tunhma lamin tibuaitu an la tawng lo ni ngeiin a lang.  An piah lawk ngaw chin lungpui hlim bela thu tlangval la naupang tak, kum 25 mi vel tur, inkhaithli zaih mai, Arizona chhak lam chhuak, James Nicholas, a ṭhianten Nicho (Nikhaw) tia an koh pawh chu chung sakhi nupa te ang bawk chuan thlamuang awm tak hian a muhil bawrh bawrh a. A bula a sakawr thlun pawh chuan hmanhmawh miah lovin a pu bula hnim hring duah tha tak takte chu a pet mawlh mawlh bawk a.

Nicho-a chu thlamuang taka muhil bawrh bawrh ang hian a lang naa a nihna takah chuan thawm awm hleka harh mai thei turin a nghar mut chauh a ni. A kawngbawr ding lama a colt .45 pai lai chu phawi mai theih turin a dah lang a. A pheikhawk ding lama a chemte thiah pawh chu a langsar vak lo naa ani tan chuan hman mai theih reng a ni. Mu chunga a nghen lâi lungpui lian tak chu ni kang laia awm a ni bawka chawhnu lamah chuan a lum vung vung thei a. He lungpui kher a thlanna chhan pawh hi eng dang ni lovin miin an rawn hmuh ve mai mai theih lohna lai, amahin luikam lehlam atanga mi rawn kal tur a lo hmuh zung zung theihna lai tur nia a hriat leh hmun remchang ber a nih vang a ni.

Darkar chanve vel a mut hnu chuan a rawn harh a. A bul vel chu a han thlir thuak thuak a. Muangchanga thovin a bul lawka a sakawr lo ding reng lam chu a pan a, tichuan a kal tumna khua, tuna a awmna atanga mêl ruk vela hla Yorker khaw lam chu a pan leh ta a.

Yorker khua chu a dik tak chuan khaw pangngai a ni chiah lo. Lo neitu chhungkaw nga vel an awm a. Khawthlang lam zin turte chawlhna thin khualbuk pahnih khat a awm leh a. Miners tlêma zawng an awm bawk a. Chu zawng chu a ni. Mahse Nicho-a tan chuan chu khaw te reuh te chu a pawimawh viau si. He khua-ah hian vawihnih a chawl tawh a. A vawihnihna-ah chuan khualbuk neitu fanu Mary Linn nen chuan inngaizawng han tihtur ni chiah lo mah se an inngaina hle a. A fanu Mary’n a ngainatzia hriain khualbuk te reuh te neitu James Linn-a pawh chuan a mikhual cham rei Nicho-a chu a duat phah viau a ni. Hetihlai hian Nicho-a chu Hamilton ranch-a a inhlawh lai a ni a. A pu Hamilton-a chuan khaw danga a fapa lehkha zir tur a hruaitir a. Chumi haw lam chu he khua-ah hian ruah leh thlipuiin a um lut a. Ni thum zet a châm ta a ni.

 Chu khua chu khawthlang rama mi hlauh ber tihngam hial tur Michael Jones-a leh a thuhruai mi pahnih, George Mull-a leh Herbert Lewis-a ten chawlhkar hnih lai kal ta aṭang khan a chhan hriat chiah lohin an chamchilh tlat mai a. Chu khuaa loneitute chu an duh duh eisakin an bungruate an chhuhsak ṭhin tih mikhual kal vel pakhat hnen aṭangin chulai ram bialtu Sheriff Gregor Handell-a chuan a lo hria a. Tichuan a ṭhianpa, hmun hla tak aṭanga rawn thleng thar, kawng engkima a rin ngam Nicho hi thil awm dan en thlithlai hmasa turin a tir ta a ni. A dik tak chuan chhan ṭha tak avangin Nicho-a hian Yorker khua chu tlawh a tum sa ve hrim hrim a. Chutia tlawh a tum tho avang chuan sheriff chuan thil awmzia sawiin a tir nghal a ni mah mah zawk.

Nicho-a chuan ralkhat tlâng pawng aṭangin Yorker khua chu a zu thlir a. Kum khat kal ta, Hamilton-a ranch a thawh laia a thlenna khualbuk aṭang chuan meikhu a rawn zâm chhuak ngiai ngiai a. A kawtah chuan sakawr pahnih a inthlung a. Sakawr dinna bul lawkah chuan sakawr tawlailir, hlui hmel tawh tak hi a ding bawk a. Mihring che vel hmuh tur an awm lo. Michael Jones-a leh a ṭhiante pahnih chu khawiah nge an chen ang? Khualbuk pahnih zinga a khawi ber emaw chu a ni phawt ang a. An chimawm viau chuan khuaa mite chuan an retheih phah hle dawn a ni. Nicho-a chuan Michael Jones-a te ṭhianho chanchin hi a lo hre fo tawh a. Sundown khaw kawtthlera an che vel pawh a lo hmu tawh nghe nghe a. Chung lai vela mite chuan Michael Jones-a silai phawi ranzia leh a kah thiamzia chu hahipin an sawi ṭhin. Mi ṭhenkhat phei chuan Wild Bill Hickok-a meuh pawh kha phawi rang zâwk bikin an ring lo. Nicho-a erawh chuan Michael Jones-a khawsazia a enin Hickok-a te ang han khing pha turah chuan a dah lo a ni.

A pistol pai lai chu uluk takin a han siam ṭha a. A diktak chuan Michael Jones-a hi Nicho-a hian ama mimal tak pawha hmuh a duhna hi a rei tawh a. A ṭhianpa khan tir kher lo pawh nise helai hmunah hian an awm tih a hriat phawt chuan a pan nal nal duh ang (An awm loh pawhin pan chu a tum tho va). Hamilton-a ranch-a a inhlawh laiin bawng pahnih khat man lekah an lo inhmu thiam lo tawh a. An inhnialna chu Little Bear khaw saloon pakhatah a ni nghe nghe a. An khaw marshall a rawn inrawlh hman a, tlêma tlemah an buai thui hman ṭhelh a ni. Chutihlai chuan an duh angin intawng zui se amah Nicho-a emaw, Michael Jones-a emaw hi chuan thlanmual an thleng tawh ngei ang. Nicho-a pawh hi mi thianghlim a ni bik lo va. A hmuh remchan apiang thawka vak kual vak kual chi; awmna ngaia awm rei thei lo ve tak mai a ni. Buaina siam hmasatua ṭang ngai lo, buaina a tawha tlanchhe ngai miah lo a ni bawk. Amah hi pa maltlat chi, ṭhian kawm tam vak lo, a chang phei chuan ramhnuai reha awm veng veng a, zin kual zin kual a, a thlen tawp tawpa riak mai chi a ni. A kum naupan aiin harsatna a tawk nasa tawh a, chu chuan amah pawh hi a tilang upa sawt bawk.

Tin, Nicho-a hian he khaw te reuh te hi hmuh leh duhna chhan tha tak a nei. Kum khat kal taa a ṭhian hlui Mary hmuh leh chu a thil chak ber pakhat a ni. A hma lama kan sawi tawh ang khan Nicho-a leh Mary chu an inngaizawng kur ngei nguai lo naa an inngainain an inkawm ngeih hle a. Mary pa pawh chuan inngaizawng vak lova ṭha taka an inkawm chu a duhzawng tak a lo nih ve avangin Nicho-a pawh hi a duat phah hle kan tih tawh kha. Nicho-a chuan Mary chu a ngaihtuah hle mai a. Chu chu a hmanhmawhna chhan pawh kha a ni. Khua a va thlen hunah thil awm dana zirin buaina lian deuh pawh chhuak nghal thei a ni a. Chumi avanga Nicho-a chu ni chin lawka mu hahchawl hmasa kha a ni nghe nghe.

Khaw chhung a luh dawn chuan miner-ho riahna in hlui bula ui pakhat chuan a lo bauh lauh lauh a. Loneitute in panga leh khualbuk pahnih leh miner-ho riahna in hlui lian deuh pakhat chauh chu in awmchhun a ni.

Nicho-a chuan Mary te khualbuk lam chu a pan ding nghal a. An khua chu a têt aiin mikhual kal vel an awm ve reng avangin an bengvar phian lehnghal. Chu bâkah Mary pa chu pa titi thiam zet mai hi a ni a. Chu chuan mikhualte pawh a titlangnelin a khuaa mite chuan an bengvar phah em em a ni. Khualbuk kawngka a va thlen chuan a chhung lama ṭawng ri lawng lawng hi a hre ta a. Aw chuan, “Kan duh anga min tihsak loh chuan he khaw te reuh tê hi kan hal darh vek a ni mai. Ka sawi tawh hi chu ka puitlin ngei bawk,” a lo ti lur lur a. A awki atang pawhin a thinur hle tih hai rual a ni lo. Nicho-a chuan thil awm dan chu hriat ve ngei a duh si a, khualbuk kawngka chu a nam hawng a, zawi muangin a lut ve ta a.

In chhûngah chuan palian deuh deuh pahnih hian dawhkan bul chair hlui tawh taka Mary pa ṭhu lai chu an lo din chilh a. Nicho-a va lut ve pawh chu an lo en nghal mai lo. Pakhat zâwk chuan muangchanga rawn hawi chhuah pah hian, “|hiana, min lo va chhuahsan zawk la a va ṭha em! Chutilo zawng, i duh âia hmain i thlan laih a ṭul palh ang e,” a lo ti a. In chhung chu a thim deuh ruih avangin James-a chuan Nicho-a chu tu nge a nih pawh a lo hre mai lo nghe nghe a. Engpawhnise midang an rawn luh ve takah chuan amah ngawta chung mi pahnih vauna hmachhawn ai chuan a ziaawm ta hrim hrim mai.

Nicho-a chuan a hmaa mi pahnih dingte chu an incheina leh an hmel aṭangin tute nge an nih a hai lo. He mite pahnih hi kum hnih kal ta khan Sundown khaw kawtthlerah a lo hmu tawh a. Chunglai vel ramah chuan an lar em avangin an hmêl chu a chhinchhiah tlat a, chuvanga la hre thei chauh chu a ni. A pa lian zawk leh hmêl bumro zawk, sam sei hnuang mai chu George Mull-a a ni a. Pistol pahnih fual takin a pai a. Kawr dum ṭial leh kekawr dum a ha a. A lukhum khum lovin a hnung lamah a uai thlaktir bawk a. A pianphung en mai chuan pa dehkhirh lutuk niawm pawhin a lang lo.

A pa tê zâwk leh hmel fel zawk, inchei nalh ang reng tak, hmuihmul mêt fai vang mai chu Herbert Lewis-a a ni.  Nicho-a va lut ve chu a lawm lo hle tih hai rual a ni lo. Henglai vela mite chuan a phawi ranzia chu hahipin an sawi ṭhin a. |henkhat phei chuan Michael Jones-a ai pawha phawi rang zawk te pawhin an sawi. A hmêl nelawm tak avang chuan miin an teh sual fo bawk. Michael Jones-a hmêl lang ve lo chuan Nicho-a rilru chu a tinuam chiah lo va, chuvangin in chhung chu ngun lehzualin a han en leh a. Mahse Michael Jones-a hmel reng reng a lang ve lo. He mite pathum hi an inzui deuh chawt a, chuvangin a awm hla lo tawp ang tih a ring.

 A ṭawng hmasa zawk George Mull-a bawk chuan, “|hiana, i lo inthiarfihlim dawn nge he putar hnung hi i zui ve dawn? He khua hi kan thuhnuaia awm a nih hi. Kan duh duh kan tithei,” a ti leh a. Nicho-a chuan, “In buaina chu ka hre ve hauh lo va. Mahse putar kha kalsan ula, min lo va chhuahsan ta zawk che u,” a ti ve ta a. Chutihlai chuan bang kil bungraw dahna almirah bula lo ding ngawi reng Mary chuan, “E he, Nicho-a zu ni reng a. Nicho, Nicho….,” tiin a rawn ṭawng chhuak ta a. Midang ṭawng ve hmain nula bawk chuan, “Nicho, tlanchhuak mai rawh. An that duh mai ang che. Mahse….” a ti a, a sawi zawm thei lo.

Herbert Lewis-a chuan, “E heu, i bialnu i rawn chhanchhuak dawn a ni maw. A ṭha e, han tum chhin ta che,” a rawn ti ve ta a. Chutah amah vek chuan, “Mikhualpa, keini hi tute nge kan nih i hria em?” Hun ṭha i neih lai hian i bialnu thurawn ang che chuan baklêngin tlanchhia la. He khua leh a chhunga awmte hi chu rawn theihnghilh hmiah rawh. Chu chu thu tâwp a ni e. Pakhat, pahnih ka chhiar ang a. Sawm ka chhiar thlen hmain min chhuahsan ang che. Kan thiltihnaa kan sawm tel loh midang rawn inrawlh ve hi kan duh lo teh mai a nia,” a ti leh a.

Nicho-a hmêla chhuah a tum lohzia leh a zam lohzia hmutu Bull-a chu harh ta zawk ang mai hian a han meng phâwk deuh hru a. An hming hriaa la ding khawng ngam tur chu mikhual an nih loh chuan henglai velah hian mi pakhat chiah a awm. Chu chu James Nicholas a ni. Bull-a chuan, “Ka hrechhuak ta e. Nicholas, nang bawk hian maw kan kawng dal leh dawn,” tih pahin a kawngbawr dinglama a pistol pai chu a chuh ta nghal a.

Thil thleng thut chu a bul ṭanna a rang ang bawkin a tawpna pawh a rang hle mai. Nicho-a chuan a beisei ang chiaha an chet avangin mak pawh a ti lo. Bull-a pistol phawi tur chu a dulah a va kahsak a. Chumi rual chuan a ṭhingṭhi nghal rawp a, a hlauhawm zawk tura a ngaih Lewis-a lam chu a tin nghal a. Lewis-a chu a ṭhianpa ai chuan a lo phawi rang zawk hret a. Mahse Nicho-a hmaa han chhuan tlak em zawng a ni lo ve. A pistol chu a phawi chhuak a, mahse a duh ang taka a lek kawh hmain Nicho-a silaimu pakhat zawk chuan a hnute hnuaiah tak mai hian a rawn verh siah a. A nghing dawt a, a pistol ken lai chu a thlauh nghal a. A rilru chu a la harh tho avangin a hmabak pawh chiang takin a hre nghal. A kawngbawr veilama a pistol chu phawi a han tum leh a. Hliampui tuar chunga che-ah chuan a chet pawh a la che rang viau. Amah hi pa dawihzep a ni lo va, a tuar pawh a chhel hle a ni. Mahse a phawi chhuah hmain Nicho-a silaimu bawk chuan a awm bawr, a thinhnun zawnah chuan a rawn deng leh dawt a. A tlin sêng ta bik lo a ni.

Silai ri a reh hnu chuan chu khaw te reuh te chu a reh leh ta tlawk tlawk mai a. Nicho-a chu muangchangin a tho va. Bull-a lam chu a va pan a. Bull-a chu harsa titak hian a dul hliam hupin a lo thaw hrawih hrawih a. Silai mu chuan a dul chung lam fuhin a awm bawr lamah a chho va, a chuap leh a lung a han khawih ni ngei tur a ni. A ka aṭang chuan thisen a rawn chhuak nguai nguai a. Thei leh thei lovin Nicho-a chu a rawn melh ṭawk ṭawk bawk a. Sawi tur a ngah hmel khawp mai. Michael Jones-a thlazar hnuaiah duh duh tithei emaw intiin henglai velah hian an lo vawk lal len tawh a. Hetiang dinhmun thleng thei turah pawh hian a lo inngai ngai lo. An kalna apiangah mite hlauh leh tlawn an ni a, chutiang reng tur emaw chu a lo intihman tawh a ni. Mahse James Nicholas-a a lo lan aṭang chuan boruak a danglam ta. An hotupa Michael Jones-a pawhin henglai vela Nicholas-a a lo lan aṭang hian fimkhur a ṭul thu a sawi zauh tawh a. A hlau deuh nite pawhin a hre hial nghe nghe a ni.

Bull-a chu a thaw zawi tial tial a. Minute khat pawh tling lovah a ṭhianpa chu a zui ve ta a. Bangkila ding Mary chuan thil awmdan chu a lo hmu vek a. Chu thil thleng chu a ran em avangin a insaseng hman lo va, a hmu ve lo thei ta lo zawk a ni. Pu Linn-a erawh chu hetiang thil lo hmu fo tawh leh indona-ah pawh lo tal ve hrep tawh a nih avangin a inthunun thei viau a. Mak tilutuk awm pawhin a awm lo.

Chawhnu dar thum velah chuan an khualbuk chu an thian fai tawh a. Mitthi pahnih pawh chu khualbuk kawt tawlailir chhia-ah chuan la ngaihtuah zui atan an dah fel diam tawh a. Boruak chu a reh ngawih ngawih a, a uap deuh churh bawk. Mary te pafa chuan an lawmthu sawi tur ang ang chu Nicho-a hnenah chuan an hrilh mawlh mawlh a. Machael Jones-a te ṭhian pathumin an khua an tihhrehawm dan te chu an hrilh zel a. Zu an rui a, loneitute ranvulh, ar, beram leh ui te chu an kahhlumsak mai mai a. An duh duh inah lutin thil an ei a. An vau bawk a. Loneitu pakhat John Hill-a phei chu silaia vauin a pawisa an chhuhsak a. A nupui chu pawngsual a, sawisakah an vau bawk a. La dam rei deuh se a tih pawh an tiduh tak tak maia an rin thu te an sawi bawk.

Michael Jones-a chu hemi tuk hian hmanhmawh deuhin a tlanchhuak a, tunthleng hian a awmna chin an la hre lo. A hma pawhin hetiang hian chhun lama vah bo daih hi a ching a, tlai ni tlâk hma deuhin a rawn haw ziah thung. Tuman a kalna chin an zawt ngam lo a ni.

Nicho-a chu khualbuk hulhliapa ṭhutthleng hlui tawh tak maiah chuan a ṭhu mû a. A lukhum chuan a hmai a khuh a. A hma zawna thil thleng hmu thei lo khawpa inkhuh phui erawh a ni lo. Ral hla taka vaivut khu chem chem leh thil dum nal nal a hmuh chu a lo hnai zel a. A rawn hnaih deuh hnu chuan sakawr tawlailir a ni tih a va hre thei. Rei lo tê-ah chu sakawr tawlailir chu a bul tual zawlah chuan a rawn ding khu ta rum rum mai a.

Tawlailir khalhtu chu a han inbeng khu luih luih a. A ṭhutna atang chuan a rawn ṭum thla a, khualbuk lam pan pah chuan, “Rawn chhuk vek rawh u le. Zanin chu hetah hian kan riah a ngaih hmel a ni. Kan sakawrte an chau lutuk tawh a. Kal zelna chi a ni ta lo. Khawiah nge kan nula hmelṭha Mary hi a awm chu le. Lalruanga zu thuhruk ngei mai kha min han hlui leh teh se,” tih pahin khualbuk kawngkhar chu a nam hawng nghal a.

Nicho-a chuan a lukhum hnuai aṭangin mi che vel chu a lo thlir reng a. A mal malin tawlailir atanga lo chhukte chu chik takin a lo en zel a. Tawlailir-ah chuan mi pathum an chuang a. A rawn chhuak hmasa ber chu pa khân sang zeih zawih, kawrchung dum ha, lukhum dum parh nalh tak mai khum hi a ni a. A hawiher aṭang pawhin pa naran a ni lo tih a hriat theih nghal mai a ni. Kum sawmthum la tling lo deuh maithei. A kawngbawra a pistol pai ful hnalh mai leh a pheikhawk tle hlarh maite chu a inhmeh phian lehnghal. Tawlailir aṭanga a rawn chhuak chuan uluk takin a bul vel thil awm dan chu a han thlir kual hmasa tê tê a. An piah lawk sakawr tawlailir hluia ruang pahnih let rengte chu hmuh loh chi a ni lo va, mahse a hmelah chuan a hmu nge hmu lo a tilang miah lo.

A hnungah chuan nu pakhat, kum sawmli mi vel tur hi bag khaiin a rawn chhuk leh a. A hmêl chu a ṭha vur lo naa ngaihno bei ve tawk tak, nu inzo tak a nih duh hmel khawp mai. Khaw dang hawi lovin khualbuk lam chu a pan ding nghal a. A hnung bera rawn chhuak chu pa sa ṭha nelh nawlh, ṭawng duh hmel tak, hlim hmel pu deuh reng mai tur hmel hi a ni a. A chhip chu a kawlh thui hle a, a lan danin kum sawmnga mi vel ni ngei tur a ni. Chu pa chuan a bul vel chu a han en kual hmasa a. Tawlailir hlui chunga miruang pahnih lo let reng chu a hmu ta a. “Eheu, a va mak ve!” tih leh a lukhum phawh a rual a. Roman Catholic ṭawngṭai dan hian a kut chuan a koki vel chu engemaw ni ṭawngṭai hla chham pah hian a han khawih zauh zauh a. Chutah khualbuk hulhliapa lo ṭhu ngawi reng Nicholas-a chu en pahin a han phun leh sup a. Khawthlang rama khawsa ṭhang a ni a, zawhna ngah lutuk hi a him lo tih pawh a hre chiang hle. Engmah sawi lovin a lut ve ta a.

Nicholas-a chuan a bula Whiskey chu a han khiat leh zauh a. Zu in tam hi buaina bul a ni tih a hriat chian avangin a in tam chu a duh ngai lo. Nakin lawka thil thleng thei chu a ngaihtuah a, phur viauna tur awm lo mah se a tihtur hmabak tho kha a nih avangin nghah chhuah law law a duh a ni. Michael Jones-a chuan ni dang ang a nih chuan khua a rawn lût leh ṭêp tawh ang. Khualbuk kawta a ṭhiante pahnih ruang a hmuh chuan a thinur nasa dawn a, chumi lo tudaitu nih tum chu thil namai a ni dawn lo tih pawh amah Michael Jones-a chanchin hre tawh tan chuan hai rual a ni lo.

Nicholas-a leh Jones-a te hi saloon pakhatah an intawng tawh kan tih kha. Khami ni aṭang khan Michael Jones-a hian nuam lo tihna riau a nei a. Mahse mi dawihzep a nih bik loh avangin tihlan chu a tum hauh lo va, a tihtur tih thulh phah nan a hmang duh hek lo. A fimkhur phah hle thung; tunhma aiin a inzir nasa bawk.

Mikhual lo thleng thar tuihal inhnangfakho chuan an zo tawh a. Tawlailira an bungraw la awmte chu lak tumin an rawn chhuak hlawm a. Tawlailir pan mai lovin Nicho-a ṭhutna hulhliap hnuaiah chuan khua an han hawi kual vel a. Chutihlai chuan an rin loh lam atang hian sakawr chungchuang pakhat hi a rawn lang ta hlawl mai a. Amah chu palian thelh thawlh, inthazawh hmel tak leh mahni inring tawk tih hriat tak mai hi a ni. Nicho-a chuan a lo hre nghal mai a. Chuvangin a insang mar a, thil lo thleng tur chu a lo nghak ta a ni.

Sakawr chungchuang lo thleng thar Michael Jones-a chuan tawlailir hlui chunga ruang chu a rawn hmu nghal mai reng a. Tute ruang nge an nih pawh zawh ngai lovin a hre nghal vek. Amarawhchu pa inthunun thei tak, rilru tiso but but ngai lo mi a nih avangin a ṭhiante ruang a hmuh tirha a hmel aṭang chuan eng nge a ngaihtuah hriat a harsa khawp mai. Chu chu tualthata eizawng ṭhin leh mi fing sual tawh vek vek awm dan chu a ni si. Nicho-a pawh chuan Michael Jones-a chu a inthunun zawh poh leh a hlauhawm dawn tih a hriat avangin a fimkhur hle.

Michael Jones-a chu a sakawr aṭang chuan a chhuk a. A ṭhiante ruang awmna sakawr tawlailir bula sakawr thlunna tur an siam thing khampheiah chuan a sakawr chu a va thlung ṭha te te a. Tichuan zawi muangin khualbuk lam chu a rawn pan ta a ni. A che vel fimkhurzia leh a inrintawkzia chu silaia inbeihna la tawk ve ngai lo leh hetiang mi fing sual la hmachhawn ve ngai lo tan chuan hriat mai mai chi a ni lo. Pen sawmhnih vel chauh a awm tawh tihah Nicho-a bul lawka lo ding ngawi reng,  hmel hmuh theih mang loh khawpa lukhum khum kun chuan a lukhum kawih dâk pah hian, “Michael, rin aia kan inhmuh hma chu. Khawvel hi a lo va zim ve le,” a rawn tichhuak ta a. Hulhliap aṭang chuan a pen chhuak a, Michael Jones-a hma-ah chuan inring tawk tih hriat tak hian a va ding ta a.

Thil awm dan chu Nicho-a beisei loh lam daih a ni. Chu mikhual tlangval sang zeih zawih, inthazawh hmel tak leh fin hmel tak, a hawiher aṭang pawha zahawm hmel tak chu Michael Jones-a kalna turah tak chuan a lo ding a. Michael Jones-a chu a ding chawt a. Mak tih hmel zeta en chungin a hmaa ding hnenah chuan, “Cliff, nangmah bawk maw ni a. Ka kawng dal hi nuam i tive hrim hrim a ni maw? A ṭha e. Ka ṭhiante pahnih ruang bulah sawn kan phum ve nghal dawn che nia. I lo va che na hman ve le,” a ti a. Mikhualpa chuan, “I ṭhiante pahnih saw eng vanga sawtia mu reng nge an nih ka hre lo. Helai hmun ka rawn thlen hi chuan tisawn an lo mu reng tawh asin. Tu tih pawh ni se mi chimawm pahnih an han awm tawh lo tur chu a thawven thlak hrim hrim e,” a ti leh a.

Mikhualpa, Cliff-a niawm tak thusawi chu Michael Jones-a chuan a awih lo nasa tih hai rual a ni lo. Cliff-a bawk chuan, “Michael, Elizabeth-i khan a thih hmain thu tam tak a sawi hman asin. Dawt a sawi hauhin ka ring lo bawk. Eng nge i ngaihdan le?” a ti leh a. Boruak chu a reh tlawk tlawk a. Henglai rama awm ṭhang tan chuan thil thleng tur chu hai rual a ni lo va, chuvangin khualbuk hulhliapa awm Nicho-a tih loh midang chu an inthiarfihlim ta sang sang hlawm a.

Nicho-a chu a rawn ding chhuak a. Muang ban chat hian, “Keima tih a ni e. Loh theih lohin min nan avanga ti ka ni a. Mahse ka inchhir lo khawp mai. Jones, min la hria ang tiraw?” a rawn tichhuak ve ta a. A hmaa ding Cliff-a chuan Nicho-a lam pawh hawi chuang lo chuan, “|hiana, lo inthiarfihlim zawk la a ṭha ang. He pa nen hian chinfel tur kan ngah lutuk. Mahse silaimu khata chinfel mai theih phei chu a ni,” a ti a. Michael Jones-a chuan Nicho-a hmel a hmu chu mak a ti tulh tulh niin a lang.

Michael Jones-a chu sakei thang awk tal chhuak thei tawh lo thinrim nen hian a inang ber awm e. A hmaa ding pahnih zinga a tu emaw zawk zawk pawh hi vanduaipui tham tak tak an ni ve ve tlat mai. Mahse a hlau tihna chu a ni lo. A beisei loh lutuk thil a hmuh dun avanga mak tihmel han pu lawk mai mai a ni a, a buai chhe chuang miah lo.

Michael Jones-a chu second sawmpanga vel a han ngawi leh a. Chutah tlemin a han insiamrem hret a. “Cliff, hremhmunah thlâwk lût nghal rawh,” tih pahin a silai chu a chuh ta thut mai a. Arizona ram bial khata mi hlauh rawn huai huai gunfighter phawi rang kha a ni bawka a ran pawh a rang kher mai. A pistol chu a phawi chhuah rualin a cheng chu a kau nghal a. Mahse chutihlai tak chuan a khup bâwk tak mai chu silaimu hian a rawn deng dawt a. A nghing dawt a. A silai phawi lai pawh chu a thlauh ṭhelh a ni. Buai chhe nghal mai lovin a hma lama a hmelma pa chu kah a han tum ṭha leh a. Mahse silaimu dangin a hnute bulah chuan a rawn deng leh dawt a. Chutah zet chuan a taksa chu a thunun zo ta lo va, a bul vaivutah chuan a let ta hlawl mai a ni.

Cliff-a chuan a pistol hmawr la khu hlat hlat chungin Michael-a lam chu a va pan chhat chhat a. A thiltihah chuan a lungawi hmel viau nghe nghe a ni. Michael-a bul a va thlen chuan zawi tê hian eng engemaw ni hi a va sawi a. A thusawi chu tuman an va hriatsak thei lo. Michael Jones-a chu a phu leh dawrh dawrh a, tichuan a ṭhiante kalna lama kal turin a chatthla ve ta a ni.

Nicho-a teho chuan Cliff-a che vel chu mak titak hian an lo en ṭhap a. Tumah an ṭawng lo. Khua chu a reh leh ta vawng vawng mai. Chutiang taka pistol phawirang leh kap thiam chu tuman an la hmu lo va, mak an ti a ni. Mipaho chuan chutianga silaia inbeihna ropui an hmu chu vannei an la inti hle ang a, an kalna apiangah an sawi an sawi chhawng ang. Mi sual hmingthang Michael Jones-a thih dan hretu nih leh a thi lâi hmutu nih ringawt pawh chu insawitheihna tham a ni ve reng bawk a ni. Hmeichhe pahnihte erawh chuan an râp hle a, pakhat phei chu a khur deuh der der a, sawi tur reng reng a hre lo. Cliff-a spur ri chhak chhak chauh lo chu ri dang reng reng hriat tur a awm lo. Cliff-a chuan a lukhum siam ṭhat pahin mak ti taka amah lo en rengtute chu a han en kual a. Chutah Michael Jones-a ruang let reng chu zo deuh mai hian a chawi kang a, a ṭhiante pahnih ruang awmna tawlailir-ah chuan a va nghat chawrh a, khualbuk lam pan chuan a rawn kal leh ta a.

Midang chuan ṭawng nachang pawh an la hre lo. Cliff-a chetla hlir chu an lo thlir a. Amah Cliff-a chu mi a nileng ni hek lo, a boruak tihthawl tula hriain, “Ti rawh ule, zu ka khilai vek ang che u. Nang pawh Nicholas, zu min rawn in pui rawh khai. I hna tur ka rawn thawh khalh che a ni awm a. Nang pawhin ka hna tur min lo thawh khalh tho va, a ṭha-ah ngai mai ang hmiang,” a rawn ti mawlh mawlh a. Nicho-a chuan, “Teh reng mai. Ka tihtur min tihkhalh tawh zawng zawngah chuan ka ui deuh viua naa pawi ka tih loh ber tum a ni hial ang. Nang anga phawi rang hi ka la hmu lo a ni awm e. I che rang hle mai. A nih, eng tin nge ka hming te chu i hriat le? Kei chuan ka hmuh che awm pawh ka la hre si lo va,” a lo ti ve a.

Cliff- a chuan, “Nimin piah mai khan Sheriff Gregor Handell-a nen kan inhmu a. He khuaa i kal thu hi min hrilh a. I pianzia a sawi nen khan helai velah chuan nang lo chu tumah dang ni tur awm hek lo. Chuvanga ko thei chauh che ka ni. Ka tihtur min tih khalh ka hlauh avangin ka sakawr ke na pawh hmang lovin he tawlailir hi ka rawn zui ve ta ringawt alawm. Ka hlauh ang ngeiin a ṭhen chu min lo tihkhalh ta reng a. Mahse ka duh ber ka rawn tawng tho va, ka vui lo ve. Kha ai khan kan rawn tlai ang tih ka a hlauhawm hle mai,” tiin a chhang a. Khualbuk-ah chuan a lut ta a.

Khualbuka Cliff-a lut chu a lo awm hmasate chuan an lo melh hrek hrek a. Mipaho chuan an ngaihsang tih hai rual a ni lo. Hmeichhiate erawh chu an thil hmuh khan a la râp em avangin Cliff-a pawh chu an nel mai hlei thei lo va. An hlau tihna erawh chu a ni lo. Khualbuk neitu putar chuan, “Ka va lawm teh reng em! He khaw te reuh tê hi heng mi sual pathumte hian an tihrehawm lutuk a. Tunah chuan hnâra hlit phawi ang huai a ni ta. Ka lawm tak tak a ni,” tiin Cliff-a chu a lo be mawlh mawlh a. Amah vêk chuan, “In vaiin zu ka khilai ang che u. Keimah ngei hian ka khilai dawn che u a ni. Kan khaw tan hemi ni hi ni chhinchhiah tlâk tak a ni si a,” a ti a. Zu chu a thli chhuak a, a bul hnaia mite chu a sem ta nghal a.

Khualbuk hulhliapa la ding khaw muang Nicho-a chuan a tuihalzia chu a hre chhuak thut a. A thil tawn leh hmuhte khan a rilru an lak pên nasat em avangin a tuihal pawh a lo theihnghilh hman hial a ni. Khualbuka luh a tum lai tak chuan Mary chu a rawn chhuak a. “Nicho, engtia khawsak zel nge i tum? He khua-ah hian eng nge rawn tih i tum chiah le? Engpawhnise ka hmu che hi ka lawm takzet a ni,” a rawn ti a. A duh aia ṭawng tam inti niawm tak hian a tawp chawt a. Nicho-a bulah chuan a rawn ding a. Nicho-a chuan, “Rawn kal hi ka tum sa ve hrim hrim a. Chumi remchang hmang chuan in sheriff-in thil awmdan rawn en turin min chah nghal a ni. Dam taka ka hmu che chu ka lawm hle mai. Ka rin aiin kan inching fel hma hlauh a. A lawmawm lamah ngai mai ang,” a ti a.

Mary chu a han thaw hawk a. A hawi vel ruai ruai bawk a. Ni chu a tla lek lek tawh a, khua pawh a dai ta ruai mai. Khaw piah lawk dilah chuan tui sava rual hi an phu mam mam a. Dil kam phaizawlah chuan wheat hmun a hring dup a. Vaimim hmun leh engmah la chin lohna leilet zawl a awm duai bawk a. Hnathawka kal chhuakte pawh an rawn haw dawn tawh ang.

Mary chuan, “Khang mi pathumte kha chu sual dan chi tin rengin an sual a ni ber mai. Ka sawi seng lo. Engpawhnise in chhûngah rawn chawl hahdam phawt la, kan la sawi zawm dawn nia. Kan boruak tawnin a zir si lo va, i chhawl te pawh a hal tawh ang chu,” a ti a. Nicho-a chuan, “A nih leh i lut ve ang hmiang. I pa zu ṭha ber kha min hlui la, thil dang chu zan lama sawi zawmah kan tidawn nia,” a ti a. Khualbuka luh tum chuan a inher nghal a. Mary chuan zawi sap, hre tura a duh a bul lawka a tlangval kawm ngeih em em, a kal bo hlan pawha a lo mangphan fo thin hriat phak chang chang tur hian,  “Nicho, min kalsan tawh lo vang tiraw?” a rawn ti leh a. A aw aṭang chuan a inthlahrung hle tih hai rual a ni lo.

Nicho-a chu a ding chawt a. Chu awki danglam tak leh ngaihno bei tak, tunhmaa a lo hriat fo tawh ṭhin, hmun hrang hrang a fan kual lai pawha a benga ri nawn fo ṭhin chuan a thinlung chu ni dang aia na zawk hian a rawn deng dawt mai a. A ke pen lai chu a tawp nghal a. A che mai thei lo. Engtia chhan tur nge tih pawh a hai lo. Mahse a kha chu a chih a, a ngawi ta reng a. A chhanna nghaktu nula hmelṭha tak, nula zakzum tak leh ngawichawi ang reng tak, putar nen chauha awm, nula khawhar tak chu a han en nawn leh a. Chutah zawng muangchang hian, “Mary, nangman rem i tih phawt chuan kalsan tawh lo tur chea rawn pan che chu ka ni alawm,” a ti ve ta a.

A TAWP TA

 -Lalchhuanmawia Tochhawng