A LOVE STORY
Ka Thil Tawn
New Delhi a\angin
kan awmna khua, India chhim lama khawpui pangngai ve tak chu rêlin ka kal a. Ka
chuanna pindanah chuan Mizo hmeichhe pahnih hi an chuang ve a. Kan \hutna chu a
inhlat lo naa kan inbe pawh mai lo. Zing lama chhuak kan ni a. Chawhnu lamah
kan inbe pawp chauh a ni.
Kan awmna khua-ah
chuan ka pain hna a thawh avangin kan awm a. Kan awmna pawh a la rei lutuk lo.
Ka pa chu sipai officer pension a ni a. Ka nu erawhchu defence account lamah a
thawk a, a la pension lo deuh; a senior pawl a nih avangin a lal tawh hle. Ka
pa quarters-ah kan la awm a. Mahse ka nu chu defence account lam mi a nih
avangin Pune lamah kan insawn thuai a rinawm. Unau pathum zinga a upa ber ka ni
a. Ka naute chu lehkha zirin hmun dangah an awm a. Kei erawh chuan lehkha zir
zovin hna ka zawng mek a. Hmuh thuai pawh ka inbeisei.
Ka zinpui zinga a
upa zawk Pi Dingpuii chu vai pasal nei, a pasal awmnaa kal tur a ni a. A
naupang zawk Mahriati chu kan awmna khawpuia kal tur a ni. Chanchin kan inhrilh
tam lo va, eng vanga kan khua-ah chuan kal tum nge a nih pawh ka zawt lo. Kan
awmna khawpui hi Mizo tamna khua a ni a. Chuvangin Mizo nula pakhatin a rawn
pan ve pawh hi a mak lo va, chuvang chuan ka zawh thui loh phah a ni. Aizawla
seilian a nih thu erawh chu ka zawt chhuak ve hram e. A kalpuinu nena an titi
a\angin lehkha thiam sang tak a ni tih ka hre bawk. Tlangval kum 25 mi chauh ka
nih avangin a upa zawk pasal nei tawh chuan ka mit a la vak lo va. A chanchin
pawh ka ngaihven lo. A naupang zawk leh hmel\ha zawk chu ka kawm chak a, ka
kawm tam zawk bawk.
A dik taka sawi chuan Mahriati chu hmel\ha ka
tikher mai. Mizo nula-ah chuan a hleitling pawl leh pian nalh pawl a ni hial
awm e. Zêp lo-ah chuan ka ngaizawng a ni. Amah pawh chuan mi nel ve awm tak leh
mi iai bik lo awm tak hian min kawm a. Ka chuanna rêl pawh nuam ka tih phah
khawp mai. Hmeltha ka ti bawk a, ka ngaihmelh nasa. Bhopal daiah rêl pakhat a
chetsual avangin kan chuanna rêl pawh chu darkar sawmhnih zetin a delay a, chuvangin
Mahriati nen chuan inkawmna hun kan neih tam phah a, chanchin kal tawh inhrilh
vak si lo leh inhre chiang vak si lo chuan kan innel ta hle mai a ni. Kan dinna
hi Bhopal a\anga kilometer za zeta hla junction te reuh tê, mihring pawh awm
mang lohna a ni a. Rêla chuang ve dang chuan thil awm dan an han zawt kual a,
kan ding nileng dawn tih an sawi ta a. Passenger-ho chu an chhuak sung sung a.
Kan chhak lawk tlang pawngah te chuan an han ding hlawm a.
Keini pahnih pawh
chu kan \hut nin em avangin kan chhuak ve ta a. Kan chuanpui nu Pi Dingpuii lah
chu han kalsawn ve mai mai thei hmel a pu si lo va, inthlahrung hauh lovin kan
lensan ta a ni. Kan rêl dinna chhak tlangah chuan vaiho pawh chu an han lawn
sup sup a. Keini erawh chu mi tam zawk lawnna lo lam, a piah deuha mual pawng
sang zawk lamah chuan kan kal ta a.
Tlangchhip kan
han thleng chu khaw hawi pawh a lo nuam khawp mai. Khaw thlang lamah chuan lui
lian vak lo hi a lo luang kawi nguai a. A kamah chuan leilet a lo awm duai a.
Leirawhchan siamna a khu lêt lêt a. Bawng rual an tla dam dam bawk a. Chumi
piahah chuan phul hmun nawm hmel tak hi a awm a. A b^k chu ngaw chhah vak lovin
a tuam thung.
Hmanhmawh vak
lovin kan \hu muang a. Kan thlang lawkah chuan kan chuannaa chuang ve vai
\henkhat chu an ri nak nak bawk a. Kan \hutna lung piah deuhah chuan lungpui
lian fê mai hi a ding luah mai a. Lawn thei ila khawhawi pawh a nuam lehzual
dawn tih a lang reng a ni. Kan thlang lawka vai \henkhat rawn chho ve mêkte
pawh chuan kan piaha lungpui chu an rawn pan ni ngeiin a lang.
Vaiho rawn thlen
chhoh hmaa chu lungpui lo han lawn chhuak hmasa thei nih chu ka ch^k ta tlat
mai a. Mahriati hnenah chuan, “Mahriati, saw lungpuiah sawn va lawn ang
hmiang,” tiin ka sawm ta a. Ani pawh chuan, “Kal nghal rawh. Vaiho rawn thlen
hma khuan aw,”tih leh thawh a rual a. Kan kal ta a ni.
Chu lungpui chu
kan han bel chiang a. Rin ang ngeiin a chhim lamah chuan harsa lutuk lova lawn
mai theihna tur chu a lo awm a. Kan inkai chho ta a ni. A dik tak chuan Mizo
nula, tlangrama seilian tan chuan lawn harsa a ni hauh lo. Mahse ka kai ch^k
chu ka lawn hmasa a, ka kut ka lo pe a. Ani pawh chuan ka kut chu a lo man vat
a. Kan inkai chho ta a ni.
Mahriati kut no
nalh zet mai ka han khawih chu ka \êk deuh chuaih hian ka hre nghe nghe a.
Manhla ka ti ngei mai. Ka huaisenna sawm khawmin a \ul b^k b^k chu ka kai chho
ta a ni.
Lungpui chung chu
a lo zawl duai a. Mei chhemna hnute pawh a lo awm nuaih a. Vairam a ni bawka êk
khawrote pawh a awm. A thianghlim vak lo. Khaw hawi erawh a nuam ngang mai. Rei
lo tê-ah vaiho pawh an lo thleng chho ve a, an ri teng tung mai a ni.
Lungpui a\anga
kan chhuk leh chu lei kan thleng chiah tihah Mahriati chu a \ê \hawt a. A ke
bilh tlu tur chuan min rawn pawm chawt mai a. Lungpui bul phaitual hnimah chuan
kan tlu dun ta a. Ka tho vat a. Kaih thawh ka han tum chu a tho mai thei ta lo
va. Ka pawm tho va, lungpui ngheng chuan ka \huttir a. “Ka tihpalh lutuk. Ka ke
ka chhep sual alawm mawle,” tih pahin a ke rêk chu a dawm vang vang a. Kei
chuan remchang chuhin a ke chu ka va dawmsak thuai a. “Helai hi han hmet teh,”
tih pahin a ke rêk a hmerna chu a thlah a. Ka thiam ang tawkin a ke chu ka han
hmehsak vel a. A no nalhin a lum nuam si a, a tlu palh lovang tih a hlauhawm
hle a ni. Nileng pawhin ka hmehsak peih mai awm e.
“A zia-awm deuh
em?” ka ti a. Ani chuan, “A nuam ta huai mai. Inhmeh i lo thiam hle mai. Khawi
maw, kan ding chhin,” tih leh min ring paha din chu a han tum chhin a, a ding
ve mai. Mahse a la nat deuh avangin ka koki-ah chuan a uai a. Inpawm titih
chuan kan ding dun ta reng mai a.
Zawi zawiin kan
chuanna rêl lam chu kan pan a. Kawng chanve vel kan thlen chuan thingbuk hnuai
lung chungah kan han \hu chawl leh a. A la hm^ bawka kan \hu dun leh ta reng
mai. Vaiho chu an vei tawn sek a. An bengchheng hle bawk. Nakinah phei chuan
kan thil einawi changin zawng rual an rawn lang nuk nuk a. Hmeichhe \henkhat
phei chuan an hlau deuh a, an bula mipaho chu an bel chawt chawt mai. Zawng
rual lah an nghal, an eitur ken laite chu an chhuhsak lo chauh a ni.
Mahriati chuan,
“A nuam phian ka ti,” a ti a. A enga chu nge nuam phiana a hriat chu ka hre
hauh lo naa kan awmna ram chu nuam a tihchhan pakhat a nih ka ring deuh ringawt
a. Mizo nula, tlangrama seilian tan chuan kan awmna ram awm dan hrim hrim chu
hmuhnawm a tling ve reng a ni. “Rêl delay
zawng zawngah chuan a la nuam ber awm e. A chang chuan a ninawm thei teh a
nia,” ka ti a. Ani chuan, “I ning viau tawh ang chu ka lo ti a. I lo la ning
bik lo chu a lawmawm e. Hei kan inkawm theih phah a, a nuam ve alawm,” a ti leh
a. Kei chuan, “Thil chu kan tawnpuitea zira nuama nuam lo a ni ve alawm. Rêl delay te pawh hi kan delay puitea zir nuama nuam lo mai mai a
lo nih hi,” tiin ka han fiam a. Ani chuan, “Chuti chu hrehawm i lo tiru viau
z^wk ang a. I delay-puite lah hi heti
ve mai hi kan ni si a,” a ti a. A nui hawk hawk a. Kei chuan, “Delay reng se ka ti asin,” ka ti a. Kan
nui dun ta hawk hawk a.
Vairama seilian
ni mah ila high school kha ka pute bul Mizoramah ka kal chhuak a. Ka pain Mizo
hnam zia ka hriat loh a hlauh em avanga min dah chho a ni. Mizorama an khaw
hluiah chuan min haw pui fo bawk. Lên min den pui a, buh lain ramah min riah
pui a, zu p^wl min tuam pui a, nula min rim pui a, sangha vuakna-ah pawh ka kal
tawh. Thlan laih leh khawhar in riah te pawh ka tih hnu vek a ni. Chuvangin
Mizo nula mizia tur chu hre lo lutuk ka ni bik lo.
Rei vak lo hnu-ah
Mahriati nen chuan kan inkai thla leh ta a. Ka ngei zawng tak ni se chu kaih a
ngai tawh miah lo vang. A ngei zawng tak ni ila kaih ngai a inti miahin ka ring
lo bawk. Chutiang vel chu kan inkara thil awm chu a ni. Chumi zan chuan d^r
sarih velah kan kal leh ta a. Zanlai pelh rawk thleng kan inkawm a. Zinkawng
nuam tak zawng a ni.
Kan tur khua kan thlen
dawn chuan khawi lam pan tur nge a nih a, kan inthurual zel theih leh theih loh
te ka zawt a. A hma khan chutiang lam zawng chuan engmah ka zawt chhuak lo. A
rawn kalna chhan leh a thlenna tur ka zawh kh^n min chhang mumal ta lo va. A
hnu-ah pawh ka z^wt chhuak ta chuang lo.Mizorama a address leh a phone number
erawh chu lawm takin min pe a. Ka phone number ka pe a. Kan thlen hnu-ah a rang
thei ang bera inhmu turin kan intiam bawk.
A kal tumna veng,
khawpui hmar lam sipai hmunpui, veng nuam tak mai leh ka kal tumna veng chu a
inan avangin taxi pakhata chuan dun kan tum ta a.
Taxi-a kan chuan
hnu chuan a kal duhna address chu a han sawi chiang a. Ka kal tumna kawtthler
number chiah a ni. “Khawia kal tur nge i nih chiah?” ka ti a. A thlen in turte
chhungkaw pa ber hming a han sawi chu ka pa a lo ni reng mai a! Ka pa a ni tih
sawi lovin engtia chu mite ina thlen tum nge a nih a, tun hma lamin an inhre
tawh ngai em tih ka zawh chuan a thlen in pa tur chu a pa a ni a, a têt lai
chauhin a hmu a, a rawn zawng chhuak dawn tih a sawi ta a. Ka var ta uarh mai.
He nula, Mahriati inti, kei aia kum thum vela upa, zin kawng tluana ka it ruk
ngawih ngawih leh ka ngaihzawn rilruk em em hi ka pa fa hmasa, kan pian hma
deuha piang, ka pain ‘a rawn zin dawn’ a tih kha a ni chiah mai.
“Kan kalna tur a
inang a nih chu,” ka ti a. Mak tih hmel tak hian a meng kawk a. “A, chutia
l’aw? Chuti chu a va remchang lehzel ve?” a ti a. Kei chuan, “Ni e, a remchang
lehzel ngawt mai,” ka ti a. Ka chanchin chu ka sawi duh ta bik lo va. A nau ka
nih thu chu ka sawi ngam ta chiah lo deuh. Kal kawnga kan inchhawnchhaih tawh
dan leh kan inngaihmelh tawh dan khan a zir em a, han insawi chhuah ngam chu
harsa ang reng tak a ni. Ka pa khawlai fa, Aizawla seilian a ni a. Kei aiin kum
hnih emaw kum thum emaw chauhin a upa a. Inngaizawng rual zawng kan ni alawm.
Ka vawikhat hmuhna a nih avangin unau kan ni tih kan hriat hnu hi chuan han nel
nghal bawrh bawrh chu a harsa maithei. Ka pa tlangval fa, sipai a \ansan avanga
a hriat zui lutuk tak loh a ni. A nu a thi a, tichuan, ralkhat a\anga a hriat
chauh \hin a pa hi a rawn zawngchhuak dawn a nih chu. A chanchin hi chu ka hre
tawh naa a thlalak takngial pawh ka la hmu ngai lo.
In kan thleng. Ka
zak deuh. Ani pawh a lai ve hlein ka hria. Ka nu chuan, “Sanga, hei i u Mahriati
tur a nih hi. In rawn zin ho lehzel chu a mak hle mai,” tiin min han
inhmelhriat \hattir leh a. Kalkawnga kan inchhaih dan leh infiam dan kha
khatiang kha a ni si a. Kan hrilhai ang reng khawp mai. Ka pa chuan a be tam
lo. Ka nu erawh chuan a lo welcome \ha khawp mai. Ka nu chuan rêla kan lo chuang
dun reng mai chu thil lawmawm tak, Pathian hruaina ni ngeiin a ngai a. A nihte
pawh chu a ni mai thei; mahse kan inngaihmelh dan leh inchhawnchhaih dan kha
chu hmu ve ngat se chuan a ngaihdan a dang daih mai thei a ni.
Ka nula ngaihzawn
rilruk em em, ka lo ngaihmelh rûk fo chu ka û tur a lo ni reng si. Ani pawhin a
dik tak chuan min iai bik lo tih a mitmeng a\angin a tilang nasa a nih kha. A zan
hnuhnung ber phei kha chuan inngheng riala \hu dunin kan mu phal mai lo a ni.
Engpawhnise a rawn thlen a\anga chawlhkar khat chhung chuan kan inbe tam lutuk
lo. In chung pindan inep chiahah kan mu a. Ka nu leh pate chu in hnuai lamah an
mû a. Duh tawkin hmun fal kan nei. Mahse ka sawi tawh ang khan chawlhkar khat
zet chu kan inzah ruk deuh avang khan kan inbe zui vak lo.
A chawlhkar
hnihna a\ang erawh chuan zah theih loh chhuahin a pindanah chuan ka va kawm ta
a. Ka û mah ni se hmel\ha ka tihna leh ka itna chu a reh chuang lo va. Zan tin
ka la ngaihtuah reng a ni. Chutia ka va lên pawh takah chuan a lo inhawng khawp
mai a. Kan inkawm ngeih leh ta hle mai. Chuta chin chu zan tin kan inkawm chho
ta a. A diktak chuan lo inngaizawng rilru deuh tawh kha kan nih avangin kan
innel dan chu a thuk hle a ni. Kan inmelh dan leh kan inkawm dan chuan unau kan
nihna aiin nula leh tlangval inngai ngawih ngawih inkawm kan nihna a tilang
nasa zawk bawk.
|awngkama inkawm
ringawt chu ka duh tawk lo va, mahse a bak han sawn ngaihna ka hre vak si lo.
Ka û chu ni lo se ka hre tur. Mahse zan khat chu ka huaisenna zawng zawng sawm
khawmin a kut chu ka khalhsak ta a nih kha. A bul \an dan tur ka ngaihtuah fe
hnuin, “U Mahriat, i zungbun kha khawia i lei nge? Hetiang deuh hi ka hmu tawh
tlatin ka hria,” tiin a zungbun bunna kut zung\ang chu ka han khawihsak a. Ani
chuan, “A mawi asin. Aizawla ka chhertir a nih hi. Ka kut hi min han hmehsak
nghal teh; a kham riau a nia,” a ti a. Tichuan lawm takin a kut chu ka hmehsak
ta a. Chutia ka kut nem var par mai ka han hmet thei ta chu ka lawm ngei mai.
A tûk leh zana
kan kut inkhalhsak leh inhmehsak vel chu a nat vang emaw, a kham vang emaw ni
tawh lovin kan innel vang leh kan init tawn vang liau liau a ni tawh. Duh tawka
kan kut kan han inkhalhsak vel chu nuam viau mah se ka la duh tawk teuh lo. Zan
hnih zanthum chutianga kan inkawm hnu chuan zan khat chu khua a lum deuh vang
nge ni, kawrfual pan deuh mai hi a ha a. A pian chu a nalhin a lang itawm ngei
mai. Ngam ila han pawm chawt a, a taksa chu duhtawka han tuai vel chakawm tak a
ni. A kawrfualin a khuh phak loh china a mal no lo langte chu chil puta thlir
tham a ni si a. Hmuhnawm ka tingei mai. A kawrfual hnute zawn velah hian thil
mum te reuh te tle vat vat hi a awm a. Kan inkawm nel tawh em avangin kei
chuan, “U Mahriat, i kawr hmaa mi hi a va mawi ve a, khawi maw ka lo en
chiang?” tih pahin ka va khawihsak nghal a. Chumi pah chuan a hnute chu tihpalh
niawm tak hian ka khawihsak a. A hmelah chuan a hua nge haw lo a hriat theih
chiah loh va, mahse a mitmeng erawh chu a danglam khawp mai.
Chumi zan chuan
nidang ang lo takin a khum lamah chuan ngawi rengin min phei san a. A thinrim a
nih ringin ka ngaih a \ha lo kher mai. A tuk zinga kan tho pawh chu ka be ngam
mang lo. Ngaih \hat loh mah naka laiin zan hnih zet a riak chhuak (ka pa tirh
vang phei chu a nia) lehnghal a. Ka rilru a nuam lo takzet a ni.
Chutia rilru nuam
lo taka ka awm lai chuan tlai khat chu a inbual zo rawn chhuak nen hian rin loh
deuhin kan intawk ta thut mai a. Ka awm lo emaw tiin a lo inthlahdah deuh hlek
bawk a ni. Pawnfen hnuai pan zet hi a feng a. A chung lamah engmah a inbel lo.
A pawnfen hnuai pan si, chhing em em si hnuaia a mal var nalh tak mai leh a
hnute uai \hiang rial mai te chu hmuhnawm ka ti kher mai. |awng nachang hre
lova ka en reng lai chuan, “Rin aia i rawn haw hma chu le. Eng ngati nge khatia
mi en reng? Phung hmu te pawh i ang dawn dawn alawm le?” a ti a. Keia hamhaih
chhan ngaihna hre lo chuan tum loh deuh hian, “I itawm em alawm,”ka ti ta
ringawt mai a. Ka chhanna chuan min tizak lehzual ngei mai.
Ka mitthla-ah ka û
mal var nalh tak mai leh a hnute bu mawi tak mai chu a lang reng a. Ka itna leh
duhna pawh a tizual khawp mai. Awm dan pawh mi tithiam lo va, a hmel hmuh ka
zak a, hmu lovin ka awm thei bawk si lo.
Mahse zan lina
velah chuan a pangngai ang chiahin kan inkawm leh ta a. A kawrfual pan bawk kha
a ha a, a khumah chuan bawkkhupin kan titi dun a. Chumi zan chuan, “Sanga,
ngaihzawng eng zat nge i neih tawh?” a ti a. Kei chuan ngaihzawng bulfuk tak
tak ka la neih ngai loh thuin ka chhang a. A awih lo tih a hmel a\angin a lang thei.
“A nih leh nula hnute i khawih tawh ngai em?” a ti ta thut mai a. Ka chhang
thiam chiah lo va. Mahse, “Hman zana i hnute ka khawih chauh kha a la ni,” tih
pahin a hnute chu ka han nghawk zauh a. A nui hawk hawk a. “Khatiang kha nula
hnute khawih han tih tham a nih loh kha,” a ti a. Kei chuan, “A nih leh eng
chin hi nge khawih i tih chu? Hetiang hi em ni?” tih pahin a hnute dinglam chu
ka han nghawksak nawk mai a. “Khaih, i inhlei lutuk. Insum rawh. Unau kan nih
hi,” a ti a. Kei chuan, “Nula i ni tho alawm,” tiin ka han nghawksak nawn leh
ngat a.
“A nih leh nula i
fawp tawh em? I nula fawh hmasak ber chu tu nge? Min hrilh duh ang em?” a ti
leh a. Kei chuan, “Ka sawi ngam nang,” ka lo tifiam a. Ani chuan, “A, sawi ngam
loh tur a awm em ni?” a ti leh a. Kei chuan, “Nula ka la fawp lo va, sawi tur
ka nei lo alawm. Mahse ka fawh hmasak ber tur nia rin chu ka nei,” ka ti a. Ani
chuan, “Tu chu maw i fawh hmasak ber tur chu? Min han hrilh teh, ka hre chak a
nia,” a ti a. “Rawn kun hnai la ka lo hrilhru ang che,” tiin ka fiam a. “Min
hrilh tak tak rawh aw,” tih pahin a rawn kun hniam a. Chu tak chu a inrin hmain
ka lo fawp ta chawt mai a. Min chhang let lo naa a dawh ve miau avangin a hmui
sen no chek mai chu ka fawp ta ngawih ngawih mai a ni.
“Kha kha a nih
kha ka nula fawh hmasak ber chu. I hre chiang viau lo maw?” ka ti a. Ani chuan,
“I sual em mai. Ka awih chuang lo,” a ti a. Kei chuan thutak fê hian, “U
Mahriat, a ni tak tak asin. Ka û phei chu ni lo la a hma daih khan ka fawp tawh
ang che,” ka ti ta a. Chutia thutak deuha ka chhan takah chuan a rawn la thutak
ve ta viau mai a. “Sanga, a ni tak tak em? Kei hi i nula fawh hmasak ber ka ni
tak tak maw?” a ti a. A phur hmel ta riau mai a. Kei chuan, “Ni tak tak e. Dawt
ka sawi miah lo,” ka ti a. Ani chuan, “Sanga, ka lawm lutuk. Chuti chu min han
fawp leh teh,” tih pahin amah zawk chuan min rawn kuah a, uar fê hian kan
infawp ta mawlh mawlh mai a.
Zankhat chu,
“Unau chu ni lo ila a nuam ngawt ang,” tiin a han thaw halh a. A rilru chu ka
hriat thiam vek avangin kei chuan, “Tihngaihna aawm si lo ti raw? Mahse a nuam
tho alawm,” ka ti a.
Mahse nuam tih
loh riauna chu ka nei ve alawm. Unau kan ni a, \awngkama sawi chhuah rem chiah
lo thil engemaw tak hi kan inkarah chuan a awm tlat \hin a, chu chuan amah hmuh
pawh min tihreh fo. Ani pawh a awm dan a\angin a hriat theih. Chuti chung chuan
unau kan ni tih kan inhriat hmaa kan init tawnna leh inhmel duhna chu a reh
thei si lo.
Zan khat pawh, “Sanga, Mizoram lama haw chhoh
vat vat ka duh. Kan awm dan hi nuam tih loh riauna ka nei. Ka rawn kal hi i tan
hian a \ha lo a ni ber mai,” a ti a. Mahse chuti chung chuan kan inhip tawnna
chu a chak ngang si a, kan in\hen thei ngang lo a ni. Kan inpawm vawng vawng a.
A hnute per thlawpin ka awmah chuan a bei a. Ka hnungzang chu a zut heuh heuh
a. A ngawi vang vang bawk a.
Ka nu leh pate
chu ka nu hna avangin zan hnih riak turin Lonavla-ah an kal a. Rêl station-a
kan thlah haw lam chu car-ah kan chuang dun a. Traffic a jam nasat avangin
kawng dangah kan hel a. Kan helna kawng chu a reh khawp mai a. Kawng sir hmun
remchang, mi tlawh pawh vak lohna hmunah chuan zunram thiarin kan ding a. Kan
kal leh tur chu motor chhungah chuan kan han inchuk zauh a. A na lutuk lo maw
tih tur khawp hian kan han inpawm vawng vawng a. Chu b^k tih theih engmah kan
nei si lo.
Chumi hnua kan
hawng chu zan dar sawm leh pakhat velah in kan thleng a. Thlamuang takin ka
khumah chuan kan mu a. Nula leh tlangval inngaizawng dang anga hmangaihna thu
han inhrilh vak rem chiah si lo chu chetziain kan tilang ta a ni ber mai.
Nakinah chuan, “Sanga, unau kan ni bawk si a, eng tin nge kan tih ang?” a ti a.
A meng hnuai deuh raih a. Kei chuan, “Kan thlen chin hi nuam takin hmang phawt
mai ang,” ka tiringawt a. Chu chu ka sawi tum chiah pawh a ni bik lo. Amah bawk
chuan, “Ka thiam loh vek a ni,” tih pahin a han hui pap a. A thawmhnaw phelhsak
ka tum chu, “Duh tawk tawh mai ang,” ti reng chungin min lo pui a.
“Sanga, ka \ah a
chhuak tlat. Min ngaidam rawh aw.Mahse kei zawng, tuna kan awm dan leh kan
nakin hun tur ka ngaihtuah hian ka \ap lo thei lo a ni,” a ti a. A mittui chu a
han hru zauh a. A hmui sen vap ham mai kha a dang bem a. A sam chu a thlah pawr
hniang bawk a. A hmel chu a hlim lem lo khawp mai. Hun kal zel tur ka ngaihtuah
a, ka ta a han ni hlen thei lo tur chu ka ui a ni. “U Mahriat, ka ta ni hlen
thei la ka ti ngei mai,” ka ti ta ringawt mai a. Ani chuan, “Sanga, chu chu ka
lo ngaihtuah fo tawh asin. A dik tak chuan kan inhmuh hmasak ber a\ang khan ka
hmangaih tawh che a. I tan hian engkim ka huam tawh a. Mahse heti hi kan lo ni
ta si a. Unau kan ni tih ka hriat zan kha chuan pawi ka ti zawk mah a ni.
Engpawhnise pasal ka neih hma chu i ta ka ni reng ang,” a ti a.
“U Mahriat, ka
hmangaih che,” ka ti ringawt a. Kei pawh chu ka inngaihtuah lungpuam a, ka
mittui a rawn tla ta zawih zawih mai a. “Sanga, \ap teh suh. Ka lungchhiat a
belh mai mai a ni. Mahse kei ngei pawh hian zanah hian a rûkin ka \ah phah fo
asin,” tih pahin min rawn pawm a. A mittui luang ngiai ngiai chu ka lo fawp a.
Kan inpawm muhil ta a ni.Chutiang chuan chumi zan chu kan hmang zankhua ta a.
Kan mu tlem ngei mai.
U Mahriati chu a
insawi ang khan a inkilh-tawih ta tlat mai a. Kan inbe tlem ta hle mai. Zan tin
deuhthaw hlim taka inkawm \hin kha zanah pawh kan inlen pawh ta mang lo va. Ni
danga inbe bawrh bawrh \hin kan inbe ta mang lo chu ka nu pawhin a lo man vat
a. Min zawt nghe nghe a. Chhan vak ngaihna pawh ka hre lo.
Ka pa fanu ve tho
a ni tih ka hriat hmaa ka nula it em em leh duh em em mai nena kan inkar chu a
bumboh ngei mai. Insum kan duh ve ve a. Inngaihzawn loh pawh kan duh. Mahse in
khatah kan cheng ho si a, chu chuan kan dinhmun chu a tiharsa lehzual; sa bel
bula chaw nghei ang deuh a ni ber. Kei chuan ka hmangaih ngai rengin ka
hmangaih a, ka it ngai rengin ka it a, hmel\ha phei chu ka ti tulh tulh zawk
niin ka hria. Ani pawhin insum harsa a tive hlein ka hria, ka khawngaih khawp
mai. A inkhawm tur a duh tawka a inchei phei chu a hnung lam a\angin ka lo en
ru ngawih ngawih \hin.
Thla khat dawn lai
kan inbiak meuh loh hnu chuan zawi zawiin kan inhnaih leh ta hret hret a. Zan
khat chu a mu tur hian ka room-ah min rawn tlawh a. “Sanga, tunlai eng nge i
ngaihtuah ber \hin?” a ti a. Chutiang zawhna chhang tur chuan ka inring hauh lo
naa tlang taka thil sawi chu \ha zawk dawnin ka hria a. “Tunlaia ka ngaihtuah
ber chu ka U Mahriati hi a ni. Amah lo chu eng dang mah ka ngaihtuah thei lo a
ni ber mai. Chhun leh zanin ka ngaihtuah a. Ka rilru-ah thil dang reng reng a
leng lo,” ka ti a. “Kan inang chiah a nih chu. Kei pawh nangmah hlir ka
ngaihtuah a. Ka khawvel hi a hrehawm tak tak a ni,” a ti a. “Khawvel hrehawm
thute i sawi tak mai. Ngawi rawh, a la nuam chhawm ve mai ang,” tiin fiamthua
lo laksak ka tum a. Mahse ani chuan thutak deuh hlek hian, “Kan chetsual hmasak
ber zan khan pasal ka neih hma loh zawng i ta ni turin ka intiam a. Kha ka
thutiam kha ka la vawng reng asin” a ti leh a. Kei chuan, “U Mahriat, i ti tak
tak em? Kha i thutiam kha i vawng tak tak maw?” ka lo ti a. Ani chuan, “Sanga,
ka la theihnghilh miah lo asin,” tih pahin min rawn hnaih hret a. A rimtui
inhnawih nam chem chem leh a thaw ri te chuan ka thinlung a titui ral a.
Awmngaihna ka hre leh ta mang lo.
“U Mahriat, i
thutiam kha i vawng reng tak tak ang maw?” tih pahin ka pawm nghal a. Min lo
pawm chawt a. Rei tak inngai ru ngawih ngawih insum lui kha kan han puak keh
leh ta a ni; kan uar dun ngei mai. “Sanga, i duh ang anga awm turin ka rawn
inpe leh tawp mai a ni. Zanin chu duh tawk ila, naktukah min lenpui rawh aw. I
duh ang ang ka tihpui ang che,” a ti a. Kei chuan uar fêa kuah pahin, “Ni e, i
thu thu alawm,” tiin a tawp nan kan han infawp leh a. Kan inmang \ha ta a ni.
A tuk zing hma
takah ka nu leh pate chu Pune-a Mizo intawhkhawmna chhim turin an chhuak a.
Keini erawh chuan muangchangin khawpui a\anga khawchhak lam kilometer sawmli
vela hla ramhnuai hmun fianrial tak mai chu kan pan ta thung a.
Kan kalna-ah
chuan dil mawi tak hi a awm a. Chu dil chhakah chuan tlangdung pakhat hi chhim
leh hmar zawngin a inkhawh a. Tlangrama seilian U Mahriati chuan chu tlang
chhipa lawn chhoh chu a rawt a. Tichuan kan han lawn ta a ni.
Tlangchhipah
chuan lungpui lianpui pui hi a awm a. A bul vel chu a fai hun a. A \hut nuam
tawk vela chhah hian phaitualhnim a \o khat tlat bawk. Chu lungpui phen thingbuk
hlim nuam tak maiah chuan kan han chawl ta a ni.
Kan han chawl
hahdam chuan hmabak vak kan nei lo. Kan tih turah kan chiang dun bawk a, inngheng
rial \hu dunin a ram mawizia leh nawmzia chu kan sawi a. Chu chu helai kan pan
chhan pawh hi a ni.
“U Mahriat,
nizana i thutiam kha i la hre reng tirawh? Ka duh apiang min pek i tiam a nih
kha,” ka ti a. A nui a. “Eng nge i duh min han dil ta che? Ka pek theih che
chuan ka intiam ang chiah kha ka ni mai,” a ti a. Fiamthu bawk hian, “Heng
zawng zawng hi ka duh vek,” tih pahin a hmuiah ka fawp zauh a. Ka pawm vawng
vawng a. “I duh chu han ti ta che. I ta ka nia lawm,” tih pahin min han siai
zauh a. |awngkama chhang lovin ka ban dinglam chuan ka kuah a. Kan thlang lam
phaizawl mawi tak mai chu kan thlir dun vang vang a.
Nakinah chuan,
“Hetianga awm nilen mai hi a va chakawm ve,” tih pahin ka awm bawr chu a hiat
neuh neuh a. Ka bianga han fawh zauh pah hian, “Sanga, min hmangaih tak tak em?
Kei chu ka hmangaih tak tak che a nia,” a ti leh a. A beng bulah chuan hriat theih
chang chang tur hian, “U Mahriat, rêla kan chuan lai a\ang tawh khan ka
hmangaih che alawm. Hmel\ha ka ti lutuk che kha i hnung lam a\ang khan ka en
ngawih ngawih \hin che asin,” ka ti a. “I ti lawmawm \hin e. Ka phû loh a ni
chu. Mahse ka lawm tho tho,” a ti leh a.
Nuam ti hle mah
ila nula leh tlangval induh, hmabak hlimawm tak nei ang chu kan ni lo. Kan
inhmangaihna chu eng ang pawhin chawr no mah se a puitling thei lo va, a
kuhmumah a tawp dawn tih kan hria; chu tak mai chuan min tidawih a. Lungchim
taka ka fawh bak chu thil dang thlenpui ka tum lo. Chutiang chuan inngheng
riala \hu dunin kan muhil dun ta a.
Ka han harh leh
chuan a lo chawhnu ruih tawh a. Khaw hawi a nuam ngei mai. Phaizawl lam ka zu
thlir thla chu hmuhnawm khawp hian a lo lang mawi a. Nula leh tlangval
inhmangaih, innei thei ngei tura inngaia leng dun ni ila a nuam famkim dawn
hian ka han hre lehzual pek a. Keini pahnih inhmangaih ve chu kan induhna a san
poh leh kan harsatna a nasa a, kan lu chungah meiling kan chhekkhawl nasa ting
mai a ni. U Mahriati chu ka han en a, ka û ni lo atan hian ka awt ta ngawih
ngawih mai a nih chu. Kumkhuaa ka ta, hetianga ka chenpui theih hi ni se
khawvel hi nuam lehzual dawnin ka hria a. Chumi rual chuan eng tikah emaw lo
theih loha kan in\hen a la ngai dawn tih ka hre si chuan min vel lo chauh a ni.
A rawn harh ve
ta. Kan eitur pai ang angte chu kan ei a. “Sanga, hmanhmawh lovang aw. Duh leh zanah
pawh kan haw mai ang chu,” tih pahin a ding chhuak a. Kan thlang phaizawl leh
dil paw ruih maite chu a han thlir kual vel a. Mawi a tihzia sawiin a phul hlut
a. A kawngah kuahin khua chu ka thlirpui a, a nuam veng veng mai.
Kan awmna
tlangdung chu zawhin khua kan chuan zel a. Vaiho zawng, phaizawla khawsa \hang
ngang an ni a, tlang lam chu an kal vak lo tih a hriat khawp mai. Keini erawh
chuan nuam kan ti a, kan fang kual ta hrep mai a ni.
Ni tlak thlengin
chu tlangah chuan kan vak vel a. U Mahriati kal thlan hlap mai leh biang tai
sen tak maite chu \ha hi ka ti em em mai a. A rukin ka lo en leh ngawih ngawih
\hin. Kan haw tur chu kan ui dun ngei mai. Theih se chu tlangchhip zawl hmun
reh ruih mai leh thingbuk mawi tak tak kara phaitual hnimah chuan inchai nilen
a chakawm hle. Mahse hun leh kan dinhmun chuan min nawr lui miau si a; kham lo
takin kan haw dun ta a ni.
November thla kan
hmang ral. Ka nu leh pate chuan Mizoram lamah Christmas hman an tum a. U Mahriati
a awm tawh avanga min kalsan pawh hreh lo deuh leh min ngaihtuah lo deuh turah
an insawi a. Kum dang zawng aiin cham rei an tum phah nghe nghe bawk. Keini tan
chuan chu chu duhthusam a ni.
November 30
chawhnu lamah ka nu leh pa chu airport-ah ka va thlah a. Aizawlah in sak nghal
te an duh avangin January thla chanve velah an rawn haw chauh ang. Ka pa phei
chu March thla lamah chauh a rawn maithei lehnghal. A diktak chuan Mizoram lama
ka pi leh pute khua han kal leh a, chhungte han hmuh pawh ka chak ve tho; mahse
in lama ka awmpui tur chuan hun nuam zawk min hmanpui dawn tih ka hre si a,
chhuanlam dang ka siam ta mai a ni. Chu bakah amah chauha u Mahriati kalsan chu
ka pa chuan a remti chiah lo bawk.
Airport a\anga ka haw kawngah chuan Mumbai Mizo nula
lehkha zir leh Mizoram ka haw ve changa Mizo nula ka kawm ve \hinte leh u Mahriati
chu ka khaihkhin mai mai a. U Mahriati anga Mizo nula zaidam leh hmangchang
hria hi an vang viauin ka ring. A hmel pawh \ha ka ti; a \ha ber phei zawng a
ni hauh lo tih chu zep thu a awm hauh lo. A nun thianghlimzia leh a thil thlir
dan positive-zia te chu mak tak a ni. Khawi atangin nge sap tawngte hi a thiam
tih mai turin a thiam a. Hetiang nula ngei mai hi nupui atana ka duhthusam chu
a ni. Mahse ka nei thei dawn lo tih ka ngaihtuah chuan ka rûm a. Ka rilru a na
ngawih ngawih mai. Eng tikah emaw chuan kan in\hen ang a. Chumi hnu chuan
mihring danin tute emaw chuan an rawn rim ang a, ka tan lo ui ngawt ngaihna a
awm dawn si lo. Ani tan pawh a neih theih loh tur a nau tana indah awl reng chu
a tihchi loh a; kei pawhin engtikah emaw chuan pasal \ha tak la nei se chu ka
ti lawi bawk si. Midang daihin an han nei tur leh ka khawsakpui anga an han
khawsakpui tur chu ka ngaihtuah a, ka rilru a na a ni tawp mai. Tunah pawh
tlangvalho chuan chawlhni inkhawm apiang hian hmel\ha an tih thu leh an hman
veleha rawn rim an tum thu hi min hrilh ziah tawh a ni. An rawn rim tak tak hun
pawh a la thleng mai ang. Christmas a lo ni ang a, kum danga rawn chuang kai
\hin Mizo tlangval, ka \hiante ngei pawh chu an la rawn riak leh emaw, chaw an
la rawn eikhawm leh ngei emaw a ni ang a. Nula chhaihin an la chhaih fo dawn; a
\hente phei chuan ngaihzawn phêt an tum ang a. Keimah thleng thleng chuan min
la biak \hat phah dawn a ni.
Hriat mang loh karin in ka thleng phei der mai. U Mahriati
chu a lo awm lo va. Keimahin sitting room-ah TV ka en a, ka khua a har khawp
mai. Rilru fima ka han inngaihtuah chuan U Mahriati nena kan inkar chu chhut
chah a, unau diktak anga awm chu \ha ber dawnin ka hre ta a. Nupui atana neih
theih loh tur hmeichhe zuna uai reng mai leh buaipui reng mai chu a mi pangngai
lo hna riauva hriatna ka nei a. Mi pangngai anga awm a, nupui \ha tak neih a,
chhungkaw pangngai din ve ka duh a nih chuan a rang thei ang bera U Mahriati
chu kalsan tur a ni tiin rilru ka siam a.
Chutia rilru siam nghet tura ka inngaihtuah lai tak chuan a rawn haw a.
Ka tum ang tak pawh chuan in\hen dan tur chu ka ngaihtuah hman ta lo a ni.
Ka bulah rawn \hut pah chuan, “Sanga, ka nu te chu an kal
ta maw? An tluang em ang chu maw!” a ti a. Kei chuan, “An tluang chek ang chu;
kan inthlah fel ta zawng a nih kha,” tih pahin ka thova, in chung lamah ka
chhohsan ta a.
Chumi zan chu ni dang anga ka \awng tam loh avangin mak a
ti deuh a ni ang, ka khuma rawn \hut phei pa chuan. “Sanga, buaina i tawk em
ni? Nge ni ka nu leh pa te kal chu i ngai viau. I va ngawichawi ve. Kan pahnih
chauha awm hi nuam i ti lo deuh a ni lo maw?” tiin min zawt a. Kei chuan, “U
Mahriat, i bula awm tluka nuam tih hi ka nei lo asin. Theih ni phei se ka
damchhung zawnga awm pawh hi ka thlang alawm. Ka hmangaihna che a nasat poh leh
ka rilru hahna leh buaina hi a nasa \hin,” ka ti a. Ani chuan min rawn kuah pah
hian, “Sanga, ka nau angin ka hmangaih che a, ka bialpa angin ka hmangaih bawk
che a. I tana mi hnawksak nih hi ka duh lo asin. Lungngai suh ka kiansan thuai
ang che. Mizoramah ka haw chho thuai dawn alawm. Nakum March thla khian
Mizorama ka hna dil kha exam a ngai dawn a. Christmas zawh veleh hian haw chhoh
a ngai ang. Chumi hnu chuan min theihnghilh dawn nia. I û ka nihna erawh hi
chuan min hre reng ang che,” a ti a.
Mahse kei chuan,
“U Mahriat, min la awmpui hrih rawh. Min hawsan suh. I tel lovin eng tin nge
keimahin ka awm theih ang. Hetah pawh lehkha te chu a zir theih alawm.
Khawngaih takin haw suh,” ka ti a. Ka pawm a, a hmuiah chuan ka fawp a. Uar fê
hian kan han inpawm zui a.
Ka beng bulah hian zawi tein, “Sanga, ka hmangaih che, ka
hmangaih lutuk che. Mahse i t^n hian ka hnawksak miau si a, haw turin rilru ka
siam fel tawh. Airport-a in kal hlan khan harsa ti tak chungin thutlukna ka
siam a. Thlawhna ticket pawh ka la diam tawh. Ka nu rawn thlen veleh ka hawsan
ang che. He khawpuiah ringawt pawh hian Mizo nula keia hmel\ha leh fel zawk an
awm \euh alawm. Mi dang nei vat la, kei chu min theihnghilh hmiah rawh. Nang
pawhin min \hen i duh ve tho kha,” a ti a.
A sawi dik bawk si a, ka ui bawk si a. Ka chhan ngaihna
hre lo chuan, “A nih U Mahriat, i haw hma chu ka ta ni reng ang che aw,” ka ti
a. Ani chuan, “I ta chu ka ni reng alawm. Ka haw hma zawng chu i tana inpumpek
turin ka rilru pawh ka siam diam tawh. Mahse haw chhoh ngei chu ka tum a ni. Ka
haw hma poh leh a \ha a ni mai. Sanga, ka pa hi rawn zawng chhuak lo tawp zawk
ila \ha tur,” a ti a. A mittui a rawn tla leh ta a. “U Mahriat, chu lam chu
theihnghilh la, zanin chu hetah hian riak ve mai rawh. Hun kan neih tlem tawh
em chu,” tih pahin a a kut chu ka hmersak vang vang a. Ka hnungzang chu a chul
heuh heuh a. Thil dang a leng lo.
Kan inthlah leh hnu chuan ka mitah tak hian mi han en a.
Nui var var chung hian, “I va han fel tak. Nang hi ka naupan lai a\anga mipa ka
duhthusam ka lo suangtuah dan ang chiah kha i ni. Ka lawm lutuk,” tih pahin min
han chuk zauh a.
Mizoram a\angin cancer natna vei kan chhungte an rawn
thleng thut mai a. Chu mite chuan Christmas dawn thleng min cham chilh a.
Chutah Christmas a lo ni a. Rin ang ngeiin kan awmna khawpuia Mizo tlangval
cham bang \henkhat chuan U Mahriati chu an rawn rim \an ta a. Ka tan lah lo ui
theih a ni si lo. A \hente phei chuan ngaihzawn tak te hian an rawn ngaizawng
a. Tihpui tura min fiam zauh zauh pawh an awm. Ani lah chuan tumah a be chhe si
lo. A hawiher a zeiin lehkha thiam a nihna a lang khawp mai si a. Mizo nula
tlemna vairamah chuan hmuh \hat a awl lehzual ang tih a lang reng mai. Nula fing
a ni a, a inveng thiam hle. Ka mit tikham zawnga awm chu a tum lo niin a lang.
Christmas zana special taka awmpui ka tum erawh chu kan ina Christmas hmang an
awm nual avangin ka puitlin ta lo va. Rin aia min chimtute chu an cham rei tak
avangin hun \ha pawh kan nei hlei thei lo a ni ber e. Zan khat chu mut dawn \êp
hian in hnuai lama \hiante awm hlan chuan kan inpawm vawng vawng a. A b^k chu inhmuh
fal tak takna hun a awm lo. Vawikhat erawh chuan kan \hianpa pakhat hian rui
deuh chung hian, “Nangni unau hi inngaizawng in ang riau,” tiin min fiam zauh
a. Kan fimkhur hle naa kan lo inveng seng lo a ni mai thei. U Mahriati chuan ka
mamawh engkim min ngaihtuahsak vek a. In chhung khawsak zawng zawng chu hneh
takin a enkawl vek bawk a. Ka nuin, “I u Mahriati ang nula fel hi i hmu zo ngût
ang emaw chu le. Fate an ni na vang vangin ani ang hi mo atan ka it a nia,” a
tih te kha hetia kan pahnih chauha kan awm hnu hian a dikzia ka hre chhuak uarh
uarh mai.
December 31 –ah mikhual dang, damlo leh a kalpuitute kan
nei leh a. Ka \hian \henkhat lo cham sa nen kan t^wt lehzual a. Hun \ha kan nei
thei lo. Kan mikhual damlo leh a kalpuitute chu ni thum zet an cham hnu-ah
hospital lamah an insawn a. Keini pahnih chu kan inchu-kha thei ta deuh. A hma
kha chuan unau anga awm a ngaih miau avang leh kan fimkhur em avangin eng
tinmah kan awm lo. January 3-ah chuan mikhual an awm tawh lo va. Amaherawhchu
damdawi in lamah buaipui zui an la ngaih tho avangin U Mahriati chu zan hnih
zet a riak chhuak leh a. January 5 zanah chauh kan inhmu leh a ni. Kan awm dan
turah kan chiang tawh a, chuvangin thil dang engmah beisei tur a awm tawh lo.
Hemi zan hian uluk taka inkawmin kan awm dan tur chu kan sawi fel a. Kut hmawr
takngial pawha inkhawih lovin kan in\hen hlawl mai a ni.
January 10-ah ka nu a rawn thleng thla leh a. A rawn
thlen a\anga a zan thumna-ah chuan min ko fal a, min tinghing lawihtu thil thar
min hrilh ta a. Chuta ka nu thusawite chu a rukin ka vawng reng a. A tûk lehah
U Mahriati chu Mizoramah a thl^wk haw a.
A haw hma zana lungchim taka kan infawh vawng vawng bak kha chu thil dang a awm
lo.
Airport thleng ka va thlah a. Kan in\hen dawn chuan
mittui tling piau hian, “Mang \ha aw,” a ti ringawt a. “Mang \ha le,” ti b^kin
ka chhang thei lo. Engemaw sawi tum nei ni awm tak hian a han ang ziau va,
mahse a sawi chhuakthei ta lova. Kei pawh eng ruai ka ni bik lo ve; thil dang
engmah sawi lovin kan inen vang vang ringawt mai a ni. Thlawhnaa a luh dawn
chuan a ban a rawn vai lauh lauh a. Tichuan U Mahriati leh ka hring nun hlimawm
tak, damchhunga ka theihnghilh tawh ngai loh tur chu ui em em chungin ka thlah
liam ta a ni.
Comments
Post a Comment