NI RAMRIA SABBATH BUAINA

Ni Ramri leh Sabbath Harsatna

            Ni Ramri (International Dateline) hian Sabbath serh chungchanga harsatna a siam leh siam loh hi inhnialna a awm ve reng a. He inhnialna hi a changin han zia-awm deuh mahse sawi chhuak tawk an awm ve reng a, an la awm zel ang tih pawh a hriat lawk theih. Chuvangin Mizo Tawnga mi ziah zen zen loh he inhnialna tawp thei lo thupui lo ziak hmasatu nih pawh hi a Tha ve tho ve.

Ni Ramri Chu Eng Nge?

            International Date Line (IDL), Mizovin Ni ramri kan ti mai chu ngaihruatnaa khawchhak leh khawthlang inThenna ramri kham, Greenwich meridian aTanga khawchhak lam hla tak Pacific tuipuia chhim leh hmar zawnga ngil taka degree 180-ah chiah inkham anga ngaih a ni a. Hmun Thenkhatah erawh chuan a paltlang ramte tana remchang zawk turah ngaiin her sawn hret hret a ni thung. Hmar lam Wrangel thlirkar aTanga rawn kalin Chukchi Peninsula-ah a kawi a, Bering Strait rawn paltlangin Diomede thliarkar te, St Lawrence thliarkar te, Matthew thliarkar te a rawn paltlang a. Chutah Aleutian thliarkar (USA) leh Commander thliarkar (Russia) inkarah a rawn chhuk a. Tichuan Russia ram zawng zawng chu IDL thlang lamah an dah ta vek a. Tichuan USA chu Guam, NothernMariana leh Wake thliarkar tih loh IDL chhak lamah vek a awm ta a ni. Tichuan IDL chu Equator a rawn thlen hma zawng chu degree 180-ah a rawn phei zel a. Mihring awm lohna thliarkar pahnih Howland thliarkar leh Baker thliarkar te chu ni khata darkar 24 hmang tlai ber an ni (UTC-12 hour).

            Hemi hnu hian IDL chu Kiribati thliarkar han huap turin khawchhak lamah f^n chho ta vak a, Kiribati thliarkar zinga a chhak ber chu 150 W meridian-ah a han pawh a. Tichuan Kine thliarkar leh Hawaii thliarkar te hi ni inTanna tak tak, khawvela ni chhuah hmasak berna ram kan tih chu an ni ta a ni. IDL chu khawthlang lam hawiin a rawn chhuk leh a, mahse degree 180 chhak lamah zel kalin Samoa leh American Samoa inkarah a rawn chhuk a. Tichuan 165⁰ W meridian-ah kalin Samoa, Tokelau, Wallis and Futuna, Fiji, Tonga, Tuvalu leh New Zealand thliarkar pakhat Kermadec Islands leh Chatham Islands te chu IDL thlang lamah awmin ni thunhmun an hmang a. American Samoa, Cook Islands, Niue, leh French Polynesia te chu IDL chhak lamah an awmin ni khatin an tlai ta zel a. Tichuan IDL chu khawthlang lam hawia kal chhukin degree 180 chu chhim tawp thleng ngil takin a zawh ta a ni.

            Heng Pacific tuifinriat thliarkar, IDL zawna awmte hian ni thuhmun reng si kha khawchhak leh khawrthlang an zawm dana zirin an koh dan a inang ta lo va. Chu chu he thu kan han ziahna chhan tur pawh hi a ni. Entirnan, IDL thlang lama awm Samoa, Tokelau, Wallis, Fiji, Tonga, Tuvalu leh New Zealand ten Sabbath an hman kha IDL chhak lama awm American Samoa, Cook Island, Niue, French Polynesia te tan chuan Zirtawpni a ni tlat. Fiji rama i inkhawm banah Samoa va kal la, anni chuan Zirtawpni alawm tiin hna an lo thawk mup mup ang. An ni fang hman chu a thuhmun reng si. Fiji rama chawlhni thianghlim tak kha Samoa-ah chuan a lo thianghlim hauh lo tihna a ni.

International Date Line Chhehvela Awmte An Lo Insiam Rem Tawh Dan

            Philippines (1521 leh 1844): Phillipines ram hi kum 1521 March thla-ah Ferdinand Magelland-an a hmu chhuak a. Kum 1565-ah Spain chuan Phillipines hi a awp nghet Tan a. An governor-general hmasa ber chu Miguel López de Legazpi (1502-1572) a ni. Kum 1564-ah Mexico lawngchawlhna Acapulco a chhuahsan a. April 1565-ah Phillipines thliarkar chhim lama khawpui pakhat Cedu an tih tak hi a thleng a. Kum 1570-ah Manila khawpui hi an thleng leh a. Tichuan Asia khawchhak lama Spain sumdawnna khaw pawimawh takah an siam ta a ni.  

Europe ramten Asia ram hrang hrang an han awp khan an rawn chhuahna rama an ni hman ang ang kha an ram awpte hnenah chuan an zawmtir Thin. Dutch te, English te, Portugues te, France te chu Cape of Good Hope kaltlangin khawchhak lama an kal a. Tichuan an ram awpte chu Europe an awm laia an ni hman chhiar zawmin ni an tuksak zel a. Spain ram erawh chuan Pacific tuipui tliarkara a ram awpte chu khawthlang lam South America leh Mexico ram aTanga awpin heng lai rama an hun hman ang chuan Asia chhak lama a ram awpte chu ni a hmanpui bawk a. Tichuan Spain ram awpte ni (day) hman leh Europe ram dang awp ramte ni (day) hman chu Ni chhuak inang rengah a danglam ta a nih chu. Entirnan Spain awp Phillipines rama Sabbath kha chumi ni (day) vek hmangtu Europe ram dangte awpah chuan Sunday a ni.

Phillipines chu rei tak Spain-in a awp avangin Mexico rama Acapulco nen inzawm tlat an ni a. Chuvangin Pacific tuipui thlang lam kila awm mah nise IDL chhak lamah an indah tlat a. Kum 1521 aTanga 1844 thleng khan Phillipine ram hi a Thenawm ramte aiin ni khatin a tlai zel tihna a ni. Entirnan, Indonesia leh Korea rama Chawlhni an hman laih laih lai khan chumi ni vêk chuan Phillipino-ho chuan Zirtawpni an hmang ve chauh tihna a ni. Kum 1821-a Spain aTanga Mexico a indan hnu khan Phillipine ram chuan a Thenawm ramte chu sumdawnna lamah a thurualpui Tan ta a. Tichuan kum 1844 December 31 Thawhlehni chu nuai bovin ni khat chu a paih ta a. Chumi chawlhkar aTang chuan kum danga Zirtawpni kha Chawlhni a lo ni ta tihna a nih chu. Mexico ram kha indang lo se chuan Phillipine rama Adventist-ho chawlhni chu tuna an Zirtawpni khi a ni dawn tihna a ni a. Uluk taka serhin Sunday serhtute chu sakawlh hnungzuitu an ti ang a. Sunday serhtute pawhin Sabbath serhtute chu Juda sakhaw zawmtute tiin a thawhlehna ni chu an inti-serh Tha viau maithei bawk.  A nihna takah chuan Phillipine rama Isua thawhlehna ni tih leh Sabbath ni tihte pawh khi sawrkar tihdanglam tawh hnu, mihring siam mai an nihna lai a awm a nih chu (chutiang zawnga sawi nêp duh t^n chuan).

Alaska (1740s and 1867):   North America hmar thlanga US state pakhat Alaska chu kum 1867 khan USA chuan Russia hnen aTangin a lei a. A neitu nihna an inhlan ni chu Julian calendar hmangtu Russia palai, Russia ram aTanga lo kal chuan an ram calendar hman lai zuiin kum 1867 October 7, Saturday tiin a chhinchhiah a. Gregorian Calendar hmangtu USA aTanga palai lo kal ve thung chuan an ram calendar zuiin kum 1867 October 18, Friday angin a chhinchhiah ve thung. Russia palai kha Adventist pa chu ni se hemi nia inhlan hi a duh hauhin a rinawm loh a. A tuk Sunday-a sawn a rawt maithei a ni. American pa kha Adventist tho ni se a tan chuan Zirtawp a nih dawn avangin a tuk Sabbath (Russian pa tana Sunday)-a sawn chu a duh hauh lovang. Alaska chuan USA time zone an hmang zui ta a ni.

Samoan Islands leh Tokelau (1892 leh 2011): Samoa thliarkarte hi tunah chuan Samoa tih leh American Samoa tia Thenhran an ni. Heng thliarkarte hi kum 1892 hma lam zawng kha chuan IDL thlang lamah an awm Thin a. Mahse an lal Malietoa Laupepa kha American sumdawnghovin American date hmang turin an thlêm a, tichuan kum 1892 July 4, American independence day kha hmang nawnin ni khat an belh ta a. Hei hi California local time aiin darkar thum chauhin a tlai nghe nghe a ni.

            Kum 2011 khan Samoa sawrkar chuan Australia leh New Zealand te chu a sumdawnpui berte an nih avangin heng ram pahnihte ni hman anga kal a, a ni hman dan chu thl^k a tum ta thut mai a. Chumi kum December 30 Zirtawpni chu a paih a, Saturday a lo ni ta daih mai a ni. Tokelau thliarkar chu New Zealand ta a ni a. A bungraw thiar velna zawng zawng chu Samoa leh American Samoa kaltlang a nih avangin Samoa sawrkar hnung chu a rawn zui ve ta nghal bawk.

Kwajalein (c. 1945 leh 1993): Indopui pahnihna lai khan he thliarkar hian America lam awnin America tihdan a zui a. Mahse kum 1993 August 21, Saturday kha paihin a chheh vel thliarkarho ni hman ang chu a hmang ve ta bawk.

Eastern Kiribati (1995): Kum 1995 khan Eastern Kiribati pawh a insiam rem a. January 1, 1995 kha Sunday –ah Tanin a insiam Tha a ni.

Sakhua A Nghawng Dan

            Heng IDL paltlang rama kohhrante hi sawrkar date thl^k vel hian a chawk buaiin kohhrante pawh a nghawng thui thei hle. A bikin uar taka chawlhni thianghlimna sawi Thin Sabbath serhtute a tibuai lehzual. Tun hmain Kellogg-a te, Butz-a te leh Hilliard-a te pawhin Tonga thliarkarah hian eng ber nge Sabbath ni-ah pawm tur tih thu hi inhnial nan an lo hmang tawh a. Pitcairn thliarkara mi te chu 180⁰ meridian ang khan an insiam rem mai a. Mahse Samoa leh Tonga thliarkara missionary awmte erawh chuan Western Hemisphere mite Sabbath an serh a, chumi ni vek chu Tonga thliarkar Thenkhata Adventist-ho chuan New Zaland leh Australia date zawmin Sunday ni-ah an lo hmang daih thung.

            John N.Andrews-a chuan The Definitive Seventh Day (1871) tih lehkha chhuahin Bering Strait chu ni ramri khamna diktaka hman tur nia a ngaih thu a ziak a. Hetiang ang hi a nih chuan Tonga rama Adventist-te chuan Sabbath dik lo an lo serh ve char char tihna a ni. Kum 1884 khan IDL chungchangah hian khawvel pum huap inkhawmpui lian koh a ni a. Mahni remchan dan anga IDL hi sawn hret hret theihah an puang a ni.

            Tonga rama missionary-te chuan Tahiti, Australia leh USA-a kohhran hruaitute bakah Ellen G.White-i hnenah engtia tihtur nge tih an zawt a. An chhanna a inang lo hlawm khawp mai. Ellen G.White-i chuan kum 1901-ah hetiang lam hawi hian Kellogg-a hnenah lehkha a thawn a. He ni ramri chungchanga buaina hi ani lo inrawlhna tur a ni lo a ti ringawt a. An zawhna chu a chhang bik lo. Hun leh thil awm danin a nawr nasat em avangin Tonga Adventist-te chuan Sunday chu Sabbath angin an hmang ve ta mai a ni. Kum 1995 khan Kiribati chuan ni khat paihin an time zone an siam rem a. Sawrkar ni tihdanglam zawm duh lo Adventist-te chuan Sunday an serh a lo Tul ve leh ta bawk. Tichuan Kiribati leh Tonga-ah chuan Sunday serh leh Sabbath serhte inkhawm ni a inang a nih chu.

            Kum 2011 December thla khan Samoa sawrkar chuan a sumdawnpui New Zealand leh Australia ramte anga ni hman duhin an time zone an thl^k a. December 29, Ningani an hman zawhah Zirtawpni, December 30 chu an paih a, Inrinni (Saturday), ni 31-ah an kai ta dawrh mai a ni. Samoa rama Adventist kohhran hi Samoa-Tokelau Mission hnuaia awm a ni a. Anni chuan an kum 2012 August thla-ah Samoa rama Seventh-day Adventist -te chuan sawrkar ni paih chu a Pathian thu love tiin Sabbath ni chu a hm^a an ni hman hun pangngaia hman an rêl ta a. Tichuan Sunday leh Sabbath chu a lo inrual ta tihna a ni ta a.  Amaherawhchu tuna an pawm loh sawrkar ni thar, Saturday lo ni ta hi kum 1892 hma lam zawnga Sabbath tho kha a ni a. Tuna an pawm, thianghlim em ema an hriat hi kum 1892 hma lama Sunday kha a ni bawk a. A khawi zawk hi nge Pathianin mal a sawm tak tih chu inhnial theih tak a nih avangin an inhnial ta fo va, an buai ta reng a ni.  

            Kohhran member Thenkhat chuan sawrkar thu zawm mai kha a pawina an hre lo va. Mahse chawlhkar nite hi sawrkar tihdanglam mai mai theih a ni lo; Pathian thu a ni ti pawl an awm bawk a. Mahse chutianga sawrkar thuneihna a ni lo tituten ni dik zawka an ngaih pawh chu kum 1892-a sawrkar tihdanglam tho chu a ni lawi si a ni.

            Samoa Adventist-ten uluk em ema Sabbath an serh chu an piah lawk New Zealand-ah chuan Sunday a ni a, chuta awm Adventist mite chuan hna an thawk leh suau suau tawh a ni. Samoa leh American Samoa te chu ram inhnaih tê, ni chhuak leh tla pawh minute thum leka inthlau an ni a. American Samoa rama Adventist-ten uluk taka an serh Sabbath chu Samoa rama Adventist-te chuan Zirtawpni atan an lo hmang ve thung.

            He buaina hi GC lamah thlen a ni a; anni pawhin tihngaihna hre lovin Pacific Region hruaitute hnenah lo ngaihtuah Tha leh turin an thawnkir ringawt mai a ni. Tin, kohhran chhunga buaina ringawt hi chu thuhran a ni a, p^wn lam miten Sabbath sawichhiatna remchangah an hmang tlat hi heng lai rama Adventist-te awm tinuam lotu chu a ni bawk. An region hotu pakhat phei chuan a hring a hrana Pathian khi a rawn inrawlh lo a nih chuan an buaina chu mihring tan chin fel ngaihna a awm tawh lo ni hialin a sawi. American Samoa rama ni thianghlim em em kha Samoa ramah chuan Zirtawp a ni tlat mai si a; chu tak mai chu sawifiah harsa an tih fo chu a ni. Samoan community leader leh kohhran member Pa'u Fereti Puni sawi dan chuan he thu hian kohhran chu nuihza siamna-ah a lo chang ta a ni a ti.   

            Auckland Pastor Neone Okesene pawhin khhran hruaitute hnenah lehkha thawnin sawrkar thutlukna chuan kohhrante hi nuihzaburah min siam ta a ni a ti bawk.

            He thu, ni ramri leh a chhehvela Sabbath harsatna chungchangah hian South Pacific Division-a Biblical Research Committee chu Transpacific Union chuan an ngaihdante sawi a, thil en chiang turin an ngen a. Biblical Research Committee pawh chuan division chhung leh pawna Pathian thu thiam tak takte an rawn zau hle a. Pacific Islands Administrators Counsel-ah pawh sawi ho a ni. Tichuan Samoa Tokelau Mission (STM) Executive Committee  chuan South South Pacific Division (SPD) recomment angin Sabbath chu sawrkarin Ni a tihdanglam hma ang khan a pangngaia kal zel tur tiin thu a titlu ta a. Chumi awmzia chu kohhran pawl dang, sawrkar thu zawmtute nen khan chawlhni an hmang rual dawn tihna a ni.

            He thutlukna siam hi ralkhat aTanga “Ni mai rawh se,” va tihsak mai mai theih a ni lo. Executive Committee ngaihdan chuan Samoa leh American Samoa te chu ram hrang ni mah se hnam khat tho an nih avangin engemaw chenah American Samoa mite mitmei pawh ven loh theih a ni dawn lo a nih chu. American Samoa rama Adventis-ten Sunday an tih kha Samoa ramah chuan Sabbath a ni dawn tlat. Hnam khat, ram inhnaih tê, sakhaw pakhat vuan dun reng siin ni thuhmun an hmang hrang daih tur kha hriat thiam harsa tak tur a ni tlat. Mahni chhia leh Tha hriatna pawhin han ngaihtuah ila, Pago Pago thliarkara Adventist-ten Sabbath an serh laia a bul lawk Apia ram Adventist-ten sawrkarin Upolu leh Tutuila inkara Ni ramri a dah vang ringawta ni hrang an hmang tur leh hna thawhna nia an lo hmang tur chu a rem theiin an hre lo a ni. Chuvangin heng ram inhnaih tê têa Adventist-te hi chuan Sabbath thuhmun an hmang turah an ngai a nih chu.

            Tumah b^ng bik awm lovin 180⁰ meridian chhak lama Adventist-te chuan Western Hemisphere-a mite Sabbath hman chu lungrual taka hman Tawmin an inkhawm ve ziah a. Chutiang bawkin 180⁰ meridian thlang lama awm, Eastern Hemisphere-a mite pawhin rinawm takin an rama Sabbath chu an hmang ve mai bawk. Entirnan Tonga leh Samoa te hi lo en ila. Heng ram pahniha Adventist-te hian Sabbath an serh ve ve a. Tonga rama Sunday chu Samoa-ah chuan Sabbath a ni. Ni thuhmun chiah si kha an hman dan a hrang daih tihna a nih chu. Chutiang bawk chu Kiribati ramah pawh a ni: Khawthlang lam ni chhiar dan an hman zawk avangin Phoneix Island leh Line Island-a Adventist-ho chuan khawthlang lama ni sarihna kha Sabbath angin an hmang ve mai. Chutih lai vek chuan 180 meridian bul lawka awm khawchhak lam ni chhiar dan zuitu thliarkar Wallis leh Futuna mite chuan khawthlang lam Adventist-ho tana Sunday kha Sabbath angin an hmang ve mai bawk. Pacific thliarkar zinga 180⁰ meridian chhak lama awm, khawthlang lam ni chhiar dan ring daih si hi an la awm nual a, chungte chu Tonga, Niue, Wallis and Futuna, Samoa, American Samoa, Tokelau, Kiribati, Cook Islands, French Polynesia, Hawaii, Pitcairn te an ni. Tichuan heng thliarkara mite hian Sabbath chu rinawm takin anmahni awmna-ah Theuh an serh mai a nih chu.

 Judate Ngaihdan

             Judate ni chhiar danah chuan ni tlak aTanga ni tl^k leh thleng hi ni khat a ni a. Amaherawhchu tunlaia International Date line awmna hi a bul vela awmte khian an remchan dan angin an sawn leh zauh Thin a. Khawi lai tak tur nge tih hi sawi fak tak tak theih pawh a ni chiah lo. Chuvangin International Date Line hi Juda-te dan hnuaia Sabbath teh nan hman ngawt tur tihna a nih theih loh dan a awm. A tak takah chuan Juda sakhuaa halakhic danin ni khat rei zawng a sawi hi tunlaia kan Date Line hman nen hian thuhnum mah ni se inang diak diak tura beisei chi a ni lo. 

            Halakhic date line hi Juda-te chawlhni chu eng tik aTanga inTan tur nge tihah hian ngaihdan a inang thei lo va. Ngaihdan pakhatah chuan halakhic date line  hi a tak takah a awm lo an ti bawk. Ngaihdan Thenkhatte chu:

1.      90⁰ East of Jerusalem: Kum zabi 12-na laia Talmunic commentary pakhat Baal HaMeor-ah chuan ni chu Jerusalem aTanga khawchhak lam degree 90 vela hla, Jerusalem aia darkar ruk hm^ aTanga inTan tur ang deuhin a sawi a. Hei hi tunlaia 125.2⁰E zawn vel, Australia, Phillipines, China leh Russia paltlangtu khi a ni a. Hei hi Juda-te kum thar Rosh Hashanah chhut Tanna pawh a ni. Hei hi mi Thenkhat chuan Babylonian Talmud leh Jerusalem Talmud-ah pawh hian chiang vak lo chuan an sawi thawi bawk.

A hnu kum zabi 20-naa mi Chazon Ish-a pawhin hei hi an pawm mai a. Amaherawhchu a nihna ang tak taka he longitude rin hi ni Then hran nana hman a harsat dan erawh chu an hai hauh lo. Entirnan 125.2⁰E hian China rama Changun khaw khawthler pakhat Dongfeng an tih chu a tan tlang a. Khauh taka he longitude rin hi ni Then hran nana hman a nih chuan chawlhni dawnah miin kawtthler lehlam a va kai khan chawlhni a pumpelh zel thei dawn tihna a ni. Hemi dan nan hian Chazon Ish chuan 125.2⁰ hi tuifinriatah chuan ngil takin kal sela, khawmualah erawh chuan ram khatin ni khat an inTawm theih nan Asia khawchhak lamah leh Australia khawchhak lamah hel sela tiin a rawt a. Tichuan Russia, China leh Australia te chu date line thlang lamah an awm ta vek a. Sabbath thuhmun an hmang thei ta a ni. Japan, New Zealand leh Tasmania te erawh chu date line chhak lamah an awm avangin Russia leh China vela Sunday an hman laiin anni chuan sabbath an lo hmang dawn tihna a nih chu. Mahse he thlirna aTang hi chuan Indonesia leh Phillipines te chuan Sunday leh Saturday kha a rualin an nei thei dawn tihna a nih chu.

                2. 180 Degree East of Jerusalem: Rabbi Yechiel Michel Tucazinsky ngaihdan chuan International Date Line chu Jerusalem chhak lam 180 degree-a awm tur a ni. Hemi ang hi chuan date line chu tuna 180 degree-ah khian ni lovin 144.8⁰ W-ah a awm dawn tihna a ni ang. Hetiang a nih hi chuan International Date Line thlang lama awm, 144.8⁰ thlang lama awm Alaska, Hawaii leh Pacific tuipui thliarkar tam tam chuan anmahni Friday turah Sabbath an serh a Tul dawn tihna a ni.

3. Mid-Pacific. Thutlukna siamtu hrang hrangin Pacific tuipui lai tak, tuna date line kal mêk hnai takah khian kal turah an dah a. Hetiang a nih hi chuan Pacific tuipuia mihring tam deuh deuhna ram Japan, New Zealand, Alaska, Hawaii te ang chuan anmahni hunah chiah Sabbath an hmang a. Mihring tlêmna Pacific tuipui thliarkarte erawh chuan an local Sabbath kha an serh thei ta lo thung.

                Mahse hetiang dan fel tak hi Talmud lamah a awm lo niin Rabbi Menachem Mendel Kasher chuan a sawi thung. A ngaihdan chuan miin Sabbath a hriat chian loh chuan a Sabbath serh hnuhnun ber aTanga a ni hman ni sarihna kha Sabbath angah hmang mai rawh se. Chuvangin khawi hmuna mi pawh Juda lo awm nghet tawhin Sabbath atana an lo hman ngheh tawh chu Sabbath a ni mai.

                Ni ramri leh Sabbath chungchanga Juda-te buaina leh inhnialna  zawng zawng hi sawi sen mai pawh a ni lo va. Mipui nawlpui erawh chuan buaina em em nei lovin an awmna hmun Theuha Sabbath kha an hmang mai niin a lang. Chumi rual chuan international date line paltlang changa ni lo inthlak danglam ta daih Thin chuan Sabbath nia an tihtur engemaw chen kha a tibuai ve lo thei lo thung.

                Van Sangah: Israel mi zinga astronout hmasa ber, kum 2003-a Space Shuttle Columbia-a thlawk chhuak Ilan Ramon kha chuan an thlawh chhuahna Cape Canaveral aTanga chhiara a ni sarihna zel Sabbath atan a hman tur thu a sawi a. Amahrawhchu van sanga khawvel an hel lai khan ni tla leh chhuak a awm ve tak tak tawh lo va, leia Sabbath kan tih ang chiah kha chu a han hmang thei lo va. Ni tl^k aTanga ni tl^k leh thleng chhiar theih a ni lo.

                Juda kulmuk pawl Bnei HaMashalim-te ngaihdan chuan Sabbath hi Pathianin Israel fate hnena a pêk a nih avangin a pêkna ram Palestina, chutah pawh Jerusalem aTanga chhut turah an ngai a. Sabbath diktak chu Jerusalem khawpuia Zirtawpni Ni tl^k aTanga a tuk leh Ni tl^k leh thleng chhiar tur a ni a. Hei hi khawvel hmun danga mite pawhin an Tawm ve mai tur a ni.