HERODA LIANA

Bethlehem Nausen Rawttu Heroda Liana

Krismas apianga kan sawi rik tel ve deuh ziah chu Isua avanga nausen mipa kum hnih hnuai lam rawt chimit vektu lal Heroda chanchin kha a ni.

            Heroda kha Judai rama lal ni mah se Juda mi a ni lo. BC 73 khan Idumai hnam Antipera leh Arab lal fanu, Jordan lui chhak lam Nabatea rama Petra-a mi Cypros-i te inkarah a lo piang a ni. A pa Antipater chuan BC 47 khan kum 25 mi lek a nih laiin Galili ram bial governor-ah a dah a. BC 43-ah a pa chu tura hraihlum a ni a. A pa thih hnu-ah a unaute nen a pa aiawhtu nih an inchuh a, chumi rual chuan Rome sawrkar tihlungawi a ngai bawk si a. Chung hun lai chu hun harsa tak a ni.  BC 40 khan Parthian-hovin Syria leh Palestina ram chu rawn runin Jerusalem pawh an la a. Chutih laia Jerusalem awptu Heroda unaupa chu an man a, a hnu lawkah a intihlum ta nghe nghe a ni. Heroda pawh Rome-ah a tlanchhia a. Jerusalem-ah chuan Hasmonean lalram a lo ding a, Antigonous-a chu a lal ta a ni.

            Rome khawpuia Heroda tlanchhia chu Octavian-a leh Mark Antony-a ten an lo pui a. Rome Senate hnenah sawipuiin Heroda chu Judai ram lal atan an lo nemnghet a. Mahse chu chuan a harsatna chu a sukiang mai lo. Parthian-ho leh an lal Antigonous-a te chu dah bo an la ngai. Chumi tur chuan Mark Antony-a chu tirh a ni a; ani chuan Parthian-ho chu Euphrates lui chhak lam thlengin a han um chho va. Chutih laiin Heroda chuan Roman general Gaius Sosius-a tanpuinain BC 37 khan Jerusalem chu a la a, tichuan Rome sawrkar hnuaiah Jerusalem chu a thut ta a. Herod chuan Jerusalema Juda puithiam 45, Sanhedrin member-te chu Antigonus-a tantu an ni tiin a tihlum a. Kum 33 zet ro a rel ta a ni.

            Heng hun lai vel tho hian Rome ramah Octavian-a leh Mark Antony-a te chu lal zawk inchuhin an indo ta a. A tir chuan Heroda hian Antony-a hi a pui nghe nghe a ni. Mahse Antony-a chu BC 31 khan a nupui Aigupta lalnu Cleaopatra VII nen an tlawm a, an intihlum ta si a. Heroda mangang chuan zah theih loh chhuahin Octavian-a chu Grik thliarkar pakhat Rhodes-a a awm chu va um zuiin a lallukhum chu a ke bulah a theh thla a. Octavian-a hnenah chuan, “Khawi lamah nge ka tan tih ngaihtuah lovin eng ang thian nge ka nih hi chhut zawk rawh,”tiin a va tlawn leh chiam mai a. Octavian-a lah chuan a aiawha mi dang lal tur zawn buai leh aiah a lo ngaidam ve mai bawk a. Tichuan Judai ram leh a chhehvela Rome sawrkar aiawh turin a dah nghet ta zel a ni. Octavian-a chuan Augusta Kaisara intiin Rome-ah ro a rel a. Jerusalem-ah a aiawhin Heroda a lal bawk a. Kaisara chu Judai rama Heroda lalramah chuan a rawn inrawlh miah lo tih theih a ni. Chuvangin Heroda hi Rome hnuaia lal mah ni se hotu nei lo ang chiahin a lal a; a lal pawh a kha ta viau reng a ni..

            Heroda lal lai hian ral a muang a, ram dang atanga amah han tibuai thei tur an awm loh bakah Rome sawrkar chuan a chhan tlat dawn tih a hria a, chuvangin tualchhunga hman tur pawisa pawh a ngah phah a, mipui hnenah chhiah pawh a tuk sang lutuk lo. Rome sawrkarah chhiah chawi tura tih a ni chiah lo chungin thilpêk tam tak a pe a. BC 30-ah chuan Hasmoneon leh Cleopatra-te ram awp chin chu a chhuhsak vek tawh a ni.

A lalna a han sawh nghet ta maw tih veleh ropui zual zel duhin in ropui tak tak a sa a. Jerusalem temple a sak that leh phei chu Solomona hun laia an sak ai khan a lian zawk daih niin an sawi. Tin, Athens khawpuia Olympic tihlar zual zel nana tanpuina a pek chuan chutih laia Mediterranean chheh velah chuan Judai ram chu a tilar hle. Puithiam chi bik ni tura an dan siam dinglai chu a tidanglam a, hnam hrang hrang lakah that a chhuah viau bawk. Juda mi diktak a nih lohna chuan engemaw hlekah rinhleh a tikai hma a, tin, Juda-ho pawhin puithiamte a thahsak teuh avangin an haw hle bawk. A mipuite chu tirethei viau mah se a chunga mite tlawn lungawi dan erawh chu thiam tak a ni.

            Heroda in ropui tak tak sakte hian hna thawh tur tam tak a siam a, ram pawhin ei leh barah a thatpui nia ngaih a ni. Rome sawrkar tihlawmna ni pahfawmin Kaisari lawngchawlhna ropui tak a sa a. Chumi rual chuan hetia in ropui tak tak a sa hi hun reiah an thatpui tak tak em tih chu inhnial theih tak a ni bawk. Kulh tam tak a siam that bakah sumdawn nan lawng chawlhna a siam a. Jerusalem khaw pawn hla deuh hlekah Heroda kulh ropui tak a sa bawk. Hmun hmingthang Masada pawh hi ama din a ni.

            A lal chhung hian ram dang atanga tibuaitu awm lutuk lo mah se an chhungkua erawh chu buainain a chim reng tih theih a ni. BC 29 khan a nupui duhtak Mariamne-i, a hmangaih em em mai chu a thikthu chhe lutuk thinrim phutin a tihlum a. A lungleng leh si chuan hrehawm a ti em em mai a ni. Heroda hi a nun a rawn em avangin a nupui Mariamne-i hian a hmangaih ve thei lo va. Chuvang chuan Heroda thikthu hi a chhe hle; a zin chhuah apiangin a zinna-ah a lo thi palh a nih pawhin in lama a nupui chu tihlum ve nghal turin thupek a hnutchhiah ziah a ni an ti. Heroda chuan Miraimne-i nena an fa mipa pahnih Alexander leh Aristobulus te chuan an nu phuba lak tumah leh a lalthutthleng chhuhsak tuma phiarru ni tlatin a hria a. A fapate pahnih ep tur hian a nupui hmasa ber Doris-i laka a fa, a hnawhchhuah tawh Antipater-a chu a hruai haw leh a. Mahse Antipater-a hian a pa Heroda hi huat namen lohin a haw thung. Tichuan an pafa chuan inthurualin Alexander-a leh Aristobulus-a chu BC 7 khan an tihlum ta a ni. Heroda hian amah vengtu bik sipai 2,000 bakah enthlatu engemaw zat a nei.

A Nupuite

            Heroda hian nupui a nei nual. A nupui hmasa ber chu Doris-i a ni a, ani nen hian fapa Antipater II an nei a. Doris-i hi amah Heroda thih hma lawk BC 4 vel khan tihhlum a ni. A nupui pakhat Mariamne I chu kan sawi tawh kha a ni. Ani nen hian fapa pahnih leh fanu pahnih Salampsio leh Cypros an nei. A nupui dang Mariamne II chu puithiam lalber Simon-a fanu a ni a. Ani nen hian fapa pakhat Herod II an nei a. A nupui dang Malthace-i nen khan fapa pahnih Herod Archelaus leh Herod Antipas leh fanu pakhat Olympias an nei. Jerusalem nu Cleopatra nen Fapa Philip-a leh Herod an nei a. Pallas-i nen fapa Phasael an nei a. Phaidra-i nen fanu Roxanne an nei. Elpis-i nen fanu bawk Salome an nei a. Heng bakah hian a unau (a cousin) pahnih nupuiah a nei bawk a. Mahse heng mite lakah hian fa a neih awm hriat a ni lo.

            Antipatera hian Juda-ho thlawp a hlawh hle naa chu ringawt chu a duh tawk hauh lo. A pa Heroda chu thah dan a ngaihtuah ta a. A thurualpui, amah Heroda unaupa leh Heroda bula chaw ei fo Pheroras-a chu a pa hraihlum nan a hriat lohin tûr a paitir a. Mahse Pheroras-a hian a thil ken chu tûr a ni tih hre lovin a in hmasa a; a thih phah ta zawk a ni. Pherora chhiahhlawhte chuan an pu thih dan chu Heroda an hrilh a; ani chuan a fapa Antipater-a chu a tihlum ve leh ta bawk. Hetiang taka mahni fate pawh zuah lo a nih avang hian Rome emperor Augustus-a phei chuan ‘Heroda fapa nih aiin a vawk nih pawh a thlanawm zawk’ a ti hial a ni.

            A lalthutthleng hrim hrim chu sawh nghet angin lang mah se Heroda chu Juda-te leh Jentel-te inkarah chuan tuboh leh dolung inkara awm reng ang a ni. Juda-te tihlawm nan temple chu a sa tha a. Chutih rualin Rome sawrkar tihlawm nan engemaw a tih a ngai ve reng a; chu chuan harsatna a siam fo. Juda-te tihlawm nana temple a chei tha chuan milem reng reng siam a phal lo va. Temple chhunga thawk tur phei chuan puithiamte chauh a luhtir a, amah ngei pawh a lut miah lo. A sak zawh dawn tawh lamah erawh chuan a luhna gate bulah mupui lem a dahtir a. Chutia sakhaw dang pathian Apollo leh Baal lim a din chu Juda-ho chuan mi verther takah an ngaih phah a ni. A temple sak mawizia hi khatih laia Rome ram pumah khan a thang chhuak a. “Heroda in sak la hmu lo chuan thil mawi an la hmu lo tihna a ni,” an ti thin. Grik tihdan a la lutuk te, advisor atana a ruai te leh Grik thusawi thiam a khawite chu Juda-te chuan an ngaithei lo hle a. Juda aia Grik ngaisang zawk leh duhsak zawkah an dah phah a ni.

            Hetianga miin a lalthutthleng an chuhpui ang tih hlau reng renga ama fate ngei pawh a tihhlum duh hial lai hian khawchhak mi fingte khan lal thar tur a piang tih an rawn hrilh leh ta hlauh mai a. Lalthutthleng hum duha mahni fate ngei pawh that hnial lo tan chuan mut tuina chi a ni ta lo. Tichuan Bethlehem khuaa nausen mipa kum hnih hnuai lam zawng zawng tihhlum vek tur thu chu a chhuah leh ta a ni (Matthaia 2:16). Heroda chanchin ziahna dangah Bethlehema nausen a rawt thu hi sawi a awm miah lo va. Mi thiam thenkhat ngaihdan chuan khatih lai khan Bethlehem khua kha khaw te reuh tê a ni a. Nausen mipa kum hnih hnuai lam chu sawmhnih lo liam an awm a rinawm chiah lo va, chuvangin a nausen rawt hi a lar tham lo a ni ang an ti.

            Heroda hi Juda mi diktak ni lovin Idumai mi, Juda sakhuaa inlet a ni kan tih tawh kha. A nihna hre reng hian Juda mite chu tihlawm a tum hle a. Ram pawn lama Juda awmte thlavang pawh a hauh thiamin a hun lai hian chhiahte pawh a tihniam thin a. A bikin Sadukai-hote phei chu a lamah an tang hman viau niin an sawi. Judate duhzawng nia a hriat eng engemaw a ti ve fo ni awm tak a ni. Amaherawhchu chuti chung chuan Juda-te nen chuan an inring tawn tak tak thei lo a ni ber mai. A lo upat tak deuh hnu chuan Fairisai-hote nen an inngeih ta mang lo va. BC 6-ah khan Messia lo pian hun hun chu Heroda lal tawpna ni a ni ang ti thu puangtu Farisai engemaw zat a tihhlumtir a. Isua pian lai bawr vel (ti mai ang aw) BC 4 khan Heroda Temple luhna sekawtrawlh chunga mupui lem intar voh mai chu Torah zirlaiten an chhu chhia a. Heroda thinur chuan an hotu thenkhat nen zirlai 40 zet a tihlum a. Hetihlai vel tho, (kum hnih khat chuan a inthlau mahna) hi Bethlehem khuaa nausen mipa kum hnih hnuai lam a rawttir chiam lai kha a ni maithei.

            Nausen a râwt hnu lawk hian natna râpthlak tak mai tuarin Jeriko khua-ah a thi a. A thi tur na tuar hi a râpthlâk hle niin an sawi. Josephus-a sawi dan phei chuan a na tuar hrehawm ti lutuk chu inthhlum te a tum hial a ni. A damchhung zawng khan depression a vei bakah rilru natna chikhat, mi dang rinhlelhnain a khat tlat bawk. A thih dawn hnaih chuan Archelaus-a chu a aiawha Judai ram te, Samari te leh Idumai ram te awp turin a ti a. A unaupa Antipas-a chu Galilee leh Repea awp turin a ti a, A fapa Philip-a chu Galilee dil chhak lam awp turin a ti bawk. Tin, a thih veleh a sipaite chu Jerusalem ennawm chhuahna hmuna Judai ram mi challang deuh deuhho hruai khawma that ve nghal turin thu a pe lawk diam a. Hei hi a chhan chu tumahin amah kha an tah dawn lovin a hria a, mahse a thih avanga tute emaw an tah ve hrim hrim kha a duh vang a ni. Mahse he a thupek hi tihpuitlin a ni ta lo. A thih thu han thang ta chu a fapa Philip-a chu lawmin a lâm chiam niin an sawi a. Mipui pawh an lawm hle a ni.

            Lal nunrawng hmingthang Heroda hi BC 4, March thla tawp lam emaw, April thla tir lam emaw vela thi niin hriat a ni a. A thih hian kum 69 a upa a ni.

Note: AD hi kum hma lamah an dah a. BC chu kum hnung lamah dah a ni thin. Hetiangin “AD 1967,”  “1967 BC” tiin. Mahse Mizo tawng ziah hi chuan ka bawhchhe lui thin a. Kum AD 1967, BC 1967 tiin ka ziak a. Chhiar a nuam bik khawp mai.