Pope VI-na Chanchin


               
“Tin, a lu pakhat chu thihpui khawp hiala hliam angin ka hmu a; nimahsela a thihpui khawp hial tura hliam chu a dam ta a, tichuan leia mi zawng zawngin sakawlh chu mak an ti a, an zui a.” Thup 13:3
Pius VI (1717-1799) hi a hming leh a chanchin hre lem lovin kan sawi zing hle mai a. Beng tihvar ve hrim hrim nan a chanchin tlem azawng i han sawi ang hmiang.
Pope VI hi a pian tirha a nu leh pate hming phuahsak chu Giovanni Angelo Braschi a ni. Kum 1717 khan Italy hmar lam Adriatic tuipui  aṭanga hla vak lo, Savio lui kama Cesena khua-ah a lo piang a. A pianna khua hi Italy ram nu huaisen Cia-i, Forlì khaw lal nupuiin Spanish Cardinal, Gil Álvarez Carrillo de Albornoz-a leh a thuihruai pope sipai laka a chhanhim kha a ni a, khaw upa tak leh lar ve tak, a khaw len loh ngaihtuaha chanchin ngah zet mai a ni. A khaw upat ngaihtuaha chanchin a ngah ang hu erawh chuan a khua hi a lian lo; tunah hian mihring nuaihkhat chuang awrh chauh an awm a ni. Mahse he khaw chanchin hi chu kan sawi thui lo vang. 
G.A. Braschi-a hi a naupan lai chanchin sawi tur a tam lo khawp mai. Mumal taka a chanchin kan chhui thui theih ber chu puithiama nemngheh a nih kum 1758-aṭang hian a ni deuh ber. Amarawhchu puithiam a nih hma pawh hian pope hnuaia kohhran inawpna office hrang hrangah a thawk kual tam hman hle tih erawh kan hre thei.
Amah hi a lo felin hnathawh thiam tak mai a ni a. Chuvangin a kaisang chak em em a ni. Puithiam a nih aṭanga rei vak lo kum 1766-ah Pope Clement XIII-na khan rorelna hmuna pawisa vawngtu-ah a ruat a. Kum 1773-ah Pope Clement XIV-an cardinal puitlingah a hlangkai leh a. Vanduaithlak takin Pope Clement XIV hi a dam rei ta lo va. A thih hnu hian kohhran hruaitute chuan a aiawh tur ngaihtuahin thla li zet hun an hmang a. A tawpah  kum 1775 February 15 khan Giovanni Angelo Braschi-a chu Pope Pius VI-na hming chawiin an thlang tling ta a. Tichuan kum zabi 18-na chhunga pope ni rei ber a lo ni ta a ni.
Pope a nih tirh hian Europe khawthlang lamah engemaw ti takin mi rilru-ah kohhran ngaihnepna leh ninna a rawn chhuak titih tlat mai a. A bikin France ramah a nasa zual ti ila a sual kher lo vang. Tunhma lama pope hovin an duh duha an hruai theih lal ṭhenkhat chuan tunhma ang khan pope thu chu a kawi angilin an zawm duh ta bik lo va. Hetihlai hian kohhran chhungah buaina dang neuh neuh a lo awm reng bawk si a, chuvangin Pope Pius VI hi pope vanduai tak a ni kan ti thei ang.
Kum 1781 October thla khan Holy Roman emperor Josehp II chuan ram siamṭhatna thupuan Edict of Toleration an tih chu a chhuah ut mai a. He thupêk ang hian Catholic mi leh sa ni lo, Lutheran, Calvinist, Orthodox te pawh kawng tam takah ngaihthiamna neih tur a ni a. Tin, Juda hote pawh an duh duha sumdawn an phalsak bakah university-a an zir phalsak an ni bawk a. A ngaihdan tak phei chuan a nu Mother Theresa-in Juda hote sakawlh ang dawn dawna a ngaihdan kha ni lovin Juda mite chu sawrkar tana mi ṭangkai tak an ni. 
Tin, Joseph II chuan Catholic puithiam awmna monastery ṭhenkhat, chhawr ṭangkaina awm lova a hriatte chu a ṭhiat bawk a. Kohhran ramri a chinglet nasa a. Seminary tam tak phei chu khar chiah lovin sawrkar thuhnuaiah a dah hmiah mai bawk a. Chu mai a la ni lo cheu; kohhran hunpui (festival) ṭhenkhatte pawh thil ṭhing tawh lutuk tiin a khap sak bawk a. Austria rama Catholic Kohhran chu pope thuhnuaia awm lova a sawrkar thuhnuaia awmtir vek dan a ngaihtuah hial a. Mahse hei erawh hi chu a puitlin ta chiah bik lo. Engpawhnise tunhma lalte chunga pope thuneihzia ngaihtuahin he thupek hi pope tan chuan na tak a ni.
He Edict of Toleration hi rin ang ngeiin Pope Pius VI chuan a duh lo em em mai a. Ralkhat aṭanga tawn ngawt pawh duh tawk lovin  kum 1782 khan Vienna khawpui chu a thupek sûttir tumin a tlawh a. Mahse a hlawhchham chiang hle a ni.
Europe ramah lal duh lohna thlipui a tleh na tual tual a. Chu chuan pope dinhmun pawh a tichak lovin mipui rilru-ah a lalna pawh zawi zawiin a hniam hret hret a. A bikin France ramah phei chuan an lal duh lohna boruak chuan a vawrtawp a thleng chho tak meuh meuh tawh a ni.
Kum 1789-ah France ram mipui rethei lutuk thinur chu an puakkeh ta nge nge a. Khawvel chanchin kal tawh kan chhiar apianga thawnthu ngaihnawm ber leh rapthlak ber pawl French Revolution chu a rawn alh chhuak ta phut mai a ni. French mipui thinur chuan an lal chhungkua leh an lamṭang nia an hriat tawh phawt mai chu an lu tansakin an râwt mang deuh thaw hial a. Sawrkar thar, Pathian leh kohhran tel lo sawrkar a lo piang ta a ni.
France rama mipui sawrkar lo piang ta chuan kohhran hausakzia leh ram neih zauzia chu a hai hlek lo va. Chuvangin kum 1790 aṭang phei chuan dan thar an siam a, kohhran ram leh sum chu an chhuhsak ta hmiah hmiah mai a ni. Chubakah sawrkar thar chuan France rama kohhrante chu tihluihnaa siamṭhat a tum bawk a. Heng thil avangte hian Vatican leh France sawrkar thar chu an inngeih thei ta lo a ni. A tir chuan Pope Pius VI hian thawm a nei lo viau a. Mahse March 10, 1791-ah chuan France rama helna leh an dan siam thar a dem thu chu na takin a puang ta a. France rama kohhran pawhin a phel phah ta reng bawk a ni.
Europe ram danga lal ṭhenkhat chuan France rama mipui sawrkar lo ding ta chu mita hmawlhte awm ang maiin an ngaimawh hlawm a. Tichuan kum 1793 khan chung lal intiam rualte chuan France sawrkar chu an do ta hlawm a. Hei hi pope pawh hian ṭha tiin France sawrkar dotu ṭangrual pawl chu a thlawp hle a;  innghahna tlakah ngaiin a ngaih pawh a ṭha hle a ni.
Mahse France sawrkar hian Napoleana a nei miau va; indona-ah tangrual pawl an che fuh hlei thei ta lo. Kum 1796-ah phei chuan Austria sipai chhuanvawr ho chu Napoleana sipaite chuan an tudawl a, Italy ram, pope lalna ram ngei mai chu an rawn rûn ta mai a. Napoleana chu tuman ngam hek lo, Pope Pius VI chu February 19, 1797 khan Tolentino-ah remna a ziah luih tir a. Lung inah a khung lo chauh a ni.
Italy ramah pawh hetihlai hian mipui an lungawi lo nasa tawh hle a. Chu bakah Italy ram pum chu inzawmkhawm duhna thlipuiin a nuai nasa mai bawk a. Hemi kum 1797 December thla hian Rome khawpui-ah buaina chu a rawn alh chhuak leh ta phut mai a. Heta helho ṭanpui tur leh Italy ram awm tur hian Napoleana chuan a General chhuanvawr Louis Alexandre Barthier-a chu  a tir leh ta a. February 15, 1798 khan General Bethier-a chuan Rome khawpui a lût a. A thurualpui Italian hote nen Rome chu lal bik nei lo Republic sawrkarah an puang a. Pope leh a rorel puite chu Rome khua aṭangin a hnawt chhuak vek bawk a.
Pope Pius VI  chu inpe tur leh a thuneihna hlip turin an vau a. Mahse chuti maiin Pope chuan inpêk a tum lo.  General Berthier-a thinur chuan Pope chu a man a, Italy ram laili Florence khawpui  chhak mel za vela hlaa khaw lian vak lo, (tunah hian Aizawl mihring zahve vel chauh an awm) Siena khua-ah a tantir phawt a. Chumi hnu-ah lungawi mai lovin France ramah an hruai thla leh a. France chhim chhak Rhone luikam vei lam ruama thei leh thlai dehchhuahna hmunpui, hmanlai Saint-Apollinaire biak in hmingthang  awmna, lunghlu lama sumdawnna hmunpui ni bawk  Valencia khaw lung inah a khung a. Hetah hian putar kum 82 mi niin Pope Pius VI-na chu kum 1799 khan a zu tar thi ta a ni.
Pope Pius VI thih hnu hian a laichin hnai tho Luigi Barbana Gregorio Chiaramonti(b. Aug. 14, 1742--d. Aug.20,1823,), Pius VI-a pianna Cesena khuaa piang ve bawk chu kum 1800 khan Pius VII-na hming chawiin pope atan thlan a ni a. A chanchin hi kan sawi tam lovang.
Pius VII chuan French sawrkar leh Catholic Church(papacy) inkara inhriat thiam lohna thui tak awm tawh chu siamṭhat a tum hle. Kum 1804 khan Napolean-a chu lallukhum a khum tir a.(A dik tak chuan Napoleana hian Pope kuta lallukhum chu lâksakin amah leh amah a inkhumtir zawk a ni.) Chu chuan French sawrkar nena an inlaichinna pawh siamṭha viau dawnin a lang hman; mahse Napolean-a chuan kohhran chu sawrkar thuhnuaia dah a duh tlat a. Hei hian an inkar chu nasa taka tichhiain an inhmu sakhi leh ṭan ta a. Kum 1809 khan Papal state-ho chu Napolean-a chuan French sawrkar hnuaiah a dah vek bawk a. Ui leh kel thlun pawlh ang chauh an lo ni leh ta a ni. Napoleana chuan Pius VII chu a man a, Genoa tuipui(Mediterranean Sea) kama khaw nuam tak (mihring 69,000;1990 census) Savona lung inah a khung a. Mahse he lung in atang hian France ram khawpui Paris chhimchhak lama ramngaw dur pui mai Fontainebleau Forest bula Fontainebleau khaw lung inah a tan tir leh ta a. Hetia Napolean-an pope a man ringawt mai hi Europe ram thenkhat Russia leh Austria te chuan an lo duh awzawng lo mai a. Hei vang hian France sawrkar chuan kohhran chu a be chhe zui ngam tak tak chuang lo. Kum 1814-a Napoleana a lo chak loh tak deuh deuh hnu khan pope chu Rome-ah ropui takin a lût leh thei ta chauh a ni.
Amarawhchu pope hian  Napoleana nghawngkawl chu hlipin Rome khawpui chu lût leh thei mah se  tunhma ang khan a ropui tak tak thei tawh lo va. Europe rama a sangawizawnpuite lahin sawrkar inrelbawlnaa pope thu leh hla chu engah teh vak an ngai tawh hek lo. Tiang chuan pope ropuina chu zawi zawiin a lo chuai chho ta zel a. Kum 1929-a Lateran Treaty  aṭang khan a rawn invawrh sang leh thei ta chauh a ni.






Comments

Post a Comment

Popular posts from this blog

KA LO TAWN VE - REMRUATI

Image
Kum 1997 November thla chawhma lam a ni a. Chutih laia ka awmna khua chu   kan   khua Thingsulthliah aṭanga kilometer za chuang zeta hla, khaw te reuh te, in za leh sawmriat vel khua a ni. BA pass hlim, tlangval zuan zang tak leh harh vang tak ka ni a, ka awmna khaw tharah chuan Upa Pawl in luahin ka khawsa ve nawk nawk a. Ka kal ngai lohna khua a nih bâkah chhungte han sawi tur pakhatmah kan neih lohna khua a ni a, chuvangin ka awm tirh phei chuan tualchhung mite zingah hriat ka nei lo. Khaw te reuh te a nih avangin a khuaa mite chuan min hre kim thuaiin ka ring a. Middle School awm chhuna thawk thar ka nih avangin mi hriat ka hlawh ve turah pawh ka inngai a ni.   Chu  chu keima fel vang leh vengvat vang ni lovin sikul naupangten an nu leh pate hnena zirtirtu thar an neih thu an sawi ngei dawna ka rin vang a ni zawk mah. Sawrkar hna thawk hlim ka ni a, hlawh pawh ka la nei ve lo. Ka nu leh pate pawisa min paitir hmangin ka khawsa ve mai mai a ni. Tin,...
Read more

NUTHLAWI THIANGHLIM

Image
A Bul Tanna Thalaiho khawhar hla sa rual ṭham ṭham kâra min rawn melh zeuh zeuhtu nuthlawi chu tunhma pawha ka hmelhriat tawh sa ni mah se chumi zan chu a danglam tlat. Lût chhuak an awm reng avangin a tira inṭhut hnaih vak lo kha zan rei lamah chuan   kan  inhnaih sâwt hle a. Zanlai ârkhuan a hun meuh chuan   kan  inkhawih pha der tawh a ni. A hmâ chawlhkar hnih vel kal tawh aṭang khan engemaw titaka khawhar rûkna riau hi ka nei thin; a chhan ka hre lo. Tlangval ngawichawi, rual pawl tam lo tak ka nih vang a ni maithei. College final year ka zir kumah pawh exam mai tur ka ni a. Thil danga inham buai hun loh lai tak a ni nghe nghe. Aizawla kal leh thuai tur ka ni lehnghal. Chutia ka naupan lai atanga ka hmêlhriat tawh nuthlawi, kei aia kum hnih vela upa, fa pahnih nei tawh lehnghal bula ka ṭhu thei ka lawm thar viau mai chu mak intih nachang ka hre lo va. “I tlaivar dawn em? Kei chu haw mai ka duh,” tia min rawn bia ka lo lawm viau mai te chu mak intih ...
Read more

Ka Tlin Ta Ngang Lo Ve

Image
Fate fahrah tur pawh ka dâwn thei ta lo ve. Tunah zawng a vawrtawp a thleng ta; ka dawh peih ta ngang lo a ni. Kan intawn tirh chuan khawvelah nula dang awm thei hian ka hre lo va. An awm a nih pawhin ani tluk tur awmin ka ring lo. Ka chhungten min duhpui lo te chu an hriat chian tâwk loh vangah puhin ka hre thiam lo va, ka hmangaihna tizualtu mai an ni. |hian ṭ haten nei lo tura min tite chu min thik vang leh an bialnute aia a hmel ṭ hat zâwk vangah dahin ka duhna an tizual ting bawk. Hlim taka inneiin a zarah fanaute kan la nei ve ang a, chhungkaw duhawm tak kan la din ang chu tiin duhthu ka sam ṭ hin. Mahse mihring hi duhthusam ang diak diaka awm a lo harsa khawp mai. Khawvel nula dang zawng zawng aia ka thlan, ka rose pâr, chhungte leh ṭ hiante min duh pui vak loh chunga ka neih tâk chuan ka tum ram – vanram tlafual lei Eden , chhawrpial rûn nuam chu min thlen zo lo chiang ngei mai. A mo thar tûka a tho tlai chu a hmâ nia a hah em vang leh zan lama kan khawsak...
Read more