KA BUAINA




Hman deuh lawk khan kartin chhuak chanchinbu pakhata mi tu emawin hriselna atana min thlahtute natna leh thihchhan chhui chian a that thu leh nupui/pasal inzawn nana DNA test a thatzia, ram changkang zawkah chuan an ching hle tawh niawma a ziak hi ka chhiar fu hlauh mai a. Eng chanchinbu nge? Engtikah mi nge chu ka hre tawh lo. Ka rilru a khawih avang leh tha ka tih em avangin zawm ngei ka han tum chhin a, mahse harsatna lian pui ka tawk ta tlat mai. Min lo ngaidam teh se.
"Duhlai, hmangaih teh che mah ila kan DNA a inmil tlat si lo ."
          A hmasa berin mahni intihrisel nan leh inenkawl nana min thlahtu chhuan thum chhuan li thlenga an thih dan tlangpui leh an natnate chhui tura a thurawn kha ka han ngaihtuah vang vang a. Keini chhungkua hi eng kan ti bik nge ni, ka pu chu ka hria a, ka pu pa erawh ka hre ta mang hauh lo mai. Thil chhinchhiah hi Mizo themtlawna lam a ni a, kan inchhui thui lo kher mai. An natna leh thihchhan awmte pawh ka hre mang lo. Ka hriat ve chhun lah chu mahni tana han lâkluh ngaihna awm lo deuh hlir an ni. Min thlahtute thih dan thenkhat chu lo halnaa kanghlum te, pumpui na te, indonaa thi te, lungphuchawl te, sakei seh te, tuitla te leh vanduaina engemaw avanga boral te an ni a. Tha tiin pawm viau mah ila hetiang thurawn anga chiang fek fawka min thlahtute lam thih dan chhui chu keini thingtlang khaw pa berh ve tak tân chuan tihngaihna a awm lo deuhthaw a ni; kan chhungkaw record a mumal lo em mai. Mahni pianchamphaphak pawh kohhran record atanga rin hriat ve tawk tawk; a baptisma chan kumin kum hnih a la tling lo deuh tih te, kawmchhakte nen kan inri kuma piang a ni, tih leh Chhunga pu chetsual kuma boral a ni tih vel kha kan rikawt neih that deuhte a la ni mai a. Kan la tlin lo deuh a ni.
          Tin, nupui pasal inneih dawna DNA test a tih pawh kha tha awm hlein ka hria; zawm ve ngei pawh ka tum. Mahse sawi leh sawi hnu, keini ang thingtlangpa mawl satliah tan zawng vana arsi lâk tum ang deuh a la ni awm e. Kan venga health worker hian a test thei a nih ngawt loh chuan kawng a la bo hle mai. Aizawl kal kan harsatzia te, kan kalve tum pawha pawisa kan ken tlem theihzia te, nachhawkna man takngial pawh kan harsat thin dan te nena ngaihtuah chuan DNA test chu tha viau mah se tih ngaihna a la awm lo a ni ber mai.
          Tin, nupui pasal zawn nana DNA test neih phawt hi tha ka ti a, mahse hlauhthawn rilruk deuh mai ka nei. Aizawlah test-na a awm em? Aizawlah awm lovin Culcutta pan ngai se ka nupui hual nen chuan zuk kal ila. Chutah pawisa tam tak kan sen hnu-ah min duhtu ka hmuh ve chhun nen hian kan DNA hi a lo inmil lo palh ang a, neih- thinglung-khawnga DNA kan test hnu-ah inthen lo tul leh siin ‘Lungduh inthenna ram khawvel hmun zauah hian’ tih hlate sak a tul ang a, DNA test hma kha kan ngai ngawih ngawih mai ang tih ka hlau ang reng hle a ni. Kan DNA milpui min duhtu midang kan hmuh mai loh phei chuan ‘Leng tar law law ang’ tih hla kha kan sa nawn tlut tlut mai dawn tihna a ni a, huphurhawm tak a ni. Chutiang a lo nih vaih chuan DNA test chu malsawmna ni lovin anchhia a lo ni ang a, ‘DNA test chu vanduaina a lo ni dawn  tihna a nih chu. Tin, chumi a thleng em lo a niha ka DNA milpui hrim hrim neih kan duh a nih pawhin hmela ka lo iai rilruk em em, nula siniar mit kalh, awr puar deuh roh lehnghal, duh duh huna zing tho ngam, torch-light nei eng fahran mai kha neih a  tul ang a, thinlung lam inmil si lo hian kan DNA chauh hi a inmil palh ang tih a hlauhawm hle mai. Ka nei laklawh tawh si ang a, kohhran leh khawtlang, chhungte leh khaw-eng zah bakah karah fate an lo awm tawh phei chuan then ngam tak tak si lovin khum laizawlah patling kan hui pup pup fo mai ang tihte pawh ka hlau tel bawk. Chutih hunah ngat chuan DNA test-na an lo hmu chhuak kher kher hi kan haw hluah hluah ang a, a hmu chhuaktupa hlamzuiha a lo thi lo kha pawi ka ti rilru hial zawk ang tih hlauhawm tak a ni.
          Hetiang thil awm theite ngun taka ka ngaihtuah hian he a thuziakte hi tha em em mah se kan chhungkaw dinhmun hian a la pha lo deuh a ni ber mai a, a pawi hle a ni. Pu Liankunga hnenah pawh hian a thuziakte tha ka tih ang leh zawm ka duh ang hua ka zawm thei lo hi thupha chawi hial tur em maw ni chu aw ka ti hial mai.






Comments

Post a Comment

Popular posts from this blog

KA LO TAWN VE - REMRUATI

Image
Kum 1997 November thla chawhma lam a ni a. Chutih laia ka awmna khua chu   kan   khua Thingsulthliah aṭanga kilometer za chuang zeta hla, khaw te reuh te, in za leh sawmriat vel khua a ni. BA pass hlim, tlangval zuan zang tak leh harh vang tak ka ni a, ka awmna khaw tharah chuan Upa Pawl in luahin ka khawsa ve nawk nawk a. Ka kal ngai lohna khua a nih bâkah chhungte han sawi tur pakhatmah kan neih lohna khua a ni a, chuvangin ka awm tirh phei chuan tualchhung mite zingah hriat ka nei lo. Khaw te reuh te a nih avangin a khuaa mite chuan min hre kim thuaiin ka ring a. Middle School awm chhuna thawk thar ka nih avangin mi hriat ka hlawh ve turah pawh ka inngai a ni.   Chu  chu keima fel vang leh vengvat vang ni lovin sikul naupangten an nu leh pate hnena zirtirtu thar an neih thu an sawi ngei dawna ka rin vang a ni zawk mah. Sawrkar hna thawk hlim ka ni a, hlawh pawh ka la nei ve lo. Ka nu leh pate pawisa min paitir hmangin ka khawsa ve mai mai a ni. Tin,...
Read more

NUTHLAWI THIANGHLIM

Image
A Bul Tanna Thalaiho khawhar hla sa rual ṭham ṭham kâra min rawn melh zeuh zeuhtu nuthlawi chu tunhma pawha ka hmelhriat tawh sa ni mah se chumi zan chu a danglam tlat. Lût chhuak an awm reng avangin a tira inṭhut hnaih vak lo kha zan rei lamah chuan   kan  inhnaih sâwt hle a. Zanlai ârkhuan a hun meuh chuan   kan  inkhawih pha der tawh a ni. A hmâ chawlhkar hnih vel kal tawh aṭang khan engemaw titaka khawhar rûkna riau hi ka nei thin; a chhan ka hre lo. Tlangval ngawichawi, rual pawl tam lo tak ka nih vang a ni maithei. College final year ka zir kumah pawh exam mai tur ka ni a. Thil danga inham buai hun loh lai tak a ni nghe nghe. Aizawla kal leh thuai tur ka ni lehnghal. Chutia ka naupan lai atanga ka hmêlhriat tawh nuthlawi, kei aia kum hnih vela upa, fa pahnih nei tawh lehnghal bula ka ṭhu thei ka lawm thar viau mai chu mak intih nachang ka hre lo va. “I tlaivar dawn em? Kei chu haw mai ka duh,” tia min rawn bia ka lo lawm viau mai te chu mak intih ...
Read more

Ka Tlin Ta Ngang Lo Ve

Image
Fate fahrah tur pawh ka dâwn thei ta lo ve. Tunah zawng a vawrtawp a thleng ta; ka dawh peih ta ngang lo a ni. Kan intawn tirh chuan khawvelah nula dang awm thei hian ka hre lo va. An awm a nih pawhin ani tluk tur awmin ka ring lo. Ka chhungten min duhpui lo te chu an hriat chian tâwk loh vangah puhin ka hre thiam lo va, ka hmangaihna tizualtu mai an ni. |hian ṭ haten nei lo tura min tite chu min thik vang leh an bialnute aia a hmel ṭ hat zâwk vangah dahin ka duhna an tizual ting bawk. Hlim taka inneiin a zarah fanaute kan la nei ve ang a, chhungkaw duhawm tak kan la din ang chu tiin duhthu ka sam ṭ hin. Mahse mihring hi duhthusam ang diak diaka awm a lo harsa khawp mai. Khawvel nula dang zawng zawng aia ka thlan, ka rose pâr, chhungte leh ṭ hiante min duh pui vak loh chunga ka neih tâk chuan ka tum ram – vanram tlafual lei Eden , chhawrpial rûn nuam chu min thlen zo lo chiang ngei mai. A mo thar tûka a tho tlai chu a hmâ nia a hah em vang leh zan lama kan khawsak...
Read more