THLAI CHAUH RING MI AN DAM REI BIK LO

Thlai Chauh Ring Mi An Dam Rei Bik Lo

Khawvel hian sa ei lo mite hi hrisel zawk leh dam rei zawk tur hian kan ngai deuh thup mai thei e. Sa ei loho hian sa ei loh hi an sawimawi thiam em em bakah sa ei mite dem lek lek zawnga sawi thawi an thiam em em bawk. Chuvangin sa ei ve ngai lo chu sa ei mite aia thianghlim deuh zawk leh hrisel deuh zawk, dam rei zawk deuh fê turah ngaihna a lian hle. Thei leh thlai ei tam thatzia hi chu sawi a ngai lo va, uar zel tur pawh a ni.

Amaherawhchu Preventive Medicine-in a zir chhuah dan chuan thlai ring mi, vegetarian-te an dam rei zawk nachhan chu sa an ei loh vang hrim hrim leh thlai leh thei chauh an ei vang ni lovin an nunphung zawka chu a ni an ti. Mi thiamte chuan New South Wales, Australia rama mihring 243, 096, kum 45 chung lam, chawhruala kum 62-te an zirchianna atangin sa ei leh ei lohin mihring dam rei leh dam rei loh a hril lo niin an sawi. An zir chhung khan heng an mi zirte zinga mi 16,836 an thi a.  Vegetarian awm ve tlêm tê zinga 80 an thi a. A awmzia chu thlai ring mite hi an dam rei chuang lo tihna a ni. Research beitute chuan tunlaia thlai chauh ringtute hian junk food kan tih ang hi an ei nasa tawh a. Chu chu an thatpui tur angin an thatpui lo a ni. Tin, tun hma lama an zir bingna-ah chuan vegetarian-te hian vantlang enhran an hlawh nasa a. Rilru lamah an tuar hle niin an sawi.

United Kingdom lama an zir chhuah dan pawh hetiang tho hi a ni. American Journal of Clinical chuan rei tak chaw ei tlem leh thlai chauh rin hi dam reina a ni kher lo an ti bawk. Hei hian tun hma lama thlai chauh ei hriselzia zirtirna nasa tak kha a rawn kalh bakah tun hnaia sa ei that lohzia an sawi uar viau thinte chu a rawn kalh chiang hle. Oxford University-a Cancer Epidemiology te pawhin thlai chauh ei hian natna thenkhat mi a pumpelhtirin chu chu dam reina a ni em tih an zir ta a ni.

Kum 1980 leh kum 1993 inkar khan United Kingdom mihring 60,310 te nun dan chu chhuiin kum 2014 thleng khan an chhui zui a. An mihring chhinchhiahte chu an thil ei dan azirin group nga-ah an then a; chungte chu (a) chawlhkar khata sa vawi nga ei, (b) chawlhkar khata vawi nga aia tlem sa ei, (c) sangha leh thlai chauh ei, (d) Thlai leh artui leh bawngnute chauh ei leh (e) Sa atanga chhuak hrim hrim ei lo, thlai hlang chauh ring. An thil ei dan chu kum nga hnu-ah an endik zel bawk.

Hemi chhung hian mi 5000 chuang an thi a. An thihchhan awm deuh deuh, meizial, zu, upat ve hrim hrim, nupa kara harsatna etc., chhinchhiah a ni bawk a. Thlai chauh rin avanga dam rei bik an awm ta tlat lo mai. Mi pangngai ngaihah pawh vegetarian-te chuan thei leh thlai an ei tam a, thau lam an ei tlem si a, hrisel zawk leh dam rei zawk tura beisei an ni. Mahse chutiang ni ta lo chuan thlai leh thei ei mang lo, thau lam ei tam nen an dam rei zawng a inchen deuh reng tlat mai.

Heta United Kingdom mi thiamte zir bingna hi sawisel tawk leh rintlak lo ti tawk awm bawk mah se a hma lama Australia rama an zir chhuah dan nen pawh a inang viau tlat. India ram pawh khawvela sa ei tlem berna ram ni mai lovin sa ei lo hrim hrim tam berna ram a ni a; an dam rei lo hlawm hle si a ni. Zunthlum natna pawh hi sa ei mite hian vei duh deuh turah ngaih a ni a. Mahse India ram hi zunthlum tam berna ram a ni lawi si. Sa ei ngai lo India mite zinga zunthlum natna a hluar viau mai hi thlai lam chi buhfai leh thlai atanga siam tho chini ei tam vangah an puh deuh ber.

Vegetarian-ho an dam rei zawka ngaitute tanchhan ber pakhat chu Loma Linda University-a Seventh-day Adventist-te chanchin khu a ni. Adventist Health Study-ten kum 1976 leh kum 1988 inkar khan an zir tawh a. Loma Linda University School of Public Health chuan Adventist Health Study 2 tiin kum 2017 December thla atang khan USA leh Canada-a kohhran member 96,000 a zir nawn leh mek bawk.

Kum 2001 khan Journal of American Medical Association (JAMA) –ah Adventist Health Study chuan vegetarian-ho an dam rei zawka ngaitute tanchhan atana tha tak chu an chhuah a. An zir chhuah dan chuan adventist vegetarian mipaho dam rei chawhrual chu kum 83.3 a ni a, chu chu mipa sa eimi aiin kum 9.5 zetin a tam zawk a. Adventist vegetarian hmeichhe dam chen chawhrual chu kum 85.7 a ni a, chu chu hmeichhe sa ei thin aiin kum 6.1-in a tam bawk. Heta tanga a lan dan chuan vegetarian-ho chu sa ei mi aiin kum 8.7 zetin an dam rei anga chawhrual theih a ni.

Mahse kum 2013 khan Loma Linda chuan follow-up paper an chhuah leh a. Chutah chuan tunhmaa miin an sawi chhuah fo vegetarian nih vanga dam reina lam chu an rawn sawi chhuak ta meuh lo thung.  Loma Linda University-in vegetarian dam reiho an zir chhuah hi life style tha pangngai, mei zu lo leh zu in lo, kohhran mi tak tak an ni hlawm a. Sa an ei loh vang hrim hrima dam rei ni lovin an nunphung hrim hrim zawk hi an dam reina chhanah an dah zawk a ni. Sa nghei kher lo pawh hetianga miin mei a zuk loh a, zu a in loh bawk a, sakhua a ngaihsak a, nun dan tha pangngaia a nun chuan a dam rei tho tih hi mi thiam tam tak ngaihdan a ni zawk. Loma Linda University-in sample atana an mihring thlanchhuahte ang bawka mi nun ngil leh tluang, inenkawl uluk kum 99 dam Billy Grahama-a chu adventist vegetarian dam chen chawhrual aia rei daih a dam tih kan hria.

India ram hi sawi tawh ang khan khawvela vegetarian tam berna ram a ni a; mihring dam rei lohna berte zinga mi a ni reng thin. Isua pian hma atanga vegetarian tamna ram kan ni. Kum 2010 bawr vel khan India ramah vegetarian mi maktaduaih 360 atanga 500 inkar vel awm turah an ngai a; chu chu mihring za zela 29-40 vel a ni. A figure diktak a hriat theih loh. Tunlai hian damdawi lam thiamna a san tak avangin kan dam rei ve ta deuh a, kan dam rei zawng chawhrual pawhin kum za kal taa kum 25 bawr vel lek ni kha kum 2015 khan mipa kum 66.9 leh hmeichhia 69.9 niin hmeichhia leh mipa chawhrual 68.3 a ni a. Chuti chung chuan World Health Organisation chhut danin khawvelah 125-na kan la ni. Khawvela sa ei tlem berna leh sa ei lo hrim hrim, vegetarian tam ber lawrlakna life expectancy-a 125-na kan ni hian vegetarian nih hrim hrim hi dam reina a ni lo tih a hriat hle a ni. UNO-in a chhut dan phei chuan 145-na kan ni. Ram changkang apiangin sa an ei tam a, ram rethei apiangin sa an ei tlem. Mosolman ramte phei chuan Bible-a sa thiang lo, entir nan vawksa te hi an ei lo va; mahse an dam rei chawhrual chu sa ei tam ram, changkang bawk si te aiin a hniam zawk daih thung.

Mizoram kohhran hruaitu lian zingah dam rei deuh deuh an awm; Presbyterian hruaitu Rev.Chhuahkhama (65) chu a hun laia mihring dam rei zawng chawh rual hniamzia ngaihtuah chuan dam rei tak a ni. Rev.Liangkhaia (95) te, Rev.Saiaithanga (93) te, Rev. Dr Zairema (92) te, Rev. Lalnghinglova (92) te pawh hi an dam rei hle a. Baptist kohhran hruaitu Rev. Dr H.S Luaia (104) pawh mi vantlang aiin a dam rei. Kum 2018 March thla, he lehkha ka ziah laia Baptist kohhran puipa la dam zingah Dr C.L.Hminga chu kum 91 mi te, K.T. Chungnunga te, Rev.C.Sangkama te, Rev. Sialngena kum 87 te, Rev. V.L.Zawnga kum 87 te a lar pawl an ni bawk. Salvation Army hruaitu Chianghnuna (87) te, Brig.Sapliana (103) te, Brig. Ngurliana (103) te, Brig.Vaikhuma (70) te kha an dam rei khawp mai. Seventh-day Adventist kohhran hruaitu Pastor L.Hmingliana (87) te pawh dam rei an tling. Tuna la dam Pastor T.Lalauva te, Pastor H.Lalengliana te, Pastor R.Laltawna te, Pastor Lalhluna te hi kum 90 bawr vel an ni. Anniho zingah hian tute hi nge vegetarian phei chu ka hre lo.

Khawvela dam rei zual bik, kum 110 aia rei dam super centenarian an tihho zingah vegetarian an awm mang lo. Kristian tan chuan mihring nun tluang pangngai, Pathian tih mi nih hi dam reina a ni ber. Sa ei leh ei loh lam a ni lo. Kristian ni ve si, awm tha duh hauh lo, nu leh pate thu pawh awih lo, ruihhlo tihching tak mai leh nun pawlawh takte hi an dam rei lo tlangpui. Dam rei pangngai nih duh chuan Pathian thu awih nun tha pangngaia nun hi a pawimawh hle a ni.