MZP leh Dan Lova Hnamdang Sumdawngte

           

Tunlai ṭhalaite inkawm khawmna lar tak facebook group pakhata MZP president thusawi niawm tak an rawn post kha a ngaihnawm ang reng phian mai. A post-tu kha MZP chanchin hre chiangtu tur berte zinga mi a nih avang leh MZP lam aṭanga hnialna engmah a awm loh avangin dâwt ni lo turah ngai ila. An thu rawn post chu hei hi a ni:

“Mizorama hnam dang sumdawng tam ber 90% vel hi dan lova sumdawng an ni a, hei hi sawrkarin hnawtchhuak se kan duh a, mahse an hnawtchhuak si lova, Mizoramah dan lova sumdawng an nih avangin ṭi ve deuh ṭhin se kan duh a. Dan lova sumdawng an nih avangin an hnenah hian pawisa kan khâwn ṭhin a, kan zêp lo, phat thu pawh a awm lo. Mi ṭhenkhat chuan min dem tih pawh kan hria, min lo dem mai teh u, kan khawn zel dâwn, hengho hnên atanga kan pawisa lakte hi ram leh hnam rawngbawl nan hman a ni…. MZP-in kan duhber zâwk chu Mizoramah hian pawisa khawnna tur hnam dang hi awm lo se tih hi a ni….” James Thang-hmingmawia, MZP president.

Heta MZP president thusawi behchhan hian May 9 (Nilaini) chhuak Vanglaini-ah khan James CVL Thafamkima’n thu a rawn ziak tawh a. Chu chu kan tuihnih duh deuh a ni.

Tunhma atangin MZP-in hnam dang sumdawng hnen aṭanga pawisa an khawn thu hi kan sawi sep sep tawh ṭhin a. Anmahni MZP lam hian pawisa an khawn leh khawn loh chungchangah hian,‘pip e, pup e,’ an tihṭhat duh ngai loh avangin rinthu chiang ang reng tak kan insawisiak a ni ber a. Mahse tunah chuan an president berin zêp hauh lovin an khawn ṭhin ngei thu a rawn puang ta a, facebook-a thu rawn post-tu hian dâwt a sawi a nih loh chuan mipui lam chu kan chiang ta.

MZP president hian hnam dang sumdawngho hi a hre chiang viau niin a lang a. Pawisa khawn nan bera an hman avang leh an MZP chawbel ber an nih avangin heng hnam dang, dan lova rawn sumdawngte nen hian an inhmu fovin an inhre chiang tawn viau ang tih pawh a rin theih a ni.

Tin, hetia engmah zêp hni hne nei lova pawisa an khawn thu president-in a rawn puang mai hi a huaisen thlâk a. Thudik a duh vanga puang chhuak ngam a nih phei chuan a fakawm khawp ang. Hetiang mi, thudik sawi ngam, ram tana ṭha tur nia hriat bawh rap rap ngam hi a ni law’m ni kan mamawh? Amarawhchu dan lova an pawisa khawn thu a rawn sawi hian a hnung zuitute rilru-ah dan dang zel pawisak lohna a hring thei mai ang em tih chu ngaihtuah tham tak a ni.

MZP president hian eng tin nge a sawi zawm zel chu kan hre pha ve hauh lo va. A thusawi kan han hmuh ve phâk chin aṭanga a lan danin MZP chuan hnam dang sumdawngte chu an haw hle a, dan leh hrai pawh pawisa zo lovin pawisa an khawn a, mâwi leh mâwi lo pawh an dâwn zo lo niin a lang. Mahse zawhna ka nei.

MZP-te hian dan lova hnam dang rawn sumdawngte chu an huat em avangin dan lovin pawisa an lo khawn phah a, mi sawisel leh dem pawh pawisa hlei thei lo khawpin an hua a ni. A nih leh chuti taka dan lova hnam dang sumdawng hua chuan a hnawt chhuak turin tun kum sawm kal ta chhung khân lampui chang khat tal kawng an zawh tawh em? Hnam dang sumdawng hnawt chhuak turin sawrkar an beisei a, an phût na hle niin a lang a. Anih leh vawi engzât nge sawrkar hnenah chung an pawisa khawnna hnam dang sumdawngho list chu theh lûtin (an hriat chian hmêl ropui si a) sawrkar chu hnam dang sumdawng hnawt chhuak turin an kar tawh? Kei chuan ka hre lo. Mipui nâwlpui hriat loh hlan hian sawrkar chu an lo nawr tlut tlut tawh pawh a ni thei. Chu pawh chu ka hre chuang lo.

Tin, hetia hnamdang sum-dawng hnena MZP chhiah an khawn hian eng tin nge chung hnam dang sumdawngho chu an dawr? Chutia pawisa an inpêk fel hnu chuan an ngawi zui ta zel mai em ni? A lan dan chuan an ngawi zui ta mai a. Tichuan a hun pangngaiah an va khawn leh a. Annin an lo pe leh a. Tichuan dan lova hnam dang sumdawngho chuan an hlauh ber tur MZP-te chu pawisa hmangin an kâ an hup ta a, zalen tak leh thlamuang takin an sumdawn chhunzawm ta zel niin a lang.

President thusawi aṭang hian pawisa khawn ringawt chuan dan lova hnam dang sumdawngte a titim lo va, tihtim ahnêkin a titlângnêl sawt zâwk nite pawhin a lang. Tin, MZP hian hnawhchhuah tum tak takna rilru nei lovin pawisa an khawn khan an duhtawk deuh mai niin an chêtzia atang hian a lang bawk. Anni sumdawngho tân lah MZP hnena pawisa an pêk a, annin engmah an sawi zui tawh loh chuan chu pawisa chu sumdawn phalna angzia zang a lo ni tawh mai dawn a, chuvangin Mizoramah hian dan lova hnam dang sumdawng hi tam lo chi an lo ni lo.

MZP hian hnam dang sumdawngho hi an haw tak tak a, an president sawi anga ‘pawisa khawnna tur hnamdang hi awm lo se,’ an tih tak tak a nih chuan hetia pawisa khawna sawrkar nghâk ringawt lo hian chung an pawisa khawnnate chu mipui hriatah puangzâr sela. An dawr hming leh an address chiang takin mipui hi min hriattir bawk se, mipui chu chung dan lova hnam dang sumdawng an tar chhuahte chu dawr miah lo turin ngen nghal bawk sela a ṭha awm e. Mipui nawlpui hi chuan tute nge dan lova rawn sumdawng a, tute hi nge dan ang thlapa rawn sumdawng kan hre lo va. Duh leh an dawr kawtahte pawh lo duty ang hmiang.  Mizo mipuite hi chu tihnuam an reng deuh mai kan nia. MZP-in chutianga hnam dang dawrkai, phalna nei lova rawn sumdawngte chu dawr lo tura min ngen phawt chuan kan dawr lo mai ang a, chutia dawrtu an neih loh na na na chuan inhawn luih reng peih thu awm suh; an duh ang tak hian pawisa khawnna tur hnam dang sumdawng chu an awm lo thuai maiin ka ring.

MZP president hian dan lova hnamdang sumdawng an tamna chhan chu ‘sawrkar chak loh vang a ni’ chu a tidawt lo naa a ṭawngkam atang hian sawrkar chak loh vangah a puh tih chu hai rual a ni awm lo ve. Ni e, sawrkar a chak tâwk loh avangin hnam dang dan lova sum-dawng an tam tih chu phat rual a ni lo va. Sawrkar chak loh avang vêk hian MZP pawhin dan lovin pawisa an khawn thei ve bawk a ni. Kan sawrkar hi dan leh thupêk kenkawhna lamah hei âi hian chak fê se chuan MZP-te pawhin hnam dang hnen aṭangin pawisa an khawn thei hauh lo vang. Hetia sawrkar a chak loh em avang hian MZP-te hian an duh phawt chuan tharum titih hmang pawhin an pawisa khawn ṭhinna hnam dang sumdawngte hi an hnawt chhuak theiin ka ring tlat a ni. Sawrkar lam chuan dan bawhchhiaa rawn sumdawng na na na chu an thlavang pawh a hauh nêp deuh turah ngai ila, chu tak chu MZP-te tân chuan dan lova hnam dang rawn sumdawngte hnawh chhuahna hun remchang a ni. I lo thlir zui zel phawt mai teh ang.

Note: Hei hi kum 2013-a ka ziah a ni.

A Kâr Awl Hnawh Khahna Mai Mai

Mizo mipate hian hnam dang bula awm kan thiam lo hle. Kan insawisel nasa lutuk a, hei hian keimahni inngaih-hlutna a tihniam chang ni lovin mi zinga awm dan min tithiam lo hle. Hei hi kum 1966 independence boruak avang kha a ni mai thei a, he rilru awmsa hi independent sual duhna rilru min petu leh a boruak ti-alh nasa lehzualtu pawh a ni zâwk daih thei bawk.

Mizo hmeichheho erawh chuan tlêmin an thiam deuh; a ṭhen phei chuan an thiam mah mah. Nupui pasala hnam dang neih pawh hmeichhia chuan an ngam viau zel. Vai hriat chian mang loh, khawii khua leh veng nge an nih a, eng ang chhungkua nge an nih hriat chian mang loh pawh an duhzawng a nih chuan an um mai ngam zel. PU Buanga Diary kan chhiar chuan an lo chhuah kum 1894 April thla vel pawh khan Mizo nula pakhat chuan vai sipai tlangval chu pasal atan Silchar pel rawkin a lo um daih tawh a. Mahse eng tin tin emawni sâpho ṭanpuinain an zu hruai chhuak leh thei hram a ni.

Tunlai pawh hian online kal tlanga an hmelhriat chawp mai mai te pawh an um ngam mai zel. Mipa erawh chu hnam dang lakah kan la zum deuh; hnam dang ṭawng kan thiam tawk loh vang leh mahni inrin tawkna kan la tlakchham deuh vang a ni mai thei. Chu bâkah Mizo mipa rilru hrim hrim hian hnam dang nula itna a nei lo ang reng khawp mai. Hmel ṭha deuh nia kan hriatte pawh hi nupui pasal ang zawng chuan kan it vak lo.

Mumbai nula pakhat, hmei-chhe lam thiam pakhat chu ka hmelhriat ve zan mai; mahse nupui tihlam zawng a leng lo a ni. A mak khawp mai; sâp nula hmelṭha tak takte pawh hi it ang chuan awm mah ila nupui ang zawng chuan kan en meuh lo. Kan Mizo nulate ngei mai hi an lo ṭha e.Δ