INDIA THIRHLUM RALTU THEI




                “Diabola ngamthlemnate chu in do zawh nan Pathian ralthuam famkimin inthuam rawh u.”    Ephesi 6:11
Main Battle Tank: Arjun
            Hman deuha India-in atom bomb a tipuak thut mai khan mi a barakhaih hle a nih kha. Chutah engtin paw’n awm ila mi relna tur zawng hrim hrim Pakistan chuan India er nan ringawt thei leh thei lovin a han tipuak ve karh karh  a. Asia chhim chhak lam ramte chuan muanna lam aiin indona dar ri an ngaichang thup zawk a ni.
            Pakistan leh China te khi India ep tur chuan an inthurual thei khawp thin mai. Hei hi India pawhin a hai lo va, chuvangin rikrum thila duai lutuk bik lo turin ralthuam tha hi a tuak ve ngar ngar thin a. Chumi rah chu kum 20 dawn lai defence scientist- thiam rual ten hah taka an beih hnu-ah kum 1996 January thla khan sipai-ho hman theih turin an pho chhuak thei ta a. Chu an thawhrim rah chu eng dang ni lovin khawvel tank tha pathum zinga tel pha ngei tur ARJUN an tih chu a ni.
            He tank tha chungchuang, ‘Arjun’ hi Combat Vehicle Research and Development Establishment(CVRDE), Madras-a siam a ni a. A tira bul tantu tak chu an director hmasa ber D.P.Mukherji a ni.
Ralthuam siam lamah khawthlang sawrkar chakho khuan India hi an pui tha duh vak lo va. Chuvangin he tank tikaltu khawl chak tak, sakawr 1400(bhp) teh meuh mai hentu Motor and Turbine Union(Germany) siam chauh hi ramdang kut chhuak a ni. Ralthuam famkim nena a rih lam ton 58 hi a khawl chak dan phu tawka tehin a rit lutuk lo maw an ti thin a. Mahse ramdanga a sual tawk tur tank German Leopard II, ton 60 leh US Abrams ton 60 te ngaihtuah chuan rit bik lo tak a ni. Tin, a ruangam innghahna (chassis) hi motor chi hrang hranga siam danglam theih tur chia duan a ni bawk.
            Arjun hi kawng pangngaiah darkar khata km 72 tlan thei, kawng mumal lo, ram palailengah km 40 tlan thei a ni a. Lui khawkrawk leh tlangpang awih tlan naranah hi chuan awlsam takin pachak pangngai rit phur kal hian a tlan zung zung thei a ni. Tin, hetia chak taka tlan chung hian mel 10 vela hla a mi a tum tak chu laser kaihruaina hmangin a kap fuh siah siah thei a. Tin, zan khaw thim chhah, ai-mit-thlawn kan tih angah pawh hian a chheh vel kilometer thum bial vel chu tuma hmuh ve si loh hian a lo hmu ru kiau thei bawk.
            A ralthuam ken zinga lian ber, a hma lama laipui ngul tlawn ruah mai hi 120mm a lian, minute khata bomb paruk atanga pariat vel kap chhuak thei a ni. Tin, a bul hnaia hmelma sipai lo hawl thluk zung zungna tur silai puak rang 7.62mm a lian leh a chung lama amah rawn beitu thlawhna lo hawl thlak zung zungna tur laipui 12.1mm a la pai ruang bawk.
            A chhung boruak hi duh duha tihvawh a, tihlum theih a nih avangin Rajasthan thlaler  vaivut khu rum rum leh ni sa rum rut mai hnuaiahte pawh khuan thlan dai hiai-in a thut theih a ni. Tin, hydro-gas suspension hmang a nih avangin Roll Royce car ang maia chuan nuam a ni an ti bawk. A pawn lam hi tank kahna laipui naran lo dang thei tura ngaih thil pakhat kanchan an tih chuan an tuam chhuak vek a. Chuvangin tank dang ai chuan him zawk hle tura ngaih a ni a. Chu bakah hmelma lamin boruak rimchhia rawn hmang pawh nise a chhunga chuangte chu him tawk hle tura ngaih an ni bawk.
            Arjun hian ram danga a tiapui battle tank ho aiin diesel pawh a heh lo va. Ral run turin a kal hla thei zawk tihna a nih chu. Tin, hmun pilril leh bo mai theihna hmunah pawh awm se sattelite-in a awmna hrilh zel thei tur global positioning system hmangin a awmna chu a hre zung zung thei dawn a ni.
            He tank hi khawvel pum huap pawha duai bik miah lo tur leh hlauh nei bik miah lo tura ngaih a ni. A chanchin hi kan sawi mai seng rih lo ve. A nih leh chuti taka ralthuam tha chu kan thlamuanpui em? Teuh lo mai. Ralthuam kan neih that poh leh min dotute talhtum suih a lian ve zel a, thlamuanna tak tak a awm thei lo. Indopui Pahnihna zawh khan indo rapthlakzia hmutute chuan indona hi awm leh thei pawhin an ring lo hial a. Mahse a zualzawpui vaihlenhlo tih ang chauh a ni. Khawvelah hian muanna famkim reng reng a awm thei lo.
            Ringtute erawh chuan khawvel ralthuam tha ber pawhin a khawih phak loh Thlarau Thianghlim ngunhnam Bible kan nei a. Chu ralthuam chakna hmang chuan khawvel neitua inchhal sual bul Setana chu kan hneh ang a, hnehna nun neiin vanram kan la lut dawn a ni. 
            “Chuvangin ni tha lovah chuan in do zawhna tur leh,in tih zawh vek hnu pawha in din theihna turin, Pathian ralthuam famkim chu la rawh u.” Ephesi 6:13

                                                                                                                                                                                                                                                                                                                                                                                                                                                                                                                                                                                                                   

Comments

Post a Comment

Popular posts from this blog

KA LO TAWN VE - REMRUATI

Image
Kum 1997 November thla chawhma lam a ni a. Chutih laia ka awmna khua chu   kan   khua Thingsulthliah aṭanga kilometer za chuang zeta hla, khaw te reuh te, in za leh sawmriat vel khua a ni. BA pass hlim, tlangval zuan zang tak leh harh vang tak ka ni a, ka awmna khaw tharah chuan Upa Pawl in luahin ka khawsa ve nawk nawk a. Ka kal ngai lohna khua a nih bâkah chhungte han sawi tur pakhatmah kan neih lohna khua a ni a, chuvangin ka awm tirh phei chuan tualchhung mite zingah hriat ka nei lo. Khaw te reuh te a nih avangin a khuaa mite chuan min hre kim thuaiin ka ring a. Middle School awm chhuna thawk thar ka nih avangin mi hriat ka hlawh ve turah pawh ka inngai a ni.   Chu  chu keima fel vang leh vengvat vang ni lovin sikul naupangten an nu leh pate hnena zirtirtu thar an neih thu an sawi ngei dawna ka rin vang a ni zawk mah. Sawrkar hna thawk hlim ka ni a, hlawh pawh ka la nei ve lo. Ka nu leh pate pawisa min paitir hmangin ka khawsa ve mai mai a ni. Tin,...
Read more

NUTHLAWI THIANGHLIM

Image
A Bul Tanna Thalaiho khawhar hla sa rual ṭham ṭham kâra min rawn melh zeuh zeuhtu nuthlawi chu tunhma pawha ka hmelhriat tawh sa ni mah se chumi zan chu a danglam tlat. Lût chhuak an awm reng avangin a tira inṭhut hnaih vak lo kha zan rei lamah chuan   kan  inhnaih sâwt hle a. Zanlai ârkhuan a hun meuh chuan   kan  inkhawih pha der tawh a ni. A hmâ chawlhkar hnih vel kal tawh aṭang khan engemaw titaka khawhar rûkna riau hi ka nei thin; a chhan ka hre lo. Tlangval ngawichawi, rual pawl tam lo tak ka nih vang a ni maithei. College final year ka zir kumah pawh exam mai tur ka ni a. Thil danga inham buai hun loh lai tak a ni nghe nghe. Aizawla kal leh thuai tur ka ni lehnghal. Chutia ka naupan lai atanga ka hmêlhriat tawh nuthlawi, kei aia kum hnih vela upa, fa pahnih nei tawh lehnghal bula ka ṭhu thei ka lawm thar viau mai chu mak intih nachang ka hre lo va. “I tlaivar dawn em? Kei chu haw mai ka duh,” tia min rawn bia ka lo lawm viau mai te chu mak intih ...
Read more

Ka Tlin Ta Ngang Lo Ve

Image
Fate fahrah tur pawh ka dâwn thei ta lo ve. Tunah zawng a vawrtawp a thleng ta; ka dawh peih ta ngang lo a ni. Kan intawn tirh chuan khawvelah nula dang awm thei hian ka hre lo va. An awm a nih pawhin ani tluk tur awmin ka ring lo. Ka chhungten min duhpui lo te chu an hriat chian tâwk loh vangah puhin ka hre thiam lo va, ka hmangaihna tizualtu mai an ni. |hian ṭ haten nei lo tura min tite chu min thik vang leh an bialnute aia a hmel ṭ hat zâwk vangah dahin ka duhna an tizual ting bawk. Hlim taka inneiin a zarah fanaute kan la nei ve ang a, chhungkaw duhawm tak kan la din ang chu tiin duhthu ka sam ṭ hin. Mahse mihring hi duhthusam ang diak diaka awm a lo harsa khawp mai. Khawvel nula dang zawng zawng aia ka thlan, ka rose pâr, chhungte leh ṭ hiante min duh pui vak loh chunga ka neih tâk chuan ka tum ram – vanram tlafual lei Eden , chhawrpial rûn nuam chu min thlen zo lo chiang ngei mai. A mo thar tûka a tho tlai chu a hmâ nia a hah em vang leh zan lama kan khawsak...
Read more