JUDA NAWHCHIZUAR

Juda Nawhchizuar

Khawvelah hian hnam mak ber leh tlo ber thlang dawn ila Juda-ho khu mi tam tak chuan kan thlang ngeiin a rinawm. Khawvel hmun hrang hrangah awm darhin tihduhdahna tinreng an tuar a. Chuti chung chuan tumahin an dip ral zo lo a ni ber. An awmna ram apiangah a rethei ber leh hausa ber nih an kawp duh viau zel a, thiamna lamah nise subject tinah hnuhma an nei zel. Khawvel chawimawina sang ber tih ngam Nobel Prize pawh hi a hnam ang chuan an dawng tam ber mai thei a ni. Kum 2018 thleng khan Chemistry-ah mi 35 in an dawng tawh a, Medicine-ah 54, Physics-ah 54, Literature-ah 15, Economics-ah 29, Peace-ah 9 laiin an dawng tawh bawk. Theu-neu lo tak a ni. Nobel Prize dawng lem lo ziaktu ropui tak tak an la kuh tun bawk. Karl Max-a lehkhabu ziah avanga khawvel inlumleh nasatzia te hi hmuh hmaih chi a ni lo vang.

Sumdawnna lama an turuzia lah tlang hriat. Khawvel mi hausa billionaire za zela 11 hi Juda mi ni hialin an sawi. Chung zinga lar deuh deuhte chu Larry Ellison - $28 billion te, Sergey Brin -$17 billion te, Lawrence (Larry) Page - 17.5 billion te, Steven Ballmer - $14.5 billion te,  George Soros-$14 billion te, computer siamtu hmingthang Michael Dell - $13.5 billion te, Russia rama mi hausa pathumna Mikhail Fridman -  $12.7 billion te, John Paulson -  $12 billion te, Chelsea FC neitu Roman Abramovich - $11.2 billion te hi an ni. Facebook neitu Mark Zuckerberg pawh sawi hmaih chi a ni lo.

Politics lama hnuhma an hnutchhiah turuzia leh huhang an ngahzia pawh mi mak tih huai huai a ni.

Hetiang taka a tha lama an hmingthan lai hian mi sawi tam loh lam, nawhchizawrhna lama an inhman nasatzia leh an chet nasatzia lam hi i han sawi ve daih teh ang. A tha lamah leh a chhe lamah Juda-ho hi an hnam tlemzia ngaihtuah chuan an daihzai viau a ni.

A sei lutuk loh nan kum zabi 19-na atang khan rek buk phawt ila a tha awm e.

Sapramah industrial revolution a rawn chhuak a. Chu hmasawnna ropui tak mai leh chak tak mai chuan vantlang nun a nghawng nasa a. Chu chuan tun hma lama sumdawnna te reuh te, mimal thila innghat nawhchizawrhna chu sumdawnna lianpui maiah a rawn siam ve ta a. He industrial revolution hi mahni ram bik nei lo hnam vakvai Juda-ho bawkin a chhe lam zawngin an tuar nasa a. South America leh North America bakah India, China, Japan, Phillipine leh Europe khawmualpui ram hrang hrangah Juda hmeichheho chu nawhchizuar tura hralh kual an ni a. Kum 1900 bawr vel khan Sanghai khawpuiah khian Europe atangin nawhchizuar sanghnih chuang an chho va; chung zinga a zahve aia tam daih chu Juda mite an ni a; a bak chu French mi an ni. Heng Juda hmeichhe nawhchizuarhote hi Moscow leh Vladivostok atanga rela rawn kal an ni tlangpui a. French-ho erawh chu tuifinriatah lawnga rawn kal an ni deuh ber.

Kum 1902 khan London-a Jews Society pawhin Juda zinga nawhchizuar an tam thu hi an pha lo va. Hei hi hnam dang aia an nikhua loh bik hrim hrim vang ni lovin an retheih vang te, Europe ram tam takin Juda mite an hnawhchhuah vang te niin an sawi. Europe leh America rama chanchinbu mite lahin nawhchizawrh leh Juda mite chu thil thuhmun ang deuhthaw ten an lo chhuah a. Nawhchizawrh chu Juda mite sumdawnna lian ber ang hiala lo chhuah duh an awm bawk. Chutia han sawi takah chuan Juda mite zingah nawhchizawrhna lama inhmang hausa tak tak an lo kuh tul reng a. Chung zinga lar tak mai chu Sadie Solomon-i hi a ni. He Juda nu nasa zet mai hi kum 1914 chho khan New York khawpuiah pawh a ruka sumdawnna lamah a lar tawh a. Johannesburg, Rio de Janeiro, Buenos Aires, Panama leh Texas-ah te nawhchizawrhna hmunpui neiin a zin kual vel thin a. A hausa tawntaw hle niin an sawi. Amah lo pawh hetih lai hian Juda pachal Nathan Spieler te chuan New York mai bakah Shanghai, Constantinople, Bombay leg Singapore-ah te nawhchizawrhna hmun a nei a. Manila khawpuiah te pawh nei ngeia rin a ni.

Europe khawmualpuia tihduhdah tuar reng leh hmuhsitna tuar reng mai Juda-ho chuan America khawmualpui chu a chhim lam emaw, a hmar lam emaw pawh ni se pem châkawm tak niin an hria a. Chumi remchang hmang chuan nawhchizuara sumdawng Juda mi ngeite chuan an hnampui Juda nulate chu an hralh ta zung zung mai a ni.

Indopui pakhatna zawha League of Nations lo ding pawh khan nawhchizuar tam lutuk leh Juda hmeichhia nena hmehbel a ni fo mai chu an sawi ho nasa a. French hmeichhiate ang em chuan a mihringah tam lo mah se an hnam tlem ngaihtuaha an tam em avangin Juda-ho chuan an hmingchhiatpui tho tho mai. Kum 1930 chho velah khan League of Nations chuan nawhchizawrh leh tute hnam bil emaw hmehbel tlat chu tih tawh lo ni se an tihial a; heta an tum chu nawhchizawrh leh Juda mite hi hmehbel kher loh tur tihna a ni ber.

Juda-ho zinga nawhchizawrhna lam buaipuia bei nasa ber leh lar ber chu Poland rama Juda mite din Zwi Migdal an tihhote kha an ni. Anniho hi kum 1867 leh 1939 inkar kha an vanglai a ni a. Argentina, Brazil, Poland, South Africa leh United States-ah an che deuh ber. An vanglai chuan an pawl member hi sangkhat chuang an ni a. Khawvel hmun hrang hranga Juda hmeichhiate chu nawhchizuar turin an huikhawm a, an pawl dinna ram kan han sawi takahte khian an hralh kual vel ta thin a ni. He mite hian pawisak an nei lo va, an duhzawng tihlawhtling tur chuan tih hreh an nei lo. An huai em em bawk.

Zwi Migdal hian kum 1920 chho velah khan Argentina-ah ringawt pawh an agent mi 430 hmangin nawhchizawrhna hmun 2,000 an thunun a, nawhchizuar 30,000 an kawl bawk. He pawl inenkawl dan hi a khauh hle a. An inthunun tha a, an pawl lakah an rinawm viau bawk. Europe khawchhak lama tihduhdah tuar Juda hmeichhiate chu hna tha zawk pek tiamin an thlem kual a, tichuan nawhchizawrhna hmunpuiah an hralh ta mai thin a ni. A nih loh pawhin heng nawhchizuar vai khawmtu rufian an tihte hian Juda nulate chu nupui an han nei der a. Tichuan ram nuam zawk lam panpui niawm taka chhuahpuiin Argentina ram lamah te an pempui a. An hralh ta thin a ni. Nawhchizuar zingah anmahni dawrtute lo chhawn tha duh lo an awm chuan an vuak hrep loh leh hna hahthlak tak tak an thawhtir thin. Heng rufian-ho hian ‘sa dawr’ tiin nula an zawrhna dawr chu an sawi mai thin a. Hotel Palestina leh Café Parisienne an tihah chuan saruakin an nula zawrhte chu an kal kualtir a. A duh duhin an lo lei tawh mai thin a ni. Heng hmunte hi sawrkar miliante pawhin an tlawh fo naa a neitute chuan sum tam tham taka an tihlungawi tlat avangin tumahin an khap thei lo va, sawrkar pawhin a haider tlat a. Tihngaiha a vang hle. Buenos Aires-a nawhchizawrhna hmun 42 zinga 39 chu Juda mite ta a ni hial a ni.

Argentina rama Zwi Migdal chet chhiatna chhan leh an rem tak duakna chhan nia an sawi hi han sawi chhawng ila a tha awm e.

Kum 1922 October thla khan Hamburg, Germany atangin Juda nu pakhat Rachel Lea Liberman-i chuan a fapa naupang te te pahnih hruaiin a hma kuma kal tawh a pasal Jacob Farber-a, puan thuia ei zawng fin tumin Argentina ram chu an pan a. An lehkha inthawn atanga a lan danin Argentina ramah chuan beiseina sang tak an nei niin a lang.

Mahse vanduai thlak takin Jacob Farber-a chu a chhungte nena an inhmuh hnu kum khat lekah TB natnain a thi ta mai a. Rachel-i chu a buai ta map mai le. Argentina rama an tawng hman lar ber lah chu a thiam der si lo. A fapate pahnih enkawl ngai bawk si; thiam dang nei si lo chuan riltama thih aiah tiin Zwi Migdal hnuaiah nawhchizawrh ve mai chu a thlang ta a ni.

Kum rei tak Zwi Migdal hnuaia nawhchi a zawrh hnu chuan in te leiin khawsak pangngaia khawsak a, eizawnna kawng dang zawh a tum ta a. Chu veleh Zwi Migdal hotupa chuan duhsak hle ni awm takin mikhual tlangval zei deuh mai pakhat chu pasal atan a hualsak ta a. Mahse he tlangval hi nawhchizuar tur hmeichhe vaikhawma harlh thin, pawisak nei lo zet a lo ni a. An han innei ta chu nawhchizuar turin Rachel-i chu a tilui leh ta a ni.

Rachel-i chu a beidawng hle naa tlawm hlen mai a tum bik hauh lo. Thu awih awm taka nawhchi a han zuar leh chuan a rukin amah mantute leh chhawr luitute hek theihna tur finfiahna tha a lo dap ru ngar ngar a. A tawpah chuan chutih laia Argentina ram police officer huaisen leh dik Julio Alsogaray-a hnenah a finfiahna neih zawng zawng nen chuan a kal rawih mai a. Chutih laia roreltu hmingthang, Migdal-ho meuh pawhin an tham theih miah loh Dr Rodrigue Ocampo-a chuan uluk taka a zir hnu-ah kum 1930 September thla khan thutlukna a siam ta a. Migdal hruaitu 108 zet chu rei tak lung in tang turin a relsak a. Chumi hnu-ah mipui nawrna a nasat em avangin Migdal hnuaia thawk nawhchizuar hralh chingho chu a za rual tak meuh meuh lung inah khung lehin tam tak Uruguay ramah an hnawtchhuak bawk a. Kum 1930 chhovah chuan hmeichhe pakhat huaisen avangin Argentina rama Zwi Mughdal-ho chu an rem ti tih ta der mai a ni.

Brazil rama Juda tleirawl nawhchizuar lut hmasa ber chuan kum 1867-ah an lut a. Kum 1872 khan Brazil sawrkar chuan Juda nawhchizuar leh nawhchizawrhna lama inhnamhnawih thin mi engemaw zat chu a hnawtchhuak a; mahse a sawt vak lo. Poland ram atanga lo kal an tam avangin Brazil-ho chuan chung Juda nawhchizuarho chu hmusit takin ‘polacas’ tiin an ko.

Kum 1913 a lo thlen meuh chuan Rio de Janeiro khawpuiah ringawt pawh Zwi Migdal-ho chuan nawhchizawrhna hmun 431 an nei hman tawh a. Anmahni Juda mite tan pawha do tham leh buaipui fe tham an ni.

Amaherawhchu indopui pahnihna-ah khan Juda mite chu nasa taka nghaisak an nih bakah maktaduaih tel tak meuh meuh tihhlum an ni ta a. An tihhlum bangte chu khawvel ram hrang hrangah an tlanchhia a. Chu chuan nawhchizawrhna lama Juda sumdawng pawl Zwi Migdal angho hi a tichep ta em em mai a. Juda hmeichhe zingah nawhchi han zuar thar tur an awm ta lo bawk nen, an lo rawih chho ta tial tial a. Tin, anmahni Juda mite zingah heng nawhchizuar pawl dodal tlat leh bei ngar ngar hi an lo awm bawk nen, a nawlpuia misual rual an che ang kha chu a zia-awm chho ta a. Amaherawhchu kum 1948-a Israel ram thar a lo din tante kha chuan hnam dang aiin an sihhnip tak tak lo a nih pawhin Juda hmeichhiate chu sihhnip deuh anga ngaih an la ni ve reng thin.

Israel ram thar a lo ding nghet a;  sum leh pai lamah hma an sawn a, ram hausa tak an lo ni chho ta a. Tin, khawvel hmun dangah pawh tun hma anga hmuhsit leh endawng an hlawh ta bik lo va. An retheih lai leh hnam dang kara tihduhdah an tawrh lai ang kha chu a ni ta lo.