Sakawlh Chungchang: Catholic Answers to the Question of the Beast {Unoffical}

Thuhmahruai

Sakawlh chungchang hi kristian-te chuan kan ngaihven lo thei lo va, kan ngaihven viau bawk. Sakawlh nia kan hriat erawh chu a inang lo khawp mai. Sevent-day Adventist kohhran leh kohhran dang tlema zawng hian Catholic kohhran hotupa pope chu sakawlh niin an chhui lut a. Heng zingah hian Seventh-day Adventist-te hian an bei nasa berin a rinawm a. Anmahni Catholic lam hi chuan sakawlha puhtuten an beih nasat ang em em hian an bei let ve lem lo niin a lang. Kohhran tin hian kan thurin ṭheuh chu mi a tam thei ang berin chhiar se kan tih laiin kan kohhran member-te chuan mi kohhran thurin chu a tlem thei ang ber chhiar se kan duh awm e. Chutiang karah chuan Catholic member ṭhenkhatin miin sakawlha an puhna point ṭhenkhat an chhanna chu a hnuaia mi hi a ni a. Zalen taka chhiar mai tur a ni. Sakawlha Catholic puhtute thu leh hla chauh hi kan chhiar a, anmahni Catholic lam atanga chhan tlema zawng hi bengvar nan hrim hrim ka han ziak a nih hi. Khai aw le! [Hei hi official-a Catholic  kohhranin an chhanna ni lovin mimal thenkhatin an chhanna lakkhawm a ni tih hre reng ila].       

1.      Kohhran ṭhenkhat chuan  Daniala 2 leh 7-a inlarna tlawhchhanin Roman Empire chu ramsa palina niin an ngai a. Chu ramsa palina lûa ki sawm lo chhuakte chu Rome sawrkar tluk hnua ram lo ding chhuak tur leh Rome sawrkar rawn bei turte entirtu niin an ngai bawk. Western Rome ram dotu ram sawmhnih zinga ram sawm chu Uriah Smith-a chuan ramsa ṭihbaiawm tak lûa ki sawmte kha niin a sawi a. Chungte chu, Vandals, Ostrogoths, Heruli, Visigoths, Burgundians, Anglo-Saxons, Alamani, Suevi, Lombards and Franks te an ni. Heng hnamte hi AD 476-a Rome sawrkar tluk hnua ram rawn ding chhuak, Rome ram dotute kha niin an sawi a. Eng vangin nge heng hnam sawmte kher hi Uriah Smith-a khan a thlan? Rome ram tihchhiatnaa hmanraw pawimawh tak tak an nih deuh bik vang em ni? 

2.      Ki te tak tê chuan ram pathum a titlawm.

3.      Pope-in hun te leh dan te a tidanglam.

4.      Ki te tak tê chuan mi thianghlimte a tiduhdah.

5.      Ki te tak tê chuan ‘hun khat leh hunte leh hun chanve chhung’ mi thianghlimte a tiduhdah ang. Chu chu kum 1260 chhung a ni. He hun hi kum 538-ah a inṭan a, kum 1798-ah a tawp. Kum 1798 hian Napolean-a sipai hotu Berthier-a chuan Pope a man a, lung inah a khung. Pope rorelna chuan hliam na tak a tuar.

         A chunga ki te tak tê chungchang kohhran thenkhatin an zirtir dan tlangpuite khi han chhui chiang ila.

1.  Ki sawmte kha Rome sawrkar tichhetu diktak an ni em? Daniala 7:24 hian ki sawmte kha hnam dang daih an ni lo tih a tichiang hle. Bible lehlin hrang hranga an sawi dan lo en ila:

(a)    And the ten horns out of this kingdom are ten kings that shall arise... (KJV) 

(b)   The ten horns are ten kings who shall arise from this kingdom... (NKJV) 

(c)    Its ten horns are ten kings that will rule that empire. (NLT) 

(d)   The ten horns are ten kings who will come from this kingdom. (NIV) 

(e)    As for the ten horns, out of this kingdom ten kings shall arise... (ESV) 

(f)     As for the ten horns, out of this kingdom ten kings will arise... (NASB) 

(g)   As for the ten horns, out of this kingdom ten kings shall arise... (RSV) 

A chunga Bible changte khian sakawlha Catholic puhtute zirtirna chu a kalh chiang hle. 

1.      Bible chuan Rome Empire chhung atang ngeiin (out of this kingdom) lal sawm an rawn chhuak dawn a ti. A chunga hnam sawm tarlante khi pakhatmah Roman Empire chhunga mi an awm lo va. Rome mite chungah ro an rel hek lo. A puhtuten ten hnam sawm an sawite hi Rome ram pawn lama mi, Rome ram ṭhenkhat rawn hneha ram thar dintute an ni. A chhûng atangin ti na na naa ram pawn lama mi hmeh bel talh tum chu a dik lo a ni. New Living Translation phei chuan ‘Its ten horns are ten kings that will rule that empire’  (A ki sawmte chu lal sawm, chu ram la awptu turte chu an ni) a ti a (Version dangah pawh a chiang viau tho nain). Heti khawpa a chiang chung hian enga ti nge kan la hriat thiam theih loh fo le? That will rule that empire tih ni reng si, Rome ram chunga rorel (rule) miah lo hmehbel tum tlat hi a mak a ni. Entirnan, Vandal-ho chuan Africa khawmualpui aṭangin Rome chu nasa takin an rawn suasam a. Mahse an kir leh mai a, an awp (rule) zui lo. Chutiang bawkin hnam dang an sawite hian Rome an awp ngai lo va, Rome ram chhungah ro an rel ngai bawk hek lo; a do zawng an do ngei a, Rome ram bung ṭhenkhat pawh an la ngei alawm. Mahse Rome ram chhunga rorel han tih tur zawng an ni lo. India leh Pakistan an indo ṭhin. A chak zawk India chuan Pakistan chungah ro a rel kher lo. 

2.       Bible hian ki sawmte chu lal an nih thu a sawi chiang khawp mai. Lalram a sawi lo. Aramik tawnga (Hebrai ṭawng pawhin a ni tho va) lal tihna chu melek a ni a (vantirhkoh tihna pawh a ni thei). Thuthlung Hlui khawiah mah ‘lalram’ tih nan emaw, ‘hnam’ tih nan emaw lehlin a ni ngai lo. Heng hnam sawmte hi lal an ni lo tih chu a chiang viau a ni. He chângah vêk hian ‘lalram’ sawi nan ‘malkuwth’ tih a hmang thung. Hetiang hian, “Tin, ki sawmte thu chu, hemi ram (malkuwth) ata hi lal (melek) sâwm an lo chhuak dâwn a ni,” tiin. He châng hi Rom ram hnehtu lalram sawmte sawina kha ni se chuan Daniala hian melek hmang lovin malkuwth tih thumal a hman a rinawm.

The ten horns are ten kings (melek) who will come from this kingdom tih hi kohhran thenkhat chuan The ten horns are ten kingdoms (malkuwth) who will come from this kingdom tihna ni tlatin an hria a, an buai ta a ni. Ramsa palina aṭanga ram sawm lo chhuak tur tak tak chu ni se ram (nation) entirtu ramsa atang hian ki (horn) ni lovin ramsa vek an rawn chhuak tur a ni. 

Sakawlha Catholic puh tum ngar ngartute chuan Daniala 8-a kelpa ki chu lal (melek) (Alexander Ropuia) entirtu ni ngeiin an ngai a. Mahse bung 7-naa ki sawmte chu lalram malkuwth entirtirtu niin an ngai daih thung. Enga ti nge an duh duh hunah ‘kiin’ a entir chu an tihdanglam. Ki sawmte chu lalram entirtua ngai siin a sawm pakhatna, ki te reuh te chu lalram ni ve miah lo kohhran hotu pope entirtu niin an hrilhfiah leh hmiah bawk. Rome ram keh chhiat lai vel khan pope-in ram bik a nei lo va. Ram bik a neih tak takna leh lalram anga a dinna chu AD 756 a ni daih. Hemi kum hian Franco lal Pepin the Short khan lawmthu sawi nan pope chu Ravenna, Italy-ah ram a pe a. Chu chu pope-in lalram a neih ve ṭanna leh tuna Vatican lo inṭanna chu a ni.  Tin, Thupuan bua ‘beram no ki ang’an tih chu ram emaw lal emaw entirtu ni lovin America political system entir nan an hmang leh daih bawk. Bible-a ki lo awm ṭhin hi an thurin mil turin an duh duh an entir mai em ni? Ki nei dang chu awm se thil dang an entir leh daih lo vang tih pawh a sawi theih loh. 

Thupuan 17:12-ah chuan, “Ki sawm i hmuhte kha lal sawm, la lal ve lote an ni,” tiin vantirhkohin a hrilhfiah a. A chiang tawk viau. Kite hian lalram entir lovin lal (mihring) ngei a entir a ni tih Bible ngeiin a sawi.  

Rom ram kha lalram sawmah a inṭhen darh tih an sawi ruala Catholic hi sakawlh an ni tihovin an sawi ṭhat duh miah loh chu Rom ram kha hmun hnih, khawchhak ram leh khawthlang ramah a inṭhen phawk tih hi a ni. A khawchhak lam chu Byzantine Empire tih niin khawthlang lam a tluk hnu-ah pawh kum sangkhat dawn lai a la ding thei a ni. Hei hian Rom ram kha ram sawmah chauh a inṭhen darh lo tih a tilang chiang viau. Bible hian khawthlang Rome leh khawchhak lam Rome a sawi hrang lo; Rome lamram ve ve an ni. Khawthlang ram kehdarh chauh sawi a, Rome ram ni ve tho ṭhin a chhak lam ram theihnghilh luih char char emaw, sawi bo dan ngaihtuah char char emaw hi a dik chiah em? Rome ram ni ve tho ṭhin Palestina leh a chhehvelte kha eng tin nge an awm ve tak?

Ramsa palina chuan ki sawm a nei a. Daniela 8 an hrilhfiahna-ah chuan ‘ki’ chuan lal a entir niin an sawi a. Inlarnaa kel pa leh beram pa chungchangah kel pa chuan ki ropui tak mai a nei a. Daniala 8:21-ah chuan ‘Kel pa chu Grik lalram entirna a ni. A mit leh mit inkara a ki lian tak chu lal hmasa ber a ni,” (NKJV) tiin a inhrilhfiah sa a. Alexander-a thih hnu khan a ram chu a general paliin an insem a, chung lal palite chu ki palite kha ni ngeiin an ngai bawk. Tichuan Daniala 7-a ki sawmte chu lalram (kingdom) entirtua an sawi laiin Daniala 8-a kite chu lal (king) entirna niin an pawm daih si. Ramsa ṭihbaiawm tak lua ki sawmte kha lûin a entir lalram pâwn lam daiha mite entirna nia an hrilhfiah pawh hi Bible thu nen a inkalh hle a ni. Bible hrilhlawkna-ah chuan ramsaten lalram an entir a, an kite chuan lal an entir zel tih a chiang hle. Daniala inlarnaa ramsa palite pawh khan lalram (nation) an entir vek a. Kite chuan lal (mihring) an entir ziah bawk. Duh duh huna lalram entir a, duh duh huna lal (mihring) entirtu atan heng kite hi hman chi a ni lo.  Ramsa pali, sakeibaknei, savawm, keite leh satihbaiawm takte kha ram (kingdom) entirtu an ni a. Ki (horn) erawh chu lalram chhunga roreltu lal (mihring) entirna an ni zel.

Catholic sawichhetuten Daniala 2-a entirna an sawi ṭhat duh hauh loh chu Nebukadnezzara mi lim ke hmun hniha inṭhen hi a ni. Rome ram kha khawthlang ram leh khawchhakah a inṭhen phawk a. A thlang lam khawpui chu Rome a ni a, a chhak lam khawpui chu tuna Turkey khawpui pakhat Istanbul (kum 1930-a a hming thar) ni ta Constantinople khu a ni. Ram sawmte khan a khawthlang lam chauh an bei a. A khawchhak lam chu khawthlang sawrkar tluk hnu-ah pawh kum sangkhat vel zet a la ding a ni. Hei hian Catholic sawichhetute ngaihruatna milim ke zungṭang sawmin hnam sawmte a entir an tih chu a dik lo tih a tilang. Khawchhak lam Rome sawrkar kha hnam sawmte khan an do ve tlat lo.

Harsatna pakhat dang leh chu Roman Empire darh hnu khan hnam sawm chauh darh lova hnam sawmhnih lai an ni hi a ni. Chuvangin tihian han sawi ta ila:

·         Hei hian Bible-in chu lalram aṭang chuan ram sawm an lo chhuak ang tia zirtirna hi a kalh chiang hle.

·       Bible chuan Catholic sawichhetute zirtirna ang lo takin heng ki sawmte hi hnam emaw, ram emaw, ti lovin ‘lal’ (mihring sawina) an ni a ti.

·         Ki chungchanga kohhran thenkhat zirtirna hi a inkalh hle bawk. Ki chu lal pakhat entirtu (entirnan Alexander-a) nia an sawi laiin a ṭhenah chuan ram entirtirtu angin an sawi a. Khang hun laia ram nei ve miah lo kohhran hotu Pope entirtu atan an hmang bawk a.  A chang leh USA constitution/political system entirna atan an hmang thung. 

·         Kohhran thenkhat sawi angin Khawthlang lam Rome sawrkar kha hnam/ram sawm chauhin do lovin sawmhnih laiin an do zawk a ni.  Chungte chu:

England (i.e. the Saxons.)

Franks

Lombards

Burgundians

Gauls (French Gauls)

Belgi

Helvetii (Swiss)

Italians (i.e. Romans)

Iberians

Visigoths

Basques

Libyans

Mauritanians (North Africa, Vandals-ho awmna bul lawk)

Dacians (Rumania, Roman province)

Slavic-hote

Alemanni

Adventist-hoten tlawm taa an sawi – Ostrogoths, Vandals, and Heruli.

Khawthlang lam Rome a keh darh khan ram sawmah chauh an inṭhen darh lo tih hi chu khawvel history-ah hian a chiang em em a ni. Tunlaia pope sawi sakawlh nasa ber  Adventist-ho pawh hi ram sawm turah hian an buai nasa thin hle. Ram sawm zinga tel turah hian Huns-ho nge Alemani tihah an inhnial nasa hle. Kum 1888 Mineapolis inkhawmpuiah pawh khan he thu-ah hian nasa takin an inhnial a. An inbei nasa khawp mai. Anmahni ngeiin an sawi hi i lo en teh ang.

Inkhawmpui tan tak tak hmain ni riat zet (10-17 Ocotber) Bible Conference an nei hmasa a. He Bible Conference-ah hian America khawthlang lam atangin AT Jones-a chu Uriah Smith-a hnial tum sa ranin a rawn thawk chho va. He mite pahnih hi ki sawm aiawhtu ram sawm zinga tel tur ram chungchangah a hma aṭang tawhin na tak takin an lo inbei tawh ṭhin a ni. AT Jones-a chuan ram sawm zingah khan Alemani-ho kha an tel tur niin a hria a. A lehlamah Uriah Smith-a chuan Huns-ho te kha tel zawk turah a dah nghet bur bawk a. Kum 1885 atang tawh khan an chanchinbu hmangin an  lo inchhang fê tawh awm e. AT Jones-a hi Signs of the Times joint editor a ni a. Uriah Smith-a hi Review and Herald chanchinbu editor a ni thung.  Mahni tawka hria inti ve ve an ni a, an ṭang huai dun khawp mai. 

Bible Conference-a an han sawiho chu an inhnial fê ta reng a. Member-te chuan Uriah Smith-a tanna chu dik deuh zawkin an hria a ni ang; AT Jones-a leh a sangawi zawnpui Waggoner-a te chu kalsualah an puh ti tih ta mai a. Mahse AT Jones-a chu a diau duh bik si lo. Member zingah ngaihdan a phir nasa hle a. An han inkawmte chu ‘Nangni Huns, keini Alemani,’ tiin an inko fiam vel ṭhin ni awm tak a ni. Hetih lai hian Uriah Smith-a hi dik zawkin hre mah se tun hnu hian Adventist-ho chuan AT Jones-a ngaihdan hi an pawm zui ta zawk a ni.

 Pope-in hnam pathum (ki pathum) a titlawm em? Uriah Smith-a chuan Vandals te, Ostrogothd leh Heruli te chu pope-in a hneh niin a sawi a. Hei hi phuahchawp liau liau a ni. Heng ram pathumte hi pope-in a hneh lo. History bu zawng zawngin an sawi dan chuan Heruli chu Lombard-hovin an hneh a, Vandals leh Ostrogoths chu Byzantine (khawchhak lam sawrkar) in a hneh thung. Vandals leh Ostrogoths-ho tlawm ta chu pope chuan engemaw ti tak chuan a lo hlawkpui ve awm e; mahse an tlawmna chungchangah hian kawngro su thamin a inrawlh lo. Heruli chu pope hmelma hlun, Arian zirtirna zuitu Lombards-ho hneh a ni daih bawk si. Heruli an tlawm ta hi pope-in hlawkpuina a nei awm reng reng a lang lo va, pope-in lo inchhuanna tur engmah a nei hek lo. 

Hei bâkah hian heng ram pathum an tluk rual hian Byzantyne chuan ram pahnih dang Huns (AD 455) leh Alemanni (AD 495) a hneh ve tho va. Heng Catholic sakawlha puhtute hian eng vangin nge heng ram pahnihte hi an sawi lan ve loh? Heng ram pahnihte hi an sawi tel chuan an zirtirna a nghing dawn tlat a, an haider lui char char mai a ni. 

Pope-in kum 1260 chhung mi thianghlimte a tiduhdah em? Pope-in a zirtirna pawm duh lotute a tihduhdah thu hi zep rual a ni lo ve. Mahse AD 538-1798 inkar chauha khung hi chu dawt chiang tak a ni. AD 538 hma lam kum za zet aṭang tawhin tihduhdahna chu a inṭan a, kum 1798 hnu kum sawmnga thleng a kal zawk a ni. 

"Persecution of non-Catholics by Catholic authority began in the 4th Century, and culminated in the Codex Theodosianus (438), which punished all who did not embrace “that religion. . . now professed by the Pontiff.” 

A chunga historian thuziak aṭang khian a chiang viau mai. Tihduhdahna chu AD 438 atanga intan daih tawh a ni. A lehlamah kum 1798 khan a tawp hauh lo bawk. Portuguese Inquisition chu kum 1821-ah a tawp a; Spanish Inquisition chu 1834-ah a tawp chauh a; Pope awmna rama  Roman Inquisition pawh kum zabi 19-na laihawl thleng khan a la awm reng a ni. Chuvangin kum 1260 chhunga pope tihduhdahna thleng ang sawi chu a dik thei lo. 

Pope-in Sabbath a thlâk em? Catholic-ho chuan Petera kha an pope hmasa berah an puang a. Chu chu Adventist-te chuan an pawm lo. Mahse Catholic-in an thuneihna hmanga Sabbath an thlak thu an sawi erawh chu an awih hle a, sawi nuam pawh an ti; an vawrh darh nasa khawp mai. A diktak chuan Sabbath atanga Sunday serhna a lo inṭan laia kohhrante kha tunlai kohhran anga thuneitu bik neia inzawm khawm an ni lo va. A awmzia chu Catholic kohhran hming an put hma daih aṭanga lo awm tawh; Catholic kohhranin an intih hmahruai duh vanga an sawi ve mai mai a ni. Hei hi chu sawi thui hrih lo ila.

Pope-in kum 1260 chhung ro a rêl em? Pope sawichhetute chuan, “Kum 1260 chhung pope rorelna chu kum 538-ah inṭanin kum 1798-ah a tâwp,” tiin a sawi a. 

Kum 538 hi Rome khawpui atanga Ostrogoths-ho an umchhuah kum kha a ni a. Mahse hemi kum hian pope tân thil ropui engmah a thleng lo. Ostrogoths-ho chu an rawn kir leh a, kum 541 atanga 548 thleng an rawn awp nawn leh a. An tlawm chian tak tak phei chu kum 561 daih a ni. Heng thute hi heng kohhran, Catholic saklawlha puhtute chuan an sawi mang mang lo vang. Miin an sawi chhuaha inhnial a ṭul châng chauhin an sawi chhuak ang. Pope-in thuneihna tak tak a chan kum chu Italy ram lailia ram hran (Vatican leh territory ṭhenkhat) a neih kum 756 daih kha a ni. Heng ram bung ṭhenkhatte hi Sardinia lalin kum 1870-a a chhuhsak thleng khan a awp a. Chuvangin kum 538 hian pawimawhna eng nge a neih? A pawimawhna ber chu pope tlawm kum nia sawi kum 1798 atanga chhiar lêta a kum 1260-na a nih vang chauh a ni. 

A nih leh kum 1798-ah hian pope rorelna chu a tawp em? Kum 1798 hi pope tan chuan kum pawimawh tak zawng a ni phawt mai. Mahse pope tlawm kum emaw, a nihna nuai bo kum emaw anga sawi chi chu a ni lo. Hemi kuma Napolean-a general pakhatin pope a man (Pope Pius VI) hi pope tan chuan a zahthlak hle ang. Mahse uar taka a tlawm kum emaw, a rorel tawp kum anga sawi tur chu a ni lo. 

France sawrkarin pope a man ringawt mai chu Russia leh Austria sawrkar chuan an duh lo hle mai a. Inthuruala France sawrkar chu do mai duh dawnin an lang a. Chu bâkah pope an man avang chuan hmun ṭhenkhatah buaina a chhuak bawk a. Chuvangin Napolean-a chuan France khawpui pakhat Valence-ah pope chu a dah a. A hnu ni sawmli, August 29, 1799-ah a thi ta a ni. 

Hetia lung ina pope thi hi pope sawrkarna leh thuneihna tawpna leh tlawmna ang hiala sawi tur chu a ni lo. A hma pawhin pope an lo thi teuh tawh. A thih hma lawk khan Pius VI chuan a aiawh thlang turin a lo tidiam tawh a. Tichuan a thih hnu lawk December 8 -ah Barnaba Chiaramonti chu pope thar atan an thlang a, a hmingah Pious VII a invuah. 

Pope thar chuan Napolean-a chu kum 1801 khan Concordat chungchang sawipuiin kum 1802 khan Organic Articles a sawipui leh a. Chuta an inremna ang chuan kohhran ramte chu an pekir leh a. France rama pope thuneihna an pe (dan hnuaiah) ta bawk. Hemi hnua thil kal zel hian pope tlukchiat lam kawh ahnekin a ropui deuh deuh zawk a ni. A bikin Pius IX (1846-1878) hun laiin a ni zual. Kum 1869 khan Pius IX hi pope ni tura nemngheh a ni a. First Vatican Council koh nghal a ni bawk a. Khawvel hmun hrang hrang aṭangin palai an kal ṭha hle. Kum 1870 July 30-ah chu council chuan Pope chu dik lo thei lovah a puang a. He thupuan hian kum 538-1798 chhunga pope thuneihna nia sawi chu a dik lohzia a tarlang bawk. 

NOTE: Hengte hi Roman Catholic mi ṭhenkhatin sakawlha puhtute an hnialna chu a ni a. A ngaihnawm ve viau a ni. Kristian kohhrante hian theihtawp chhuahin kan kohhran thurin chu kan vawrh darh theuh a. Chung kan thu vawrh darhte chu mi zawng zawngin chhiar se kan ti theuh bawk a. Mahse mi kohhran lehkhabu erawhchu kan chhiar taima lutuk lo deuh fo bawk; a awm ve tho ve. A chang phei chuan mi kohhran thu leh hla chhiar chu kan inkhap deuh roh hial nite pawhin a lang. Kan inkhap ngam chiah lo a nih pawhin chutianga mi kohhran thu leh hla chhiar nasa lutuk chu kan ngaithei lo lek lek awm e. Hei hi kohhran tin awm dan ve reng a nih a rinawm. Chutiang karah chuan heng thute hi tihbengvar nan ka han ziak mai mai a ni.

Thu ropui tak leh changkang tak ziah tum ka ni lo bawka an lehkhabu rawn leh an tanchhan zawng zawng chu ka ziak vek duh ta bik lo a nih hi. LCM.

A hnuaia thupui dang VATICAN LUNG IN TANG  tih thu hi chhiar zawm ila a ngaihnawm lehzual ang. 

VATICAN LUNG IN TANG LEH ROMAN QUESTION

He tawngkam, ‘Vatican lung in tang,’ tih hi Pope Pius IX chungchang sawina a nih rualin a hnua a ngaihdan zawmtu pope dangte sawina pawh a ni thei tho bawk.

Kum zabi 19-na tir lam deuh atangin Italian mipuite chuan insuihkhawm a, ram thar din duhin buaina an lo siam zauh zauh tawh a. Kum 1848-ah buaina nasa tak a chhuak a. Hetih laia pope chu Mastai-Ferretti, Pope Pius IX a ni. A hma chiaha Gregory Pope Gregory XVI (1831-1846) kha chuan Italy ram insuihkhawm chu a dinhmun tiderthawng thei a ni tih a hriat avangin a duh lo hle a. Tin, khawvel hmasawnna hi a duh vak lo bawk. Rel kawng neih pawh a sawisel nasa hle. Pope thar Pius IX erawh chu mi danglam tak ni dawnin a lang a. America sawrkar phei chuan a fak hman hle. Mipui pawhin “Viva Italia! Viva Pio Nono!” tiin an chawimawi hial a. A hun laia Italy ramah chuan a lar vet vet khawp mai.

            Mahse kum 1848-ah ram pum huap buaina a lo chhuak a. Pius IX hian Italy ram insuihkhawm chu a lo duh hauh lo mai a. Chu chuan mipui a tithinur em em mai a. Mipui thinurin Rome khawpuiah buaina an siam a. Pope chuan Rome khaw mipui chu a thunun zo dawn lo tih hriain a tlanchhiatsan ta a. Kum 1850 khan French sipai venna hnuaiah a rawn lut leh ngam chauh a ni. 

            Ni 9 February, 1849-ah Roman Republic chuan Papal States sawrkar, civil leh sakhuana lama pope thuneihna chu a paihthla a. Hemi kum vek July thla hian French sipaiho chuan Pope Pius IX chu a dinhmun ngaiah an dah leh a. Roman Question (Roman Buaina) chuan France ram thlengin inhnialna a chawk chhuak nasa ta hle mai a ni. Kum 1859 July thla-ah France leh Austria chuan Second Italian War of Independence chu titawp turin remna an ziak a. Pope dinhmun tur chuan hruaitute lu a tihai hle mai. Pope lalram, Papal States chu tihzim a, Rome khawpui leh a chhehvel chauh huamtir tura rawtna pawh a awm a. Hei hi a kum lehah tihpuitlin a ni ta nghe nghe. 

            February 18, 1861-ah Italy sawrkar thar Parliament hmasa ber chu Turin khawpuiah an thukhawm a. March 17, 1861-ah Victor Emmanuel II chu Italy lal atan an puang a. Hemi thla vek ni 27-ah Rome chu Italy sawrkar khawpui ni turin an puang leh a. Amaherawhchu, France Emperor  Napoleon III chuan pope veng turin a general Christophe Léon Louis Juchault de Lamoricière-a chu Rome-ah chuan sipai tam tawk tak nen a dah tlat avangin Italy sawrkar thar sipaite chu Rome khawpuiah chuan an lut mai ngam lo. Hei vang hian kum 1865 khan sawrkar thar chu Turin atangin Florence lamah an insawn leh ta rih a ni.

            Pope chuan Italy ram inzawm khawm tur chu a la do nasa hle. Kum 1869 December-ah First Vatican Council a ko va. He council hian a kum leh July 1870-ah pope chu dik lo thei lo tiin a puang nawn leh a. Hei hian Pathian thu-ah leh politic lamah awmze thuk neiin an hre nghe nghe a ni. 

            Kum 1870 July thla hian France leh Prussia an indo a. August thla-ah Napolean III chuan Italy rama Papal States vengtu a sipaite chu a ko kir a. Sedan indona-ah a tlawm zui ta bawk a. Hetihlai hian Italian mipui zingah Rome chu laklet ngei duhna a lianin an sawrkar chu an nawr nasa hle mai a. Tichuan lalber Victor Emmanuel II chuan pope hnenah chuan palai  Count Gustavo Ponza di San Martino a tir a. Pope Pius IX chu lehkha thawnin buaina awm lova Rome khawpui an lak dan tur leh amah pope ngei pawh venhim an tum thu a thawn a ni. Mahse Pope Pius IX chuan lalber palai chu a lo vin hrep mai a. Lalber lehkhathawn chu dawhkanah paih pahin tawngkam mawi lo tak takin a lo hau a ni. 

            Thu leh hlaa indawr theih a nih tak loh avangin Lalber chuan a sipaite chu Rome khawpui la tur chuan a tir ta a. September 11-ah  General Raffaele Cadorna leh a pawlte chuan zawi muangin Rome khawpui lam chu an pan a. Indo kher lova inbiak rem theih ringin a muang lui a nih hmel hle. September 19-ah Rome khaw dai, Aurelian Walls an tih chu an lo thleng a, khawpui chu an hual ta mup mai a ni. Pius IX chuan lo inpek ngawt chu a duh hauh lo. Italy sawrkar thar a pawm lohzia entir nan a sipaite chu lo beilet turin thu a pe a. September 20-ah chuan darkar thum zet laipuia an insai hnu-ah Rome khawpui chu a tlu ta a. He indona-ah hian Italian sipai 49 leh pope sipai Papal Zouaves 19 an thi nghe nghe a. Tichuan Rome khawpui leh Lazio ram bial chu pope kut atangin an chhuhsak a, Italy ramah an rin lut ta a ni. 

            Rome khawpui tlu ta chu France Emperor Napolean III chuan a tuar na kher awm e. Mahse chu lam chu kan sawi thui lo mai ang. Pius IX-a hnu lama pope lo awm thar zelte pawhin Italy sawrkar chu an pawm thei hlawl lo a ni ber mai.

            Italy sawrkar pawh chuan pope enkawl dan tur chu an hre thiam lo ang reng khawp mai a. Tichuan kum 1871 May 13 chuan Italian parliament-ah dan thar an pass ta a. Chu chu Law of Guarantees an ti a. Chu dan ang chuan pope chuan lalber Emmanuel II ang bawkin ambassador a tir chhuak thei ang a, ram dang ambassador pawh a la lut thei ang. Tin, Italy ram chhungah chauh pawh ni lo, ram dangah pawh a duh duhin pope chu a zin chhuah an phalsak bawk. 

            Pope Pius IX leh a hnua pope dang lo awmte chuan Italy lalberin pope leh a lalram Papal States chunga ro a rel tur chu an pawm thei lo va. An chunga dan an siam tur chu an ngaingam lo a ni ber. Pope chu Italy lalber tana chaplain ang lek a han ni tur chu an duh lo va. Pope Pius IX chuan Law of Guarantees leh Italy sawrkarin kum tina pawisa an pek tur pawh chu a hnawl nghe nghe a ni. 

            Kum 1870 September 20 khan Italy lalram thar din a, Italy ram suihkhawm tumtute chuan Rome khawpui chu an hneh ta a. Tichuan kum sang chuang zet pope thuhnuaia awm tawh, Italian peninsula-a Papal States chu a lo tawp ta a. Italy sawrkar chuan pope chu a duh duha zin chhuah phalsak mah se sawi tawh ang khan chutih laia pope chuan Vatican chhuahsana Italy ram dan va zawm kha tlawm pa-ekah a neih a. Hetia khawvel sipai rualin sakhua leh civil chunga kum sang chuang zet pope thuneihna an rawn paihthla ta mai hi chutih laia pope tanglai Pius IX chuan a duh lo hle mai a. Tichuan kum 59 chhung zet chu pope reng rengte chuan Vatican chu an chhuahsan duh ta miah lo va. Chhuahsan loh chu sawi loh, chutihlaia Italian sipaiho inkulhna hmun Vatican Basilica hmuh theihna hmun Saint Peter's Square-ah pawh a inlan duh ta miah lo va. Hemi kum 59 chhung hian pope reng reng chuan malsawmna pawh Basilica chhung atangin an ti ta deuh ber a. Pope thar an awm a, lukhum an inkhumtir pawhin Sistine Chapel-ah hlir an nei ta a ni. 

Hetia kum 59 zet pope-ten Italy sawrkarin Papal States a chhuhsak leh Rome khawpui a neihsak duh loh entir nana Vatican an chhuahsan duh lo hi ‘Vatican Lung In Tang’ tih tawngkam loh chhuahna chhan chu a ni. Kum 1929-ah Lateran Treaty hmangin Italy sawrkar chuan pope chu Vatican chungah thuneihna pumhlum a pe leh ta a. Roman Question (Rome buaina) pawh chu a lo tawp ta a ni.